aza 8
law leṯi meci Yecuŋw
1 eṯi Yecu ele ŋwara ŋi lu ki balaḏ kwere kwere kwupa kwɔkwɽeny tɔk, eṯuŋw zi andindaci ŋiɽaŋali ŋizaw ŋeḏi ŋeleny ŋeḏi Allah. na eṯir li romḏi lir wri-kwuɽen, 2 na law lɔkwɔ tɔk, limɔŋw zi ruci rigɽima-na riki kiṯay, na limɔŋw zi zəwi kimeṯi tɔk; kwete kweni maryam kweḏi majdalaŋw, kwunde kwir kwuruḏu gwu rigɽim-na riki dufɔkwɽeny; 3 na yuwanna, kwir kwaw kweḏi huuzi, kwir wakiil weḏi hiruuḏuz; na zuuzanna, na liḏaḏu luru leṯi ogwumicelu kwɔmne gi kweŋen eḏi zi meci.
ṯiŋerɔŋw ṯeḏi kwor kwowḏina ŋwola lu
4 ner rayḏa duŋw litezir likwakiḏaḏi ki ṯay ki ṯay, litutuweḏi nana leḏi yayin tatap, nuŋw zi andaci ŋiŋerɔŋwa, nuŋw zi eca ŋwu: 5 kwor kwete kwuruḏi ŋwola ŋi eḏi ŋi ele eḏi zi owḏinelu. mindaŋ muŋw zi owḏinelu ta, ner iidi ŋwɔkwɔ ki ṯay la, ner zi rutalu, mindaŋ nezi ndow uṯani kworɔ wac. 6 ner iidi ŋwɔkwɔ kwɔrcuɽam-na; mindaŋ mer alliḏa ner ayi nana kaka iti eḏi gwu ezir wa dufaŋi-na mac. 7 ner iidi ŋwɔkwɔ ki yugwi-na, ner alliḏa yugwi yi-na mindaŋ mezi yugwi firtaŋ. 8 ŋwuḏaḏu ta, ner iidi kureyu-na wicaw, ner alliḏa, ner əgini ŋwola nyamin-na ruɽi-ṯuḏni. muŋw zi rataci ŋiɽaŋali, nuŋw ofna nuŋw zi eca ŋwu: kweḏi yəni eḏi yi neŋne, eḏuŋw neŋne.
9 na limeḏgen uṯizelu, ner eca ŋwu: ṯiŋerɔŋw kḏu teni ṯi aḏa? 10 nuŋw zi eca ŋwu: ŋiɽaŋal ŋeḏi ŋeleny ŋeḏi Allah, ŋulucine kerreny, na orɔ ŋaŋa lilŋiiḏizi. lakin liḏaḏu er zi neŋne tatap ŋir ŋiŋerɔŋw nana, mindaŋ er zi eze rac, lakin er zi ṯime ŋizarzi; er zi neŋne rac, lakin er zi ere elŋece ezir mac ŋiniŋnarzi. 11 ṯiŋerɔŋw kḏu ṯeni ŋwu: ŋwola ŋwiri ŋiɽaŋal ŋeḏi Allah. 12 ŋwunani ki ṯay la, ŋwunde ŋwiru ŋwir lizi liniŋna ŋiɽaŋali, mindaŋ ma ibliiz ila, eṯuŋw zi dimeḏa ŋiɽaŋali ŋimɔnani ki rugwor-na, kaka aruŋw gwu ŋwu: ŋinani mindaŋ er ŋi emnizi ta, er kilaw. 13 ŋwola ŋwumiidi kwɔrcuɽam-na, ŋwunde ŋwiru ŋwir lizi liniŋna ŋiɽaŋali, ner zi miḏa tinyiŋlana ṯi. lakin ner ere eḏi rufu mac. eṯir zi emnizi, lakin mer zi mummi ta, eṯir zi ṯugwudazi tuc. 14 ŋwola ŋwumiidi ki yugwi-na, ŋwunde ŋwiru ŋwir lizi liniŋna ŋiɽaŋali, lakin mezi ṯaŋrica urreḏa ṯeḏi kwɔmne kweḏi ṯurmun, na ṯikeɽinjelu ṯeḏi ŋurṯu tɔk, mezi kaduwa ye keḏi kwɔmne kwere kwere kwuḏaḏu ta, mer zi enḏiḏa, eṯir firtaŋ ŋiɽaŋali, eṯir eni ŋimɔkiraḏi. 15 na ŋwola ŋwunani kureyu-na wicaw, ŋwunderṯa ŋwir lizi leḏi rugwori-na rizaw, tirlalu; mer neŋne ŋiɽaŋali, eṯir zi ami miḏaŋw, eṯir kwurmɔṯani mindaŋ, eṯir ami riɽuŋw tɔk.
