aza 8
kwaw kwumiḏir ŋijin ŋi
1 na Yecu ele kayin weni zeyṯuun. 2 ŋurpana tuk nuŋw nani kwokwony ki heykal-na, na lizi ila tatap nanuŋw gwu. nuŋw nanalu, nuŋw zi ilŋiiḏini. 3 na kla leṯizilŋiiḏini kuruu-na na lifarzi tɔk, ner muloce kwayu kwete, kwumiḏir ŋijin ŋi, ner ketizelu keligeny-na. 4 ner eca ŋwu: muallim, kwaw ŋgwu kwumiḏir ŋijin ŋi. kwinḏirer. 5 kuruu-na ta na muuza ellici nyuŋwuzi amra, nuŋw aru ŋwu: acar layu lir ṯaŋwu yal yi. ta na ma ari ŋa ḏa? 6 ŋandicar zi ŋu, mummir gwu, mindaŋ eḏi ŋi kete kari. na Yecu irralu, nuŋw lɔ lamin li kureyu lu. 7 mindaŋ mer lanḏaci ŋiɽaŋali, ŋutizar ŋi lu, nuŋw diɽela, nuŋw zi eca ŋwu: kwere daŋgal-na kwiira ŋikyaŋi-na, eḏuŋw ta aw kal gi kerreny. 8 nuŋw irralu kwokwony, nuŋw lɔ kureyu lu. 9 na kla limɔniŋnaci, ner liŋḏani-na ŋiɽaŋal ŋi ŋeŋen ŋeni ŋiki, ner ru nyete-nyetec; lupa lupa kerreny, mindaŋ ner ele lu tap. ner tayi Yecuŋw lu kwutuput, na kwaw kwurillazalu. 10 na Yecu diɽela, nuŋw inḏa kwayu dak. nuŋw eca ŋwu: kwaw kwalu, lizi lende? kwiti kwere kwumɔŋa kete kari manya? 11 nuŋw eca ŋwu: kwende kwere, Kweleny. na Yecu eca ŋwu: nyi kwiti kwɔŋa kete kaṯi tɔk mac; inḏi ma ta pa, na eṯizerri ŋere ŋiki kwokwony mac.
fori kweḏi ṯurmun
12 nezi Yecu andaci kwokwony, nuŋw zi eca ŋwu: nyi kwiri fori kwedi ṯurmun. muŋw kwaḏiḏa nyuŋwu kwere, ŋwere ele kirim-na mac, ŋweḏi fori-na kweḏi ŋimiiḏa. 13 na ṯa lifarzi eca ŋwu: a kwunḏize rɔgwɽɔ rɔŋwa ki; ŋwu ṯa, ŋiti ŋeḏi fayḏa kwere mac. 14 nezi Yecu eŋnici, nuŋw zi eca ŋwu: menyi ŋi kinna unḏizi rɔgwɽɔ rinyi ki, eṯir ta eni rerem, kaka ilŋiiḏinyi gwu rac ezir wumenyi gwu ila, wilaḏi nyi gwu tɔk. lakin na ere elŋece ŋaŋa ezir winḏi nyi gwu mac, wilaḏi nyi gwu tɔk mac. 15 ŋeṯi ŋi ṯa hakwumi ŋizigwunaŋi. kwiti kweṯi nyi hakwumi kwere mac. 16 lakin, eŋgi nyi ṯa hakwumi, eŋgi nyi ṯa hakwumi rerem, kaka iti ur nyi gwu kwutuput mac. nyiŋa liri-na nden Papa gi kwuzanyi. 17 ŋuluḏina tɔk kuruu-na kalu, mer ŋi unḏi ki lir nden, ŋinderṯa ŋir rerem. 18 nyi kwiri ṯa kweṯi ŋi unḏi ki ŋeḏi rɔgwɽɔ rinyi; na Papa kwuzanyi eṯuŋw ŋi unḏi ki ŋeni nyi tɔk. 19 ta ner eca ŋwu: Papa kwɔŋwa kwende? nezi Yecu eŋnici, nuŋw zi eca ŋwu: a lende lilŋiiḏi nyi, ya Papaŋw kwinyi, eŋgi nyi elŋe, eŋgelŋe Papaŋw kwinyi tɔk. 20 ŋiɽaŋal ŋu ŋandizaŋw zi kezir weḏi kazzina, ilŋiiḏinaŋw zi gwu ki heykal-na. na, kwizi ere mida kwere mac, kaka iti ṯimanniza gwu lomur luŋwun kinna mac.
