aza 7
Yecu-ŋa lieŋgen li
1 mer rataḏi ŋu ta, na Yecu ireri jaliil; nuŋw ere ireri yahuḏiiya ŋgi mac, kaka ilica gwu yahuuḏ lu eḏeɽenye. 2 na iid adiḏi weḏi yahuuḏ, weṯir yi nani ki yəfaŋ-na. 3 na gwu ṯa lieŋgen eca ŋwu: ṯaza pa ezir lu wu, ele yahuḏiiya, mindaŋ a gwu limaḏgalu eze ŋilima ŋɔŋwa ŋeṯizerri tɔk. 4 kwende kwere kweṯizerri ŋejmeṯi muŋw naŋni eḏi ruwezi rɔgwɽɔ lu pɔrpɔr. ma ṯa erri ŋilima ŋu ta, ruweci ṯurmuna rɔgwɽɔ lu. 5 kaka iti eḏi gwu lieŋgen kinna ṯəmna duŋgwun mac. 6 nezi Yecu eca ŋwu: lomur linyi liti limɔṯimayini kinna mac, lakin na ŋwomur tatap orɔ ŋwalu. 7 kla leḏi ṯurmun liti leḏi ŋuma mac eḏuwezi ŋaŋwuzi; lakin eṯir nyi uwezi, kaka eṯinyi gwu ruwenize ŋikyaŋi lu ŋeŋen. 8 ṯaŋar, ŋaŋa, ki iid-na. nyi kwiti kwinḏi eḏiṯaŋi ki iid-na mac, kaka iti ṯimayina gwu kinna lomur linyi mac. 9 muŋw zi andaci ŋu, nuŋw ta nani kinna jaliil.
10 mindaŋ ma lieŋgen ṯaŋi, nuŋw ṯaŋi ŋundu tɔk ki iid-na, ŋijirṯa ŋijirṯa, kwiti kwinḏe lu pɔrpɔr mac. 11 na yahuuḏ naŋni ŋunduŋwu ki iid-na, ner ari: kwende manuŋ? 12 nezi ŋwuduŋw andazi ki riny ki riny ŋeni ŋundu; ner gi ari lɔkwɔ: kwizawi, ner ari liḏaḏu ŋwu: beri, kweṯorlili lizi. 13 lakin na kwizi ere andizala kwere pɔrpɔr mac, kaka ṯinyar gwu yahuuḏa.
Yecu kwilŋiidine lizi urzaliim, kwaruŋw, nyi kwoɽu nani gwu Allah
14 ma iid afaḏazina, na Yecu ṯaŋi ki heykal-na, nuŋw zi ilŋiiḏini lizi. 15 na yahuuḏ ṯibi, ner ari: ŋilŋiiḏi zi kwor ŋgwu ŋeḏi yiṯam aŋgwuru, iti ma ilŋiiḏinerzi gwu ki yiṯam-na mac? 16 nezi Yecu eŋnici, nuŋw zi eca ŋwu: ŋeṯinyji ilŋiiḏini, ŋinyi ŋiti ŋiri mac, lakin ŋeḏi Papa kwuzanyi ŋiri. 17 ma kwizi kwere emni eḏi errici Allah ṯugwor ṯi ṯuŋwun, ŋwu zi elŋe ŋeḏi ṯilŋiiḏina tinyi eḏari, ṯeḏi Allah tiri, ya tinyi tiri. 18 ŋgwa kweṯi zi ilŋiiḏini ŋeḏi rɔgwɽɔ ruŋwun oɽeny, eṯuŋw naŋni eḏi niini-na. lakin ŋgwa kweṯinaŋni eḏi nii-na ŋgwa kwuza ŋunduŋwu, kwunderṯa kwir rerem, na eṯi ŋidiny ere nani duŋgwun-na mac.
