aza 20
ṯuṯizelu ṯeḏi yiziiz ṯeḏi zulṯa kweḏi Yecu
1 ner ṯa orɔ ŋwu, lamin lete, nanuŋwi ki heykal-na kwilŋiiḏina lizi ŋiɽaŋali ŋizaw, na leleny leḏi yiziiz ila nanuŋw gwu, lor li leṯizilŋiiḏini kuruu-na, na lijowit tɔk, 2 ner eca ŋwu: andicanyji ṯi, zulṯa kwunder kwendu kwiri kweti zi gi erri ŋu? ya eya kwinḏeḏa ŋaŋwu zulṯa eḏi zi gi erri? 3 nezi Yecu eŋnici, nuŋw zi eca ŋwu: nyi tɔk kwɔŋazi uṯizelu ŋiɽaŋal ŋi ŋete, andicarnyi ṯi, 4 baptizm kweḏi yuhanna kwir kweḏi kilerena, ya kweḏi lizigwunaŋ? 5 ner zi mumri la, ner aru ŋwa, a kwer ari ḏa? mer kinna eca ŋwu, kweḏi kilerena kwiri, ta, kwenyjeca ŋwu, na a lɔḏɔ lidirna eḏemnici ŋunduŋwu? 6 lakin, mer kinna eca ŋwu, kweḏi lizigwunaŋ kwiri, ta a lizi tatap aci nyuŋwuzi yal yi, kaka arir gwu, yuhanna kwiri kwiɽi. 7 ner eŋnici ner eca ŋwu: ŋiti ŋilŋiicanyji mac. 8 nezi Yecu eca ŋwu: na ŋiti ma ŋaŋa zi andaci nyi tɔk mac ŋeḏi zulṯa kwerre nyi gi kwɔmne ŋgwu.
ṯiŋerɔŋw ṯeḏi ṯuruny
9 nuŋw andaci lizi ŋiŋerɔŋwa, nuŋw zi eca ŋwu: kwor kwete kwukiiḏa yaɽi yeḏi eynab nuŋw zi alaci karṯinya, nuŋw alla loru lɔkwɔ eḏi zi aŋraci, nuŋw ele kuṯu tuk, nuŋw gwu nanni. 10 mindaŋ ma lomur ṯimayini, nuŋw ṯiŋaci loru klu kaḏaama kete eḏefiza nyoru nyɔkwɔ nyeḏi yaɽi. na lor ipii ner əɽi nyiḏak. 11 nuŋw zi ṯiŋaci kaḏaama kete kwokwony, ner ipii tɔk ner erre luŋw, ner əɽi nyiḏak. 12 nuŋw zi ṯiŋaci kwokwony kete, ner orɔ ṯɔɽɔl. nuŋw orɔ kimer kete yəmaŋi nana, ner kaṯu par. 13 na kweleny kweḏi ṯuruny aru ŋwu, aḏa kwenyerri? eḏinyji ṯi ṯiŋaci manuŋ toru tinyi, tamɽanyi; le ta nii ŋunduŋwu-na kezni. 14 lakin ma lor eze ner uŋwunḏizina ner aruŋw: ŋgwu kwiri tiɽŋeyin tir nda; ilar pa, er eɽenye ta, er eḏi nyiŋa kwɔmne tatap kweŋguŋw afi. 15 ner kaṯu ṯiɽegera kəni ner eɽenye. roḏur ma ŋwu ta, e zi kweleny kweḏi ṯuruny errica aḏa? 16 kwila, ŋwukirazi loru lu, mindaŋ ŋwezinḏeḏa lir ter ṯuruny kḏu. mer zi neŋne, ner eca ŋwu: eṯi zi ṯa Allah ruzaŋw mac. 17 nuŋw zi icazalu, nuŋw zi eca ŋwu: ŋuluḏina ṯi manuŋ ŋeni aḏa?
kal kimer durni lir lɔrṯɔ leṯaci,
nuŋworɔ keṯi zi tamḏu tatap.
18 kwere kwiidi kal la ŋgu, ŋwu egrini, lakin ma gwu kal iideḏa la kwere, ŋwu aḏanni.
