aza 3
yuhanna kweni baptizt na ṯireca ṯuŋwun
1 ma kweleny kweni ṯibariyuuz gezar nani ŋeleny-na yiḏleyu wri-ṯuḏni, na bilaaṯuz albunṯi orɔ muḏiir kweḏi yahuḏiiyaŋw na hiruuḏuz orɔ kweleny kweḏi ezir weni jaliil, na eŋgen kweni fiilibbuz orɔ kweleny kweḏi iṯuriiya ŋwuzi ṯarakuniitiz gi, na lizaniyuuz orɔ kweleny kweḏi abiliiyaŋw, 2 ki lomur ta kla, roḏu hannaan-ŋa gayaafa gi leleny leḏi yiziiz, na ŋiɽaŋal ŋeḏi Allah ila nani gwu yuhanna, kwir tor teḏi zakariiya, kwuḏer-na. 3 etuŋw ele kezir tatap weḏi kufurṯa keni urdun. etuŋw andindaci lizi, etuŋw zi eca ŋwu: orlacar ŋikyaŋi ŋwudɔŋw, a miḏa kuruu keḏi baptizm, a ŋazi ŋikya fifrinizi kitay. 4 kaka luḏinar gwu kiṯam-na keḏi izaya, kwir kwiɽi, ŋeni ŋu:
tɔgwɽɔ teḏi kwete kwari kwuḏer-na ŋwu:
daɽmicar Kwelenyi tay lu,
rillizer ray lu ruŋwun.
5 ŋwobi tatap ŋweḏi yayin ŋwumiɽnyami la,
na a yayin tatap ɔblɔ lu, ŋwunder ŋi,
na a ezir wir ŋwindiŋ irlalu,
na a ray reḏi ŋwuḏutɽaŋ oḏana lu yir yir,
6 na a lizi tatap eze ŋigileḏa ŋeḏi Allah.
7 nuŋw zi andaci lulubeḏi, limɔ ru eḏi zi baptazi, nuŋw zi eca ŋwu: ŋaŋa, lir kwelle kweḏi yumow yir yirra, eya kwiri kwirecaŋazi eḏafri ŋiɽŋaza ŋinḏi? 8 eṯi riɽi kwelle kwofḏana kaka kla limorlaci ŋikyaŋi ŋwudɔŋw rerem, na eṯarina ŋwu mac; ibrahiim kwiri ṯernyeri ṯeri. nyi kwecaŋazi ma ŋwa rerem, Allah weḏi ŋuma eḏi ruzizi ibrahiimŋw yali kyu kwelle. 9 na kire-kirem ŋgwu, keni, likete ŋundi yaɽi nana eḏi zi ṯiŋaṯa yuṯi yelu; mindaŋ yere yere yiti yiriɽi kwelle kwizaw mac, er zi ṯiŋaṯa, er keṯini kigə-na.
10 na lizi lulubeḏu nanuŋw gwu utizelu, ner eca ŋwu: na aḏa kwenyerri? 11 nuŋw zi eŋnici nuŋw zi eca ŋwu: kweḏi lofan nden, eḏuŋw alla kwete eḏinḏeḏa ŋgwa kwiti kweḏuŋw mac; kweḏi eḏneya, eḏuŋw ta erri ŋwu tɔk. 12 ner ele eḏi miḏa kuruu keḏi baptizm kla leṯallila ṯulba tɔk, ner eca ŋwu: muallim, nyiŋa lerri aḏa? 13 nuŋw zi eca ŋwu: eṯi zi ere ṯemḏici ṯulba lu mac, eṯami allaŋw. 14 na ta orṯa tɔk eca ŋwu: na nyiŋa ta, nyi ma erri aḏa? nuŋw zi eca ŋwu: eṯere lakazi kwizi lu mac; eṯi zi ere eḏunezelu mac; eṯamina tɔk kwuruuz gi, kwəkinaŋa gi ŋɔḏɽor.
