aza 5
kubɔrkɔn ki ṯil la ṯeḏi beyṯizḏa
1 kwaḏan kwɔkwɔ na iid nani wete weḏi yahuuḏ, na Yecu taŋi urzaliim. 2 kezir weḏi gwe kweḏi yaŋal urzaliim, na ezir nani weḏi yogwur ṯuḏni, weṯi yahuuḏ eca beyṯizḏa. 3 na ki yogwur kyu ner inḏiralu litezir luma, lir lunduŋ, lir yɔmzɔŋ, lir yubɔrkɔn, leṯinanji ŋaw lu mer lagiḏina. 4 kaka eṯi gwu maleyka oɽi ŋwomur ŋwere ŋwere ŋaw-na eḏi zi lagizina. ma kwizi kwere oɽi kerreny mer lagiḏina, eṯuŋw zawi kimeti kuŋun. 5 na kwor nani kwete kinaŋw, kwurna yiḏleyu ṯuɽi-wri-dufɔkwupa. 6 ma Yecu kaṯazi kwinḏiralu, kwilŋiicaŋw rac eḏari, kwinḏiralu kwurna kwizatuk, nuŋw eca ŋwu: a kwunaŋna eḏi zey a? 7 na kwor kwurna eŋnici, nuŋw eca ŋwu: kwor kwalu, nenyi ere eḏi kwizi kwere mac eḏoɽazi nyuŋwu ŋaw-na ma ŋaw lagiḏina, lakin menyi naŋni kineni eḏoɽi, eṯuŋw ṯamḏiḏa nyuŋwu nana kwir ter. 8 na Yecu eca ŋwu: diɽi, dimi ŋwumbanyu ŋwɔŋwa, a ŋi ele. 9 na ṯa kwor eni kwumɔ zey tuc, nuŋw dimi ŋwumbanyu ŋwuŋwun, nuŋw ŋi ele.
10 na lamin kla orɔ zabiṯ, lirlinelu ter, ŋwu ṯa na yahuuḏ eca kworu kwumɔ zey, ŋwu: zabiṯ kwiri pa. ŋiti ŋiri ŋeḏi kuruu mac eḏapi ŋwumbanyu ŋwɔŋwa. 11 nuŋw zi eŋnici, nuŋw zi eca ŋwu: ŋgwa kwumenyi zəwi, kwunderṯa kwecenyi ŋwu: dime ŋwumbanyu ŋwɔŋwa, a ŋi ele. 12 ner uṯizelu ner eca ŋwu: kwor kwunde kwiri kwendu kwecaŋa ŋwu: dime, a ŋi ele? 13 lakin na ŋgwa kwumɔ zey ere elŋe mac eḏaruŋw, eya kwiri, kaka mezi gwu Yecu ṯazalu, nanir gwu duŋw litezir kezir wa. 14 kwaḏan kwɔkwɔ na Yecu kaṯazi ki heykal-na, nuŋw eca ŋwu: izaṯi, a kwumɔ daɽmani pa; eṯi zi erra ŋere ŋiki kwokwony mac, na ṯurfa ṯi ŋa enḏiḏa ṯiṯemḏelu eḏi kerrenyŋw la. 15 na kwor ele kitay, nuŋw andaci yahuuḏa, nuŋw zi eca ŋwu: Yecu kwiri mi kwumenyi daɽmaḏa. 16 na gwu ta, na yahuuḏ naŋni eḏowɽi Yecuŋw yey, kaka muŋw zi gwu erri ŋu ki lamin leni zabiṯ. 17 nezi Yecu eŋnici, nuŋw zi eca ŋwu: eti Papa kwinyi akiki ŋɔḏɽor mindaŋ kirem kwumorɔ, nenyi tɔk, nyi ŋgwu kwaki ŋɔḏɽor. 18 ner ṯa orɔ ŋwu, na ŋi yahuuḏ ilicelu rerec eḏeɽenye; ner ere orɔ kaka muŋw gwu dapi kuruu gi la kedi zabiṯ ṯuɽuk mac, lakin kaka muŋw gwu ruzi Allah Papa kwuŋwun tɔk, biɽḏir gwu rɔgwɽɔ-na Allah yi.