19 muuza kwiti kwinḏeḏa ŋazi kuruu manya? na kwende kwere daŋgal-na kwumɔmiḏa kuruu ŋamaŋ. a lɔḏɔ lineŋnizanyi lu eḏeɽenye? 20 na ŋwuduŋw eŋnici, ner eca ŋwu: a kweḏi tigṯima-na tiki. eya kwiri kwuneŋnizaŋa lu eḏeɽenye? 21 nezi Yecu eŋnici nuŋw zi eca ŋwu: nyi kwerra pa ŋilima ŋutuput, ner ŋazi ta liŋɽi lu tatap. 22 lakin, izarṯi, muuza kwinḏeḏa ŋazi kuruu keḏi undu ŋwuḏrunya; (nuŋw ere orɔ kedi muuza mac, lakin kedi papa-ŋa kiri;) na ŋaŋa, a leṯunduni ki lamin leḏi zabiṯ. 23 ŋwu ta mer uɽu toru ki lamin leni zabiṯ, kaka iti naŋnar gwu mac eḏi dapi kuruu gi la keḏi muuza, na a lɔḏɔ lermicanyi keni daɽmaḏi nyi gwu kworu kwete ki lamin leni zabiṯ eḏi zey minmin? 24 eṯere talani eḏi zi ṯemizici ŋiɽaŋali mac, talizaŋazi gwu yey nana; eṯi zi ami ṯemizuŋw ŋamaŋ.
25 ner ari lɔkwɔ leḏi urzaliimŋw, kwunde kwiti kwiri ŋgwu manya, kwuneŋnizar lu eḏeɽenye? 26 izarṯi, andizaŋw papac, ner ere eca ŋiɽaŋali ŋere mac. kwumɔ fa ta leleny elŋece ŋamaŋ, eḏari, kwunder fa ṯa ŋgwu kwir Kwruztu i? 27 na a kwilŋiicar kwizimini ŋgwu ezir winḏuŋw gwu rac. lakin ma Kwruztu ila ta, eya kwiri kwelŋece ezir winḏuŋw gwu? 28 ilŋiiḏina zi gwu Yecu ki heykal-na, nuŋw zi ofaḏa-na, nuŋw zi eca ŋwu: a lilŋiiḏi nyi, na elŋe ezir tɔk winḏi nyi gwu. nyiti kwumila zulṯa gi kwinyi oɽeny mac, lakin ŋgwa kwuzanyi, kwunderṯa kwiri ta pa rerem, lakin kwuṯimḏi ŋa. 29 kwilŋiiḏi nyi pa rac, kaka inḏi nyi gwu nanuŋw gwu; kwunderṯa kwuzanyi. 30 ner naŋni eḏi mida, na kwizi ere uzi kwere rii nana mac, kaka iti ṯimanniza gwu lomur luŋwun kinna mac.
31 na luru leḏi ŋwuduŋw ner emni, ner alliḏa ŋunduŋwu rugwori nana. ner ari: ma Kwruztu ila ta, ŋwu fa ta erri ŋilima ŋitemḏizila ŋeḏi kwor ŋgwu a? 32 na lifarzi niŋnaci lizi landiza ŋiṯaŋali la weyaŋ ŋeni ŋundu, na leleny leḏi yiziiz-ŋa lifarzi li tiŋa laŋɽa leḏi heykal eḏi miḏa. 33 nezi Yecu eca ŋwu: nyi kwunani kinna ŋaŋa li kwɔkwɔ, mindaŋ ta, nyi ma ele nani gwu kwuzanyi. 34 a lenyi naŋnini, lakin er nyi ulezi. na ezir wenyi gwu nani, a liti leḏi ŋuma eḏi gwu ila mac. 35 na yahuuḏ andizazina ŋwu: kwele ṯaka mindaŋ er ma ulezi? kwunaŋna eḏele ki yahuuḏ-na limɔfaḏa ki umam-na, eḏi zi gwu ilŋiiḏini lir umam a? 36 ŋeni ṯi aḏa mindaŋ, aruŋw gwu ŋwu: a lenyi naŋnini mindaŋ er nyi ulezi; na ezir wenyi gwu nani, a liti leḏi ŋuma eḏi gwu ila mac?
ŋaw ŋetindeda ŋimiida
37 ki lamin la kla leḏi iid leni lupa ledi kwaḏanŋw, na Yecu rilli, nuŋw ofna ŋuma ŋi, nuŋw aru ŋwu: kwere kwiiḏowḏa, eḏuŋw ila nani nyi gwu eḏi zi ii. 38 muŋw emni kwere eḏalliḏa nyuŋwu tugwori nana, erorɔ kaka ŋuluḏina ŋaruŋw: yufurṯa yafri ŋaw lu ŋuruḏi nani gwu tugwor ṯuŋwun ŋeṯi zi inḏeḏa ŋimiiḏa. 39 nuŋw ŋi andazi ŋu ŋeḏi Ṯigɽim ṯinḏir eḏafi kwaḏan gi, kla leṯalliḏa ŋunduŋwu rugwori nana. Ṯigɽim tirlinelu ter ṯiti timer zi inḏeḏa kinna mac, kaka ma gwu Yecu ere niini-na kinna tɔk mac.