15 mindaŋ ma lizi akaci kizen cirŋel ner ŋi ortutini ki rugwor-na ŋeni yuhanna, ner ari, kwiri Kwruztu i? kwiri aḏa? 16 nezi yuhanna eŋnici nuŋw zi eca ŋwu: nyi kwɔŋazi baptazi ŋaw ŋi; na ŋgwa kwete kwinḏi kwuṯemḏinyi la ŋuma ŋi, nenyi ere ofḏani mac eḏi kedici nyamin nyeḏi yiḏwan. kwunde kwiri kwɔŋazi baptazi Ṯigɽim ṯi ṯirlinelu ter igə yi. 17 kumugla kuŋwun kinani ki ṯii, eḏi gi zuɽi kuwaɽa lu, mindaŋ ŋwu firṯaḏa ŋwana ki tuluŋ-na, ŋwu dunnazi lugwɔli igə yi, witi wiɽnyana lu mac. 18 ta ŋwu, eṯi yuhanna ilŋiiḏini lizi ŋiɽaŋali ŋizaw ŋitezir, etuŋw zi ireci tɔk.
19 lakin hiruuḏuz, kwir kweleny kwumɔ yuhanna ermici ŋiɽaŋal ŋi ŋeḏi hiruuḏiiya, kwir kwaw kweḏi eŋgen kweni fiilibbuz, na ŋiɽaŋal ŋiki ŋir ter tɔk tatap, ŋeṯi zi hiruuḏuz erri, 20 nuŋw zi ma kiɽezizi la rerec ŋimɔŋw ŋi kete yuhannaŋw ki zijin.
21 ner ṯa orɔ ŋwu, mer zi baptazi tatap na Yecuŋw tɔk, kweni kwari ki yiriny, na lere diŋelni kworɔ. 22 na Ṯigɽim ṯirlinelu ter dapa, nuŋw roḏa kaka kwurru, nuŋw gwu awla, na ṯɔgwp ermiḏa kilerena, nuŋw eca ŋwu: a kwiri Tor tinyi tamɽenyi, taminyrina tɔk.
23 ki lomur linaŋna li Yecu eḏilŋiiḏini lizi ṯay ṯi, na yiḏla yuŋwun orɔ kaka ṯuɽi-wri. na gi lizi aruŋw, kwiri tor teḏi yuzif; na yuzif orɔ tor teḏi haali, 24 kwir tor teḏi maṯṯaat, kwir tor teḏi laawi, kwir tor teḏi malki, kwir tor teḏi yanna, kwir tor teḏi yuzif, 25 kwir tor teḏi mattaaṯiya, kwir tor teḏi aamuuz, kwir tor teḏi nahuum, kwir tor teḏi hazli, kwir tor ṯeḏi najja, 26 kwir tor teḏi maaṯ, kwir tor teḏi mattaaṯiya, kwir tor teḏi zimay, kwir tor teḏi yuzif, kwir tor teḏi yahuuḏa, 27 kwir tor teḏi yuhanna, kwir tor teḏi riiza, kwir tor teḏi zarubaabil, kwir tor teḏi zaltiil, kwir tor teḏi niiri, 28 kwir tor teḏi malki, kwir tor teḏi addi, kwir tor teḏi guzam, kwir tor teḏi almuudaam, kwir tor teḏi iir, 29 kwir tor teḏi yuuzi, kwir tor teḏi aliyaazar, kwir tor teḏi yuuriim, kwir tor teḏi matṯaat, kwir tor teḏi laawi, 30 kwir tor teḏi zimuun, kwir tor teḏi yahuuza, kwir tor teḏi yuzif, kwir tor teḏi yuunaan, kwir tor teḏi aliyaagiim, 31 kwir tor teḏi malaya, kwir tor teḏi meynaan, kwir tor teḏi mattaaṯa, kwir tor teḏi naaṯaan, kwir tor teḏi dauḏ, 32 kwir tor teḏi yazzi, kwir tor teḏi uubiiḏ, kwir tor teḏi buuwaz, kwir tor teḏi zalmuun, kwir tor teḏi nazuun, 33 kwir tor teḏi ammiinaadaab, kwir tor teḏi araam, kwir tor teḏi hazruun, kwir tor teḏi faariz, kwir tor teḏi yahuuḏa, 34 kwir tor teḏi yaguub, kwir tor teḏi izhaag. kwir tor teḏi ibrahiim, kwir tor teḏi taarah, kwir tor teḏi nahuur, 35 kwir tor teḏi zaruuk, kwir tor teḏi rayu, kwir tor teḏi faalak, kwir tor teḏi aabir, kwir tor teḏi zaala, 36 kwir tor teḏi geynaan, kwir tor teḏi arfakzaad, kwir tor teḏi zaam, kwir tor teḏi nuuh, kwir tor teḏi laamak, 37 kwir tor teḏi maṯuuzaala, kwir tor teḏi aknuuk, kwir tor teḏi yarrid, kwir tor teḏi malaliil, kwir tor teḏi geynaan, 38 kwir tor teḏi anuuz, kwir tor teḏi ziit, kwir tor teḏi adam, kwir tor teḏi Allah.
