aza 21
Yecu muŋw zi gwu ruwenizelu ṯujuli kəni
1 kwaḏan ta, na Yecu ruwenizi limeḏgen lu kwokwony ṯujuli kəni, teḏi ṯabariiyaŋw, kaka ṯaŋwu. 2 ner nani duŋw zimaan buṯruz, na tuma, kwecer tuŋwur, na naṯanayiil kweḏi kaanaŋw kwunani jaliil, na nyor nyiɽen nyeḏi zabḏi, na nden liḏaḏu lir limeḏgen. 3 nezi zimaan buṯruz eca ŋwu: nyi kwele eḏummi lumi. ner eca ŋwu: a kwer ta ele tɔk. ner ru, ner enḏi ki faluuka-na tuc. na kuluŋa ŋga, ner beryeŋini. 4 ma ezir afralu, na Yecu rilli ṯujuli kəni, lakin na limeḏgen ṯime ŋunduŋwu. 5 nezi Yecu eca ŋwu: kwelle, lum liti lere manya? ner eŋnici ner eca ŋwu: lende lere. 6 nuŋw zi eca ŋwu: keṯir difa faluuka ki ṯuɽma, ki ṯii teḏi mini, e zi ta inḏa. taŋwu, ner kaṯu, nuŋw zi niṯeḏa eḏi mulḏa, kaka ma gwu lum iiḏi litezir. 7 na meḏgen ŋgwa kwamɽa Yecu andaci buṯruzŋw, nuŋw eca ŋwu: Kweleny kwiri mi ŋgwu. mezi buṯruz neŋne ŋu ŋeni Kweleny kwiri, nuŋw keṯini kireti nana, kaka allaḏuŋw gwu lu kerreny, nuŋw ideḏa ŋaw-na. 8 na ta limeḏgen liḏaḏu ila faluuka gi kwɔkwɽeny limumɔlɔti difa lum li-na, kaka iti rucar gwu tujul-na tuk mac; tir kaka ŋwara ruɽi-wri la ruɽi-tuḏni (300).
9 ner dapa ki faluuka-na, ner gwu kaṯazi igəŋi wir ŋwurɔ, weḏi lumi la, na ṯuli kwɔkwɔ tɔk. 10 nezi Yecu eca ŋwu: ilarṯi lum li lɔkwɔ limezi umma kire-kirem. 11 na zimaan buṯruz dallu ki faluuka-na, nuŋw mulḏa difa, nuŋw gi ele ṯujuli kəni, kwurena lum-na dedep, lupa lupa, lir ruɽi-dufɔwɽeny-wri-ṯɔɽɔl (153). kwubaḏir gwu fa kinna, na ta difa ere ke tɔk mac. 12 nezi Yecu eca ŋwu: ilar, ereḏne. nuŋw ere kwere mac kweḏi limeḏgen kwumɔ bonye eḏutizelu, eḏeca: a kwiri kweni eya? ner elŋe rac, ner ari, Kweleny kwiri ṯa ŋgwu. 13 na Yecu ila, nuŋw dimi ṯuli, nuŋw zi inḏeḏa, lumi ṯa tɔk. 14 na nyamin orɔ-na tɔɽɔl, nyimɔ nyi Yecu ruwenizi limeḏgen lu, muŋw gwu diɽi ŋiɽany-na.