Yecu kwica yahuuḏa ŋeḏi ŋiɽaŋal ŋinḏi eḏila
21 nuŋw zi eca ŋwu kwokwony: nyi kwele pa ki tay tinyi, na a lenyi naŋni, lakin a lay ŋikya ŋi-na ŋalu. ezir wenyi gwu ele, a liti leḏi ŋuma eḏi gwu ila mac. 22 na yahuuḏ ari: kwu manja eɽenye rɔgwɽɔ a? kaka aruŋw gwu ŋwu: ezir wenyi gwu ele, a liti leḏi ŋuma eḏi gwu ila mac. 23 nuŋw zi eca ŋwu: ŋaŋa leḏi kuṯeluŋw liri, nenyi orɔ kweḏi kindalaŋw. ŋaŋa leḏi ṯurmun kḏu liri, nenyi ere orɔ kweḏi ṯurmun kḏu mac. 24 ŋandicaŋazi ṯa ŋwu, a lay ŋikya ŋi-na ŋalu, ma ṯa ere emnizi nyuŋwu mac, eḏari: kwunderṯa, a ṯa ay ŋikya ŋi-na ŋalu. 25 ta ner eca ŋwu: a kwiri ṯaŋ? nezi Yecu eca ŋwu: nyi kwiri pa rerec ŋgwa keni kwandicaŋazi. 26 nyi kweḏi ŋiɽaŋali ŋuru eḏi zi andaci ŋaŋwuzi, eḏi ŋi hakwumi ŋaŋwuzi tɔk; lakin na kwuzanyi, kwunderṯa kwiri rerem, na ŋiɽaŋal ŋeṯinyji neŋne nanuŋw gwu, ŋinderṯa ŋeṯinyji andaci ṯurmuna.
27 ner ere elŋece mac eḏaruŋw: ŋandizaŋw zi ŋeḏi Papa. 28 ŋwu ṯa nezi Yecu eca ŋwu: ma allazi Toru teḏi kwizigwunaŋ ta, enyi ma elŋe, eḏaruŋwa: kwunderṯa, na kwiti kweṯerri kwɔmne kwere oɽeny mac; ŋiɽaŋal ŋimezi Papa ilŋiiḏini ŋunduŋwu, nuŋw zi ṯa andazi ŋwu. 29 ŋgwa kwuzanyi, eṯuŋw nani nani nyi gwu. kwiti kwumenyi ṯayi lu kwutuput mac, kaka eṯi nyji gwu erri dɔk ŋa ŋeṯəmi ŋunduŋwu-na. 30 muŋw andazi ŋiɽaŋali ŋu, ner alliḏa ŋunduŋwu rugwori nana luru.
na yahuuḏ upaci Yecuŋw ŋiɽaŋali lu
31 na Yecu orlaḏa yahuuḏa nana, yimemnizi ŋunduŋwu, nuŋw zi eca ŋwu: ma nanni ki ṯuruwenizelu tinyi ta, a ami orɔ limeḏgeri linyi rerem; 32 ezi elŋe tɔk ŋirlalu, a ŋazi ŋirlalu kedi. 33 ner eŋnici, ner eca ŋwu: nyiŋa liri pa ŋwola ŋweḏi ibrahiim. nyiŋa lende limorɔ luway leḏi kwizi kwere kinna, a kwɔḏɔ kwari, a likedini? 34 nezi Yecu eŋnici, nuŋw zi eca ŋwu: nyi kwecaŋazi ma ŋwa rerem: kwere kweṯi zi erri ŋiki, kwunderṯa kwiri kwuway kweḏi ŋikya. 35 kwuway kwende kweṯinannazi duənu dɔk. tiɽŋeyin tiri teḏi ŋwuɽele, tinderṯa teṯinanni dɔk. 36 ma ŋazi ṯa Tor kedi, ta a eni limami kedinuŋw rerem. 37 ŋilŋiicaŋazi rac, a liri ŋwola ŋweḏi ibrahiim, lakin a leṯi nyi naŋni eḏeɽenye kaka iira gwu ezir daŋgal-na weḏi ŋiɽaŋal ŋinyi. 38 ŋeṯinyji andazi ŋimenyjeze nani gwu Papa kwinyi, na ŋetiŋazerri ŋaŋa ŋimɔŋazi neŋne nani gwu tarnyalu ṯalu.
