aza 15
taŋal tuḏuḏu
1 na kla leṯallila ṯulba lizi li liki rugwori ḏuŋgwaḏa eḏi niŋnaci Yecuŋw, 2 na lifarzi-ŋa lizi li leṯizilŋiiḏini kuruu-na ermiḏeḏina, ner aru ŋwu: kwizimini kweṯi zi enji liki rugwori kiloɽu-na, eṯir li eḏne duŋw.
3 ŋwu ṯaŋwu, nuŋw zi andaci ŋu ŋir ŋiŋerɔŋw, nuŋw zi eca ŋwu: 4 muŋw eḏi kwete daŋgal-na yaŋali ruɽi-ṯndni, mindaŋ muŋw ṯuḏi kete ta, ŋwu zi ere ṯay lu ruɽi-kwaɽnaŋ-wri-kwunitri kwuḏer-na domony manya, eḏele eḏ ica kumɔṯuḏi, mindaŋ eḏinḏa? 5 muŋw inḏa, ŋwu kita yiili la, ŋwu amina. 6 muŋw gi ele duənu ta, ŋwu ere aɽazi limeḏgen duŋw, lizi li leḏi yəni lu manya, eḏi zi eca ŋwu: er amina, menyi gwu inḏa kaŋali kinyi kuḏuḏi. 7 nyi kwecaŋazi ma ŋwa, ṯinyiŋlana ṯeḏi kla linanni kilerena ŋiɽaŋal ŋi ŋeḏi kwete kwiki ṯugwori muŋw orlaci ŋikyaŋi ŋwudɔŋw, ṯitemḏi ṯinyiŋlana ṯeŋen ŋiɽaŋal ŋi ŋeḏi lizi leni lofḏana lir ruɽi-kwaɽŋan-wri-kwuniṯri, liti leŋgorla rugwori lu mac.
ŋamal ŋir faḏḏa ŋuḏuḏu
8 ya ma kwaw kwere eḏi ŋamali wri ŋir faḏḏa, muŋw zi ṯuzi ŋete ta, ŋwu ere kete fori eḏi ferṯe duənuŋw lu tɔk manya, eḏeca ezir lu tuctuc, mindaŋ eḏi zi inḏa? 9 muŋw zi inḏa ta, ŋwu ere aɽazi limeḏgen duŋw, lizi li leḏi yəni lu manya, eḏi zi eca ŋwu: er amina, menyi gwu inḏa ŋamali ŋuṯuḏaḏi nyi. 10 nyi kwecaŋazi ma ŋwa, eṯi limaleyka leḏi Allah nyeŋlena kaka ta ŋwu, ŋiɽaŋal ŋi ŋeḏi kwizi kwete kwiki muŋw orlaci ŋikyaŋi ŋwudɔŋw.
tor tuḏuḏu
11 nuŋw aru ŋwu: kwor kwete kweḏi nyoru nyiɽen nyir nyɔŋwor; 12 nuŋweca tɔkwɽeny ŋwu: papa, inḏeḏe nyi kwɔmne kwinyi kweŋginyji kannaci kwaḏan. nezi ṯernyin kannaci kwɔmne nden tɔk. 13 nuŋw nani kra tɔkwɽeny ŋwamin ŋwere caw, nuŋw lufezi kwɔmne tatap duŋw, nuŋw gi ele kuṯu tuk. nuŋw gwu kiraza kwɔmne lu kwuŋwun ki ŋiɽaŋal-na ŋiki. 14 mindaŋ muŋw ṯuza tatap, na yaŋwu enḏiḏa ezir wa yu tɔrtɔr, na ŋuway enḏiḏa. 15 nuŋw ele eḏi nani nanu gwu kwor kwete kweḏi ezir wa, nuŋw uzi kwuḏer-na eḏ ii yizaŋi lu. 16 nuŋw naŋni eḏi bii kari kuŋwun lugwɔli liiḏi yizaŋ. na kwizi ere kwere kwukitiza yey mac. 17 mindaŋ ma ṯugwor ṯuŋwun kiɽṯa, nuŋw andizana, nuŋw aru ŋwu: aḏri; papa kwinyi kweḏi yaḏaama yitezir yeṯi ye eḏneya mindaŋ eṯir tay lu. nenyi ta, nenyi naŋni eḏayḏalu yaŋwu yi. 18 nyi kwudiɽi, nyaɽa nanu gwu papa, nyeca ŋwu: kwumenyi əkici kwedi kilere-na lɔmori puɽcur, ŋaŋwu tɔk. 19 nyi kwiti kwofḏana pa kwokwony mac eḏari, nyi kwiri tiɽŋelu. ruzenyi kaka kaḏaama kɔŋwa. 20 nuŋw diɽi, nuŋw ele eḏi ṯernyin-ŋa. lakin, nanuŋw ki tay la tuk kwinḏi, na ṯernyin iza, na ŋimɽi yaḏa duŋgwun, nuŋw afri, nuŋw miḏa-na, nuŋw agani ṯunyu ṯi. 21 na tor eca ṯernyin ŋwu: papa, kwumenyi əkici kweḏi kilerena lomori puɽcur, ŋaŋwu tɔk. nenyere ofḏani kwokwony mac eḏari, nyi kwiri tiɽŋelu. 22 na ṯernyin eca yaḏaama ŋwu: afar kwofan kwizaw frafra, kwuṯemḏi, oɽaci; enjici kaṯima ki lamin, yiḏwanu ŋwara tɔk. 23 mulḏar tiḏri kra tir limaḏar, a eɽenyje, er ye, er amina. 24 kaka ay gwu tor kru tinyi, na timɔmiiḏi kwokwony; nuŋw eni tiḏuḏu tɔk, na timinḏini. ner naŋni eḏamina.