Yecu kweṯafi ŋuma nani gwu Papa kwuŋwun
19 nezi Yecu eŋnici, nuŋw zi eca ŋwu: nyi kwecaŋazi ma ŋwa rerem, Tor titi teḏi ŋuma mac eḏerri kwɔmne kwere oɽeny. eṯuŋw erri ṯuɽuk kwɔmne kweṯuŋw izaci Papaŋw kwuŋwun kweṯuŋw erri; kaka kwɔmne kweṯi Papa erreri, eṯi ṯa Tor erreri tɔk. 20 kaka eṯi gwu Papa amindi Toru, na eṯuŋw baŋaci ŋunduŋwu tatap kweṯuŋw erri, ŋwubaŋaci ŋunduŋwu ŋɔḏɽor ŋiṯemḏizelu ŋu, er ŋazi liŋɽazi. 21 kaka eṯi zi gwu Papa diɽi layyu eḏi zi inḏeḏa ŋimiiḏa, ŋwu ṯaŋwu, eṯi zi Toru inḏeḏa kla ŋimiiḏa leṯuŋw zi naŋni. 22 eṯi zi Papa ere hakwumi lere mac, lakin nuŋw inḏeḏa Toru zulṯa minmin, 23 mindaŋ er ma nii tatap Toru-na, kaka eṯir gwu nii Papaŋw-na. kwere nyiḏak kwiti kweṯi nii Toru-na mac, kwiti kweṯi nii Papaŋw-na tɔk mac kwuza ŋunduŋwu.
24 nyi kwecaŋazi ma ŋwa rerem, kwere kweṯi nyi niŋnaci ŋiɽaŋali, na kweṯalliḏa ŋgwa ṯugwori nana kwuzanyi, kwunderṯa kweḏi ŋimiiḏa-na ŋiaŋ, ŋinḏi eḏi nanniḏa dɔk; kwiti kwinḏi eḏi ilaḏa hukm nana mac, lakin kwumɔ ru tuc ŋiɽany ŋi-na eḏenḏi ki ŋimiiḏa-na ŋir minmin. 25 nyi kwecaŋazi ma ŋwa rerem, lomur kla linḏi, limɔ keni ṯimayini kirem, a layyu neŋne ṯɔgwɽɔ ṯeḏi Tor teḏi Allah, na kla tatap limɔneŋne, er miiḏi. 26 kaka eḏi gwu Papa ki rɔgwɽɔ ruŋwun ŋuma ŋeṯinḏeḏa ŋimiiḏa, nuŋw ṯa inḏeḏa Toru tɔk ŋuma ŋeṯinḏeḏa ŋimiiḏa. 27 nuŋw ma ṯa inḏeḏa zulṯa tɔk eḏi ruwezi hukma lu, kaka urŋw gwu Tor teḏi kwizigwunaŋ. 28 eṯi ŋi liŋɽu ŋu mac, kaka inḏi gwu lomur eḏila le li kla tatap linani ki rimamu-na er neŋne ṯɔgwɽɔ ṯuŋwun, 29 er ruweḏe lu; kla limezerri ŋizaw er diɽi ki ŋimiiḏa-na, na kla limezerri ŋiki, er diɽi ki hukm-na.
ṯunḏiza ki ṯeḏi Allah ŋeni Yecu
30 nyi kwiti kweḏi ŋuma eḏerri kwɔmne kwere zulṯa gi kwinyi oɽeny mac; ŋeṯinyji neŋne ta, eṯir orɔ ŋeṯi nyi ŋi hakwumi, na hukm winyi eni wirlalu, kaka iti naŋnanyi gwu eḏi zi erri tugwor ṯi tinyi mac. eṯi nyi naŋni eḏi zi erri ṯugwor ṯi ṯeḏi ŋgwa kwuzanyi. 31 eŋgi nyji ŋi unḏizi ki ŋeni rɔgwɽɔ rinyi oɽeny, eŋgi ṯunḏiza ki ṯinyi ere eḏi fayḏa kwere mac. 32 ŋgwata kwir ter kweṯi zi ŋi unḏizi ki ŋeni nyi; nenyi elŋece eḏari, tunḏiza ki ṯuŋwun ŋeni nyi ṯeḏi fayḏa rac. 33 yafur yalu yimɔnani nani gwu yuhanna, nuŋw zi ŋi unḏizi ki ŋeni ŋirlalu. 34 lakin ṯunḏiza ki ŋeni nyi ṯende ṯeṯiruḏa nani gwu lizigwunaŋ. ŋandicaŋazi ŋu mindaŋ eŋgi kilaw. 35 yuhanna kwiri lɔmba leṯifudi na letiṯiŋaḏa fori lu, na ŋaŋa, a limemni ŋwomur ŋwɔkwɔ fori kwuŋwun, na gi nyeŋlena. 