ṯilŋiiḏina ṯeḏi lɔmba
16 kwizi kwende kwere kweṯifudi lɔmba eḏi kwuɽbeḏe lu melwa gi, ya kwaŋgiraŋ-na. beri, ma. eṯuŋw allazi kezir la wizaw eḏi ṯiŋaci lizi fori lu, linaŋna eḏi enḏi. 17 kaka iti lucina gwu kwɔmne kwere mac, illa ŋgwa kwinḏi eḏijinelu pɔrpɔr; nuŋw ere kwere tɔk mac kwukwuɽbene lu, illa ŋgwa kwinḏi eḏi ruwene lu. 18 kitizarzi yey ŋiniŋnaŋazi, kaka kweḏu ŋwi er kiɽeci, na kwiti kweḏu ŋwi mac, er keni eɽineḏa kwɔmne kiṯay kwaruŋw gi ŋwu: kweḏi nyi.
ŋiaŋga ŋa ŋir rerem
19 na gwu lenyin-ŋa ilaḏa lieŋgen li, ner ere upaḏi nanuŋw gwu mac, kaka kwuɽbeḏir gwu kwuɽbu-kwuɽbuk. 20 nuŋw andaci kwete nuŋw eca ŋwu: lanyalu-ŋa liaŋgalu li kilana par, linaŋnaŋa eḏi raŋḏa. 21 nuŋw eŋnici ŋgwa kwandica, nuŋw eca ŋwu: aya kwinyi na lieŋgeri linyi, linderṯa kla letineŋne ŋiɽaŋali ŋeḏi Allah, mer zi ma erri.
Yecu kwubiye zi kuruni lu pet na ṯujuli tɔk
22 lamin lete ner enḏi limeḏgen li ki faluuka-na, nuŋw zi eca ŋwu: er ṯamḏu ṯujuli ṯi-na. ner ṯiŋa faluuka ner ele. 23 mer ele ŋaw la, na ŋwaru ye ki, nuŋw inḏiri. na kurun kupa upuḏi ki ṯujul-na. nezi ŋaw oɽaḏa-na, nezi ŋiɽaŋal kiyaḏa cilcil. 24 ner ele, ner kiɽṯi, ner eca ŋwu: muallim, muallim, a kwer mi oɽaḏa iininyu! nuŋw kiɽṯi, nuŋw ermici kuruni, ŋaw ŋi ŋupuḏu tɔk, ner biɽeḏa lu pet. 25 nuŋw zi eca ŋwu: ṯəmna ṯalu ṯende? ner ṯenye, ner ṯibi kaka aḏa kwere, ner andizazina: eya kwiri manuŋ ŋgwu? muŋw ellici kuruni ŋwuzi ŋaw ŋi amra, ner ami niŋniḏici ŋunduŋwu.
ṯizeya ṯeḏi kwor kweḏi rigɽima-na riki
26 ner upaḏi kezir weḏi lizi leni lijadara, wunani jaliilŋw ṯoɽu ṯi la. 27 muŋw dapiḏalu ner kadirḏi kwor gi kwete kweḏi balaḏ ŋgwa, kweḏi rigɽima-na riki, kwiti kweṯikinnaḏa yireṯi lelu tuk mac; nuŋw ere nani duənu kwere too, eṯuŋw ta nanniḏa ki rimamu-na. 28 muŋw inḏa Yecuŋw, nuŋw upina kwola gi, nuŋw iideḏa ŋwuɽele-na, nuŋw eca ŋwu: a kwende kweḏi karḏa nani nyi gwu? a kweni Yecu, kwir Tor teḏi ŋgwa kwuṯemḏelu. nyi kwuturecaŋa lu, eṯi nyi ṯa rəra mac. 29 kaka andicaŋw gwu ṯigɽima tiki eḏi ru kworu-na, ṯeṯidallu nana ŋwamin ŋwuru. eṯir kəki ŋwuruŋ ŋi, yalibaz yi tɔk, lakin eṯuŋw zi undena, mindaŋ eṯi ṯigɽim tiki apirazi wuḏer yi-na. 30 na Yecu uṯizelu, nuŋw eca ŋwu: a kweneya? nuŋw eca ŋwu: nyi kweni kwitezir, kaka enḏi gwu rigɽim riki ruru duŋgwun-na. 31 ner tureci lu tur ner eca ŋwu: etinyji ṯa ṯiŋaḏaḏi mac ezir yi-na wolu-na dip, wufoɽu kuṯu tɔk. 32 na yizaŋ nani yuru, yiina lu duŋw kayin la; na rigɽim riki tureci lu, ner eca ŋwu: efricenyi, nyenḏi ki yizaŋ-na. nuŋw zi efrici. 33 ṯaŋwu, na rigɽim riki ru kworu-na, ner enḏi ki yizaŋ-na. ner irri ŋwoɽa ŋi tatap, ner dapi ndoṯom li la, ner iriḏa ŋaw-na, ner gwu ay.