25 na tiɽŋeyin tir nda nana kwuḏer. mindaŋ muŋw ṯaŋa, muŋw ilizi duənuŋw keṯɔk, nuŋw niŋnaci kwurna kwaru, ṯiṯi gwu lizi tɔk. 26 nuŋw ornuti kaḏaama kete, nuŋw uṯizelu, nuŋw eca ŋwu: aḏa kwiri manuŋ? 27 nuŋw eca ŋwu: aŋgalu kwir pa kwumila, na ṯarnyalu eɽenyje tiḏri tir limaḏar, kaka muŋw gwu kaṯazi kwizaw, kwufirli nana tɔk. 28 nuŋw ərum, nuŋw derne eḏenḏi. ŋwu ṯaŋwu, na ṯernyin ru par nuŋw dadizelu. 29 nuŋw eŋnici ṯernyin, nuŋw eca ŋwu: aḏri; nyi kwəkicaŋa ŋɔḏɽor yiḏleyu yuru; eṯi ŋa ere ofḏaci ŋiɽaŋali lu ŋere mac; eṯinyi ere inḏeḏa tɔŋe tere eḏi ri amina limeḏgeri li linyi too. 30 mindaŋ ma tiɽŋelu ila kru, tuṯuzizaŋa kwɔmne ŋijin ŋi ta, na eɽenyje tiḏri tir limaḏar. 31 nuŋw eŋnici ṯiɽŋeyin, nuŋw eca ŋwu: tor tinyi, a kwunannindi pa dɔk; na ta kwɔmne kwinyi eni kwɔŋwa tatap tɔk. 32 kanya kimami eḏamina, eḏi nyeŋlena tɔk; kaka ay gwu aŋgalu ŋgwu, na kwumɔmiiḏi kwokwony; nuŋw eni kwuḏuḏu tɔk, na kwuminḏini.
Kaaŋal kɔthɔɔthɔ.
(Maṯṯa 18:12-14)1 Laamin lette nǝ kila lǝṯi allilla ṯɔlba lizi-li ligii rɔgwori tok, nǝr iila ethi niŋnaci Yǝcu-ŋwɔ. 2 Nǝ Lifirriisiiyyiin-ŋǝ mɔ@allimiin-gi kwǝthi Sherii@a aari ibṯǝḏi ethi ǝrmithǝthǝnǝ, nǝraarɔŋw, “Kwɔr ŋgwɔ kwotho kwǝṯi ǝmmini lizi ligii rɔgwori ǝṯir-li ethne!” 3 E-ta nǝsi-mǝ Yǝcu andaci mǝthǝlǝ-ŋgwɔ nɔŋwsǝccǝŋw,
4 “Ǝngi kwette kwaalɔ ǝthi yaaŋali ruɽi-ṯɔthni, mindaŋ ǝŋgiŋw tɔɔthi kette e-ta ǝŋgiŋw ǝrri aatha? Ŋwɔsi ṯayyalɔ kiya yir ruɽi-kwaɽiŋan-la wrii-kwunǝṯɔrri ki-wuthǝr-nǝ, ǝŋgiŋw ele ǝŋgiŋw naŋna-lɔ ŋga kɔthɔɔthɔ mindaŋ ǝŋgiŋw kaṯṯisa. 5 Nǝ mɔŋw kaṯṯisa tǝ, ŋwɔ nyeŋlena beṯṯen, ŋwɔɽɔmuthǝ ki-yilli-la, 6 ŋwɔ-gi aaɽitha dɔɔnɔ. E-ta ŋwɔ ɔrnɔṯa limethgen-ŋwɔsi jiiraan-gi dɔŋw, mindaŋ ŋwɔsi ǝccǝŋw, ‘Nyii kwɔmaamina beṯṯen kaka mǝnyii-gwɔ kaṯṯisa kaaŋali kiinyi kɔthɔɔthɔ Ŋwɔṯaŋw ǝri nyeŋlena ki-luuvǝ-nǝ kɔlɔ!’ 7 Nǝrṯǝ oroŋw tok, ŋǝsi andaci, ṯaamana ṯinḏi ethi naani ki-leere-na ṯɔppa ṯǝthi kwikiya kwɔtɔpɔt kwumurlǝ ṯɔgwor-lɔ ethi kila-la lirllalɔ lir ruɽi-kwaɽiŋan-la wrii-kwunǝṯɔrri, liti linaŋna ethi urlǝ rɔgwor-lɔ kwokwony mac.