40 mezi ta lizi neŋne, ner ari lɔkwɔ: kwunderṯa kwiri kwiɽi rerem, kweṯir əkizi kizen. 41 ner ari liḏaḏu: kwunderṯa kwiri Kwruztu; na liḏaḏu ari: Kwruztu kweŋgi ruḏa jaliil a? 42 ŋiti ŋuluḏina manya, ŋaruŋw: Kwruztu kwuruḏa ŋwola-na ŋweḏi dauḏ-ŋa, kayin weni beyṯlahm, wunanu gwu dauḏ-ŋa? 43 nezi lizi məmilḏi ŋeni ŋundu. 44 ner naŋni lɔkwɔ eḏi miḏa, na kwizi ere kwere uzi rii nana mac.
45 ta na laŋɽa leḏi heykal aɽi nani gwu leleny leḏi yiziiz, lifarzi li, ner zi eca ŋwu: kwende kwumɔ mulḏa? 46 nezi laŋṯa eca ŋwu: kwizi kwende kwere kweṯandazi kaka kworu ŋgwu? 47 nezi lifarzi eŋnici, ner zi eca ŋwu: a limɔ ani orle ŋaŋa tɔk a? 48 kwende kwere kweḏi leleny-ŋa lifarzi li kwumalliḏa ŋunduŋwu ṯugwori nana? 49 lakin lizi klu ta, liti lilŋiiḏi kuruu mac, leni taluŋw. 50 na kwete deŋgen-na kweni nikudimuz oɽi ki ŋiɽaŋal-na, ŋgwa kwumɔraŋḏa Yecuŋw kilikelu kete, 51 nuŋw zi eca ŋwu: ŋofḏana kuruu-na keri eḏi ruzi kwizi kwere kaṯi, kwiti kwuniŋnacar kinna mac, iti ilŋiiḏir gwu kinna mac, kwɔmne kwerraŋw a? 52 ner eŋnici, ner eca ŋwu: a kweḏi jaliilŋw kwiri tɔk a? naŋnini zi mamak ŋuluḏina ezinḏa ŋu: liɽi liti leṯiruḏa jaliil mac. 53 ner faḏi lere lere deŋgen ŋwuzi;
Yǝcu-ŋǝ liyeŋgen-li.
1 Kwaathan-tǝ, nǝ Yǝcu irǝrǝlɔ Jǝliil-nǝ; nɔŋweere naŋni ethi irǝrǝlɔ Yuhuuḏiiyyǝ-nǝ mac, kaka naŋna-gwɔ Yahuuḏ ethi ɽeenye. 2 Nǝ @iiḏ wǝthi Yahuuḏ wǝthi Yǝlwǝ aadithi keṯṯok. 3 E-ta nǝ liyeŋgen ǝccǝŋw, “Duŋgwǝsǝ ǝzir wɔ ele Yahuuḏiiyyǝ, mindaŋ mǝ ṯalaamiiz ṯɔɔŋwa ese ŋothɽor ŋa ŋǝṯisi ǝrri. 4 Kwizi kwiti kweere mac kwǝṯi akkɔ ŋothɽor ŋejmethi, mɔŋw naŋni ethi ruwǝzi rogɽo-lɔ ruuŋwun por-por. Mǝ ǝrri ŋɔthɽɔr ŋɔ tǝ, nǝr ɔvthanni ethi ruwǝcci ṯurmunǝ rogɽo-lɔ rɔɔŋwa.”
5 Nǝ liyeŋgen saaṯɔk nǝreere ǝmminici ŋunduŋw tok mac. 6 Nǝsi Yǝcu ǝccǝŋw, “Lɔɔmɔr liinyi liti limǝ iila kinnǝni mac, laakin lɔɔmɔr laalɔ tǝ nɔŋw naani nyaamin tatap ŋaaŋa-li. 7 Turmun ṯiti ṯǝthi ŋɔma ethi wǝzi ŋaaŋwɔsi mac, laakin ǝṯɔŋw wǝzi nyuŋwɔ kaka nǝṯinyii-gwɔ tutuwǝcci ŋothɽor-lɔ ŋuuŋun ŋigii. 8 Nḏir ŋaaŋa rogɽo-ri raalɔ ki-@iiḏ-nǝ; nyiiti kwɔthaaŋɔ nyii ki-@iiḏ-nǝ mac, kaka niti mǝgwɔ lɔɔmɔr liinyi iila kinnǝni mac.” 9 Mɔŋwsi andasi ŋɔ rac tǝ, nɔŋw-tǝ naani kinnǝni Jǝliil-nǝ.