39 ner eŋnici ner eca ŋwu: ibrahiim kwiri ṯernyeri. nezi Yecu eca ŋwu: eŋgorɔ nyor nyeḏi ibrahiim, eŋgi zi erri ŋir ga ŋeṯi zi ibrahiim erri. 40 lakin, a liri pa klu lilicenyi lu eḏeɽenye ŋanna kwir kwor kwumɔŋazi andaci ŋirlalu, ŋiniŋnanyji nani gwu Allah, nezi ibrahiim ere erri ŋwu mac. 41 ŋaŋa klu leṯerri ŋɔḏɽor ŋeḏi tarnyalu. ner eca ŋwu: liti lilŋiiḏinyji ŋuruḏni kezir were mac. nyiŋa leḏi Papaŋw kwutuput kweni Allah. 42 nezi Yecu eca ŋwu: eŋgi Allah orɔ Tarnyalu, eŋgi nyi amɽi, kaka ruḏi nyi gwu nani gwu Allah, nenyi ŋgwu ta. nenyi ere ila tugwor ṯi tinyi mac, lakin nuŋw orɔ ŋundu kwuzanyi. 43 a lɔḏɔ liti lilŋiica ŋiɽaŋali ŋinyi mac? kaka iti naŋna zi gwu rugwor ralu eḏi zi neŋne. 44 ŋaŋa liri leḏi ṯarnyalu ṯeni ibliiz, na eṯi zi naŋni eḏizerri ṯugwor ṯi ṯeḏi ṯarnyalu, nuŋw eni ṯindinyiṯi lizi kwɔnkwɔn tuk, eṯuŋw gwu ere eḏi karḏa nani gwu ŋirlalu mac, kaka iirar gwu ŋeni rerem duŋgwun-na. muŋw kəki ŋəluŋi, eṯuŋw zi andazi ŋeni ŋuŋun, kaka enuŋw gwu kwəluŋ, enuŋw gwu ṯernyin ṯeḏi ŋəluŋ-ŋa tɔk. 45 nenyi, kaka andicaŋazi gwu ŋirlalu, a lende lemnecenyi. 46 kwunder kwendu daŋgal-na kwinḏa ŋikyaŋi ŋere duŋgwinyi-na? menyji andazi ŋirlalu, a lɔḏɔ lidirna eḏemnizi nyuŋwu? 47 kweṯiruzi Allah ṯernyin ṯuŋwun, eṯuŋw neŋne ŋiɽaŋali ŋeḏi Allah; a lende liri nyor nyeḏi Allah. ŋwu ṯa, a liti leṯiniŋnaci ŋunduŋwu ŋiɽaŋali mac.