36 lakin ṯunḏiza ki tinyi ṯiṯemḏi la kḏa ṯeḏi yuhanna, kaka ŋɔḏɽor ŋinḏeḏenyji Papa kwinyi eḏi zi ratazi, na ŋeṯinyjerri ŋinderṯa ŋeṯi ŋazi ŋi unḏizi ki ŋeni nyi, ner ari, Papa kwuŋwun kwiri kwuza. 37 na Papa kwuzanyi, kwunderṯa ŋundu kwumenyi ŋi unḏizi ki. a liti limɔniŋnaci ŋunduŋwu ṯɔgwɽɔ aŋwun were mac, ya eḏeze kwir ṯa ḏa. 38 a lende leṯi miḏa ŋiɽaŋali ŋuŋun, kaka iti emnaŋa gwu mac ŋgwa kwuzaŋw. 39 a leṯinaŋnini ŋiɽaŋal-na ŋuluḏina, kaka ari ŋa gwu ŋwu: nyiŋa leḏi ŋimiiḏa-na ŋinḏi eḏi nanniḏa dɔk ki ŋiɽaŋal-na ŋuluḏina. na ŋinderṯa ŋeṯi zi ŋi unḏizi ki ŋeni nyi. 40 lakin, a liti lemni keni mac eḏila nani nyi gwu, eḏafa ŋimiiḏa.
41 nyi kwende kweṯinaŋni ṯiniiya-na nani gwu lizigwunaŋ. 42 lakin nyi kwilŋiicaŋazi rac, a liti leḏi ṯamɽa-na ṯeḏi Allah daŋgal-na mac. 43 nyi kwumila yiriny yi yeḏi Papa kwinyi, ner nyi ta ere enji kiloɽu-na mac. muŋw ila kwir ter yiriny yi yuŋwun domony, a emnizi eḏenji ŋunduŋwu kiloɽu-na. 44 na ŋaŋa, a leḏi ṯəmna aŋgwuru, ma niini-na daŋgal-na wuɽe-wuɽeny, iti naŋna ŋa gwu mac ṯiniiya-na ṯinḏi nani gwu ŋgwa kwir Allah wutuput? 45 eṯaruŋw mac: kwenyji bɔŋwḏi nani gwu Papa. muuza kwiri ṯa, ŋgwa kwumalliḏa ŋaŋa rugwori nana, kwɔŋazi bɔŋwḏi. 46 eŋgemnizi muuzaŋw, eŋgi nyi emni, kaka luḏuŋw zi gwu ŋeni nyi. 47 mezi ṯa ere emnizi ŋuluḏuŋw zi mac, ta a ma emni aŋgwuru ŋiɽaŋali ŋeṯinyji andazi?
Yǝcu mɔŋgwɔ sǝwi kiborkoni.
1 Kwaathan tǝ nǝ @iiḏ naani wǝthi Yahuuḏ, e-ta nǝgwɔ Yǝcu ṯaaŋitha Urshaliim. 2 Nǝ kwee naani kwette kinaŋw Kǝgwur wǝthi Yaaŋal kwǝnyjiccǝr yiriny @ibraaniiyyiina yǝni Beiṯ-hisḏa, kwǝthi yǝgwur ṯɔthni. 3 Nǝ lizi littǝzir luumǝ nḏiralɔ kinaŋw, [lir lunduŋw-ŋǝ yomsoŋ-yi, nǝ yiborkon tok. 4 Kaka nǝṯi-gwɔ meleka kwǝthi Kweeleny ɔɽi ŋaaw-na ŋwɔɔmɔri ŋweere-ŋweere, ǝṯɔŋwsi lakkasina, nǝ kweere kwɔɔɽi ŋaaw-na kerreny mǝr lakkithana, ǝṯɔŋw saawi kimǝthi keere nyithak kuumǝ-ŋwɔ.] 5 Nǝ kwɔr kwette naani kinaŋw kwuumǝ yithlǝyu ṯuɽi-wrii dɔvokwɔppa. 6 Mǝ Yǝcu ese, mindaŋ mɔŋw elŋece ethaarɔŋw kwɔnanni kinaŋw yithlǝyu yuuru, nɔŋwɔccǝŋw, “A kwɔnaŋna ethi saawi-a?” 7 Nǝ kwɔr kwuumǝ ɔŋnici nɔŋwɔccǝŋw, “Yaa Sǝyyiḏ, nyii kwiti kwǝthi kwizi-nǝ kweere mac kɔnɔŋw kwǝthi ɔɽasi nyuŋwɔ ŋaaw-na mǝr lakkithana. Mǝnyii ṯǝcci ethi ɔɽi, ǝṯɔŋw ṯamthitha nyuŋw naana kwir ter.” 8 Nǝ Yǝcu ǝccǝŋw, “Diiɽu a dimmi birci kwɔɔŋa ele.” 9 Ŋwɔṯaŋw nǝ kwɔr sǝwinni fittak; mindaŋ nɔŋw dimmi birci kwuuŋwun nɔŋwaari ibṯǝḏi nɔŋweele.
