aza 1
ṯagna
1 nyiŋa leni buuluz na timuṯaawuz, lir yaḏaam yeḏi Kwruztu kweni Yecu, lagnaŋazi leni ŋaŋa tatap lirlinelu ter eḏi Kwruztu-na kweni Yecu, kla linani fiilibbi, lijowiṯ li, na lizamaamaz tɔk. 2 eḏi ṯimeca ṯeḏi ŋimɽi nani daŋgal-na ŋiɽena ŋi ŋinḏi nani gwu Allah wir Papa kweri, na Kweleny kweni Yecu Kwruztu.
buuluz muŋw eca Allah zukran ṯinyiŋla ṯi-na
3 nyi kweṯeca Allah winyi zukran nyamin dɔk ma ŋazi kikiḏayini. 4 na ma ŋazi erici ki yiriny tatap, eṯi nyi ari ki yiriny ṯinyiŋla ṯi-na, 5 ŋiɽaŋal ŋi ŋeḏi ŋumaṯ ŋalu ki ŋɔḏɽor-na ŋeḏi injiil, ki lamin liŋna mindaŋ ma kirem kwumorɔ. 6 nyi kwilŋiica rac eḏaruŋw, ŋgwa kwumɔ ŋazi enjici ŋɔḏɽor ŋizaw ki rugwor-na ralu, kwɔŋazi ṯimaci kworɔ dap ki lamin linḏi li Yecu Kwruztu eḏaɽa. 7 ŋeni ŋofḏana nani nyi gwu eḏi ŋi ta kitaḏa ŋeni ŋalu tatap, kaka eṯir nyi gwu kete ki rugwor-na ralu ṯamɽa ṯi, ŋaŋa leni kla loɽmaṯi nyi li ki ṯimeca-na ṯeḏi ŋimɽi, nani nyi gwu ki zijin-na, ya menyji unḏici ki ŋiɽaŋal ŋi ŋizaw ŋir injiil mindaŋ eḏi ŋi aruŋw, ŋiri rerem. 8 Allah wiri wilŋiidi ṯugwori tinyi, eṯinyi gwu orɔ zurum eḏi nani ŋaŋa li, amɽa ŋazi gwu ṯamɽa ṯi ṯir-na dip kaka ṯeḏi Kwruztu kweni Yecu ŋundu.
ṯara ki yiriny eḏi zi ṯi firlazi lu kla linḏi eḏorti juwaba ŋgu
9 nyi kweṯari ki yiriny eḏi ṯamɽa ṯalu kikindeḏi mindaŋ ŋwupeŋe beṯen, ki ṯilŋiiḏa-na, na ki ṯeḏinayeyna tɔk ṯir-na ter ter, 10 mindaŋ ma eḏi ŋuma eḏi zi ṯecici ŋeni ŋofḏana ŋiṯemḏizi. na eṯinyari ki yiriny tɔk mindaŋ ma zuɽi rugwor-na cucuɽic, liira loma-na lere mindaŋ ma lomur ila linḏi li Kwruztu eḏaṯa. 11 mindaŋ ma ami uni ŋwola ŋwu ŋweḏi ṯofḏana ṯinḏi Yecu ŋgi kweni Kwruztu, eḏi nii Allah-na, na eḏi ŋi ortaḏa tɔk.
ṯəgina ṯeḏi injiil nani gwu buuluz ki zijin-na
12 nyi kwunaŋna ŋazi eḏizelŋece ŋimerrini ŋeni nyi, ŋimɔ meci ŋiɽaŋali ŋizaw ŋeḏi Kwruztu beṯen eḏi zi feḏelu. 13 yezgar tatap kya yeṯinyi karni, na lizi liḏaḏu tatap erelŋe rac eḏaruŋw, kwunani ki zijin-na kaka enuŋw gwu kweḏi Kwruztu. 14 kaka nani nyi gwu ki zijin-na na lieŋgeri luru lir likwruztyan ferle ṯəmna teter eḏi Kweleny-na. ner eḏi ŋugul-na ŋuru, ner andazi ŋiɽaŋali ŋeḏi Allah liti leḏi tiḏeny-na tɔkwɔ kamin-gi mac.