Girish kithɔɔthaathɔ kwayɔ.
8 “Ya ǝŋgi kwaaw kwette ǝthi girishǝ wrii, mindaŋ ǝŋgiŋw ṯuusi kette, e-ta aatha kwɔŋw ǝrri? Ŋwɔ fuudi lombo, nǝ ŋwɔ ferṯe dɔɔnɔŋwalɔ dar, mindaŋ ŋwɔ naŋnalɔ ŋǝmǝ-ŋǝmmǝŋ ǝzir naana tatap mindaŋ ŋwɔ kaṯṯasi. 9 Mɔŋw kaṯṯasi-tǝ ŋwɔrnɔṯa limethgen nǝ jilraana tok dɔŋw, mindaŋ ŋwɔsi ǝccǝŋw, ‘Nyi-mǝ nyeŋlena beṯṯen kaka mǝny-gwɔ kaṯṯasi girishǝ kithɔɔthathi-nyii. Ŋwɔṯaŋw ǝri nyeŋlena ki-luuvǝ-nǝ kɔlɔ!’ 10 Nǝrṯǝ oroŋw tok ŋǝsi andaci, limeleka lǝthi Allah linḏi ethi aamina beṯṯen kwɔkiya-gi kwette kwǝṯi urlǝ ṯɔgwor-lɔ.”
Tɔr tɔthɔɔthɔ.
11 Nǝ Yǝcu aari isṯimir kandisa-gi nɔŋwaarɔŋw, “Kwɔr kwɔnaanɔ kwette kwǝthi nyɔɔrɔ nyiɽǝn nyir nyoŋwor. 12 Nǝ tokwɔɽony ǝccǝŋw, ‘Papa nḏǝthǝ-nyii lɔɔɽɔŋi liinyi lǝthi ŋɔr ŋɔɔŋa kirem ṯaŋw, linḏi-nyji ethi kannaci kwaathan’. Ṯaŋw nǝ kwɔr kannaci nyɔɔrɔ nyuuŋwun nyiɽǝnḏǝk ŋɔɔrɔ ŋuuŋun. 13 Mǝ nyaamin nyokwo ere nǝ tɔr tokwɔɽony iila kwomne tatap kwǝthi-ŋwɔ, nɔŋw dimmi gwuruushǝ nɔŋw ɔrlacci dɔɔnɔŋwɔ ŋwɔdoŋw. Mindaŋ nɔŋweele ki-bǝlǝḏ kwɔɔlɔna dɔddɔl, nɔŋgwɔ ǝthivǝyini gwuruushǝ-lɔ dɔmɔny ki-ŋiɽaŋal-na ŋigii. 14 Nɔŋw ṯuusi kwomne tatap kwǝthiŋw. E-ta na yaaŋwɔ karbatha bǝlǝḏǝ ŋgwa yuu tottor. Nǝ ŋundu-tǝ nɔŋwɔni kwɔmǝ naanalɔ ṯar-ṯṯar. 15 Mindaŋ nɔŋweele ethi ǝkkici kwette ŋɔthɽor kwǝthi bǝlǝḏ-ŋgwa, mindaŋ nɔŋw ɔɔsi kɔ-thrɔny-na ethi iyici yiizǝŋi-lɔ. 16 Mindaŋ nɔŋw naŋni beṯṯen ethi bii rogɽo ruuŋwun lɔgwoli lǝṯi yiizǝŋ yee, laakin nǝ kwizi ere kweere mac kwɔmǝ inḏǝthǝ kwomne kweere kwǝthi yee. 17 Kwaathan tǝ nɔŋw kithaayini nɔŋwaarɔŋw, ‘Athrɔ yaḏaam tatap yǝthi papa kwiinyi yǝthi-pǝ eṯhneya witṯǝzir wǝṯir yee, laakin nyii-tǝ, enyiitǝ yaaŋwo iɽinyathalɔ kɔnɔŋw-lɔ domony! 18 Nyii kwɔdiiɽi nyeele naanɔ-gwɔ papa kwiinyi nyǝccǝŋw, Papa, nyii kwɔmǝ ǝkkici Allah pir, nǝ ŋaaŋwɔ tok. 19 Nyiiti kwɔvthanna kwokwony mac ethoro tɔr tɔɔŋwa; ruusǝ-nyii kaka kwette kwǝthi yaḏaama yoɔŋwa’. 