48 na yahuuḏ eŋnici, ner eca ŋwu: nyiŋa liti lami andazuŋw manya, ari nyi ŋi ŋwu: a kwiri zaamri, na kweḏi ṯigɽima-na ṯiki tɔk a? 49 nezi Yecu eŋnici, nuŋw zi eca ŋwu: nyi kwiti kweḏi ṯigɽima-na tiki mac; eṯi nyi ṯa nii Papaŋw-na kwinyi, lakin ŋaŋa, a leṯi nyi ruze luŋw. 50 nyi kwende kweṯinaŋnici rɔgwɽɔ rinyi ŋiniṯi. ŋgwata kwete kweṯinyji neŋnici, nuŋw orɔ kweṯi zi ṯecici. 51 nyi kwecaŋazi ma ŋwa rerem: ma kwizi kwere inyizi ŋiɽaŋali ŋinyi nana, ŋwere inḏa ŋiɽany mac. 52 na yahuuḏ eca ŋwu: ŋimenyjelŋe kirem a kweḏi ṯigɽima-na tiki. ibrahiim-ŋa limɔ pa ay, liɽi li tɔk, ta na ari ŋa ŋwu: ma kwizi inyici ŋiɽaŋali ŋinyi nana, ŋwere inḏa ŋiɽany mac. 53 a kwuṯemḏi ternyeriŋw la teni ibrahiim, timay, a? liɽi tɔk limay. eya kwiri kwuruza rɔgwɽɔ rɔŋwa? 54 nezi Yecu eŋnici, nuŋw zi eca ŋwu: menyi niini-na oɽeny, a ŋiniṯ ŋinyi ene luŋw. Papa kwinyi kwiri kweṯinyi nii-na. kwunderṯa kwari ŋa gi: Allah weri wiri. 55 na wende wilŋiiḏi ŋa? wilŋiiḏi nyi ṯa, nyi, na eŋgi nyi ari: witi wilŋiiḏi nyi mac, eŋgi nyi orɔ kwəluŋ, kaka ŋaŋwuzi. lakin wilŋiiḏi nyi rac, na eṯi nyi inyizi ŋiɽaŋali ŋuŋun nana. 56 na ṯarnyalu ṯalu ṯeni ibrahiim nyeŋlena beṯen lomur li linyi eḏinḏa, na limɔŋw eze, nuŋw li amina tɔk. 57 na yahuuḏ eca ŋwu: a kwende kwumorɔ yiḏleyu ruɽi-riɽen-wri kinna, na a ma eze ibrahiimŋw aŋgwuru? 58 nezi Yecu eca ŋwu: nyi kwecaŋazi ma ŋwa rerem, iti ilŋiiḏir gwu ibrahiimŋw kinna mac, nyi kwiri ṯa. 59 ner uṯi yali yeḏi yi aci, nezi Yecu lucineḏa, nuŋw ru ki heykal-na.
Kwaaw kwumthǝthir ki-ŋiijin.
1 Laakin nǝ Yǝcu ele kaayin-la wǝni Zeiṯuun. 2 Mǝ ŋɔrpana oro tuttuk nɔŋw aaɽitha kwokwony ki Heikal-na. E-ta nǝ lizi iila tatap naanɔ-ŋgwɔ, mindaŋ nɔŋw naanalɔ nɔŋwsi ǝccǝ @allima. 3 Nǝ mɔ@alllmiin-ŋǝ kwǝthi Sherii@a Lifirriisiiyyiin-li mɔltha kwayɔ kwette kwumthǝthir ki-ŋiijin mindaŋ nǝr rilli ŋunduŋw kelgeny-na. 4 Nǝrǝccǝ Yǝcu-ŋw-ŋwɔ, “Yaa Mɔ@allim, kwaaw-ŋgwɔ kwumthir kwǝrrǝ ŋiijinǝ. 5 Nǝ ki Sherii@a-nǝ nǝnyji Muusǝ ǝllici waamira laazim ethisi accathalɔ lir kaka ṯaŋw yall-yi. Nǝ a kwaari-ŋa tha ŋiɽaŋal-ŋi ŋǝni ŋundu?” 6 Ŋandisarsi ŋɔ ŋǝthi-ŋi ṯǝcci ŋunduŋw, mindaŋ ǝŋgirsi kaṯṯasi ŋeere ŋǝthi-ŋi ruusi ŋunduŋw kaṯṯi. E-ta nǝ Yǝcu irralɔ nɔŋw lo laamin-lalɔ kwurǝyu-lu. 7 Nǝrtǝ aari isṯimir ethi uṯiṯicǝlɔ, mindaŋ nɔŋw diɽii nɔŋwsǝccǝŋw, “Ethi ŋgwa kwiira ŋikiyaŋi-na daŋgal-na aaw ŋunduŋwɔ ker-kerreny kall-gi.” 8 Nɔŋwaaɽi nɔŋw irralɔ kwokwony mindaŋ nɔŋw lo-lɔ laamin-li luuŋwun kwurǝyu-lu. 9 Mindaŋ mǝrsi neŋne ŋɔ tǝ, nǝreele kithaay tatap leerek-leerek, lɔppa kerreny, mindaŋ nǝ Yǝcu ṯathinalɔ, ŋundu-ŋǝ kwaaw-gi kwirlɔ kiyǝnǝ yuuŋwun. 10 Mǝ Yǝcu baaŋithala tǝ nɔŋwɔccǝŋw, “Kwaaw kwaalɔ, lende kila? Kwiṯi kweere kwɔmǝ-ŋǝ kette kaṯṯi mac-a?” 11 Nɔŋwɔccǝŋw, “Kwiti kweere mac Kweeleny.” E-ta nǝ Yǝcu ǝccǝŋw, “Nyii tok, ŋeere kette kaṯṯi tok mac; nḏi kǝniny, e-ta eseere akki pir kwokwony mac.”]