Yǝcu mɔŋgwɔ naani ki-@iiḏ-nǝ wǝthi Yǝlwǝ.
10 Laakin kwaathan-tǝ mǝ liyeŋgen taaŋi ki-@iiḏ-nɔ tǝ, nɔŋw ṯaaŋi ŋundu tok, laakin nɔŋweere elelɔ por-por mac laakin nɔŋweele ŋejmethi. 11 Nǝ Yahuuḏ naŋninnalɔ ki-@iiḏ-nǝ nǝraarɔŋw, “Kwende?” 12 Nǝ ṯɔŋwɔn ṯǝni ŋundu naani ṯittǝzir ki-lizi-nǝ. Mindaŋ nǝraari lokwoŋw, “Kwir kwizi kwiccaw.” Nǝraarɔŋw lithaathɔ, “Bǝri kwinḏi ethi ṯuusi lizi.” 13 Laakin nɔŋweere kweere mac kwandisalɔ por-por ŋiɽaŋali ŋǝni ŋundu, kaka nithiinyar-gwɔ Yahuuḏǝ.
14 Mǝ @iiḏ avathisina tit-tir nǝ Yǝcu ṯaaŋi ki Heikal-nǝ mindaŋ nɔŋgwaari @allima. 15 Nǝ Yahuuḏ liŋɽi beṯ-beṯṯen nǝraarɔŋw, “Kwɔr-ŋgwɔ kwaava-thi ṯa@liima kɔthɔ ṯaka niti-mǝ naarɔŋw @allima kǝzir weere too?” 16 Nǝsi Yǝcu ǝŋnici nɔŋwsǝccǝŋw, “Ta@liim ṯiinyi ṯiti ṯir mac, laakin nɔŋworo ṯǝthi ŋgwa kwɔɔsa-nyii. 17 Mɔŋw ǝmmini kweere ethisi ǝrri ŋǝthi ṯɔgwor ṯǝthi Allah, ŋwɔsi elŋe ŋa ŋǝṯinyii-ŋi aari @allima ŋinḏi naanɔ-gwɔ Allah, alla ŋǝṯi-nyji andasi ŋǝthi sɔlṯa kwiinyi. 18 Ŋgwa kwǝṯisi andasi ŋǝthi sɔlṯa kwuuŋwun, ǝṯɔŋw naŋnanni ŋinithi naana ki-rɔgɽo ruuŋwun. Laakin mɔŋw nǝŋnici ŋgwa kwɔɔsa ŋunduŋw ŋinithi nɔŋworo kwir amiin, kwiti kwukǝɽinyjinǝlɔ mac. 19 Muusǝ kwiti kwɔrɔ mac kwinḏǝthǝ-ŋǝsi Sherii@a? Laakin nɔŋweere kweere kwaalɔ mac kwimthi Sherii@a. Ŋaaŋa lotho linaŋna-nyii ethi ɽeenye?” 20 Nǝ lizi ǝŋnici nǝrǝccǝŋw, “A kwǝthi shiiṯaana-na! Ǝyǝ kwɔrɔ kwɔnaŋna-ŋa ethi ɽeenye?” 21 Nǝsi Yǝcu ǝŋnici nɔŋwsǝccǝŋw, “Nyii kwǝrrǝ-pǝ ŋilima ŋette, mindaŋ nǝ liŋɽi tatap. 22 Muusǝ kwir kwinḏǝthǝ-ŋǝsi ṯundunǝ ŋwɔthrɔnya (nǝ Muusǝ ere oro kǝniny kwindǝthǝ-ŋǝsi mac, laakin nǝ lugwurnǝ laalɔ oro), mindaŋ ǝṯi uɽu kwizi ki-laamin-la lǝthi Sǝbiṯ. 23 Mǝ kwizi uɽunni ki-laamin-la lǝthi Sǝbiṯ mindaŋ ethi Sherii@a kwǝthi Muusǝ ere kiini-nǝ mac, e-ta ŋaaŋa luurǝccǝ-nyii rɔgwori kaka nisǝwǝny-gwɔ anŋa wǝthi kwizi min-min ki-laamin-la lǝthi Sǝbith-ǝ? 24 Ǝṯiŋeere aari haakima ŋa ŋǝthi parŋgala-ŋw mac, laakin ǝṯaari haakima hɔkwɔma wirllalɔ.”
