ṯagna
1 nyi, kweni yahuuza, kwir kaḏaam keḏi Yecu Kwruztu na eŋgen kweḏi yaguub-ŋa, kwagnaŋazi leni lornuṯirzi, leṯi zi Allah wir Papa amɽi, limɔŋw zi aŋraci tɔk eḏi Yecu-na kweni Kwruztu.
2 eḏi ŋimɽi, na ŋiɽena, na ṯamɽa tɔk kikindeḏi nani ŋa gwu.
ṯireca ṯeḏi limuallim lir ləluŋ na ṯikiyaḏa lu cilcil
3 limɽi linyi, nyi kwumorɔ zurum eḏi luca ŋaŋwuzi ŋiɽaŋali ŋeḏi ŋigileḏa ŋeri—ŋeni ŋalu tɔk—lakin ŋofḏana eḏi turecaŋazi lu tur eḏi roce ṯəmna kḏa ṯinḏeḏenyji tuc lir lizi lirlinelu ter eḏi Kwruztu-na. 4 kaka mer gwu enḏa lɔkwɔ nyetec, liti leṯinyizi Allah nana mac, limerzi ruzi kaṯi kerreny tuk, kaka ofḏanar gwu eḏi zi hakwumi, linderṯa leṯurli ṯimeca ṯeḏi ŋimɽi ŋeḏi Allah weri eḏizerri nyiḏak nyiḏak ŋeḏi kaduwa kiki, ner nyindini Yecuŋw Kwruztu, kwir Muallim kweri na Kweleny kweri kwutuput.
5 ŋinaŋnanyji eḏi zi kiḏeynici ŋaŋwuzi ŋa tatap ŋilŋiiḏi ŋazi kinna ŋeḏi Kweleny—kwumɔ kileḏi lizi ruwezaŋw zi gwu lu kezir weḏi mizrŋw, na kwaḏan nuŋw zi kiraza lu kla liti lemnica ŋunduŋwu mac. 6 na kwokwony, limaleyka lɔkwɔ limɔ derne eḏi nani kezir wukita zi gwu Allah, ner zi kaṯa likəkina ŋwoɽuŋ ŋi ŋweṯinanniḏa dɔk kiriim-na ndɔm ndɔm kuṯelu, eḏi gwu nani mindaŋ ma lamin lupa ila leḏi hukm. 7 kaka zaḏuum-ŋa amuura gi, na yayin yirkaḏizelu, ner borgwony-na beṯen kaduwa gi keḏi aŋna; ṯaŋwu ner kiraḏa lu kigə-na weṯinanni dɔk, ner orɔ ṯireca ṯeḏi igə weḏi hukm.
8 ner ṯa orɔ ŋwu tɔk ŋeḏi lor klu kirem; eṯi zi riŋliṯ mulɔtɔ eḏi borgwony-na ŋikya ŋi beṯen; eṯir derne eḏinyizi zulṯa nana mindaŋ eṯir zi erri luŋw lir leḏi ŋiniṯ. 9 lakin mikhayil, kwir rayiiz weḏi limaleyka, ki lomur limerli urreḏi kaŋna la weḏi muuza ŋundu-ŋa ibliiz yi, nuŋw ere bonye mac eḏefica ŋunduŋwu ŋiɽaŋali ŋir luŋw eḏi ŋi ruzi kaṯi, nuŋw eca ŋwu: Kweleny kwɔ ŋa kiɽaci. 10 lakin na lor klu, eṯir ruzi kwɔmne tatap luŋw kwiti kwilŋiiḏir mac, na kwɔmne gi ŋgwa kweṯir elŋe-na kaka kweṯi kwɔmne kweḏi yaɽi-na elŋe-na domony, er ṯa kiraḏa lu. 11 eyewey kweḏi lizi klu, kaka kwaḏiḏir gwu ṯay ṯeḏi kayiin, ner firgaḏi nana eḏaki ŋiɽaŋali pir kaka balaamŋw ŋiɽaŋal ŋi ŋeḏi ṯəgina, ner kiraḏa lu ki ŋudurlaḏu-na kaka kworu kweni koruh. 12 lizi klu eṯir kiici ŋaŋwuzi ŋumaṯi ŋalu ŋami. eṯir gwu urleli, eṯir ere ɽuni kwizi kwere mac, illi rɔgwɽɔ reŋen dak; liri kaka ŋwebleṯ ŋwiira kaw-na, ŋwuṯiŋaṯizi kurun; liri kaka yaɽi yayyu nana, yiti yeṯi riɽi kwɔmne kwere mac, mindaŋ eṯir zi alliḏalu; 13 liri kaka ṯujul ṯilagḏina ṯumbiny ṯeṯi kakiṯa kuḏɔ ndɔṯɔma kəni, na eṯir ṯa kakiṯa feḏiya kweŋen. liri kaka rorum reṯi ireri ki lere, er inḏa kirimi kiriim-na ndɔm ndɔm kuṯelu, kimerzi ketize.