Ṯǝbshiir ṯǝthi Yuhanna kwǝni Ma@maḏaan.
(Maṯṯa 3:1-12Mɔrgus 1:1-8Yuhanna 1:19-28)1 Mǝ yiṯhlǝ oro wrii-ṯɔthni yimǝ-yi Ṯibaryɔɔs Gaysor naani ki-ŋeeleny-na, nǝ Biilaaṯɔs Albɔnṯi oro haakim wǝthi yahuuḏiiyyǝ-ŋwɔ, nǝ Hiiruuḏus oro mɔhaafis kwǝthi Jǝliil-ŋwɔ, nǝ eŋgen kwǝni Fiilibbus oro mɔhaafis kwǝthi ǝzir wǝthi Iyṯɔɔriya-ŋǝ Ṯaraakhuniiṯɔs-gi, nǝ Liisaaniiyuus oro mɔhaafis kwǝthi Ibiiliina-ŋwɔ, 2 nǝ Hanaan-ŋǝ Gayaafa-gi oro Rɔ-asa Rɔppa rǝthi kahana. Ki-lɔɔmɔr-la ṯǝ kila, nǝ ŋiɽaŋal ŋǝthi Allah iila naana-gwɔ Yuhanna kwir tɔr ṯǝthi Zakkariiyyǝ ki-sahraa-na. 3 Ṯaŋw nǝ Yuhanna ele ǝzir naana tatap wǝthi bahar-ŋwɔ kwǝni Urḏɔn nɔŋgwɔ aari bǝshirǝ nɔŋwaaraŋw, “Ɔrlaccar ŋikiyaŋi ŋaalɔ ŋwɔdogw mindaŋ aari @ammiḏa, e-ta ǝŋǝsi Allah fivrici ŋikiyaŋi ŋaalɔ kithaay.” 4 Kaka lɔɔthɔnɔr-gwɔ Kiṯaab-na kǝthi kwiɽii kwǝni Isha@ya ŋaarɔŋw,
“Ŋgwa kwette kwɔnaanaa ki-sahraa-na kwǝṯi urnuni
ǝṯɔŋwaarɔŋw,
Daɽimicar Kweelenyi ṯaay-lɔ a rillici raay-la ruuŋwun
ŋwɔreele-la!
5 A yɔɔzɔn tatap uttǝnnilǝ kwɔɽec-kwɔɽec, ǝri ubli
yaayinɔ-ŋwɔsi ŋwundǝr-ŋilɔ tatap,
nǝ raay rɔɽɔŋgwɔnynana laazim ǝrsi rillǝlɔ, nǝ rir
kwurṯu-kwurṯu ǝri miɽinyanni-la.
6 A lizi tatap ese ŋiglǝthǝ ŋǝthi Allah.”
7 Ŋwɔṯaŋw nɔŋwɔccǝ ŋwɔdɔŋwa ŋwa ŋwɔmǝ iila naana-ŋgwɔ ethisi ǝccǝ @ammiḏa-ŋwɔ, “Ŋaaŋa lir ŋwɔɔla ŋwɔthi yimǝw, ǝyǝ kworo kwiirǝcǝ-ŋǝsi ethi arṯitha ŋirŋasa-lɔ ŋǝthi Allah ŋinḏi ethiila? 8 Ǝrrǝrsi ŋa ŋisaaw ŋinḏir-ŋǝsi-ŋi ethelŋe ethaarɔŋw ŋaaŋa limǝ ɔrlacca ŋikiyaŋi ŋaalɔ ŋwɔdoŋw. Ere aari ibṯǝḏi ethaarɔŋw ki-rɔgwor-na raalɔŋw, ‘Nyiiŋǝ lir kwelle kwǝthi Ibraahiim’ mac. Nyii kwɔŋǝsi andaci, Allah wǝthi ŋɔma ethi ruusi yaali kiyɔ kwelle kwǝthi Ibraahiim! 9 Kallany kimǝ naanalɔ cɔgwo-cɔgwop ethi undǝthǝ yaaɽi-lɔ rɔvɔɔ-ri-na; kwaaɽi kweere kwiti kwiriiɽi nyɔɔrɔ nyisaaw mac tǝ, ǝri uɽuthǝthǝlɔ mindaŋ ŋwɔ kǝṯṯini kithaay kiigǝ-nǝ.”