Kwɔrɔstɔ kwir-ṯa ŋgwɔ.
25 Nǝ lizi lokwo lǝthi Urshaliim-ŋwɔ aarɔŋw, “Kwɔr kwiti kwindǝr ŋgwɔ kwɔnaŋnar-lɔ ethi ɽeenye mac-a? 26 Nǝ kwirpa ŋgwɔ kwandisalɔ por-por, mindaŋ nǝreere ǝccǝ ŋiɽaŋali ŋeere mac! Kwǝni kwɔmǝr elŋece rac rerrem ethaarɔŋw kwir Kwɔrɔstɔ-a? 27 Laakin a kwilŋithir-pǝ ethaarɔŋw kwɔr-ŋgwɔ kwinḏi ṯaka-ŋgi. Laakin mǝ Kwɔrɔstɔ iila tǝ, a kwizi ere kweere mac kwelŋece ǝzir winḏiŋw-yi.” 28 Nǝ kinaŋw naari Yǝcu @allima ki Heikal-na, nɔŋw ɔvɔna ŋɔmmaŋi nɔŋwaarɔŋw, “Ŋaaŋa lilŋithi-nyii rac-a na nǝr-nyelŋe tok nyii kwinḏi ṯaka-ŋgi-a? Laakin nyiiti kwinḏi ŋiɽaŋal-ŋi ŋǝthi sɔlṯa kwiinyi mac! Ŋgwa kwɔɔsa-nyii nɔŋwṯoro kwir rerrem, neere elŋe ŋunduŋw mac. 29 Kwilŋithi-nyii-pǝ nyii, kaka ninḏiny-ŋwɔ duŋgwun-ŋgi, nɔŋwɔni kwɔɔsa-nyii.” 30 Ŋwɔṯaŋw nǝr ṯǝcci ethi mithǝ ŋunduŋw, laakin nɔŋweere kweere mac kwɔmǝ ɔɔsi ŋunduŋ rii naana, kaka niti mǝgwɔ saa@ kwuuŋwun ere iila kinnǝ mac. 31 Laakin nǝ lizi luuru ǝmminici mindaŋ nǝraarɔŋw, “Mǝ Kwɔrɔstɔ iila, e-ta ŋwɔrri ŋilima ŋuuru rac ŋithamthisi-lǝ ŋǝthi kwɔr ŋgwɔ-a?”
Hɔrraas wɔmǝr ɔɔsi ethi mithǝ Yǝcu-ŋw.
32 Nǝ Lifirriisiiyyiin neŋne dɔŋw lǝrmithǝthinǝ ŋiɽaŋal-ŋi ŋǝni ŋundu, mindaŋ nǝ rɔ-asa rǝthi kahana-ŋǝ Lifirriisiiyyiin-li ɔɔsi hɔrraasa ethi mithǝ ŋunduŋw. 33 E-ta nǝsi Yǝcu ǝccǝŋw, “Nyii kwɔ-kinnǝ naani kwokwo ŋaaŋa-li; e-ta nyii-mǝ ele naanɔ-gwɔ ŋgwa kwɔɔsa-nyii. 34 Ŋaaŋa lǝnyii naŋnalo mindaŋ arnyeere kaṯṯasi mac; nǝ kǝzir wǝny-gwɔ naani, ere ethi ŋɔma ethi-gwɔ iila mac.”
35 Nǝ Yahuuḏ andasina nǝraarɔŋw, “Kwɔr-ŋgwɔ kwunaŋna-thi etheele ṯaka, mindaŋ mǝreere ǝthi nyiiŋǝ ŋɔma mac ethi kaṯṯasi ŋunduŋw? Kweele ki Yahuuḏ-nǝ kiya yifaathalɔ faṯ ki Yuunaan-na, mindaŋ ŋwɔccǝ Yuunaaniiyiin-na @allima? 36 Ŋiɽaŋal ŋuuŋun ŋǝni ǝyǝ ŋaarɔ-ŋiŋw, ‘Ŋaaŋa lǝnyii naŋnalɔ mindaŋ ǝrnyeere kaṯṯasi mac’, nǝ, ‘Kǝzir wǝnyii-gwɔ naani ǝgwɔ ere ǝthi ŋɔma ethiila mac?’ ”
Ruwǝ rǝthi ŋaaw ŋimiithɔ.