ŋiɽaŋal ŋeḏi ṯulba ṯeḏi kweleny kweni gezar
19 na leleny ledi yiziiz-ŋa lor li leṯizilŋiiḏini kuruu-na, naŋni eḏi ṯa mida ki lomur ṯa kla, lakin ner ṯenye lizi, kaka ilŋiicar gwu rac, andizaŋw zi gwu nana ŋir ṯiŋerɔŋw kḏu ŋeni ŋeŋen. 20 ner iili yey yi birr; ner ṯiŋa loru eḏele nanuŋw gwu ŋejmeṯ ŋi, ner orɔ kaka lizi lirlalu, ŋidiny, mindaŋ eŋgir ma inḏa ŋiɽaŋali ŋere ŋuŋun ŋeḏi gwu ruzezi kaṯi, eŋgir mulḏaḏa ki zulṯa kweḏi muḏiir. 21 ner andaci ner eca ŋwu: muallim, nyiŋa lilŋiicaŋa, a kweṯami andazuŋw, eṯi zi ami ilŋiiḏini tɔk, na ere ṯemzi la kwere mac lakin leṯizilŋiiḏini ŋeḏi ṯay ṯeḏi Allah ŋir rerem. 22 andicanyji ṯi, ŋiri ŋeḏi kuruu ŋeŋgir ŋi inḏeḏa gezarŋw ṯulba, ya beri? 23 nuŋw elŋe ŋidiny ŋeŋen, nuŋw zi eca ŋwu: 24 eficernyi giriza kete, nyi eze. zura kweḏi eya kwiri, ŋwuli ŋi-na? ner eca ŋwu: kweḏi gezar kwiri pa. 25 nuŋw zi eca ŋwu: eṯinḏeḏa ma gezarŋw kwɔmne muŋw orɔ kweḏi gezar; eṯi ta inḏeḏa Allah kwɔmne muŋw orɔ kweḏi Allah. 26 ner ulezi ṯay ṯeḏi gwu miḏa ŋiɽaŋali ŋere ki lizi-na, ner nani deny, limɔliŋɽi.
ŋiɽaŋal ŋete ŋeḏi ṯiḏiɽa ŋɽany-na
27 na kla leni lizadduugi, leṯaru ŋwa, ṯiḏiɽa ŋiɽany-na ṯiti tere mac, ila nanuŋw gwu, 28 ner dedricelu ner eca ŋwu: muallim, muuza kwulucanyji ŋiɽaŋali ŋu: ma eŋgen kweḏi kwor-ŋa ay, muŋw ṯazi kwayu lu kwuŋwun kwiti kweḏi toru-na tere mac, ŋofḏana eḏi eŋgen morḏaḏi kwaw la, eḏilŋaci eŋgen kwumay nyoru. 29 ner nani pa ŋianga lir dufɔkwɽeny, na kwir nda agwu kwayu, na kwor ay kwiti kweḏi toru-na tere mac. 30 na ŋgwa kwukwaḏiḏi ŋunduŋwu morḏaḏi la; 31 na ŋgwa kwukwaḏiḏi ŋunduŋwu tɔk morḏaḏi la; ner ṯa orɔ ŋwu ŋete ŋete, mindaŋ ner gwu morḏaḏi la lir dufɔkwɽeny tatap, ner ay, liti leḏi nyoru-na mac. 32 mindaŋ kwaḏan, na kwaw ay tɔk. 33 ki lomur leḏi ṯidiɽa ŋiɽany-na ta, a ma kwaw orɔ kweḏi eya? kaka agwur gwu tatap lir dufɔkwɽeny.
34 nezi Yecu eca ŋwu: eṯi lizi leḏi ṯurmun kḏu amɽaḏizina edagiḏi; 35 lakin, na kla leṯir zi ruzi lofḏana eḏenḏi ki ṯurmun kḏana, na ki ṯidiɽa ŋiɽany-na, liti leṯamɽaḏizina eḏagiḏi mac, 36 er ere ay kwokwony tɔk mac, kaka mer gwu biɽḏi limaleyka, er orɔ nyor nyeḏi Allah, na nyeḏi ṯidiɽa ŋiɽany-na. 37 na ŋedi ṯidiɽa ŋiɽany-na, na muuza kinna ruwezeŋw ŋiɽaŋali lu, muŋw zi lɔ ŋeḏi kwaɽi kwumodi, nuŋw enjici Kweleny yiriny yeni Allah weḏi ibrahiim, na Allah weḏi izhaag, na Allah weḏi yaguub. 38 ŋwu ta, a kwilŋecer eḏaru ŋwu, ki yey-na yuŋwun eti lizi leni layyu leni ta kinna limiiḏu, kaka eṯuŋw gwu orɔ Allah weḏi limiiḏu; na eṯir miiḏi duŋgwun-na.