Yǝcu kwir fɔɔri kwǝthi ṯurmun.
12 E-ta nǝsi Yǝcu andaci kwokwony nɔŋwsǝccǝŋw, “Nyii kwɔrɔ fɔɔri kwǝthi ṯurmun; kweere kwǝnyii kwaathltha ŋweere ele kirim-nǝ mac, laakin ŋwɔthi fɔɔri-na kwǝthi ŋimiitha.” 13 E-ta nǝ Lifirriisiiyyiin ǝccǝŋw, “Ŋɔnḏɔŋa-ŋi kii ŋǝthi rogɽo rɔɔŋwa. Ŋwɔṯaŋw nǝ shahaaḏa kwɔɔŋa ere oro rerrem mac.” 14 Nǝsi Yǝcu ǝŋnici nɔŋwsǝccǝŋw, “Mǝnyii-ŋi kinnǝni ɔnḏi kiyǝnǝ ŋǝthi rogɽo riinyi, ǝtǝ shahaaḏa kwiinyi oro rerrem tɔttɔr, kaka nilŋithiny-gwɔ nyii kwinḏi ṯaka-ŋgi, nǝ ninyeele ethiilatha ṯaka-ŋgi, laakin ŋaaŋa ta nǝrnyeere elŋece ǝzir winḏiny-yi mac wala winḏiny-gwɔ ethiilatha. 15 Ŋǝṯi-ŋi aari ŋaaŋa haakima ŋir kaka ŋǝthi aŋna, laakin nyiitǝ ninyeere ǝccǝ kweere haakima mac. 16 Laakin mǝnyii kinnǝni aari haakima, ǝtǝ hɔkwɔm wiinyi oro rerrem tɔttɔr, kaka niti nɔrɔny-gwɔ kwɔtɔpɔt kwaari haakima mac, laakin nyii nǝ ŋgwa kwɔɔsa-nyii tok. 17 Ki Sherii@a-na kwaalɔ nǝr lothone ŋaarɔŋw shahaaḏa kwǝthi lizi ndǝn kwɔṯǝthi yǝnǝ. 18 Ŋǝṯiny-ŋi ɔnḏi kiyǝnǝ ŋǝthi rogɽo riinyi, nǝ Papa kwɔɔsa-nyii ǝṯɔŋw-ŋi ɔnḏi kiyǝnǝ ŋǝni nyii.” 19 Nǝr uṯicǝlɔ nǝrǝccǝŋw, “Ṯarnyalɔ ṯende?” Nǝsi Yǝcu ǝŋnici nɔŋwsǝccǝŋw “Ŋaaŋa lende lilŋithi-nyii wala ethelŋe ṯǝrnyǝri-ŋw, ǝŋgir-nyii elŋe ǝŋgi elŋe ṯǝrnyeri-ŋw tok.” 20 Nɔŋwɔni kwandisa ŋiɽaŋali ŋɔ kǝzir wǝthi khazna, kinaŋw naarɔ-ŋgwɔ @allima ki Heikal-na, laakin nǝ kwizi ere kweere mac kwɔmǝ mithǝ ŋunduŋw kaka niti mǝgwɔ saa@ kwuuŋwun ere iila kinnǝni mac.
Ŋaaŋa liti lǝthi ŋɔma etheele kǝzir wǝny-gwɔ ele mac.
21 E-ta nǝsi Yǝcu ǝccǝŋw kwokwony, “Nyii ŋgwɔma-pa kweele kithaay rac, nǝ ŋaaŋa lǝnyii naŋnalɔ mindaŋ ai ŋikiyaŋi-na ŋaalɔ. Kǝzir winḏiny-gwɔ etheele, ere ǝṯhi ŋɔma ethi-gwɔ iila mac.”
