aza 17
ṯara ki yiriny ṯeḏi Yecu
1 andiza Yecu ŋiɽaŋali ŋu, nuŋw dimi yey, nuŋw baŋa lerya la, nuŋw ari: Papa, zaa kwumila, niiye Tiɽŋelu-na, eḏi ma Tiɽŋelu nii ŋaŋwu-na tɔk, 2 kaka inḏeḏa ŋa gwu ŋunduŋwu zulṯa ki lizigwunaŋ la eḏizi inḏeḏa tatap ŋimiiḏa ŋiaŋ, ŋinḏi eḏi nanniḏa dɔk, kla limezinḏeḏa ŋunduŋwu. 3 ŋinderṯa ŋir ŋimiiḏa ŋiaŋ, ŋinḏi eḏi nanniḏa dɔk, eḏelŋe ŋaŋwu, kwir Allah wir wutuput wir rerem, na Yecuŋw Kwruztu kwuza ŋa. 4 nyi kwumɔŋa nii-na ki ṯurmun-na, kaka ma ŋa gwu rataci ŋɔḏɽor ŋimenyjinḏeḏa eḏizerri. 5 kire-kirem Papa, niiye nyuŋwu-na nani ŋa gwu ŋiniṯ ŋi ŋeṯindizeḏi, iti kinna kitina ṯurmun mac. 6 nyi kwumɔruweci lizi yiriny lu yɔŋwa, kla limenyjellici ki ṯurmun-na. ner orɔ lɔŋwa, nenyji ma inḏeḏa, ner ŋa ma miḏici ŋiɽaŋali. 7 ŋu ma pa ŋimerzi elŋece kirem ŋeḏi kwɔmne tatap kwumenyi inḏeḏa, eḏari, kwuruḏi nanuŋw gwu. 8 kaka menyji gwu ilŋiiḏini ŋiɽaŋali ŋimenyjinḏeḏa, ner zi miḏa, ner nyi elŋece rerem rac eḏari, kwuruḏi nanuŋw gwu; ner zi ma emni tɔk eḏari, kwunderṯa kwuza ŋunduŋwu. 9 klu lerizenyji ki yiriny; liti lerizenyji ki yiriny leḏi ṯurmun mac. ner ṯa orɔ kla limenyjinḏeḏa, kaka urir gwu lɔŋwa. 10 kwɔmne tatap kwinyi, nuŋw ṯa orɔ kwɔŋwa; na kwɔŋwa nuŋw ṯa orɔ kwinyi, na ŋiniṯ ŋinyi erṯelu deŋgen-na.
11 nyi kwiti kwunani dəŋ ki ṯurmun-na mac; lakin klu ta er orɔ linani ki ṯurmun-na, enyila nani ŋa gwu. Papa, kwirlinelu ter, eti zi aŋraci ŋuma ŋi ŋeḏi yiriny yɔŋwa kla limenyjinḏeḏa, mindaŋ erorɔ-na lutuput, kaka ur indi gwu-na lutuput. 12 nani nyi li kinna, eṯinyjaŋraci ŋuma ŋi ŋeḏi yiriny yɔŋwa, kla limenyjinḏeḏa; eṯinyji karni, nuŋw ere ṯuḏi kwere mac, illa ŋgwa kwir tor teḏi ŋikiraḏalu, mindaŋ er rataḏi ŋuluḏina. 13 na kirem nyi kwaɽa nani ŋa gwu. ŋandizanyji ŋu ki ṯurmun-na mindaŋ er eḏi ṯinyiŋlana tinyi minmin deŋgen-na. 14 limenyjinḏeḏa ŋiɽaŋali ŋɔŋa; nezi lizi leḏi ṯurmun uwezi, kaka iti urir gwu leḏi ṯurmun mac, kaka ṯa nyuŋwu. 15 nyi ŋgwu kwari ŋa ki yiriny eḏi zi ere allalu ki ṯurmun-na mac lakin eḏi zi ṯinyini nana ŋgwa kwikiyaḏa lu. 16 liti liri leḏi ṯurmun mac, kaka ṯa nyuŋwu. 17 rillizelu ter ŋirlalu ŋi. ŋiɽaŋal ŋɔŋa ŋinderṯa ŋeni ŋirlalu. 18 kaka uzanyi gwu ki ṯurmun-na, limenyjuzi ki ṯurmun-na ṯaŋwu tɔk. 19 nyi ŋgwu kwurilli rɔgwɽɔ lu rinyi ter, ŋiɽaŋal ŋi ŋeŋen, mindaŋ er ma rillinelu ter ŋirlalu ŋi.