ŋiɽaŋal ŋeḏi kwaḏanŋw ŋimezi Yecu andaci buṯruzŋw
15 mer eḏne ta, na Yecu andaci zimaan buṯruzŋw, nuŋw eca ŋwu: zimaan, tor teḏi yuuna, a kwamɽanyi beṯen eḏi kwɔmne la tatap? nuŋw eca ŋwu: e pa, Kweleny, a kwilŋiicanyi rac, nyi kwamɽaŋa na ga. nuŋw eca ŋwu: ɽunizenyi nyaŋali nyinyi. 16 nuŋw eca ŋwu kwokwony: zimaan, tor teḏi yuuna, a kwamɽanyi a? nuŋw eca ŋwu: e pa, Kweleny; a kwilŋiicanyi rac, nyi kwamɽaŋa na ga. nuŋw eca ŋwu: karnicenyi yaŋali. 17 nuŋw eca kwokwony ŋwu, na nyamin orɔ-na ṯɔɽɔl: zimaan, tor teḏi yuuna, a kwamɽanyi na ga? na ṯugwor ye buṯruzŋw-na, muŋw zi gwu anḏaci nyamin-na ṯɔɽɔl, a kwamɽanyi a? nuŋw eca ŋwu: Kweleny, a kwilŋiiḏi kwɔmne tatap; a kwilŋiicanyi eḏari, kwamɽanyi. na Yecu eca ŋwu: ɽunizenyi yaŋali. 18 nyi kwecaŋa ma ŋwa rerem: kerreny, orɔ ŋa kamal, a kweṯikenne oɽeny, na eṯele kezir wete nyiḏak wunaŋnaŋa; lakin, ma ṯa orɔ kimeyaŋ ta, a kwala rii-na, a ŋa kwizi kwir ter kəkici, er ŋa mulḏa kezir were nyiḏak, witi wunaŋna ŋa gwu eḏele mac. 19 nuŋw zi andazi ŋu, baŋicaŋwzi ŋeḏi ŋiɽany ŋeŋgi rɔtɔ ḏa, ŋengi ŋi buṯruz nii Allah-na. andicaŋwzi ŋu, nuŋw eca ŋwu: romanyi.
20 na buṯruz izani kwaḏan gi, nuŋw eze meḏgen kwukwaḏaḏizi, kwamɽa Yecu. kwunderṯa kwinḏiraḏi Yecuŋw kwurdum la ki lomur liiḏinar li, ecaŋw gwu ŋwu: Kweleny, eya kwiri kweŋgi ŋa bɔŋwḏi? 21 ma buṯruz eze, nuŋw eca Yecuŋw ŋwu: Kweleny, kwor ŋgwu ta, na aḏa kwunaŋna eḏerrinici ŋunduŋwu? 22 na Yecu eca ŋwu: menyi kinna naŋni ŋunduŋwu eḏi nani mindaŋ menyi aɽa, ta na a kweḏi karḏa kere? romanyi, ŋa. 23 ner iṯiḏi ŋiɽaŋali la ŋu ŋiaŋga, ŋeḏi ŋgwa, kwiti kwindi eḏay mac; na Yecu ere ari mac: kwiti kwayi mac; nuŋw gi ari: menyi ta naŋni ŋunduŋwu eḏi nani mindaŋ menyi aɽa, ta na a kweḏi karḏa kere?
ŋiɽaŋal ŋeḏi kwaḏanŋw
24 kwunderṯa ŋgwu kwiri meḏgen kwunḏi ŋi ki ŋu, na kwumɔ zi lɔ tɔk. nenyelŋe ṯundiza ṯuŋwun ki ṯeni rerem. 25 ner nani ŋitezir ŋir ter ŋeḏi Yecu, ŋerruŋwzi. eŋgir lɔḏine tatap ŋere ŋere, nenyaru ŋwu: ṯurmun tatap titi ṯeŋgi miḏa yiṯami mac, yeŋgir zi lɔ.
Yǝcu mɔŋgwɔ ruwǝnnici ṯalaamiiza-lɔ ṯir dɔvokwɔrony.
1 Kwaathan-tǝ nǝ Yǝcu ruwǝcci ṯalaamiiza rogɽo-lɔ ruuŋwun kwokwony bahara kǝni kwǝthi Ṯabariiyya-ŋw. Nǝ ṯǝrṯiib oro kɔthɔ ṯɔrwǝzǝŋw-thi rogɽo-lɔ ruuŋwun. 2 Nǝ Sim@aan Bɔṯrɔs-ŋǝ naani dɔŋw Ṯɔɔma-gi kwǝṯir ǝccǝ Tɔɔŋwɔr, Nathnaa-iil kwǝthi Ghaana Jǝliil-ŋwɔ, nǝ nyɔr nyǝthi Zabḏi, nǝ ṯalaamiiz ṯiɽǝn ṯithaathɔ ṯir ṯalaamiiz ṯǝthi Yǝcu. 3 Nǝsi Sim@aan Bɔṯrɔs ǝccǝŋw, “Nyii kweele nyɔmma lɔmi.” Nǝrǝccǝŋw, “Nyiiŋǝ leele ŋa-gi.” Nǝreele mindaŋ nǝr ǝnḏi ki-mɔrkǝb-nǝ; laakin nǝreere mithǝ kwomne kweere mac kulŋǝ-ŋga.