22 E-ta nǝ Yahuuḏ aarɔŋw, “Kwinḏi mǝnyjǝni ethi ɽeenye rogɽo ruuŋwunǝ, kaka naarɔ-ŋgwɔŋw, ‘Kǝzir winḏiny-gwɔ etheele, ŋaaŋa liti lǝthi ŋɔma ethiila mac-a?’ ” 23 Nɔŋwsi ǝccǝŋw, “Ŋaaŋa lǝthi kuṯṯǝlɔ lirpa; nyiitǝ ninyoro kwǝthi kindala-ŋw. Ŋaaŋa lɔrɔ lǝthi ṯurmun kɔthɔ, nyiitǝ ninyeere oro kwǝthi ṯurmun kɔthɔ mac. 24 Nyii kwandica-ŋǝsi nǝŋsi ǝccǝŋw ŋaaŋa linḏi ethi ai ŋikiyaŋi-na ŋaalɔ mǝrnyeere ǝmmini mac ethaarɔŋw, ‘Nyii kwɔrɔ Ṯa Ŋgwɔ’.” 25 Nǝrǝccǝŋw, “Ŋa kwir kwǝni ǝyǝ?” Nǝsi Yǝcu ǝccǝŋw, “Nyii kwandica-ŋǝsi kinaŋw-lɔ tuk kwon-kwon. 26 Nǝ nǝnyji ǝthi ŋittǝzir ethisi andasi ŋǝni ŋaalɔ, nǝ ŋuuru ŋǝthi-ŋi ǝccǝ ŋaaŋwɔsi haakima. Laakin ŋgwa kwɔɔsa-nyii kwundǝr-ṯǝ kwir rerrem, mindaŋ nǝnyji andaci ṯurmunǝ ŋa ŋiniŋnaca-nyji ŋunduŋw ṯɔɽɔk.” 27 Nǝrseere elŋe mac ethaarɔŋw ŋandisa-ŋwsi ŋǝni Ṯǝrnyin. 28 E-ta nǝsi Yǝcu ǝccǝŋw, “Mǝ allasi Tɔɔrɔ-la tǝthi Kwizigwunǝŋ-tǝ, ǝmǝ elŋe ethaarɔŋw, ‘Nyii kwɔrɔ Ṯa Ŋgwɔ’; nǝ ǝṯi-nyji ere ǝrri ŋeere sɔlṯa-gi kwiinyi mac, laakin ǝṯi-nyji andasi ŋa ṯɔɽɔk ŋilŋithinǝ-nyji Papa. 29 Ŋgwa kwɔɔsa-nyii nɔŋwɔni kwɔnaanisa-nyii; nɔŋweere ṯiŋatha nyuŋwɔ-lɔ kwɔtɔpɔt mac, kaka nǝṯi-nyji-gwɔ ǝrri ŋwɔɔmɔri tatap ŋǝṯǝmi ŋunduŋw-nǝ.” 30 Mɔŋwsi-ṯǝ andasiŋw tǝ, nǝ lizi luuru ǝmminici ŋunduŋw.
Lizi lir hɔrr nǝ lir lɔwaay.
31 E-ta nǝ Yǝcu andaci Yahuuḏǝ kiya yimǝ ǝmminici nɔŋwsǝccǝŋw, “Maari isṯimir ki-ŋiɽaŋal-na ŋiinyi, e-ta oro ṯalaamiiz ṯiinyi rerrem, 32 nǝ ǝsi elŋe ŋa ŋir rerrem, mindaŋ mǝŋǝsi ŋa ŋir rerrem kǝdu.” 33 Nǝr ǝŋnici nǝrǝccǝŋw, “Nyiiŋǝ lirpa ŋwɔɔla ŋwɔthi Ibraahiim, ninyeere oro lɔwaay lǝthi kwizi kweere ḏuṯ. A kwotho kwǝccǝ-nyjiŋw, ‘Ŋaaŋa likǝdinni’?”