Nǝ Sǝbiṯ oro kwǝrrinǝ-gi ŋiɽaŋal ŋɔ. 10 E-ta nǝ Yahuuḏ ǝccǝ kwɔɔra kwɔmǝ sǝwinni-ŋwo, “Sǝbiṯ kwir-pa, ŋende ŋir gaanuuni mac ethi appi birci kwɔɔŋa.” 11 Nɔŋwsi ǝŋnici noŋwsǝccǝŋw, “Kwɔr-ŋgwa kwusǝwǝ-nyii kwundǝr kwǝccǝny-ŋwo, ‘Dimmǝ birci kwɔɔŋa ele’.” 12 Nǝr uṯicǝlɔ nǝr-ǝccǝŋw, “Kwɔr kwundǝr kwǝndu kwǝccǝ-ŋɔŋw, ‘Dimmǝ birci kwɔɔŋa ǝgeele’?” 13 Laakin nǝ kwɔr ŋgwa kwusǝwunǝ ere elŋe Yǝcu-ŋw mac, kaka naanɔ-gwɔ dɔŋw kǝzir wa, nǝ Yǝcu ǝni kwɔmǝ ele kithaay tok. 14 Nǝ kwaathan kwokwo ta nǝ Yǝcu kaṯṯasi ki Heikal-na, nɔŋwɔccǝŋw, “Iisa-ṯi aŋgwɔ kwɔmǝ saawi kirem, e-ta iisa ǝṯisi ǝrrǝ ŋeere ŋigii kwokwony mac, mindaŋ mǝrŋeere ǝrrinici mac ŋigii beṯṯen ethi kerreny-ŋwɔ-la.” 15 Nǝ kwɔr ele nɔŋw andica Yahuuḏǝ nɔŋwsǝccǝŋw Yǝcu kwir kwisǝwǝ-nyii. 16 Nǝṯǝ sǝbǝb oro-ŋgwɔ kwuwǝzǝ-gi Yahuuḏ Yǝcu-ŋw, kaka nǝrrǝŋwsi ŋɔ ki-laamin-la lǝni Sǝbiṯ 17 Nǝsi Yǝcu ǝŋnici nɔŋwsǝccǝŋw, “Papa kwiinyi kwǝṯi akkɔ ŋothɽor ŋwɔɔmɔri tatap. Nǝ nyii tok, laazim nyji akkɔ ṯǝŋw tok.” 18 Nǝ nǝṯǝ sǝbǝb oro-ŋgwɔ kwɔmǝ-gi Yahuuḏ naŋnalɔ beṯṯen ethi ɽeenye. Kaka niti nikiyǝ-ŋgwɔ Sǝbithǝ-nǝ ṯɔɽɔk mac, laakin kaka nɔruusǝ-ŋgwɔ Allah Ṯǝrnyin, nǝ nibiɽithǝ-ŋgwɔ rogɽo-na ruuŋwun Allah-yi.
Sɔlṯa kwǝthi tɔr.