34 mer zi eze ŋimerrini, leṯiziyelu, ner afri ner mida ayinu, ner zi andaci ledi duənuŋw, na ledi balaḏ tɔk. 35 ner ru eḏeze kwɔmne kwumerrini, ner ila nani gwu Yecu, ner kaṯazi kworu kwumɔ rigɽim riki duŋgweci, kwunanalu Yecuŋw ŋwuɽele-na, kwumɔkenne yireṯi, kwumami nanuŋw. ner ṯenye. 36 nezi lizi linanu lizazi andaci ŋiɽaŋali tɔk ŋumɔ rɔtɔ ŋwu, na ŋeḏi kwor ŋgwa kwumɔzey aŋgwuru. 37 na lizi tatap leḏi ezir weḏi lijadara tureci Yecuŋw lu eḏi zi duŋgweci, kaka mezi gwu ŋiḏeny enḏiḏa ŋupa ŋiminni. ŋwu ṯa, nuŋw enḏi ki faluuka-na, nuŋw gi aɽi kiṯay. 38 na kwor ŋgwa kwumɔ rigɽim riki duŋgweci tureci Yecuŋw lu tur, nuŋw eca ŋwu: er ṯa romḏi. na Yecu əɽi kiṯay, nuŋw eca ŋwu: 39 aɽi ele duənu daŋgalu, ezi baŋaci yilima yupa yimɔŋazi Allah errici, na kwor ele nuŋw iṯidi ŋiɽaŋali ki balaḏ-na tatap, ŋeḏi yilim yupa yerricezi Yecu.
Yecu kwumiiḏice yayiruzŋw toru tir tira, nuŋw zəwi kwayu kweṯiiri ŋina
40 ma Yecu aɽi na lizi agani ŋunduŋwu, ner gi amina, kaka əkicer gwu kizen tatap. 41 na kwor kwete ila, kweni yayiruz, kwir kwijowiṯ kweḏi majma. nuŋw iideḏa Yecuŋw ŋwuɽele-na nuŋw tureci lu tur eḏi gi ila duənu duŋgwun, 42 kaka eḏuŋw gwu toru tutuput tir tira, tir yiḏleyu kaka wri-kwuɽen, timerrizi ŋiɽany. na Yecu ele, nezi lizi ataḏi nana ki ṯay ki ṯay.
43 na kwaw kwete nani ki duŋw-na, kweṯiiri ŋina yiḏleyu wri-kwuɽen. nuŋw ere kwere mac kweḏi ŋuma eḏi zəwi ŋunduŋwu. 44 nuŋw ila ṯoɽu ṯi la nuŋw mummici Yecuŋw yebɽaŋi yeḏi yireṯ, na ŋin ŋeṯiiri, uɽeḏi puduk. 45 nezi Yecu eca ŋwu: eya kwiri kwumummicenyi yireṯi? ner ureŋni tatap, na buṯruz-ŋa eca ŋwu: muallim, ŋwuduŋw ŋwataḏi ŋa nana, mindaŋ na aru ŋwu, eya kwiri kwumummi nyi a? 46 nezi Yecu eca ŋwu: kwumenyi mummi kwete, kaka icinenyi gwu rac, ŋuma ŋimenyi gwu ru-na. 47 na kwaw ulezi ṯay, ṯeḏi gwu lucineḏa, nuŋw ila kwumunḏuḏi, nuŋw iideḏa ŋwuɽele-na, nuŋw andazi pɔrpɔr ki lizi-na ŋiɽaŋali ŋimo ŋi mummi kireṯi, muŋw ma zey tuc. 48 nuŋw eca ŋwu: tor tinyi, miḏi tugwori. ṯəmna tɔŋwa ṯimɔŋa zəwi. indi ma ta pa kwizaw.