34 Nǝsi Yǝcu ǝŋnici nɔŋwsǝccǝŋw, “Nyii kwǝccǝ-ŋǝsi-mǝ ŋwɔ rerrem, mǝ kweere nyithak ǝrri ŋikiyaŋi aṯɔŋworo kwɔwaay kwǝthi ŋikiya. 35 Kwɔwaay kwiti kwǝti nannitha dɔɔnɔ dok mac. Laakin ǝṯi tɔr oro tǝṯi nannatha dok. 36 Ṯaŋw mǝŋǝsi Tɔr kǝdu ki-ŋɔwaay-na e-ta a kǝdinni rerrem. 37 Nyii kwilŋithi rac ethaarɔŋw ŋaaŋa lir ŋwɔɔla ŋwɔthi Ibraahiim. Laakin nǝrnyii nǝŋnicǝlɔ ethi ɽeenye, kaka niti nikaṯṯisa-gwɔ ŋiɽaŋal ŋiinyi ǝzir daŋgal-na mac. 38 Ŋǝṯi-nyji andasi ŋǝṯi-nyji iisacci Papa-ŋwɔ kwiinyi, nǝ ǝṯisi ǝrri ŋaaŋa tok ŋa ŋiniŋnaca-ŋǝsi ṯarnyalɔ ṯaalɔ.”
39 Nǝr ǝŋnici nǝrǝccǝŋw, “Ibraahiim kwir-pa kwɔrɔ ṯǝrnyǝri ṯǝri.” Nǝsi Yǝcu ǝŋnici nɔŋwsǝccǝŋw, “Ǝŋgi oro nyɔr nyǝthi Ibraahiim, ǝŋgisi ǝrri ŋǝrrǝsi Ibraahiim, 40 laakin nǝrnyii naŋnalɔ kirem ethi ɽeenye kwir kwizi kwette kwandica-ŋǝsi ŋir rerrem, ŋǝṯi-nyji neŋne naanɔ-gwɔ Allah; ŋiti ŋindǝr-ŋɔ ŋǝrrǝsi Ibraahiim mac. 41 Ŋǝṯisi ǝrri ŋa ŋǝrrǝsi ṯarnyalɔ ṯaalɔ.” Nǝrǝccǝŋw, “Liti lilŋithi-nyji ŋɔrɔɔṯhɔna mac, nyiiŋa lǝthi Papa-ŋwɔ kwɔtɔpɔt kwǝni Allah.” 42 Nǝsi Yǝcu ǝccǝŋw, “Ǝŋgi Allah oro Papa kwaalɔ ǝŋgir-nyii amɽi kaka nuruuthiny-gwu naanɔ-gwɔ Allah; ninyeere iila-lɔ wɔɽǝny mac, laakin nɔŋworo kwɔɔsa-nyii. 43 Ŋotho ŋǝṯisi ṯime ŋǝṯi-nyji andasi? Ŋindǝr-ṯǝ ŋɔ kaka ŋiti ŋǝthiŋǝ-ŋi ŋɔma mac ethi kettice ŋiɽaŋali ŋiinyi yǝni. 44 Ŋaaŋa lɔrɔ lǝthi ṯarnyalɔ ṯaalɔ ṯǝni Ibliis, nǝ ǝṯisi naŋni ethisi ǝrri ŋa ŋǝṯisi ṯarnyalɔ ṯaalɔ naŋni. Nɔŋworo kwette kwǝṯi kegitte ḏimmiya kinaŋw-lɔ tuk kwon-kwon, nɔŋweere ǝthici ŋiɽaŋali ŋir rerrem karatha-na keere mac, kaka nǝṯɔŋwsi-gwɔ ere ǝthinǝ ŋir rerrem mac. Mɔŋw kǝkki ŋǝluŋi, nǝrṯoro ŋǝthi ǝthi wuuŋwun, kaka nɔrɔ-ŋgwɔ kwǝluŋw, nǝ nɔŋworo ṯǝrnyin ṯǝthi ŋǝluŋ-ŋǝ tok. 45 Laakin kaka nandisa-nyji-gwɔ ŋir rerrem, nǝrnyeere ǝmminici mac. 46 Kwundǝr kwǝndu daŋgal-na kwǝnyii ilŋthini ŋikiyaŋi ŋiinyi? Mǝnyji andasi ŋir rerrem tǝ, nǝ ŋaaŋa lotho lidirna ethi ǝmminici nyuŋw? 47 Ŋgwa kwir kwǝthi Allah, ǝṯɔŋw kettice ŋiɽaŋali kǝni ŋǝthi Allah. Ŋaaŋa liti lɔrɔ lǝthi Allah mac, ŋwɔṯaŋw ǝṯisi-mǝ ere kettice yǝni mac.”