14 ŋeḏi lizi klu nezi aknuuk andaci ŋiɽya ŋi, kwunderṯa kwukwaḏiḏi adamŋw, kwir ŋelŋe ŋir nimra dufɔkwɽeny, nuŋw aruŋw: izarṯi, Kweleny kwumerli ila litezir lirlinelu ter, 15 eḏi zi ketice tatap zeyria, eḏi zi kete liki kaṯi kwɔmne gi kwumererri, kwiti kweṯir gi nii Allah-na mac, na ŋiɽaŋal ŋi ŋifirli tɔk ŋeḏi lizi kla liki, ŋeṯir zi andizaza ŋunduŋwu nana. 16 linderṯa leṯi məmilḏinyamin tatap; liti libii kwɔmnekwere ḏuṯ; leṯikwakiḏaḏa zurum lu kweḏi rɔgwɽɔ reŋen ṯuɽuk; eṯir ruwa ŋiɽaŋali ki runyu-na reŋen ŋupa ŋupa; eṯir kekeɽinji lizi lu eḏaruŋw, liɽenjina domony eḏəgini kwɔmne kweḏi rɔgwɽɔ reŋen dak.
17 lakin, limɽi linyi, eṯi zi kiḏayini ŋandizazi yafur yeḏi Kweleny kweri kweni Yecu Kwruztu, 18 ŋandicar ŋazi ŋu: ki nyamin la nyeḏi kwaḏanŋw er nani kla linḏi eḏariri ṯəmna ṯir rerem yima rac, linḏi eḏizerri ŋeḏi kaduwa keŋen. 19 linderṯa klu, leṯurreḏa lizi-na, urir gwu leḏi ṯurmun domony, nezi gwu Tigɽim ṯirlinelu ter ere nanni-na mac. 20 lakin ŋaŋa, limɽi linyi, ŋofḏana eḏi duŋgwuŋgwazi rɔgwɽɔ ralu ṯəmna ṯi ṯirlinelu ter; eṯari ki yiriny eḏi Tigɽim-na ṯirlinelu ter. 21 dirnaṯizar rɔgwɽɔ ralu ki ṯamɽa-na ṯeḏi Allah; tillicaŋa gwu ŋimɽya ŋeḏi Kweleny kweri kweni Yecu Kwruztu, kwinḏi eḏinḏeḏa ŋaŋwuzi ŋimiiḏa, ŋinḏi eḏi nanniḏa dɔk. 22 eṯi zi firlaza la lɔkwɔ lajila ki ṯəmna; 23 kileḏerzi lɔkwɔ, ezi mulḏa igəŋi kworɔ ɽuṯ; eḏi ŋazi ŋimɽi yaḏa ŋiḏeny ŋi, na eṯi firazi yireṯi kya tɔk yeṯizi ŋikya ŋeŋen ruŋwi nana.
24 eḏi ŋgwa kweṯeḏi ŋuma eḏaŋraci ŋaŋwuzi eḏere iidi mac, eḏirli ŋaŋwuzi ki yey-na yeḏi ŋiniṯ ŋuŋun ṯinyiŋla ṯi-na ṯupak, liti leḏi ŋikyaŋi-na ŋere mac, 25 eḏuŋw ortani, kwir Allah wutuput wir Kwigileḏa kweri Yecu ŋgi kweni Kwruztu, kwir Kweleny kweri tɔk, eḏuŋw ortani ŋiniṯ ŋi, na ŋeleny ŋi, na ŋuma ŋi zulṯa gi tɔk, iti nani gwu ŋwomur ŋwere kinna mac, kirem, na dɔk dɔk. emba.