10 Nǝ lizi uṯicǝlɔ nǝrǝccǝŋw, “E-ta nyiiŋǝ lǝrri aathaŋw?” 11 Nɔŋwsi ǝŋnici nɔŋwsǝccǝŋw, “Mɔŋwɔthi kweere yǝmiisǝ yiɽǝn, laazim ŋwɔ inḏǝthǝ keṯṯe ŋgwa kwiṯi kwǝthi mac, nǝ kweere kwǝthi ethneya, laazim ŋwɔsi-ṯǝ ǝrriŋw tok.” 12 Nǝr iila lokwo kila lǝṯi allilla ṯɔlba ethi aari @ammiḏa, nǝr uṯicǝlɔ nǝrǝccǝŋw, “Yaa Mɔ@allim aatha kwǝnyii ǝrri?” 13 Nɔŋwsi ǝccǝŋw, “Ǝṯeere ṯǝmsǝ-lɔ ŋgwa mac kwǝṯir-ŋǝsi-ŋi andaci ethi alla.” 14 Nǝ jesh kwokwo tok uṯicǝlɔ nǝrǝccǝŋw, “Nǝ nyiiŋǝ tǝ? Aatha kwǝnyii ǝrri?” Nɔŋwsǝccǝŋw, “Ǝṯeere aagitha kwizi kweere gwuruushǝ ŋɔmaŋi-na mac, wala ethi allasi kwizi kweere ŋiɽaŋali naana ceg-cegi ŋir ŋǝluŋw. Ǝṯi ammini mǝhiyǝ wǝṯir-ŋǝsi inḏǝthǝ.”
15 Nǝ lizi tatap kinaŋw ǝkkici kwomne kizǝn kwir ŋilim ethi ǝrrini, nǝraari ibṯǝḏi eṯhaari fǝkirǝ ki-rɔgwor-na ethaarɔŋw, Yuhanna kwir-mi Kwɔrɔstɔ kǝzinni! 16 Nǝsi Yuhanna ǝŋnici tatap nɔŋwsǝccǝŋw, “Nyii kwǝṯi-ŋǝsi ǝccǝ @ammiḏa ŋaaw-ŋi; laakin ŋgwa kwinḏi ethiila kwette kwɔthǝmthiny-lǝ beṯṯen ŋɔma-ŋi, ninyeere ɔvthanni mac ethi kǝdici yithwǝnu yuuŋwun. Kwundǝr-ṯǝ kwɔŋǝsi ǝccǝ @ammiḏa Ṯigɽim-thi Ṯirllinǝlɔ ter nǝ iigǝ-yi tok. 17 Nɔŋw ǝthi yumuugwulǝ kiriny yǝthi-yi urnǝsi, nɔŋwɔthi ṯiganyjiri ṯǝṯɔŋw-thi suuɽi kɔwaaɽalɔ, ŋwɔ firṯatha ŋwaana ki-tuuluŋw-nǝ, laakin lugwol-tǝ ŋwuuɽǝsi iigǝ-yi witi wǝṯi iɽinyannalɔ mac.” 18 Ǝṯi Yuhanna ǝccǝ lizi bǝshirǝ ŋiɽaŋali ŋisaaw ŋǝthi Allah raay-ri rirna ter-ter, aṯɔŋwsi tuurǝccǝlɔ ethi duŋgwǝci raay reeŋen. 19 Nǝ Yuhanna ǝrmici mɔhaafisa kwǝni Hiiruuḏus, kaka kaṯṯinǝthi-ŋgwɔ eŋgen kwayɔ kwuuŋwun kwǝni Hiiruuḏiiyyǝ, nǝ nɔŋwsǝni ŋǝrrǝ-ŋwsi tok ŋuuru ŋigii. 20 Naaɽi nǝsi-mǝ Hiiruuḏus ǝrri ŋigii rerrec, rnɔŋgwɔ kette Yuhanna-ŋwɔ ki-sijin-nǝ.
Ma@muuḏiiyya kwǝthi Yǝcu.
(Maṯṯa 3:13-17Mɔrgus 1:9-11)21 Mǝ lizi tatap aari @ammiḏa, nǝ Yǝcu aari @ammiḏa tok, nǝ kinaŋw naarɔŋw-tǝ kinnǝ kiyiiriny nǝ leere ḏiŋǝlnǝ kworo. 22 Nǝ Ṯigɽim Ṯirllinǝlɔ ter dappitha duŋgwun-lǝ ṯir kaka kɔɔthɔr. Nǝ ṯogɽo ɔɽa ki-leere-na ṯaarɔŋw, “A kwir Tɔr tiinyi tamɽany-na-gaa aatha kweere. Nyii kwaamina beṯṯen ŋaaŋgi.”