Yǝcu-ŋǝ Ibraahiim-gi.
48 Nǝ Yahuuḏ ǝŋnici nǝrǝccǝŋw, “Nyiiŋǝ liti lɔvthasa mac kinaŋw naariny-ŋw, ŋa kwir Kwɔsaamirii kwǝthi ṯigɽimǝ-nǝ ṯigii-a?” 49 Nǝsi Yǝcu ǝŋnici nɔŋwsǝccǝŋw, “Nyiiti kwǝthi ṯigɽimǝ-nǝ ṯigii kǝzir weere mac, laakin ǝṯinyii iiɽi Ṯǝrnyǝriŋw-nǝ, nǝ ŋaaŋa tǝ ǝṯir-nyii ruusǝlɔŋw. 50 Laakin ŋɔ tatap ǝṯi-nyeere naŋnanni ŋinithi naana ŋeere mac. Laakin nɔŋw naani kwɔtɔpɔt kwǝṯi-nyji nǝŋnici nyuŋw, mindaŋ ŋworo ŋundu kwɔŋaari haakima. 51 Nyii kwǝccǝ-ŋǝsi-mǝ ŋwɔ rerrem, mɔŋw mithǝ kweere ŋiɽaŋali ŋiinyi, ŋweere ai ḏuṯ.’ 52 Nǝ Yahuuḏ ǝccǝŋw, “Nyiiŋǝ limǝ elŋe kirem ethaarɔŋw a kwǝthi ṯigɽimǝ-nǝ ṯigii. Ibraahiim kwɔmǝ-pǝ ai, nǝ liɽii tok; mindaŋ naarɔŋw, ‘Mɔŋw mithǝ kweere ŋiɽaŋali ŋiinyi ŋweere nyeŋle ŋiɽany mac’. 53 A kwɔthǝmthi ṯǝrnyǝriŋw-lǝ ṯǝri ṯǝni Ibraahiim ṯimǝ ai, nǝ liɽii ai tok-a? A kwuruusǝ rogɽo rɔɔŋwa ǝyǝ?” 54 Nǝsi Yǝcu ǝŋnici nɔŋwsǝccǝŋw, “Minyoro kwiniyǝ rogɽo-na riinyi, ǝtǝ ṯiniyǝnǝ ṯiinyi oro-lɔ domony. Papa kwiinyi kwɔrɔ kwǝṯi-nyii nii-nǝ ŋgwa kwǝṯi-gi aarɔŋw kwɔrɔ Allah wǝri. 55 Laakin neere elŋe ŋunduŋw ḏuṯ, nǝ nyiitǝ ninyelŋe ŋunduŋw. Minyaarɔŋw kwiti kwilŋithiny mac, nyoro kwǝluŋw kaka ŋaaŋwɔsi. Laakin ninyelŋe ŋunduŋw, nǝnyii mithici ŋiɽaŋali ŋuuŋun. 56 Ṯarnyalɔ ṯaalɔ ṯǝni Ibraahiim ṯaamina etheese lɔɔmɔri liinyi, nǝ limǝŋw ese nɔŋw-li aamina tok.” 57 E-ta nǝ Yahuuḏ ǝccǝŋw, “A kwende kwɔmoro yithlǝyu ruɽi-riɽǝn-la wrii kinnǝ, e-ta a kwɔmǝ ese Ibraahiim-ŋwɔ-a?” 58 Nǝsi Yǝcu ǝccǝŋw, “Nyii kwǝccǝ-ŋǝsi-mǝ ŋwɔ rerrem, niti ninaani Ibraahiim kinnǝ mac, nǝnyii naani.” 59 Ŋwɔṯaŋw nǝr ɔṯi yaali ethi-yi acci; laakin nǝsi Yǝcu luccunǝthǝ, mindaŋ nɔŋw ruu kithaay ki Heikal-na nɔŋweele.