19 Nǝsi Yǝcu ǝccǝŋw, “Nyii kwǝccǝ-ŋǝsi-mǝ ŋwɔ rerrem, Tɔr titi tǝthi ŋɔma mac ethisǝrri ŋeere ṯɔgwor-thi ṯuuŋwun, laakin illi ŋa ṯɔrɽɔk ŋǝṯɔŋwsi iiaacci Ṯǝrnyin ŋǝṯɔŋwsi ǝrri; kaka ŋa ŋǝṯisi Papa ǝrri, ǝṯisi Tɔr ǝrri tok. 20 Kaka nǝṯi-gwɔ Papa amɽi Tɔɔrɔ, mindaŋ ŋwɔsi baaŋaci ŋa tatap ŋǝṯɔŋwsi ǝrri rogɽo-ri ruuŋwun, ŋwɔsi baaŋaci ŋa ŋɔppa beṯṯen ŋithǝmthisi-lǝ ŋɔ ethisi ǝrri, mindaŋ mǝ liŋɽi tatap. 21 Kaka nǝṯisi-gwɔ Papa dindi kila laayɔ ǝṯɔŋwsi indǝṯhǝ ŋimiitha, ŋwɔṯaŋw ǝsi Tɔr indǝṯhǝ kila ŋimiitha linaŋnaŋwsi ethisi inḏǝthǝ. 22 Ǝṯi Papa ere ǝccǝ kweere haakima mac, laakin nɔŋw inḏǝthǝ Tɔɔrɔ tuuŋwun sɔlṯa tatap kwǝthi-gi aari haakima, 23 mindaŋ mǝr iiɽi Tɔɔrɔ-na tatap, kaka-ṯǝ nǝṯir-gwɔ iiɽi Papa-ŋwna. Kweere kwiti kwǝṯi iiɽi Tɔɔrɔ-na mac, nɔŋwɔni kwiti kwiiɽǝ Ṯǝrnyin-nǝ mac ṯɔɔsa ŋunduŋw.
24 “Nyii kwǝccǝ-ŋǝsi-mǝ ŋwɔ rerrem, kweere kwǝṯi neŋne ŋiɽaŋali ŋiinyi, mindaŋ mɔŋw ǝmminici ŋgwa kwɔɔsa-nyii, ŋwɔṯhi ŋimiitha ŋǝṯi nannitha dok-dok; ǝreere ǝccǝ haakima mac, laakin nɔŋwɔni kwɔmǝ ṯamthɔ ŋiɽany nɔŋw ele ki-ŋimiitha-na.
25 “Nyii kwǝccǝ-ŋǝsi-mǝ ŋwɔ rerrem, lɔɔmɔr kila lindi, na lindar-ṯa kɔlɔ, linḏi-li kila laayɔ ethi neŋne ṯogɽo ṯǝthi Tɔr ṯǝthi Allah, na kila liniŋnaci ŋunduŋw ǝri miithi. 26 Kaka nɔrɔ-gwɔ Papa ṯuwǝ ṯǝthi ŋimiitha, nǝrṯoroŋw tok, mindaŋ ŋwɔ ruusi Tɔɔrɔ tuuŋwun ṯuwǝ ṯok ṯǝthi ŋimiitha. 27 Mindaŋ nɔŋw inḏǝthǝ sɔlṯa ethi-gi aari haakima, kaka nɔrɔ-ŋgwɔ Tɔr tǝthi Kwizigwunǝŋ. 28 Ǝṯi-ŋǝsi ŋiɽaŋal ŋɔ liŋɽasa mac; kaka ninḏi-gwɔ lɔɔmɔr ethiila linḏi-li kila tatap linaanɔ ki-rimaamɔ-na eṯhi neŋne ṯogɽo ṯuuŋwun, 29 ǝri ruuthǝ ki-rimaamɔ-na; nǝ kila lǝrrǝzi ŋisaaw, ǝri diiɽǝ mindaŋ ǝri miithi; nǝ kila lǝrrǝzi ŋigii ǝri diiɽǝ mindaŋ ǝrsi ǝccǝ haakima.
Ṯɔnḏa kii ŋiɽaŋal-ŋi ŋǝthi Yǝcu.
30 “Nyii kwiṯi kwǝthi ŋɔma ethisǝrri ŋeere mac sɔlṯa-gi kwiinyi; kaka ŋa ŋǝṯi-nyji neŋne nǝrṯoro ŋǝṯiny-ŋi aari haakima; ǝṯi hɔkwɔm wiinyi ǝni wirllalɔ, kaka nǝṯinyji-gweere naŋnalɔ ŋǝthi ṯɔgwor ṯiinyi mac, laakin nǝroro ŋǝthi ŋgwa kwɔɔsa-nyii.