39 ner eŋnici lɔkwɔ leṯizilŋiiḏini kuruu-na, ner aru ŋwu: muallim, a kwumemba ami andazuŋw. 40 nuŋw ere bonye kwere mac eḏuṯizelu ŋiɽaŋal ŋi ŋere.
Kwruztu kwiri tor teḏi daud-ŋa?
41 nuŋw zi eca ŋwu: ŋɔḏɔ ŋari ŋi ŋu ŋeḏi Kwruztu, kwir tor teḏi dauḏ-ŋa? 42 na dauḏ ŋundu, kiṯam-na keni limazmuur, aru ŋwu:
Kweleny kwandica Kwelenyi kwinyi,
nuŋw eca ŋwu: nani ki ṯii tinyi ṯeḏi mini.
43 mindaŋ ma ŋa ketize ṯuwənu ṯɔŋwa ŋwara-na ŋwɔŋwa.
44 na dauḏ ŋundu ruzi ŋunduŋwu Kweleny. kwiri tor tuŋwun aŋgwuru?
ṯireca eḏaŋraḏa nana ki lizi-na kla leṯizilŋiiḏini kuruu-na
45 nuŋw zi andaci limeḏgen, nezi lizi tatap neŋne, nuŋw zi eca ŋwu: 46 eṯaŋraḏa nana ki lor leṯizilŋiiḏini kuruu-na, leṯinaŋni eḏ irere lu zurṯena, leṯinaŋni lizi eḏagani ŋunduŋwuzi ki zuk-na; leṯamɽi ezir wizaw ki limajma-na, na ezir wuṯemdu ki azuuma-na tɔk. 47 eṯir yaḏa leḏela duənuŋw mindaŋ; eṯir ariri ki yiriny lelu tuk ŋidiny. linderṯa linḏi eḏafi hukma wupa eḏi liḏaḏu la.
Yǝcu mǝr-gwɔ uṯicǝlɔ sɔlṯa-gi kwuuŋwun.
(Maṯṯa 21:23-27Mɔrgus 11:27-33)1 Laamin lette nǝ Yǝcu ǝccǝ lizi @allima nǝ nɔŋwsi ǝccǝ bǝshirǝ Inyjiilǝ tok ki Heikal-na, e-tǝ nǝ rɔ-asa rǝthi kahana-ŋǝ mɔ@allimiin-gi kwǝthi Sherii@a, nǝ lishiyuukh tok iila, 2 nǝrǝccǝŋw, “Andica-nyji-ṯi, a kwǝṯi ǝrri kwomne ŋgwɔ sɔlṯa-gi kwǝndu? Ǝyǝ kwɔrɔ kwinḏǝthǝ-ŋǝ sɔlṯa ŋgwɔ?”
3 Nǝsi Yǝcu ǝŋnici nɔŋwsǝccǝŋw, “Nyii kwɔŋǝsi uṯicǝlɔ tok; andicar-nyii-ṯi, 4 ma@muuḏiiyya kwǝthi Yuhanna kwǝthi ki-leere-naŋw kwirii alla kwǝthi lizigwunǝŋ kwɔrɔ?”
5 Nǝr aari ibṯǝḏi ethisi mɔmri-la deŋgen-na nǝraarɔŋw, “A kwǝr aari tha? Mǝri aarɔŋw, ‘Kwǝthi ki-leere-naŋw kwɔrɔ’, ŋwaarɔŋw, ‘Nǝ ŋaaŋa lende lǝmmincǝ Yuhanna-ŋwɔ?’ 6 Laakin mǝraarɔŋw, ‘Kwǝthi lizigwunǝŋ kwɔrɔ’, ǝnyji dɔŋw kɔlɔ tatap acci yall-yi, kaka nǝmminicǝr-gwɔ Yuhanna-ŋwɔ ethaarɔŋw kwiɽii kwiri.” 7 E-ta nǝr ǝŋnici nǝrǝccǝŋw, “Kwiti kwilŋicana ǝzir mac kwinḏi ṯaka-ŋgi.” 8 Nǝsi Yǝcu ǝccǝŋw, “Nǝ nyii tok ŋiseere andaci mac ŋǝthi sɔlṯa kwǝṯiny-gi ǝrri kwomne ŋgwɔ.”