20 liti lericenyji klu ki yiriny ṯuɽuk mac, lakin ner orɔ tɔk kla linḏi nyi eḏalliḏa rugwori nana, ŋiɽaŋal ŋi ŋinḏirzi eḏi zi ilŋiiḏini. 21 er ma orɔ-na lutuput; kaka eṯi nyi gwu nanni-na, Papa, na eṯi ŋa gwu nanni-na, ŋwu ṯa, er nyji gwu nanni-na tɔk. mindaŋ a ma lizi leḏi ṯurmun emnizi ŋaŋwu eḏari: kwunderṯa kwuza. 22 ŋiniṯ ŋinḏeḏanyji, ŋimenyinḏeḏa ŋunduŋwuzi, mindaŋ er ma orɔ-na lutuput kaka nyuŋwuzi. 23 er orɔ ṯaŋwu, nanni nyji gwu-na, nanni ŋa duŋgwinyi-na tɔk, er ma orɔ-na minmin lutuput, ṯaŋwu, a ma lizi leḏi ṯurmun elŋece eḏari, kwunderṯa kwuza, na leṯuŋw zi amɽi kaka eṯuŋw gwu amɽi ŋunduŋwu.
24 Papa, nyi kwunaŋna lor klu, linḏeḏanyji haḏiya, enyi li nanni kezir wenyi gwu nanni, mindaŋ er ma ecice ŋiniṯi ŋinyi ŋimenyjinḏeḏa, kaka amɽenyi gwu kerreny tuk, iti kitaŋa gwu ṯurmuna kinna mac. 25 Papa kwir kwizana, lizi leḏi ṯurmun limɔŋa ṯime, ne nyi orɔ kwumɔ ŋa elŋe, na lizi klu linyi elŋece rac eḏari: kwunderṯa kwuza. 26 limenyji ruwenizi yiriny lu yɔŋwa deŋgen-na, enyji ruwenize lu tɔk, mindaŋ eḏi ṯamɽa, ṯamɽanyi ŋi, nanni deŋgen-na, na enyi ma nanni deŋgen-na tɔk.
1 Mǝ Yǝcu ṯimmasi ŋiɽaŋali ŋɔ rac tǝ, nɔŋw dimmi yǝy nɔŋw baaŋatha leereya-la mindaŋ nɔŋwaarɔŋw, “Papa saa@ kwɔmǝ ɔppatha; niiyǝ Tɔɔrɔ-na mindaŋ mǝ-ŋǝ Tɔr niinǝ tok, 2 kaka ninḏǝthǝ-ŋǝ-gwɔ sɔlṯa ki-lizigwunǝŋ-lǝ tatap, mindaŋ nɔŋwsi inḏǝthǝ kila tatap ŋimiitha ŋǝṯi nannitha dok-dok kila linḏǝthǝ-ŋǝsi ŋunduŋw. 3 Nǝ ŋimiitha ŋǝṯi nannitha dok-dok nǝrǝniŋw, ethi elŋe ŋaaŋwɔ kwir Allah wir rerrem wɔtɔpɔt, nǝ Yǝcu Kwɔrɔstɔ-ŋw kwɔɔsa-ŋa. 4 Nyii kwiniiyǝ-ŋǝnǝ kɔnɔŋw-lɔ kwurǝyu-lu, kaka mǝnyii-gwɔ ṯimmasi ŋothɽor ŋa ŋinḏǝthǝ-nyji ethisi ǝrri; 5 Papa niiyǝny-nǝ kire-kirem-ŋgwɔ kiyǝnǝ yɔɔŋwa ṯiniyǝthi-ṯǝ kitha ṯette-ṯette ṯǝṯiny-thi niinǝ kinaŋw-lɔ tuk nigittina-gwɔ ṯurmun-lɔ kwon-kwon.