15 ŋeni rerem eḏaruŋw, lɔkwɔ leṯandazi Kwruztuŋw ki lizi-na ŋidiny, rugwor ri rikii ŋiɽany, lakin na liḏaḏu rugwor ri rizaw. 16 linderṯa leṯizandazi ṯamɽa ṯi, lilŋiiḏi eḏaruŋw, kwunani ki zijin-na ŋiɽaŋal ŋi ŋeḏi ṯuroca ṯeḏi injiil. 17 na kla linaŋna eḏi ṯamḏu nyuŋwu la, eṯir andindazi Kwruztuŋw lu rugwori-na riɽen riɽen, leṯi keni undundeḏa kaniiza-na eḏorɔ-na ter ter, leṯi nyi naŋni kezni eḏi kiɽeci nyuŋwu ṯurfa kunuŋ ki zijin-na. 18 lakin, ŋinḏi eḏi roto ḏa? Kwruztu kweni kwandindizarla, urir gwu rugwor-na riɽen riɽen ŋidiny ŋi, ya beri; ŋwu ṯa eṯi nyi nyeŋlena.
ṯinyiŋlana ṯeḏi buuluz mezi gwu yafur andazi ŋeḏi Kwruztu
19 epa, nyi kwinḏi ṯa eḏi nyeŋlena, kaka eṯi nyi gwu elŋece eḏaruŋw, ṯimeca ṯeḏi ṯara ṯalu ki yiriny, na ṯeḏi Ṯigɽim ṯeḏi Yecu Kwruztu ṯinḏi nyi eḏi meci eḏofḏazi. 20 nyi kwukitaḏa ṯəkiza ṯi kizen ṯupak eḏi ṯurony ṯere ere ye nyuŋwu mac, kaka naŋna nyi gwu dɔk dɔk eḏandazi ŋugul ŋi kaka ṯa kirem, mindaŋ menyi piŋi ŋiniṯi ŋeḏi Kwruztu ki rɔgwɽɔ-na rinyi, ŋimiiḏa ŋi ŋinyi, ya ŋiɽany ŋi.
ŋinder ŋendu ŋeni ŋofḏana, ŋiɽany ya ŋimiiḏa
21 kaka menyi gwu miiḏi, eṯi ŋimiiḏa eni ŋeḏi Kwruztu, na eḏay ta na ṯəgina orɔ. 22 lakin menyi nani keni kwumiiḏu kwir aŋna, kezni ner ofḏani ŋu eḏi ŋi kiɽezi ŋɔḏɽor ŋere ŋizaw. nyi kwende kweḏi ŋuma eḏi zi alla ŋete. 23 nyi kweni kwumultu-na ray riɽen tɔk, nenyi naŋni eḏele eḏi nani Kwruztu gi, kaka enir gwu ŋu ŋimɔṯamḏu beṯen; 24 lakin nenyaruŋw, ŋiɽaŋal ŋi ŋalu ner eni ŋofḏana eḏi nani, nyi, kwir aŋna. 25 nyi kwilŋiiḏi deder eḏaruŋw ŋaŋa linaŋna nyi. ṯaŋwu nenyi kitaḏa eḏi nani ŋaŋa li eḏi meci ŋaŋwuzi eḏi duŋgwuŋgwa, na eḏi kiɽeci ṯəmna ṯalu tinyiŋlana tɔk. 26 mindaŋ ma tinyiŋlana ṯalu ortaḏa Kwruztuŋw kweni Yecu duŋwgwinyi-na, menyi aɽiḏa daŋgal-na.