Mǝthǝl kwǝthi @ɔmmaal ki-jineene-na kwǝthi @ineb.
(Maṯṯa 21:33-46Mɔrgus 12:1-12)9 E-ta nǝ Yǝcu andaci lizi mǝthǝlǝ nɔŋwsǝccǝŋw, “Kwɔr kwɔnaanɔ kwette kwugiithǝ yaaɽi yǝthi @ineb ki-jineene-na, mindaŋ nɔŋwɔccǝ ajjira @ɔmmaala ethi aŋraci, mindaŋ nɔŋweele ki-bǝlǝḏ kwir ter nɔŋgwɔ naana lǝlu-ttuk 10 Mǝ lɔɔmɔr iila lǝthi-li akkɔ @ineba, nɔŋw ɔɔsi khaḏaama naanɔ-gwɔ @ɔmmaal ethi inḏǝthǝ nyɔɔrɔ nyokwo nyǝthi jineene; laakin nǝ @ɔmmaal ippi, mindaŋ nǝrǝɽi rii-ri-na domony. 11 Mindaŋ nɔŋwaaɽi nɔŋwsi usici khaḏaama kithaathɔ kwokwony; laakin nǝ @ɔmmaal ippi tok, mindaŋ nǝr ǝwɽi yǝy-lɔ, fǝthiyǝ-gi e-ta nǝr ǝɽi rii-ri-na domony. 12 E-ta nɔŋwsi ṯiŋacci khaḏaama kir nimrǝ ṯoɽol; naaɽi nǝ @ɔmmaal ippi yǝmmǝŋi tok, mindaŋ nǝr kaṯṯɔ par. 13 Mindaŋ nǝ kwɔr kwǝthi jineene kwǝthi @ineb aarɔŋw, ‘Aatha kwǝnyii ǝrri? Nyii kwɔɔsi tɔɔrɔ tiinyi wɔɽe-wɔɽeny tamɽany-na; nǝ tǝr-tǝ iiɽinǝ rac!’ 14 Mǝ @ɔmmaal ese, nǝr ɔŋwnɔthisi-na nǝraarɔŋw, ‘Tɔr tindǝr-ṯǝ kɔrɔ tinḏi ethi mɔrthathi ŋɔr-la; ilar-pa ǝri ɽeenye, mindaŋ mǝ ŋɔr oro ŋǝri’. 15 E-ta nǝr kaṯṯɔ ŋunduŋw par jineeneya ṯɔɔɽɔthala kwǝthi @ineb nǝr-gwɔ ɽeenye.” E-ta nǝsi Yǝcu uṯicǝlɔ nɔŋwsǝccǝŋw, “Nǝ aatha kwɔrɔ kwinḏi kwɔr-ŋgwɔ kwǝthi jineene kwǝthi @ineb ethi ǝrrici @ɔmmaala? 16 Mɔŋw iila ŋwɔ ɽeenye lɔɔrɔ kila, mindaŋ ŋwinḏǝthǝ @ɔmmaala wɔthaathɔ jineeneya kwǝthi @ineb.” Mǝ lizi neŋne ŋiɽaŋali ŋɔ, nǝraarɔŋw, “Athrɔ ǝṯisi-ṯǝ Allah ruusǝŋw mac!”
17 Nǝsi Yǝcu ecce mindaŋ nɔŋwsi uṯicǝlɔ nɔŋwsǝccǝŋw,
“Ŋiɽaŋal ŋɔ ŋǝthi kiṯaab ŋǝni ǝyǝ ŋaarɔŋw,
‘Kall ŋga kidirnathi lorṯo-lɔ lǝṯi accici kiiracasi faayitha,
kimǝ orlle kimoro mɔhim, ethi kiyall-la tatap’.
18 Kweere nyithak kwiidi kall-la ŋgɔ, ŋwɔ ǝgrininǝ nyɔrom-nyɔrom; na mǝ kall-ŋga iidǝthǝ kwizi-lǝ kweere ŋwɔrona minya-minyak.”
Ṯɔlba ṯǝthi inḏǝthǝ Imbraaṯɔɔra alla bǝri.