1 Nyii kwǝni Yahuuthǝ, kwir khaḏaam kǝthi Yǝcu Kwɔrɔstɔ, nǝ kwir eŋgen kwǝthi Ya@guub-ŋǝ. Nyii kwɔlɔcca-ŋǝsi kila lɔrnɔṯɔsi Allah, kila linannɔ ki-ṯamɽa-na ṯǝthi Allah wir Papa, kila linannɔ ki-ṯaŋrica-na ṯǝthi Yǝcu Kwɔrɔstɔ.
2 Ethi ŋimɽi-ŋǝ ŋiiɽǝnnǝ-ŋi nǝ ṯamɽa ṯir min-min kikindǝthici ŋaaŋwɔsi.
Mɔ@allimiin kwir lǝluŋw.
3 Limǝthigǝri liinyi lamɽa-nyji, nyii kwǝthi sɔɔrɔma beṯṯen ethi lɔcca ŋaaŋwɔsi ŋiglǝthǝ ŋa ŋɔɽɔmaṯṯir-gwɔ-na, mǝnyii iccini ŋiɽaŋal-ŋi ŋir ḏɔrɔɔri nǝŋǝsi lɔcca tɔc, ethi firlli ŋaaŋwɔsi naana, ethi rocce ṯǝmminǝ kitha ṯinḏǝthǝ Allah lizi luuŋwun lirllinǝlɔ ter. 4 Kaka mǝgwɔ lizi lokwo liira Allah-na ǝnḏǝ dǝŋgǝr-nǝ nyettec, lǝṯi urlulli ŋiɽaŋal-lɔ ŋǝthi ne@ma kwǝthi Allah wǝri, ethisi ruusi ŋiɽaŋal ŋigii, lir lizi kila lǝṯi derne Yǝcu Kwɔrɔstɔ-ŋw, kwir Sǝyyiḏ kwǝri kwɔtɔpɔt kwir Kweeleny. Kerreny tuk nǝ Kiṯaab Kirllinǝlɔ ter andasi ŋiɽaŋali ŋir ŋiɽiiya ŋǝthi hɔkwɔm wa wɔmǝr aavi.
5 Nilŋithi-ŋǝsi-vǝ kinnǝni ŋɔ rac tatap kerreny tuk, nǝnyii-tǝ ǝthi sɔɔrɔma ethi kithǝyini ŋaaŋwɔsi ŋiɽaŋali ŋǝthi Kweeleny ŋiglǝthǝŋw-ŋi lizi lǝthi Israa-iil ki Mɔsir-na, laakin kwaathan kwokwo tǝ, nɔŋwsi kiirasalɔ kila liti lǝthi ṯǝmminǝ mac. 6 Kithaayinar limeleka kila lidirna ethi naani kǝzir-nǝ wǝthi ŋɔsɔlṯa ŋeeŋen, laakin nǝr ɔrlacca ǝzir-lɔ weeŋen ŋwɔdoŋw wa wɔnaanir-gwɔ-na. Nǝr kǝkkini ŋwɔɽɔŋw-ŋi ŋwɔṯi nannitha kirim-nǝ dok-dok kuṯṯǝlɔ, kǝzir wɔgittasi-gwɔ Allah lǝkkicǝ Laaminɔ lɔppa kizǝn, kila linḏirsi-li ethisi ǝccǝ haakima. 7 Kithaayinar Saḏɔɔm-ŋwɔsi @amɔɔra-gi, nǝ muḏun-ŋgwa kwirikathisi-lɔ kwǝthi lizi kila lǝrrǝ-si kaka limeleka, nǝr borgwonyne naana beṯṯen kadɔwa-gi kir ŋiijin kǝthi aŋna, mindaŋ nǝr kaṯṯasi jiizǝ kwǝthi iigǝ wǝṯi nannitha dok-dok, jiizǝ kwǝni ṯiirǝcǝ ṯir-lɔ por-por ṯeeŋen tatap.