ṯoraca eḏorɔ lugwul
27 lakin eḏi ŋeḏre ŋalu nii ŋiɽaŋali-na ŋeḏi Kwruztu, mindaŋ menyi kinna ila eḏeze ŋaŋwuzi, ya ma ŋazi ruci-na, enyji neŋne ŋeni ŋalu eḏaruŋw, ŋaŋa kla ta leṯenji ŋwara lu teter, leḏi Ṯigɽim-na ṯutuput na ṯugwor ṯutuput, leṯi kiɽmiḏi-na ruɽma ri eḏi zi illazi ki leṯermiḏeḏa ṯəmna nana ṯeḏi injiil, 28 liti leṯi ṯenye kwɔmne-na kwere mac kweḏi kla leṯi ŋazi ermiḏeḏa nana. ŋugul ŋalu ŋinḏir ŋi eḏi zi elŋece eḏaruŋw, lizi klu leḏi ṯəmna linḏi eḏi kileḏini ŋigileḏa ŋi ŋinḏi nani gwu Allah, lakin nyiŋa pa, leṯir zi ermiḏeḏa nana, er kiraḏa lu. 29 kaka inḏeḏer ŋazi gwu haḏiya witi wir weḏi yi emnici Kwruztuŋw ṯuɽuk mac, lakin eḏi keni rerini ŋiɽaŋal ŋi ŋeni ŋuŋun tɔk. 30 ŋaŋa, na nyi tɔk, kweṯir kiɽmiḏi-na ruɽma ri eḏi zi illazi ki; izar nyi gwu ŋaŋa tamin tete na ŋineŋnaŋazi eḏaruŋw, ŋinani nyi gwu ṯa-na kinna.
1 Nyiiŋǝ lir lǝni Bɔɔlɔs-ŋǝ Ṯiimɔɔthaaws-gi, lir yaḏaam yǝthi Kwɔrɔstɔ kwǝni Yǝcu.
Laaginna-ŋǝsi tatap kila lirllinǝlɔ ter, ethi Kwɔrɔstɔ-na kwǝni Yǝcu kila linaanɔ Fiilibbii, nǝ limɔṯraan-ŋǝ shamamisa-gi:
2 Ethi Allah wir Papa kwǝri, nǝ Kweeleny kwǝni Yǝcu Kwɔrɔstɔ inḏǝthǝ ŋaaŋwɔsi ne@ma nǝ ŋiiɽǝnnǝ tok.
Ṯaara kiyiiriny ṯǝthi Bɔɔlɔs.
3 Nyii kwǝṯi ǝccǝ Allah wiinyi shukran nyaamin tatap mǝŋǝsi kithaayini; 4 nǝ nyaamin tatap mǝŋǝsi ǝrici kiyiiriny, ǝṯi-nyii aari kiyiiriny kwinyiŋlana, 5 ŋiɽaŋal-ŋi ŋa ŋimǝccǝr-nyii-ŋi ki-ŋothɽor-na ŋǝthi Inyjiil ki-laamin-la liŋna mindaŋ kirem kwɔmoro kimaara. 6 Nǝ nyii kwilŋithi rac rerrem ethaarɔŋw, Allah wa waari ibṯǝḏi ŋothɽor daŋgal-na, ŋɔŋsi-tǝ ǝrrǝthǝ mindaŋ mǝr ernene ki Laamin-la lǝthi Yǝcu Kwɔrɔstɔ. 7 Ŋaaŋa kɔlɔ linaanɔ nyaamin tatap ki-ṯɔgwor-na ṯiinyi. Ŋwɔṯaŋw nǝr ɔvthanni duŋgwu-nyii ethi iccini ṯǝŋw ŋaaŋwɔsi-li tatap. Kaka nɔɽɔmaṯṯi-ŋa-gwɔ tatap nyii-gi ki-ne@ma-na-ŋgwɔ kwinḏǝthǝ-nyii Allah, nǝ ki-sijin-nǝ ŋgwɔ kwɔnaaniny-gwɔna, nǝ kinaŋw nikǝdinǝny-gwɔ ethi rocce Inyjiilǝ mindaŋ ethi ǝnyjǝlɔ kidi-kidir. 8 Allah wir shuhuuḏ kwiinyi, nyii kwǝni kwandisa rerrem nǝccǝ-ŋǝsiŋw, sɔɔrɔm kwiinyi kwɔppa kwǝni ŋaaŋa tatap, kwuruuthi ki-ṯɔgwor-na ṯǝthi Kwɔrɔstɔ kwǝni Yǝcu.