(Maṯṯa 22:15-22Mɔrgus 12:13-17)19 Nǝ mɔ@allimiin kwǝthi Sherii@a ŋundu-ŋǝ rɔ-aǝa-ri rǝthi kahana naŋni ethi mithǝ Yǝcu-ŋwɔ kinaṯa kinaŋw-lɔ ṯogdo-ṯogdo, kaka mǝr-gwɔ elŋe ethaarɔŋw kwandisasa-nyji mǝthǝlǝ-ŋgwɔ naana; laakin nǝrǝni lithiinyanna lizi tok 20 Ŋwɔṯaŋw nǝr iili yǝy-yi birr, nǝr usici lizi ŋejmethi, nǝr ruusi rogɽo reeŋen kaka lizi lirllalɔ ŋidiny, mindaŋ ǝŋgirsi mithǝthǝ ŋeere ŋǝŋgwɔŋwsi andasi, mindaŋ ǝŋgir mɔloce ŋgwa kwǝthi sɔlṯa ŋundu-ŋǝ mahkama-gi kwuuŋwun. 21 Nǝ lizi kila lithiŋacar-si Yǝcu-ŋwɔ ǝccǝŋwɔ, “Yaa Mɔ@allim nyiiŋǝ lilŋithi rac ethaarɔŋw ŋǝṯisi andasi nǝ ǝṯŋi aari @allima ŋirllalɔ, nǝ ǝṯeere ṯǝmsi-lǝ kweere mac, laakin ǝṯi aari @allima ŋiɽaŋali ŋir rerrem ŋǝthi ṯaay ṯǝthi Allah. 22 Andica-nyji-ṯi, ŋir shere@i ethi inḏǝthǝ Imbraaṯɔɔra wǝthi Rɔɔma-ŋwɔ ṯɔlba alla bǝri?”
23 Laakin mǝsi Yǝcu iisacci araaya weeŋen, nɔŋwsǝccǝŋw, 24 “Baaŋicar-nyii-ṯi girishǝ kette! Suurǝ kwǝthi ǝyǝ kwir ŋgwɔ yiriny-yi?” Nǝr ǝŋnici nǝrǝccǝŋw, “Kwǝthi Imbraaṯɔɔr kwir-pa.” 25 Nǝsi Yǝcu ǝccǝŋw, “Imba kwǝthi Imbraaṯɔɔr, ǝtǝ inḏǝthǝ Imbraaṯɔɔra; nǝ kwǝthi Allah ǝtǝ inḏǝthǝ Allah.” 26 Nǝ mǝreere ǝthi ŋɔma ethi mithǝthǝ ŋiɽaŋali ŋeere ŋa ŋanḏisa-ŋwsi ki-lizi-na mac tǝ nǝr liŋɽalɔ buruc ŋiɽaŋal-ŋi ŋǝŋnicǝŋwsi-ŋi, mindaŋ nǝr naani tɔc tugwup.
Ṯɔṯalɔ ṯǝthi ṯidiiɽǝ ki-ŋiɽany-na
(Maṯṯa 22:23-33Mɔrgus 12:18-27)27 Nǝ Lisaḏɔɔgiiyyiin-ŋǝ iila lokwo naanɔ-gwɔ Yǝcu, kila lǝṯaarɔŋw ṯidiiɽǝ ki-ŋiɽany-na ṯiti mac, mindaŋ nǝrǝccǝ Yǝcu-ŋwɔ, 28 “Yaa Mɔ@allim, Muusǝ kwɔlɔcca-nyji Sherii@a ŋgwɔ nɔŋwaarɔŋwa, ‘Mǝ kwɔr kweere ai mindaŋ mɔŋw ṯayyi kwayɔ-lɔ kwiira nyɔɔrɔ-na laazim a eŋgen mɔrthathi kweethella, ethi ilŋa-nyji eŋgen ŋgwa kwaayɔ nyɔɔrɔ’. 29 Laamin lette nǝ lɔr naani dɔvokwɔɽony lir ŋiyaŋga; ŋgwa kwɔppa deŋgen-la nɔŋw aagithi, e-ta nɔŋw ai kwiira nyɔɔrɔ-na. 30 Nǝ kwir nimrǝ kwaɽǝn mɔrthathi kwaaw-la, 31 nǝ kwir nimrǝ ṯoɽol tok; e-ta nǝrṯǝ oroŋw kila tatap lir dɔvokwɔɽony, nǝr ai liira nyɔɔrɔ-na. 32 Nǝ kwaathan-tǝ nǝ kwaaw ai tok. 33 Mǝ laamin iila linḏi-li lizi laayɔ ethi diiɽǝ, e-ta ŋwɔmoro kwaaw kwǝthi ǝyǝ rerrec? Kaka mɔŋgworo kwaaw kwǝthi kila tatap lir dɔvokwɔɽony.”