8 Nǝrṯoroŋw tok, nǝ lizi kɔlɔ ǝthi riŋlitha rǝṯisi duŋgwǝci ethi ǝrrizǝsǝ yaŋna yeeŋen ŋikiyaŋi naana; ǝṯir ruusi sɔlṯa-lɔŋw kwǝthi Allah, mindaŋ ǝṯir ollollo ŋinithi ŋǝthi limeleka lǝthi ki-leere-nɔŋw. 9 Nǝ nǝsi meleka kwir rǝ-iis kwǝni Miikhaa-iil ere ǝrri ŋɔ mac, kinaŋw mǝr urrǝthi Ibliis-yi, niŋaŋlathir-gwɔ kaŋna-la wǝthi Muusǝ ǝyǝ kwɔrɔ kwǝŋgi aavi, nǝ Miikhaa-iil ere bonye ethi kette Ibliisǝ kaṯṯi mac ŋiɽaŋal-ŋi ŋeere ŋir yɔvɔɔlɔ, laakin nɔŋwɔccǝŋw, “Ethi-ŋǝ Kweeleny ǝrmici”. 10 Laakin lizi kɔlɔ tǝ ǝṯir andisasa kwomne naana tatap ŋiɽaŋali ŋigii-ŋigii, ŋgwa kwiti kwilŋithir mac, nǝ ŋa ŋǝṯirsi elŋeṯṯe-na kaka ŋǝṯisi-ṯǝ haywaanaaṯ elŋeṯṯe-na ṯobii@a-thi, nǝrṯoro ŋɔ ŋette-ŋette ŋǝṯisi kiirasalɔ. 11 Ǝnnǝ ṯurvǝ ṯeeŋǝn ṯir-mi! Kaka mǝr-gwɔ kwakithatha ṯaay ṯǝthi Gaayiin. Ŋiɽaŋal-ŋi rǝthi gwuruush nǝr inḏǝthǝ rogɽo reeŋen ṯɔɔthɔŋw kwǝthi Bal@aam kwɔthɔɔthɔ-ŋgi. Nǝr diiɽi ŋǝryǝ-ŋi, kaka ŋǝrrǝsi Guureh mindaŋ nǝr kiirathalɔ tok kaka ŋunduŋw. 12 Laaɽinna lɔrdɔwa lir fǝthiyǝ ki-yǝzuumǝ-nǝ yaalɔ yǝṯisi amɽi yǝthi ŋiyaŋga. Nǝṯirsi-gwɔ kettice yǝy ŋǝthi rogɽo reeŋen dak. Lǝni laaɽinna rweblethi ŋwɔṯisi kɔrɔn iili, ŋwiira kawwa-na. Nǝr aaɽanni yaaɽi yiti yǝṯi riiɽi nyɔɔrɔ mac kaw-gi. Lir kaka yaaɽi kiya yimǝrsi allathalɔ rɔvɔɔ-ri-na, mindaŋ nǝr ayitha keereny-gi tɔc. 13 Nǝri aaɽanni ŋaaw ŋǝthi bahar ŋǝṯi ɔppɔpɔthina nǝṯir-gwɔ kagiṯṯa kitho kǝthi fǝthiyǝ kweeŋen. Nǝr aaɽanni rɔɔrɔmi rǝṯi tiilǝli-lǝ, kira rigitticasi Allah ǝzir-lɔ weeŋen wɔnannathi lur kirim-nǝ lac-lac.
14 Ŋindǝr-ṯǝ ŋɔ mindaŋ nǝ Akh-nuukh kwɔkwaathathi Aḏam-ŋwɔ kwir kwugwurnǝ, kwir nimrǝ dɔvokwɔɽony, nɔŋwsi andasi ŋiɽiiya-ŋi kerreny tuk, ŋǝni ŋeeŋen nɔŋwaarɔŋw, “Kweeleny kwinḏi ethiila limeleka-li luuŋwun lir aalaaf lirllinǝlɔ ter, 15 ethisi ǝvicǝ tatap hɔkwɔma, nǝ ethisi kette tatap kaṯṯi ŋiɽaŋal-ŋi ŋeeŋen ŋigii ŋiti ŋir ŋǝthi Allah mac, nǝ ŋiɽaŋal-ŋi ŋa tatap ŋifirlli-ŋifirlli ŋǝṯisi kila ligii liira Allah-na andisasa ŋunduŋw naana!” 16 Nǝṯǝ lizi oro kɔlɔ lǝṯi ǝrmiṯhǝthǝnǝ nyaamin tatap, nǝ ǝṯirsi kette lithaathɔ kaṯṯi; lǝṯi kwakithatha sɔɔrɔmalɔ kweeŋen kwigii; ǝṯir iiɽi rogɽo-na reeŋen, ǝṯir ɔrtatha lizi naana ŋidiny ŋiɽaŋal-ŋi ŋaami-ŋaami ethi ǝginici rogɽo reeŋen kwomne kweere.