4 Nǝ mǝ ǝzir aadithi ethi avralɔ, nǝ Yǝcu rilli ki-nḏɔṯṯɔm; laakin nǝ ṯalaamiiz ere elŋe mac ethaarɔŋw Yǝcu kwiri. 5 Nǝsi Yǝcu ǝccǝŋw, “Kwelle, ŋaaŋa kila lǝthi lɔmi leere-a?” Nǝrǝŋnici nǝrǝccǝŋw, “Bǝri.” 6 Nɔŋwsǝccǝŋw, “Kǝṯṯir diivǝ ki-ṯuɽumǝ ṯǝthi mɔni ṯǝthi mɔrkǝb, e-ta ǝsi kaṯṯisa lokwo.” E-ta mǝr kaṯṯɔ nǝreere ǝthi ŋɔma mac ethi mɔltha, kaka mǝr-gwɔ mithǝ lɔmi littǝzir. 7 Nǝ ṯilmiiz kitha ṯǝṯi Yǝcu amɽi ǝccǝ Bɔṯrɔs-ŋwɔ, “Kweeleny kwir-mi!” Mǝ Sim@aan Bɔṯrɔs neŋne ethaarɔŋw Kweeleny kwiri, nɔŋw kǝkkini kirethi-na kuuŋun, kaka nallathɔ-ŋgwɔ yirethi-lɔ yuuŋwun, ŋwɔṯaŋw nɔŋw iidǝthǝ ki-bahar-na. 8 Laakin nǝ ṯalaamiiz ṯithaathɔ iila ki-mɔrkǝb-nǝ, nǝr mɔloṯṯo diivǝ kwuurǝnnǝ lɔmi-na deddep, kaka niti nurucǝr-gwɔ wurǝyuŋ-nǝ tuk mac, laakin nǝr naani kaka yaarḏa ruɽi-ṯɔthni.
9 Mǝr dallitha ki-wurǝyu-lu tǝ nǝreese iigǝŋi wir ŋwɔro kinaŋw, wǝthi lɔmi-la, nǝ rǝghiiv tok. 10 Nǝsi Yǝcu ǝccǝŋw, “Ilar-ṯi lɔm-li lokwo kila limthi-ŋǝsi kire-kirem-ŋgwɔ” 11 Nǝ Sim@aan Bɔṯrɔs ele nɔŋw alla ki-mɔrkǝb-nǝ nɔŋw mɔltha diivǝ kwuurǝnnǝ lɔmi-na deddep lɔppa lɔppa, lir ruɽi-dɔvokwɔɽony-la wrii-ṯoɽol, nǝ nuurur-vǝ kinnǝni beṯṯen tok, nǝtǝ diivǝ ere unduni kinnǝni tok mac. 12 Nǝsi Yǝcu ǝccǝŋw, “Ilar aari afṯɔra” Nɔŋweere kweere mac kwǝthi ṯalaamiiz kwɔbɔɔnya ethi uṯicǝlɔ ethi ǝccǝnw, “A kwir kwɔndu?” Kaka nilŋithir-gwɔ ethaarɔŋw Kweeleny kwiri. 13 Nǝ Yǝcu iila nɔŋw dimmi rǝghiivǝ nɔŋwsi inḏǝthǝ, nǝ lɔm tok. 14 Nǝṯǝ taamin oro kɔrɔ tir nimrǝ ṯoɽol timǝri Yǝcu ruwǝnnici ṯalaamiiza-lɔ ṯuuŋwun kinaŋw mɔŋw diiɽǝ ki-ŋiɽany-na.
Yǝcu-ŋǝ Bɔṯrɔs-gi.