49 andicaŋw ṯaŋwu, na kwor ila kweḏi kwijowiṯ-ŋa, nuŋw eca ŋwu: ṯernyeri, ṯɔḏɔ emba ṯi deŋṯinaŋa cakicagi? marna tira tɔŋwa ay tɔk. 50 lakin na Yecu neŋne ŋiɽaŋali ŋimoɽi kəni-na mbiny, nuŋw eca ŋwu: eṯi ṯinya mac; eḏi ṯəmna, na ti ṯa kilaw rac. 51 mer upaḏi duənu, nuŋw zi ere efrici lere lir ter eḏenḏi mac, illa buṯruz-ŋa yaguub gi, yuhanna tɔk, na ṯernyin ṯeḏi tira-ŋa lenyin gi. 52 ner ari kwola tatap, ner ariḏa ŋwunda ŋwunda; nuŋw zi eca ŋwu: eṯaru kwokwony mac. titi tayi mac: tinḏiri ṯa domony. 53 lakin ner ari yima nyiḏak, kaka ilŋiicar gwu, tira timay. 54 nuŋw miḏa ṯii ṯuŋwun pup, nuŋw ornuti ŋunduŋwu, nuŋw eca ŋwu: tor tinyi, kiɽṯi. 55 na tigɽim ṯuŋwun aɽiḏana tuc, nuŋw diɽelu pruṯ. nezi Yecu andaci eḏinḏeḏa eḏneya were. 56 na ṯernyin-ŋa ṯibi lenyin gi, ner liŋɽi kaka aḏa kwere, nuŋw zi ici nuŋw zi eca ŋwu: eṯi zi andica kwizi kwere ŋu mac, ŋimerrini.
Laaw kila lǝṯi rɔɔmɔthi Yǝcu-ŋǝli.
1 Nǝ Yǝcu ele nɔŋw irǝrǝlɔ ki-muḏun-nǝ, nǝ ki-ŋwilli-na tok, kwaari bǝshirǝ ŋiɽaŋali ŋisaaw ŋǝthi Ŋeeleny ŋǝthi Allah. Nǝ ṯalaamiiz ṯir wrii-kwuɽǝn ele ŋundu-ŋǝli, 2 nǝ laaw lokwo tok lisǝwǝ-ŋwɔsi, nǝ lallathɔ-ŋwsi rigɽimǝ-nǝ rigii. Mǝryǝm (kwǝni Majḏaliiyyǝ) ŋgwa kwallathɔŋw rigɽimǝ-nǝ dɔvokwɔɽony rigii; 3 nǝ Yuuna kwir kwaaw kwǝthi Khuuzii kwir wǝkiil wǝthi Hiiruuḏus, nǝ Suusanna, nǝ lithaathɔ luuru lǝthi kwomne kweeŋen kwǝṯir-gi mǝcci Yǝcu-ŋwsi talaamiiz-thi ṯuuŋwun.
Mǝthǝl kwǝthi kwɔr kwugwuuthu ŋwɔɔla.
(Maṯṯa 13:1-9Mɔrgus 4:1-9)4 Nǝ lizi iirǝthǝ Yǝcu-ŋwɔ naana, ŋwilliya naana tatap; mindaŋ nǝ lɔdɔŋw lɔppa raaaytha, nǝsi Yǝcu andaci mǝthǝlǝ ŋgwɔ nɔŋwsǝccǝŋw, 5 “Laamin leṯṯe nǝ kwǝr kwetṯe ele ethi kwɔɔtha ŋwaana. Nǝ nɔgwuuthu-ŋwsi ki-thɔrɔny-na tǝ, nǝr iidi ŋwokwo ki-thaay-la, nǝrsi rɔttalɔ, mindaŋ nǝsi ndǝw ɔṯanni kworo wac. 6 Ŋwɔthaathɔ ŋwokwo nǝr iidi ki-ŋwiiɽi-na, mindaŋ mǝr ḏalliṯha, nɔr arum kaka niira-gwǝ ḏuuva ki-wurɔyu-nɔ. 7 Nǝr iiḏi ŋwɔthaathɔ gwokwo ki-yuugwi-nǝ, nǝr dallitha nǝr peŋe yuugwiyi-nǝ tatap mindaŋ nǝsi yugwi firtaŋ. 8 Nǝ ŋwɔthaathɔ nǝr iiḏi ki-wurǝyu-nǝ wisaaw; nǝr dallitha mindaŋ nǝr rii-ɽi yǝy, nǝsi tɔllaŋ ṯɔtɔpɔt rii-ɽi yǝy ruɽi-ṯɔthni.” Nǝsi Yǝcu ṯimmaci ŋiɽaŋali nɔŋwsǝccǝŋw, “Kwǝthi yǝni yǝthi-yi neŋne ethɔŋw neŋne.”
Sǝbǝb kwǝthi amthaal.