Ṯuuluca ṯǝthi kila linḏi ethi ɔrti.
17 Laakin laazim ǝsi kithaayini ŋɔ liyǝŋgǝri liinyi lǝṯi-nyji amɽi ŋa ŋandica-ŋǝsi kerreny tuk yaavɔr yǝthi Kweeleny kwǝri kwǝni Yǝcu Kwɔrɔstɔ. 18 Nǝrŋǝsi ǝccǝŋw, “Mǝ ŋwaamin ŋwɔthi kwaathan-ŋwɔ iila tǝ, a lizi ruwǝnnǝlɔ linḏi-ŋǝsi ethi ǝrri kathri, lir lizi lǝṯi kwakithatha sɔɔrɔmalɔ kweeŋen kwiti kwir kwǝthi Allah mac.” 19 Lindǝr-ṯǝ kɔlɔ lir lizi lǝṯi aava ṯundǝnnǝnǝ, lǝṯisi kadɔwa keeŋen kǝthi ṯurmun-nǝ kǝkki, liti lǝthi Ṯigɽimǝ-nǝ mac. 20 Laakin ŋaaŋa tǝ liyǝŋgǝri liinyi lǝṯi-nyji amɽi aarir kǝniny isṯimir laccica rɔgɽɔ raalɔ ṯǝmmine-thi ṯaalɔ ṯirllinǝlɔ ter beṯṯen. Ǝṯaari kiyiiriny ŋɔma-ŋi ŋǝthi Ṯigɽim Ṯirllinǝlɔ ter, 21 naanir ki-ṯamɽa-na ṯǝthi Allah, lǝkkicǝ ŋimɽiyǝ kizǝn ŋǝthi Kweeleny kwǝri kwǝni Yǝcu Kwɔrɔstɔ eṯhi inḏǝthǝ ŋaaŋwɔsi ŋimiithǝ ŋǝṯi nannitha dok-dok. 22 Rɔɔthɔr limɽi ki-lizi kila lir rɔgwor-na riɽǝ-riɽǝn ki-ṯǝmminǝ; 23 kilǝthǝrsi lithaathɔ, ethisi alla kiigǝ-nǝ; nǝ lithaathɔ ǝsi baaŋaci ŋimɽiyǝ ṯiiɽǝ-thi-nǝ, laakin a wǝzi yirethi yeeŋen yǝṯi ruuŋwi naana sɔɔrɔm-gi kweeŋen kwigii.
Ṯaara kiyiiriny ṯǝthi ṯiniyǝnǝ.
24 Ethi Allah wǝthi ŋɔma ethi aŋraci ŋaaŋwɔsi, mindaŋ etheere iidi mac, nǝ ethi mɔltha ŋaaŋwɔsi liira lɔɔma-na, linyiŋlana kiyǝnǝ yǝthi ŋinith ŋuuŋun, 25 ethi ŋinith nanni naanɔ-gwɔ Allah wɔtɔpɔt wir Kwiglǝthǝ kwǝri, Yǝcu Kwɔrɔstɔ-ŋgi kwir Kweeleny kwǝri, ethɔŋw ɔrtanni ŋinith-ŋi, ŋeeleny-ŋi nǝ sɔlṯa-gi tok, kiyithlǝ tatap yimǝ ṯamthɔṯṯɔ, nǝ yǝthi kirem-ŋwɔ mindaŋ nǝ yinḏi ethi nannitha dok-dok! Amiin.