Lugwurnǝyin lǝthi Yǝcu Kwɔrɔstɔ-ŋa.
(Maṯṯa 1:1-17)23 Mǝ Yǝcu aari ibṯǝḏi ŋothɽor ŋuuŋun, nɔŋworo yithlǝyu tuɽi-wrii, nǝr-gi aarɔŋw kwir tɔr tǝthi Yuusuf kwir tɔr tǝthi Haali, 24 kwir tɔr tǝthi Maṯathaath, kwir tɔr tǝthi Laawi, kwir tɔr tǝthi Malkii, kwir tɔr tǝthi Yanna, kwir tɔr tǝthi Yuusuf, 25 kwir tɔr ṯǝthi Maṯṯaathiiyya, kwir tɔr tǝthi @aamuus, kwir tɔr tǝthi Naahuum, kwir tɔr tǝthi Hasli, kwir tɔr tǝthi Nǝjjaay, 26 kwir tɔr tǝthi Ma-aath, kwir tɔr tǝthi Maṯṯaathiiyya, kwir tɔr tǝthi Shim@i, kwir tɔr tǝthi Yuusukh, kwir tɔr tǝthi Yahuuthǝ, 27 kwir tɔr tǝthi Yuhanna, kwir tɔr tǝthi Riisa, kwir tɔr tǝthi Zarubaabil, kwir tɔr tǝthi Sha-alṯi-iil, kwir tɔr tǝthi Niiri, 28 kwir tɔr tǝthi Malkii, kwir tɔr tǝthi Aḏḏii, kwir tɔr tǝthi Guusam, kwir tɔr tǝthi Elmuuḏaam, kwir tɔr tǝthi @iir, 29 kwir tɔr tǝthi Yuusii, kwir tɔr tǝthi El-@aazar, kwir tɔr tǝthi Yuuriim, kwir tɔr tǝthi Maṯathaath, kwir tɔr tǝthi Laawii, 30 kwir tɔr tǝthi Sham@uun, kwir tɔr tǝthi Yahuuthǝ, kwir tɔr tǝthi Yuusuf, kwir tɔr ṯǝthi Yuunaan kwir tɔr tǝthi El-yaagiim, 31 kwir tɔr tǝthi Mǝlyǝ, kwir tɔr tǝthi Maynaan, kwir tɔr tǝthi Maṯṯaatha, kwir tɔr tǝthi Naathaan, kwir tɔr tǝthi Ḏaawḏ, 32 kwir tɔr tǝthi Yǝssǝ, kwir tɔr tǝthi @uubiiḏ, kwir tɔr tǝthi Buu@az, kwir tɔr tǝthi Salmuun, kwir tɔr tǝthi Nǝh-shuun, 33 kwir tɔr tǝthi @ammiinaaḏaab, kwir tɔr tǝthi Araam, kwir tɔr tǝthi Hasruun, kwir tɔr ṯǝthi Faaris, kwir tɔr tǝthi Yahuuthǝ, 34 kwir tɔr tǝthi Ya@guub, kwir tɔr tǝthi Is-haag, kwir tɔr tǝthi Ibraahiim, kwir tɔr tǝthi Ṯaareh, kwir tɔr tǝthi Naahuur, 35 kwir tɔr tǝthi Suruuj, kwir tɔr tǝthi Ra@uu, kwir tɔr tǝthi Faalij, kwir tɔr tǝthi @aabir, kwir tɔr tǝthi Shaalih, 36 kwir tɔr tǝthi Gaynaan, kwir tɔr tǝthi Arfak-shaaḏ, kwir tɔr tǝthi Saam, kwir tɔr tǝthi Nɔɔh, kwir tɔr tǝthi Laamak, 37 kwir tɔr tǝthi Maṯuushaalih, kwir tɔr tǝthi Akh-nuukh, kwir tɔr tǝthi Yaariḏ, kwir tɔr tǝthi Mahlal-iil, kwir tɔr tǝthi Gaynaan, 38 kwir tɔr tǝthi Anuush, kwir tɔr tǝthi Shiiṯ, kwir tɔr tǝthi Aḏam, nǝ Aḏam oro tɔr tǝthi Allah.