(Maṯṯa 13:10-17Mɔrgus 4:10-12)9 Nǝ ṯalaamiiz ṯǝthi Yǝcu utici ŋunduŋw-lɔ ŋiɽaŋal-ŋi ŋǝthi mǝthǝl ma@na-gi kwuuŋwun kwǝni ǝyǝ. 10 Nɔŋwsi ǝŋnici nɔŋwsǝccǝŋw, “Ṯilŋithinǝ ṯǝthi ŋejmeth ŋǝthi Ŋeeleny ŋǝthi Allah ṯimǝr-ŋǝsi ilŋithini, laakin lithaathɔ-tǝ, ǝrsi ilŋithini amthaal-yi, mindaŋ mǝreele ethi iisithi ǝṯireere ese ǝsir mac, mǝr kette yǝni aṯirsi ere elŋe tok mac.
Yǝcu mɔŋgwɔ uppi mǝthǝlǝ-nǝ kwǝthi kwɔr kwugwuuthu ŋwɔɔla.
(Maṯṯa 13:18-23Mɔrgus 4:13-20)11 “Mǝthǝl-ŋgwɔ kwǝniŋw, ŋwɔɔla ŋwir ŋiɽaŋal ŋǝthi Allah. 12 Ŋwan ŋwa ŋwiidu ṯaay kǝni ŋwaaɽinnasi kila lǝṯi kette yǝni; laakin ǝṯi Ibliis iila ǝṯɔŋwsi dimmǝthǝ ŋiɽaŋali ŋa ŋɔgwɔɔthɔna ki-rɔgwor-na reeŋen, mindaŋ mɔŋwsi lǝŋthǝci etheere ǝmmini mac, mindaŋ ethi kilaaw. 13 Nǝ ŋwa ŋwiidu ki-ŋwiiɽi-na, nǝrsaaɽanni kila lǝṯi neŋne ŋiɽaŋali mindaŋ ǝṯirsi mithǝ laamina. Laakin aṯireere ɔɽi rɔvɔɔ deŋgen-na lac-lac mǝc; ǝṯir ǝmmini lokwo cuk domony, laakin mǝsi lɔɔmɔr iilicǝ lǝthi ṯɔmɔmma, aṯirsi duŋgwǝci kwuɽunyjur. 14 Nǝ ŋwa ŋwiidu ki-yuuŋwi-nǝ, nǝrsaaɽanni kila lǝṯi kette yǝni; laakin ǝṯisi ṯurtunǝnǝ tǝthi ṯurmun-ŋǝ ŋɔrṯɔ-ŋi nǝ ṯimiidatha ṯǝthi ŋimiitha-ŋɔ tɔk, ǝtirsi-gwɔ ǝnḏinǝ mindaŋ aṯirsi mithǝ kworo, mindaŋ aṯireere rii-ɽi mac. 15 Nǝ ŋwa ŋwiidu ki-wurǝyu-nǝ wisaaw, nǝrsaaɽanni kila liniŋna ŋiɽaŋali, rɔgwor-ri risaaw rɔsɔɔɽɔ tɔk, mindaŋ nǝrsi mithǝ tetter, mindaŋ aṯir rii-ɽi ŋwɔɔla ṯindinyanna-thi naana.
Mǝthǝl kwǝthi lombo.
(Maṯṯa 5:15Mɔrgus 4:21-25)16 “Kwiti kweere mac kwǝṯi fuudi lombo mindaŋ ethi kwuɽubǝthǝlɔ mǝlwǝ-gi, alla ethi kette kwaŋgiraŋ-na. Laakin lǝṯɔŋw-pǝ kǝniny allasi-la kider kǝzir wuuŋwun, mindaŋ mǝ lizi kila lǝṯi ǝnḏǝ aami ese ǝzir-ŋwɔ fɔɔri-gi. 17 Kwɔmne kwiti kweere mac kwuluccunǝ kwiti kwinḏi ethi ruwǝnnǝlɔ mac, nǝ kweere kwugwuɽubǝnnǝlɔ, ŋwinḏini mindaŋ ǝri ruwǝzǝlɔ ki-fɔɔri. 18 Ŋwɔṯaŋw aŋrathir, nǝ ǝṯaami neŋneŋw tok; nǝ kweere kwǝthi kwomne kweere ǝrgwɔ kiɽǝcci-lɔ, laakin kweere kwiti kwǝthi kweere mac tǝ, nǝ mɔŋwsǝthi kinnǝni nyokwɔɽoc nyaarɔŋw-nyiŋw nyǝthiŋwsi ǝrsi-tǝ aagitha kithaay.”
Lǝnyin kwǝthi Yǝcu-ŋǝ liyǝŋgen-li.