9 Nyii kwǝṯaari kiyiiriny mindaŋ ethi ṯamɽa ṯaalɔ kikindǝthǝ keereny-gi ṯilŋiṯṯathina ṯir rerrem nǝ ki-ṯǝthinǝ yǝnǝ tok ṯir min-min, 10 mindaŋ mǝthi ŋɔma ethisi allana ŋa ŋisaaw beṯṯen, mindaŋ mǝ sɔɔɽi nǝ meere lɔɔma-na leere tok mac ki Laamin-la lǝthi Kwɔrɔstɔ. 11 Mindaŋ mǝ urǝnni-nǝ deddep ŋwɔɔla-ŋi ŋwɔthi ŋirllalɔ, ŋwɔṯiila Yǝcu Kwɔrɔstɔ-ŋgi, ethi nii Allah-na nǝ ethi biɽǝthǝ yiriny tok.
Mǝrǝni ŋimiitha-tǝ, nǝ Kwɔrɔstɔ oro.
12 Nyii kwɔnaŋna-ŋǝsi ethisi elŋe ŋɔ liyǝŋgǝri liinyi, kwomne-ŋgwɔ kwǝrrinicǝ-nyii kwɔmǝ mǝcci Inyjiilɔ rerrem ethi kikkiɽǝthi. 13 Ŋwɔṯaŋw nǝ jesh tatap lizi-li lithaathɔ limǝ elŋe ethaarɔŋw kwɔnaani ki-sijin-nǝ sǝbǝb-gi kwǝthi Kwɔrɔstɔ. 14 Nanni kwiinyi kwɔnaaniny-gi ki-sijin-nǝ, kwɔmǝ firllasi liyǝŋgǝriŋw-silǝ luuru ethi Kweeleny-na. Mindaŋ nǝrǝthi ŋuugul-nǝ ŋuuru ethi andasi ŋiɽaŋali ŋǝthi Allah, liti lǝthi tithenya-na tokwo kaamin-gi ḏuṯ.
15 Ŋǝni rerrem ethaarɔŋw kila lokwo lǝṯi aari bǝshirǝ Kwɔrɔstɔ-ŋgi ki-lizi-nǝ kee-ŋgi ŋiɽany nǝ ŋurrǝthǝ-ŋi tok, laakin lithaathɔ tǝ, nǝr-sǝrri rɔgwor-ri risaaw. 16 Kilɔ lǝthi kwaathan-ŋwɔ, ǝṯirsi ǝrri ṯamɽa-thi, kaka nilŋithir-gwɔ ethaarɔŋw Allah winḏǝthǝ-nyii ŋothɽor ethi-ŋi rocce Inyjiilǝ. 17 Nǝ kila lithaathɔ lǝthi kerreny-ŋwɔ, ǝṯirseere aami andasiŋw ŋǝthi Kwɔrɔstɔ mac, laakin ǝṯirsi andasi ṯigɽim-thi ṯǝthi ṯamɽa rogɽo, ǝṯir naŋni ethi kiɽǝcci nyuŋwɔ ṯurvǝ a-naaniny-tǝ kinnǝni ki-sijin-nǝ. 18 Laakin ŋende ŋɔrɔɔthathi-nyii ŋiɽaŋal ŋeere mac! Ŋɔ ŋaaminy-ŋina rac, ethi Kwɔrɔstɔ ǝrinni bǝshirǝ raay-ri tatap, ǝrrinǝr-gwɔ rɔgwor-rina alla rɔgwor-ri risaaw, nyii-tǝ nannitha kwaamina dok.