31 “Mǝnyii-ŋi ɔnḏi kiyǝnǝ ŋǝthi rogɽo riinyi, a shahaaḏa kwiinyi ere oro rerrem mac. 32 Laakin nɔŋw naani kwette kwǝṯi-ŋi ɔnḏi kiyǝnǝ ŋǝni nyii, na nǝnyii elŋe ethaarɔŋw shahaaḏa ŋgwa kwǝṯɔŋw kette kwǝni nyii kwir rerrem. 33 Ŋaaŋa lɔɔsɔ yaavɔra naanɔ-gwɔ Yuhanna mindaŋ nɔŋw-ŋi ɔnḏi kii ŋir rerrem. 34 Nyii kwiti kwǝṯi kittatha ki-shahaaḏa kwǝṯhi kwizigwunǝŋ mac; laakin ŋandisa-nyji ŋɔ ṯɔɽɔk, mindaŋ mǝ kilaaw. 35 Yuhanna kwir kaka lombo lǝṯi fɔɔdi, nǝ ǝṯɔŋw erṯelɔ, nǝ ǝmmini ethi nyeŋlena kwokwo fɔɔri-gi kwuuŋwun. 36 Laakin shahaaḏa kwiinyi-tǝ nɔŋw ṯamthɔ shahaaḏa-la pur-pur kwǝthi Yuhanna; ŋa ŋǝṯi-nyji ǝrri nǝroro ŋinḏǝthǝ-nyji Papa kwiinyi ethisi ǝrri, nǝrṯoro ŋǝṯi andasi ki-lɔɔbi liinyi, ethi elŋe ethaarɔŋw Tǝrnyǝri ṯir ṯɔɔsa-nyii. 37 Nǝ Papa-ŋgwa kwɔɔsa-nyii nɔŋw-ŋi ɔnḏi kiyǝnǝ ki-lɔɔbi liinyi. Neere neŋne ṯogɽo ṯuuŋwun mac, wala etheese ŋunduŋw yǝy-yi naana; 38 neere kette ŋiɽaŋali ŋuuŋun ki-rɔgwor-na raalɔ mac, kaka niti nǝmminicǝ-ŋǝ ŋgwa mac kwɔɔsa-nyii. 39 Iccar Yiṯaab-na Yirllinǝlɔ ter, kaka nigittathiŋa-gwɔ ethaarɔŋw ŋimiitha ŋǝri ŋǝṯi nanni dok-dok ŋinaanɔ-gwɔna; nǝṯǝ Yiṯaab oro kiyǝ yette-yette yǝṯi andasi ŋiɽaŋali ŋiinyi! 40 Laakin nǝ derne ethiila naaniny-gwɔ ethaavi ŋimiitha. 41 “Nyiiti kwɔnaŋna ṯiniyǝnǝ ṯǝthi lizigwunǝŋ mac. 42 Laakin nǝnyii elŋe rac ethaarɔŋw ṯamɽa ṯǝthi Allah ṯiti ṯinaanɔ daŋgal-na mac. 43 Nyii kwinḏi yiriny-yi yǝthi Papa kwiinyi, laakin nǝrnyeere ǝnyji ki-lɔɔɽɔ-na mac, mɔŋwiila kweere nyithak yiriny-yi yǝthi rogɽo ruuŋwun, ǝnyji ki-lɔɔɽɔ-na. 44 Ŋaaŋa linḏiny ethi ǝmminici aŋgwɔrɔ, mamɽi ethi niini-nǝ daŋgal-na wɔɽe-wɔɽeny, mindaŋ ǝṯeere naŋni ṯiniyǝnǝ kitha ṯinḏi naanɔ-gwɔ Allah mac? 45 Ǝṯi kittathɔ ethaarɔŋw nyii kwɔŋǝsi kettice shǝkiyǝ naanɔ-gwɔ Papa mac; Muusǝ kwɔrɔ kwinḏi-ŋǝsi ethi kettice shǝkiyǝ, ŋgwa kwallathi-ŋa rɔgwori naana. 46 Ǝŋgi ǝmminici Muusǝ-ŋwɔ, ǝŋgir-nyii ǝmminici tok, kaka luuthuŋwsi-gwɔ ŋǝni nyii. 47 Laakin mǝseere ǝmmini ŋa ŋuluuthuŋwsi mac tǝ, e-ta ǝmǝ ǝmmini ŋiɽaŋali ŋiinyi aŋgwɔrɔ?”