(Maṯṯa 12:46-50Mɔrgus 3:31-35)19 Nǝ lǝnyin kwǝthi Yǝcu-ŋǝ liyeŋgen-li iila naanǝ-ŋgwc, laakin nǝreere ǝthi ŋɔma mac ethi dɔŋgwatha keṯṯɔk naanɔ-ŋgwɔ sǝbǝb-ŋi kwǝthi lɔdɔŋw. 20 Nǝ kwizi kwette accǝ Yǝcu-ŋw, “Laanyalɔ-ŋǝ liyaŋgalɔ-li kilala lirlicǝŋǝ par linaŋna-ŋa etheese.” 21 Laakin nɔŋwsi ǝŋnici nɔŋwsǝccǝŋw, “Lǝnyǝr-ŋǝ liyǝŋgǝri-li lindǝr kila lǝṯi neŋne ŋiɽaŋali ŋǝthi Allah mindaŋ ǝṯirsi iinyici naana.”
Yǝcu mɔŋgwɔ rilli kɔrɔni waamir-yi.
(Maṯṯa 8:23-27Mɔrgus 4:35-41)22 Laamin lette na Yǝcu-ŋǝ ṯalaamiiz-thi ṯuuŋwun ǝnḏi ki-mɔrkǝb-nǝ, mindaŋ nɔŋwsǝccǝŋw, “Ǝreele ǝri uɽǝthǝ bahara-na areele kǝni kithaathɔ.” E-ta nǝreele. 23 Nǝ kinaŋw ninḏir, nǝ Yǝcu nḏiri ŋwaarɔ. Nǝ biḏaan nǝ kɔrɔn avanna tɔc kɔppa ki-bahar-na, nǝ mɔrkǝb aari ibṯǝdi ethi urǝnni ŋaaw-na, mindaŋ nǝr naani khaṯar-na kɔppa. 24 Nǝ talaamiiz ele naanɔ-ŋgwɔ nǝr kiɽiti nǝrǝccǝŋw. “Yaa Sǝyyiḏ! Yaa Sǝyyiḏ! Nyiiŋǝ limǝ naŋni ethi kiirathalɔ!”
Nǝ Yǝcu ḏiiɽǝnǝlɔ tɔc, nɔŋw ǝrmici kɔroni ŋaaw-ŋi ŋɔppɔthɔna; mindaŋ nǝr biɽǝthɔlɔ pǝṯ tɔc, nǝ ǝzir ayithalɔ ciɽiŋill! 25 E-ta nɔŋwɔccǝ ṯalaamiiza-ŋw, “Ṯǝmminǝ ṯaalɔ ṯende?”
Laakin nǝr liŋɽalɔ nǝr ṯeenye nǝr andasi deŋgen-na nǝraarɔŋw, “Kwɔr-ŋgwɔ kwir ṯaŋ? Mindaŋ mɔŋw taami inḏǝthǝ kɔrɔni-ŋwɔsi ŋaaw-ŋi ŋɔppɔthɔna waamira mindaŋ mǝrtaami iinyici naana pappac!”
Yǝcu mɔŋgwɔ sǝwi kwɔɔrɔ kwǝthi rigɽimǝ-nǝ rigii.
(Maṯṯa 8:28-34Mɔrgus 5:1-20)26 Nǝ Yǝcu-ŋǝ ṯalaamiiz-thi ṯuuŋwun ele bahar-gila mindaŋ nǝr ɔppathi kǝzir wǝthi Jaraasiiyyiin wiisa Jǝliil-ŋwɔ kiyǝnǝ. 27 Mǝ Yǝcu dappitha-lɔ nḏɔṯɔma kǝni, nǝr biɽithi kwɔr-gi kwette kwuruuthu ki-mǝḏiinǝ-nǝ kwǝthi shayaaṯiina-naɔ. Nǝ kwɔr ŋgwa-tǝ nɔŋwɔni kwɔnannɔ ŋwɔɔmɔri ŋwuuru lɔvdɔṯṯɔ, ǝṯɔŋweere nanni dɔɔnɔ mac, laakin nɔŋwɔni kwǝṯi nanni ki-yibaŋ-na yǝṯir-ŋwɔ aanathisi. 28 Mɔŋweese Yǝcu-ŋw, nɔŋw ɔvɔna ŋwal-ŋi ŋɔmmaŋi mindaŋ nɔŋw iidǝthǝ ŋwɔɽelle-na nɔŋw ɔvɔna ŋɔmmaŋi nɔŋwɔccǝŋw, “Yǝcu Tɔr tǝthi Allah wuthǝmthǝlɔ pur-pur! A kwɔnɔŋna aathaŋw naaniny-gwɔ? Nyii kwutuurǝccǝ-ŋǝlɔ etheere bii nyuŋwɔ ṯurvǝ mac!” 29 Ŋǝni ŋandisa-ŋwsi ŋɔ, kaka nǝllicǝ-gwɔ Yǝcu waamira ethi ruu kithaay duŋgwun-nǝ. Kaka nǝṯi-gwɔ ṯigɽim ṯuruuŋwɔ mithǝ ŋwɔɔmɔri ŋwuuru mindaŋ ǝṯir kegitte ki-sijin-nǝ, ǝṯir kǝkki rii nǝ ŋwaara ŋwɔɽɔŋw-ŋi mindaŋ ǝṯɔŋwsi undǝthǝnǝ rɔṯ-rɔt, mindaŋ ǝṯi shiiṯaan aprǝlɔ ǝṯɔŋw iili ki-sahraa-na.