37 Nǝ ki-laamin-lǝ lirmithitho lǝthi @iiḏ, lir laamin lɔppa, nǝ Yǝcu diiɽǝlǝ mindaŋ nɔŋw andasi ṯogɽo-thi tɔppa nɔŋw aarɔŋw, “Mǝ ǝwthǝ yee kweere tǝ, ethɔŋwiila naaniny-gwɔ mindaŋ ŋwɔsi ii. 38 Ŋgwa kwǝnyii ǝmmini, kaka naarɔ-gwɔ Kiṯaab-ŋwɔ, ‘A ruwǝ rǝthi ŋaaw ŋimiithɔ bablitha ki-ṯɔgwor-na ṯuuŋwun’. 39 Nɔŋwɔni kwandisa ŋiɽaŋali ŋa ŋǝthi Ṯigɽim ṯinḏi kila ethi aavi lǝmminici ŋunduŋw. Kaka niti nimǝ-gwɔ Ṯigɽim ere ǝvini kinnǝni mac. Kaka niti mǝgwɔ Yǝcu niini-nǝ kinnǝni tok mac.
Lizi mǝr-gwɔ uɽǝnninǝ.
40 Mǝ lizi lokwo neŋne ŋiɽaŋali ŋɔ nǝraarɔŋw, “Kwiɽii kwirma-ṯa ŋgwɔ rerrem.” 41 Nǝ lithaathɔ aarɔŋw, “Kwɔrɔstɔ kwir-ṯa ŋgwɔ.” Laakin nǝ lokwo lithaathɔ aarɔŋw, “Kwɔrɔstɔ kwǝŋgi iila Jǝliil-ŋgi-a? 42 Kiṯaab kirllinǝlɔ ter kiti kaarɔŋw, Kwɔrɔstɔ kwiti kwǝŋgi iila ŋwɔɔla-ŋi ŋwɔthi Ḏaawḏ mac-a. Nǝ ǝŋgi-ŋwɔ iila Beiṯ-lahm-ŋgi kwir lilli lǝthi Ḏaawḏ mac-a?” 43 Ŋwɔṯaŋw nǝ ṯuuɽǝnnǝ-nǝ naani ki-lizi-nǝ ŋiɽaŋal-ŋi ŋǝni ŋundu. 44 Nǝr naŋni lokwo ethi mithǝ ŋunduŋw, laakin nɔŋweere kweere mac kwɔmǝ ṯiŋatha ṯii naana.
Rɔ-asa rǝthi Yahuuḏ riti rǝthi ṯǝmminǝ mac.
45 Nǝ hɔrraas aaɽitha naanɔ-gwɔ rɔ-asa rǝthi kahana-ŋǝ Lifirriisiiyyiin-li e-ta nǝrsi ǝccǝŋw, “Kwenḏe kwɔmǝ mɔltha?” 46 Nǝsi hɔrraas ǝŋnici nǝrsǝccǝŋw, “Kwizi kwiti kweere mac kwǝṯi anḏasi kaka kwɔɔrɔ ŋgwɔ!” 47 Nǝsi Lifirriisiiyyiin ǝŋnici nǝrsǝccǝŋw, “kwɔmǝ-ŋǝsi ṯuusi tok-a? 48 Ŋgwa kweere kwir kweeleny alla Kwɔfirriisii kweere kwɔmǝ ǝmminici ŋunduŋwɔ? 49 Laakin lɔḏɔŋw kɔlɔ lende-pǝ lilŋithi Sherii@a kwǝthi Muusǝ ŋwɔṯaŋw nǝrǝni limǝ ollonne.” 50 Nǝ Niiguuḏiimuus ŋgwa kwɔmeele naanɔ-gwɔ Yǝcu kerreny, kwir kwette kweeŋen, nɔŋwsǝccǝŋw, 51 “Sherii@a kwǝri kwǝṯi ǝccǝ kwizi haakima kerreny kwiti kwɔmǝri niŋnaci mac, nǝ ethisi elŋe tok ŋa ŋǝrrǝ-ŋwsi-a?” 52 Nǝr ǝŋnici nǝrǝccǝŋw, “A kwɔrɔ kwǝthi Jǝliil-ŋwɔ tok-a? Naŋnasiṯa-lɔ, nǝ ŋiti ŋǝsi kaṯṯasi ŋeere mac ŋaarɔŋw kwiɽii kwinḏi ethi ruthǝ Jǝliil-nǝ.” [ 53 E-ta nǝr anditha deŋgen-ŋwɔsi.