34 Nǝsi Yǝcu ǝŋnici nɔŋwsǝccǝŋw, “Lɔr-ŋa laaw-li lǝthi lɔɔmɔr kɔlɔ lǝṯi aagithathisina. 35 Laakin lɔr-ŋa laaw-li kila lɔvthanna linḏi ethi diiɽi ki-ŋiɽany-na mindaŋ ǝri nanni ki-lɔɔmɔr-la linḏi ethi iila, liti linḏi ethi aagithathisi-na mac. 36 Linḏi ethoro kaka limeleka mindaŋ ǝreere ai mac. Lindǝr-ṯǝ lir nyɔr nyǝthi Allah, kaka mǝr-gwɔ diiɽǝ ki-ŋiɽany-na. 37 Kaka nilŋithinǝ-nyji-gwɔ Muusǝ ethaarɔŋw kila lǝṯi ai lǝrsi diiɽǝ ki-ŋiɽany-na. Nǝ ŋa ŋɔlɔɔthɔna ŋǝthi kwaaɽi kwuuɽathu, nɔŋwsi andasi ŋǝthi Kweeleny kwir ‘Allah wǝthi Ibraahiim, Allah wǝthi Is-haag, nǝ Allah wǝthi Ya@guub’. 38 Wir Allah wǝthi limiithɔ, nɔŋweere oro Allah wǝthi laayɔ mac, kaka ǝṯir-gwɔ miithi duŋgwun-nǝ.”
39 Nǝ mɔ@allimiin kwokwo kwǝthi Sherii@a ǝŋnici nǝrǝccǝŋw, “Yaa Mɔ@allim a kwɔmaami andasiŋw dap-dap!” 40 Ŋwɔṯaŋw mindaŋ nǝreere bonye kwokwony mac ethi uṯicǝlɔ.
Ṯǝṯalɔ ṯǝni Kwɔrɔstɔ.
(Maṯṯa 22:41-46Mɔrgus 12:35-37)41 Nǝsi Yǝca ǝŋnici nɔŋwsǝccǝŋw, “Nǝ lotho lǝṯaarɔŋw, Kwɔrɔstɔ kwir Tɔr tǝthi Ḏaawḏ? 42 Kaka nanḏisa-gwɔ Ḏaawḏ ṯuunyu-thi ṯuuŋwun wɔɽe-wɔɽeny Kiṯaab-na kǝthi Mazaamiir naarɔ-ŋgwɔŋw.
‘Kweeleny kwǝccǝ Kweelenyi kwiinyi-ŋwɔ;
Naanalɔ kɔnɔŋw ki-thii ṯiinyi ṯǝthi mɔni,
43 mindaŋ mǝŋǝ annaci ṯuwǝnǝ-lɔ;
ki-ŋwaara-na ŋwɔɔŋa’.
44 Nuruusǝ-mǝ Ḏaawḏ ‘Kweeleny’; e-ta ǝmǝ Kwɔrɔstɔ oro
Tɔr ṯuuŋwun aŋgwɔrɔ?”
Yǝcu mɔŋgwɔ ɔli ŋiɽaŋal-ŋi ŋǝthi mɔ@allimiin kwǝthi Sherii@a.
(Maṯṯa 23:1-36Mɔrgus 12:38-40)45 Mǝ lizi tatap kettice Yǝcu-ŋwɔ yǝni ciɽiŋill ethi neŋne nɔŋwɔccǝ ṯalaamiiza ṯuuŋwun-ŋwɔ, 46 “Aŋricar mɔ@allimiina kwǝthi Sherii@a, kwǝṯi amɽi ethi iirǝrǝlɔ lijǝllǝbiyǝ-li lɔɔla, nǝ ǝṯir amɽi ethisi lizi akikanni ṯiiɽǝthi-nǝ ki-lisuug-nǝ; ǝṯir kwugwurbuni lɔrsiya ki-limajma@-na, nǝ ki-yǝzir yisaaw-yisaaw ki-yǝzuumǝ-nǝ. 47 Ǝṯir aagatha leethela lir laaw faayitha kweeŋen, nǝ ǝṯirsi ɔrnatha dɔɔnɔŋwɔ kweeŋen, ǝṯir aari kiyiiriny ŋidiny lǝlu-ttuk. Linḏi ethaavi hɔkwɔmǝ wɔppa wumni!”