30 Nǝ Yǝcu uṯicǝlɔ nɔŋwɔccǝŋw, “A kwǝni ǝyǝ?” Nɔŋw ǝŋnici nɔŋwɔccǝŋw, “Nyii kwǝni Jesh!” 31 Nǝ shayaaṯiin tuurǝccǝlɔ ethisi ere ṯiŋatha kǝzir wǝṯi-gwɔ rigɽim nanni rǝkkicǝ jiizǝ kizǝn mac.
32 Nǝ yiizǝŋ naani kinaŋw-lɔ keṯṯok dɔŋw lɔppa yiinalɔ lundǝri naana. Nǝ shayaaṯiin tuurǝcci Yǝcu-ŋwlɔ tur ethisi duŋgwǝci ethi-ŋwɔ ǝnḏinǝ, e-ta nɔŋwsi duŋgwǝci. 33 E-ta nǝ shayaaṯiin ruuthǝ kwɔr-na mindaŋ nǝrǝnḏi ki-yiizǝŋ-nǝ. Mindaŋ nǝ dɔŋw tatap avri ki-ṯirllilɔŋw mindaŋ nǝr irdǝthi ki-bahar-na nǝsi-gwɔ ŋaaw ǝnyji.
34 Mǝ nyaaɽa nyiyǝ yiizǝŋi-lɔ ese kwomne kwɔmǝ ǝrrini, nǝr fǝthi khabaralɔ ki-mǝḏiinǝ-nǝ nǝ ki-ŋwilli-na tok. 35 Nǝ lizi ruu nǝreele ethiisa aatha kwɔmǝ ǝrrini, mǝr iila naana-gwɔ Yǝcu, nǝr ese kwɔɔrɔ ŋgwa kwuruuthu-gwu shayaaṯiina-na kwɔnaanalɔ ŋwaara-na ŋwɔthi Yǝcu, kwɔginna yirethi naana, kwɔmǝ avri nda-na dar, mindaŋ nǝr ṯeenye tatap. 36 Nǝ kila liisasi ŋa ŋǝrrinǝ, nǝrsi andaci lizi ŋǝniŋw kwɔr ŋgwɔ kwɔmǝ sǝwinni aŋgwɔrɔ. 37 E-ta nǝ lizi tatap lǝthi ǝzir wa uṯici Yǝcu-ŋwlɔ etheele kithaay, kaka nithiinyar-gwɔ beṯ-beṯṯen. Ŋwɔṯaŋw nǝ Yǝcu ǝnḏi ki-mɔrkǝb-nǝ nɔŋweele kithaay. 38 Nǝ kwɔr ŋgwa kwɔmǝ-gwɔs shayaaṯiin ruuthǝ-nǝ kithaay, nɔŋw tuurǝcci Yǝcu-ŋwlɔ nɔŋwɔccǝŋw, “Duŋgwǝcǝ-nyii ŋǝ rɔɔmi.” Laakin nǝ Yǝcu ṯiŋatha nɔŋwɔccǝŋw, 39 “Nḏi aaɽitha ki-dɔɔnɔ kwɔɔŋa mindaŋ ǝsi ilŋithini ŋa ŋimǝ-ŋǝsi Allah ǝrrici.” Ŋwɔṯaŋw mindaŋ nǝ kwɔr ele mǝḏiinǝ-ginǝ nɔŋwsi andasi ŋa ŋǝrricǝsi Yǝcu.
Tɔr ṯǝthi Yaayirɔs tir tiira, nǝ kwaaw kwɔmǝmmucǝ Yǝcu-ŋw kirethi.