19 Aaw, nyii kwinḏi-tǝ ethi nyeŋlena ṯir-ṯir. Kaka nilŋithiny-gwɔ ethaarɔŋw, ŋiɽaŋal-ŋi ŋǝthi ṯaara ṯaalɔ kiyiiriny, nǝ ṯimǝccǝ-thi tok ṯǝthi Ṯigɽim ṯǝthi Yǝcu Kwɔrɔstɔ, a ŋiɽaŋal ŋɔ orlle ethoro ŋiglǝthǝ ŋiinyi. 20 Sɔɔrɔm kwiinyi kwɔppa nǝ ṯigittatha tok, nǝrǝniŋw nyii kwiti kwinḏi ethi bɔlgwɔnythi ḏuṯ ki-ŋothɽor-na ŋiinyi, laakin nyii kǝniny urǝnni-nǝ deddep ŋuugul-ŋi nyaamin tatap, nǝ kire-kirem-ŋgwɔ-ṯǝ kǝniny tok, mindaŋ mǝ Kwɔrɔstɔ niini-nǝ kirem dok-dok kaŋna-na wiinyi, a-naaniny-gwɔ tǝ kinnǝni kwɔmiithɔ alla kwaayɔ. 21 Mǝnyii naani kwɔmiithɔ tǝ, ǝṯi ŋimiitha ǝni ŋǝthi Kwɔrɔstɔ, na mǝny ai tǝ, nǝ ṯǝginǝ oro. 22 Laakin mǝr-tǝ ǝniŋw ethi naani kwɔmiithɔ aŋna-yi nǝr-ǝniŋw ethi kikiɽǝzi ŋwɔɔla ŋwisaaw. Laakin ninyjeere elŋe mac ŋindǝr ŋǝndu tittir ŋǝnyji alla, kandisa kimǝ-nyii firllaṯa. 23 Nyii-ŋgwɔ kwɔmɔltɔ-na raay riɽǝndǝk. Ninyǝthi sɔɔrɔma etheele ethi naani Kwɔrɔstɔ-gi, nǝrǝni ŋɔvthanna beṯṯen. 24 Laakin ŋiɽaŋal-ŋi ŋǝni ŋaalɔ tǝ, nǝrǝni kǝniny ŋisaaw beṯṯen eṯhi nǝnyji ŋaaŋwɔsi kwɔmiithɔ aŋna-yi. 25 Ŋilŋithi-nyji ŋɔ rac dedder, na nǝnyji elŋe tok ethaarɔŋw nyii-ŋgwɔ kwinḏi ethi nanni ŋaaŋali tatap, mindaŋ mǝ kikiɽǝthi, nǝ ethi nyeŋlena ki-ṯǝmminǝ-nǝ, 26 ŋwɔṯaŋw, mǝnyii iila naaniŋa-gwɔ kwokwony tǝ, e-ta ǝmǝ ǝthi sǝbǝbǝ kwǝthi-gi piŋi rogɽo raalɔ ŋiɽaŋal-ŋi ŋǝni ŋiinyi, kaka nɔɽɔmaṯṯi-ŋa gwɔ ki-ŋimiitha-na Kwɔrɔstɔ-ŋǝli kwǝni Yǝcu.
27 Ethi ŋethre ŋaalɔ nii Inyjiilǝ-nǝ wǝthi Kwɔrɔstɔ, mindaŋ minyoro kwǝthiila etheese ŋaaŋwɔsi alla mǝnyii tǝ kinnǝni rucci ŋaaŋwɔsi-na, ǝnyji neŋne ŋǝni ŋaalɔ ethaarɔŋw, ŋaaŋa kila-tǝ lǝṯi ǝnyji ŋwaara-lɔ tetter ṯigɽim-thi ṯɔtɔpɔt, fikir-gi kwɔtɔpɔt, lɔthɔgthathisa ruɽumǝ-ri ŋiɽaŋal-ŋi ŋǝthi ṯǝmminǝ ṯǝthi Inyjiil. 28 Ǝṯi ṯiinya ṯuwǝnu ṯaalɔ kwomne-gi kweere mac. Ŋilŋithina ŋɔ dedder ethaarɔŋw, ṯigiirathalɔ ṯeeŋen ṯindǝr-ṯǝ kɔthɔ. Laakin ŋiglǝthǝ ŋaalɔ tǝ, nǝr iila naanɔ-gwɔ Allah. 29 Kaka nuruusǝr-ŋǝsi lɔvthanna ethi ǝkkici Kwɔrɔstɔ-ŋw ŋothɽor, etheere ǝmminci ŋunduŋw ṯɔɽɔk mac, laakin ethi rǝrinni ŋiɽaŋal-ɽi ŋǝni ŋundu tok. 30 Ɔɽɔmaṯṯir dɔŋw nyii-gi mindaŋ ǝri ṯɔgthi. Ŋǝriyǝ ŋirṯa-ŋa ŋette-ŋette ŋiisacar-nyji kinaŋw nɔthɔgthi-nyii kerreny, nǝ ŋɔ-ṯa tok ŋiniŋna-ŋǝsi ŋinaaniny-gwɔna kwɔthɔgthɔ.