20 Nɔŋw diiɽǝ nɔŋw aari ibṯǝḏi ethi aaɽitha naanɔ-gwɔ ṯǝrnyin ṯuuŋwun. Laakin a-naanɔŋw-ṯǝ kinǝŋgwu tuk, nǝ ṯǝrnyin ese, mindaŋ nǝgwɔ ŋimɽi yatha, nɔŋw avri nɔŋw mithǝnni naana tǝttǝr, nɔŋw aaganni ṯuunyu-thi. 21 Nǝ tɔr ǝccǝŋw, ‘Papa, nyii kwɔmǝ ǝkici Allah pir, nǝ ŋaaŋwo tok; ninyeere ɔvthanni kwokwony mac, ethoro tɔr tɔɔŋwa’. 22 Laakin nǝ ṯǝrnyin ɔrnɔṯi yaḏaama yuuŋwun nɔŋwsi ǝccǝŋw, ‘Nḏir fira-vra aava kwɔɔvan kwiccaaw a oɽacci. Nǝ ǝnyjici khaaṯima ki-laamin, nǝ yithwǝnu ŋwaara tok. 23 Mindaŋ ele a moltha tithri tirɔɔla, a ɽeenye ǝri yee mindaŋ ǝri nyeŋlena. 24 Kaka naayɔ-gwɔ tɔr tiinyi kɔrɔ, laakin timǝ miithi kirem; nǝ nɔŋwɔni tɔthɔɔthɔ, laakin timǝ inḏini’. Ŋwɔṯaŋw nǝ luuvǝ aari ibṯǝḏi.
25 “Nǝ ki-lɔɔmɔr-la ṯǝ kila nǝ tɔr tɔppa ṯaaŋa wuthǝri. Nǝ ki-thaay-la kwaaɽathi dɔɔnɔ, mɔŋw iilicǝ yiŋna keṯṯok, nɔŋw neŋne muziiga nǝ kuɽugu tok. 26 E-ta nɔŋw ɔrnɔṯi khaḏaama kette nɔŋw uṯicǝlɔ nɔŋwɔccǝŋw, ‘Aatha kwɔrɔ kwǝrrinǝ?’ 27 Nǝ khaḏaam ǝŋnici nɔŋwɔccǝŋw, ‘Aŋgalɔ kwir-pa kwɔmǝ aaɽitha dɔɔnɔ, mindaŋ nǝ ṯamyalɔ ɽenyje tithri tɔrɔɔla, kaka mɔŋgwɔ aaɽa kwisaaw kwɔvthanna’. 28 Laakin nǝ tɔr tɔppa urǝzi ṯɔgwori nɔŋw derne etheele dɔɔnɔ; mindaŋ nǝ ṯǝrnyin ruuthǝ par nɔŋw tuurǝccǝlɔ tur, ethi ǝnḏi kiininy. 29 Laakin nɔŋw ǝŋnici ṯǝrnyin nɔŋw ǝccǝŋw, ‘Iisa-ṯi yithlǝyu kiyɔ tatap yǝṯiŋǝ-yi ǝkkici ŋothɽor, naŋeere ɔvthaci waamira-lɔ weere ḏuṯ. Nǝ aatha kweere kwɔmǝ-nyii inḏǝthǝ? Wala kinnǝni too teere tǝthi-ri kettice limathi liinyi ŋiirinǝ ŋeere! 30 Laakin mǝ tɔr tɔɔŋwa kirɔ aaɽitha dɔɔnɔ, tǝthiviyinǝ ŋɔɔrɔ-lɔ ŋɔɔŋa domony ki-liijin-ǝ, nǝ ɽenyje ŋunduŋw tithri tɔrɔɔla!’ 31 Nǝ ṯǝrnyin ǝŋnici nɔŋwɔccǝŋw, ‘Tɔr tiinyi, a kwɔnanni-pa kɔnɔŋw nyii-gi nyaamin tatap, nǝ ŋgwa tatap kwǝni kwiinyi, nɔŋwɔni kwɔɔŋa. 32 Laakin ŋovthanna-pa kǝniny ethi kette luuvǝ ethi aamina, kaka nǝni-gwɔ aŋgalɔ ŋgwo kwaayɔ, laakin kwɔmǝ miitha kirem; nǝ nɔŋwɔni kwɔthɔɔthɔ tok, mindaŋ kwɔmǝ inḏinǝ kirem’.”