(Maṯṯa 9:18-26Mɔrgus 5:21-43)40 Nǝ Yǝcu aaɽitha ki-ṯuɽumǝ ṯithaathɔ tǝthi bahar, nǝr aalanni ṯaamathina kaka nǝkkicǝr-gwɔ tatap ŋunduŋw kizǝn. 41 E-ta nǝ kwɔr ɔppatha kwette kwǝni Yaayirɔs, kwir rǝ-iis rǝthi majma@, nɔŋw iidǝthǝ Yǝcu-ŋwɔ ŋwɔɽelle-na, nɔŋw tuurǝccǝlɔ ethi-gi ele ki-dɔɔnɔ kwuuŋwun, 42 kaka ninḏi-gwɔ tɔr ṯuuŋwun tir tiira ethi ai, tir yithlǝyu wrii-kwuɽǝn. Nǝ kinaŋw mǝ Yǝcu ele ki-thaay-la nǝ lizi attathi naana rɔgwoṯ-rɔgwoṯ. 43 Nǝ kwaaw naani kwette deŋgen-na kwǝṯi ɔnda ŋiinǝ mindaŋ nɔŋwaa-gu yithlǝyu wrii-kwuɽǝn. Nǝ kwizi ere kweere mac kwǝthi ŋɔma ethi sǝwi ŋunduŋw. 44 Nɔŋw iila Yǝcu-ŋw ṯɔɔɽɔthala nɔŋw mummuci yǝbɽǝŋi yǝthi kwɔfṯaan kwuuŋwun, mindaŋ nǝ ŋin ŋuuŋun rillanni tɔc. 45 Nǝ Yǝcu ɔṯalɔ nɔŋwaarɔŋw, “Ǝyǝ kwɔrɔ kwɔmɔmmɔny?” Mǝr ǝvrinni tatap nǝ Bɔṯrɔs ǝccǝŋw, “Yaa Sǝyyiḏ, lizi lir-pa kɔlɔ lirikathiŋalɔ tatap, na nǝr-ŋǝ attathi naana tok!” 46 Laakin nǝ Yǝcu aarɔŋw, “Kwizi kwette kwɔmǝ-nyii mɔmmi kaka niccinǝny-gwɔ ŋɔma-ŋi ŋimǝ ruuthǝ duŋgwiny-nǝ.” 47 Nǝ kwaaw elŋǝce ethaarɔŋw, limǝ-nyii elŋǝce, mindaŋ nɔŋwiila kwɔnḏǝthɔ, nɔŋw iidǝcci Yǝcu-ŋwlɔ ki-ŋwɔɽelle-na ŋwuuŋwun. Mindaŋ nɔŋwandaci kiyǝnǝ yǝthi kila tatap, sǝbǝbǝ kwɔmɔmmɔ-ŋgi, mindaŋ nɔŋw saawi tɔc. 48 Nǝ Yǝcu ǝccǝŋw, “Ŋiira ŋiinyi ṯǝmminǝ ṯɔɔŋwa ṯimǝŋǝ sǝwi. Nḏi kǝniny kwaami naana.”
49 Nǝ kinaŋw nanḏisa-tǝ Yǝcu kinnǝni, nǝ kwette iilanna kwɔɔsar ki-dɔɔnɔ kwǝthi rǝ-iis, nɔŋwɔccǝ Yaayirɔs-ŋwɔ, “Tɔr tɔɔŋwa tir tiira timǝ ai, ǝṯi undǝŋnǝ mɔ@allima ceg-cegi mac.”
50 Laakin mǝ Yǝcu neŋne, nɔŋwɔccǝ Yaayirɔs-ŋwɔ, “Ǝṯi ṯiinya mac; ǝmminǝ-tǝ kǝniny, nǝ tǝtǝ miithi rac.”
51 Mɔŋw ɔppathi dɔɔnɔ, nɔŋweere duŋgwǝci kweere mac ethi-li ǝnḏi kiininy, illi Bɔṯrɔs-ŋǝ Yuhanna-gi nǝ Ya@guub tok, nǝ ṯǝrnyin ṯǝthi tiira-ŋǝ lǝnyin-gi. 52 Nǝ kila tatap linaanɔ kinaŋw nǝraari kwɔɔla, mindaŋ nɔr aarithana ŋwundǝ-ŋwundǝ ŋwɔthi tɔr. Nǝsi Yǝcu ǝccǝŋw, “Ǝṯaarɔ mac tor titi taayɔ mac; tǝni tinḏirɔ domony!” 53 Nǝr aaritha yiimǝ kathri, kaka ilŋicar-gwɔ tɔɔrɔ timǝ ai. 54 Mindaŋ nǝ Yǝcu mithǝ tii nɔŋwɔccǝŋw, “Tɔr diiɽǝthilǝ!” 55 Nǝ tigɽim aaɽitha naana, nɔŋw diiɽǝnnǝlɔ puruṯ, mindaŋ nǝsi Yǝcu andaci ethi inḏǝthǝ kwomne kweere kwǝthi yee. 56 Nǝ ṯǝrnyin-ŋǝ lǝnyin-ŋǝli liŋɽalɔ buruc, laakin nǝsi Yǝcu icci etheere iirǝci kwizi kweere mac ŋiɽaŋali ŋɔ.