15 Mǝr ṯimmasi fɔṯɔra-tǝ, nǝ Yǝcu ǝccǝ Sim@aan Bɔṯrɔs-ŋwɔ, “Yaa Sim@aan, tɔr tǝthi Yuhanna a kwamɽa-nyii beṯṯen ethi kɔlɔ-la?” Nɔŋwɔccǝŋw, “Epa, Kweeleny; a kwilŋithi rac ethaarɔŋw nyii kwamɽa-ŋa.” Nɔŋwɔccǝŋw, “ɽunicǝ-nyii nyaaŋali nyiinyi.” 16 Nɔŋwɔccǝŋw kwokwony ki-taamin-la tir nimrǝ kwuɽǝn, “Yaa Sim@aan, tɔr tǝthi Yuhanna a kwamɽa-nyii-a?” Nɔŋwɔccǝŋw, “Epa Kweeleny; a kwilŋithi rac nyii kwamɽa-ŋa.” Nɔŋwɔccǝŋw, “Aŋrica yaaŋali yiinyi.” 17 Nɔŋwɔccǝŋw kwokwony ki-taamin-la tir ṯoɽol, “Yaa Sim@aan, tɔr tǝthi Yuhanna, a kwamɽa-nyii-a?” Nǝ Bɔṯrɔs ronyine kaka mɔŋgwɔ ǝccǝŋw ki-taamin-la tir ṯoɽol ŋwɔ, “A kwamɽa-nyii-a?” E-ta nɔŋwɔccǝŋw, “Kweeleny, a kwilŋithi kwomne tatap; a kwilŋithi rac ethaarɔŋw nyii kwamɽa-ŋa!” Nǝ Yǝcu ǝccǝŋw, “Aŋrica yaaŋali yiinyi. 18 Nyii kwǝccǝ-ŋǝ-mǝ ŋwɔ rerrem, kinaŋw nɔrŋa kinnǝ kaamal ǝṯi kǝkkininǝ wɔɽeny, nǝ ǝṯeele kǝzir wette nyithak wɔnaŋnaŋa-gwɔ ethi-gwɔ iilatha; laakin moro kimǝyǝŋ-tǝ, alla rii-na rɔɔŋwa, ǝŋǝ kwir ter kǝkkinǝ, mindaŋ kwɔŋa mɔlthatha ǝzir-yi wette nyithak witi wɔnaŋnaŋa mac ethi-gwɔ iilatha.” 19 Ŋandisa-ŋwsi ŋɔ ethisi ilŋithini ŋǝthi ŋiɽany ŋɔrtɔ tha ŋinḏi-ŋi Bɔṯrɔs ethi nii Allah-na. Kwaathan tǝ nɔŋwɔccǝŋw, “Rɔɔma-nyii.”
Yǝcu-ŋǝ ṯilmiiz-ṯhi ṯiṯhaathɔ.
20 E-ta mǝ Bɔṯrɔs orllolɔ nɔŋweese ṯilmiiza ṯithaathɔ ṯǝṯi Yǝcu amɽi ṯikwaathathisi kitha ṯinḏirathi Yǝcu-ŋwɔ kwɔrdɔm ki-@asha-la ṯǝccǝ yǝcu-ŋw-ŋwɔ, “Kweeleny, ǝyǝ kwɔrɔ ŋgwa kwinḏi-ŋǝ ethi bɔɔŋwɔthi?” 21 Mǝ Bɔṯrɔs ese nɔŋwɔccǝ Yǝcu-ŋw-ŋwɔ, “Kweeleny nǝ kwɔr ŋgwɔ tǝ?” 22 Nǝ Yǝcu ǝccǝŋw, “Ǝŋgiroro ŋǝthi ṯɔgwor ṯiinyi ǝŋgi-ŋwɔ naani mindaŋ ǝŋginy aaɽa, a kwǝthi karatha kǝthi aatha? Rɔɔma-nyii!” 23 Nǝ ŋiɽaŋal ŋɔ iṯithǝ-lɔ ki-limath-na ŋǝniŋw ṯilmiiz kɔthɔ ṯiti ṯinḏi ethi ai mac; laakin Yǝcu-tǝ nɔŋweere aarɔŋw mac, kwiti kwinḏi ethi ai mac, laakin, “Ǝŋgiroro ŋǝthi ṯɔgwor ṯiinyi ethi naani mindaŋ ǝŋginy aaɽa, a kwǝthi karatha kǝthi aatha?”
24 Ṯilmiiz ṯindǝr-ṯǝ kɔthɔ ṯɔnḏɔ kii kwomne-gi ŋgwɔ tatap, nɔŋwṯoro ŋundu ṯimǝ lo kwomne-ŋgwɔ tatap, na nǝnyii elŋe tok ethaarɔŋw shahaaḏa kwuuŋwun kwir rerrem.
Ŋiɽaŋal ŋirimṯhithǝ.
25 Laakin nǝtǝ kwomne naani kinnǝni kwittǝzir kwɔthaathɔ kwǝrrǝ Yǝcu; ǝŋgiŋw lothone kweere-kweere, ǝŋgi ṯurmun kǝzinni ere ǝthi ŋɔma mac ethi dimmi Yiṯaabi kiya yǝŋgi lothone.