6 “Nyii kwɔma ruwǝcci lizi yiriny-lɔ yɔɔŋwa kila linḏǝthǝ-nyji ki-ṯurmun-nǝ; nǝroro lɔɔŋwa, mindaŋ nǝnyɽi inḏǝthǝ nyuŋw, ŋwɔṯaŋw nǝr mithǝ ŋiɽaŋali ŋɔɔŋa. 7 Nǝ kirem tǝ limǝ elŋe ethaarɔŋw kwomne ŋgwa kwinḏǝthǝ-nyji kwinḏi naani-ŋa-gwɔ; 8 limǝ-nyji inḏǝthǝ ŋiɽaŋali ŋa ŋinḏǝthǝ-nyji, mindaŋ nǝrsi aavi, e-ta nǝrsi elŋe ethaarɔŋw kwinḏi dɔŋgwɔŋa-ŋgi rerrem; mindaŋ mǝr ǝmmini ethaarɔŋw ŋa kwir kwɔɔsa-nyii. 9 Kɔlɔ lǝriccǝ-nyji kiyiiriny; nyii kwiti kwǝricǝ ṯurmunǝ kiyiiriny mac, laakin nǝroro kila linḏǝthǝ-nyji lǝricǝ-nyji kiyiiriny, kaka nɔrɔr-gwɔ lɔɔŋwa; 10 nǝ kila tatap lir liinyi nǝroro lɔɔŋwa, nǝ lɔɔŋwa nǝroro liinyi, mindaŋ nǝnyii niini-nǝ deŋgen-na. 11 Nǝ kirem tǝ ninyeele ethiila naaniŋa-gwɔ, ninyeere ǝni kwɔnaanɔ kwokwony ki-ṯurmun-nǝ mac, laakin ŋundu-ŋǝ tǝ nǝr nanni ki-ṯurmun-nǝ. Papa kwirllinǝlɔ ter, aŋricasi yiriny-yi yɔɔŋwa, kila linḏǝthǝ-nyji, mindaŋ mǝrorona lɔtɔpɔt, kaka nyuŋwsi ŋa-gi. 12 A-naaniny tǝ kinnǝni ŋundu-ŋǝli, nǝnyɽi aŋraci yiriny-yi yɔɔŋwa kila linḏǝthǝ-nyji; limǝ-nyji aŋraci mindaŋ nɔŋweere ṯɔɔthi kweere mac illi ŋgwa kwir kwizi kwǝthi ṯigiirathalɔ, mindaŋ mǝrǝthi yǝnǝ ŋǝthi Kiṯaab Kirllinǝlɔ ter. 13 Laakin kirem tǝ nǝnyii ele ethiila naaniŋa-gwɔ; nyii kwandisa ŋiɽaŋali ŋɔ ki-ṯurmun-nǝ, mindaŋ mǝ ṯinyiŋlana ṯiinyi urǝnni deŋgen-na deddep. 14 Limǝ-nyii inḏǝthǝ ŋiɽaŋali ŋɔɔŋa; mindaŋ nǝsi ṯurmun wǝsi kaka niti nɔrɔr-gwɔ lǝthi ṯurmun mac, nǝ nyii tok ninyeere oro kwǝthi ṯurmun mac. 15 Nyii kwiti kwaari-ŋa kiyiiriny ethisi dimmǝ kithaay mac, laakin ethisi aŋraci ŋgwa naana kwigii. 16 Liti lir lǝthi ṯurmun mac, kaka nyuŋwɔ kwiti kwɔrɔ kwǝthi ṯurmun mac. 17 Rillǝsilɔ ter ŋiɽaŋali-ŋi ŋɔɔŋa ɔir rerrem. 18 Kaka nɔɔsa-nyii-gwɔ ki-ṯurmun-nǝ, ǝnyji ɔɔsi nyii tok ki-ṯurmun-nǝ. 19 Nǝ ŋiɽaŋali-ŋi ŋeeŋen nǝnyii rilli rɔgɽɔ-lɔ riinyi ter, mindaŋ mǝrŋǝ rillici rogɽo-lɔ reeŋen tok rerrem.
20 “Liti lǝriccǝ-nyji kɔlɔ kiyiiriny dak mac, laakin nǝroro kila tok linḏi-nyii ethi ǝmminici kandisa-gi keeŋen, 21 mindaŋ mǝroro lɔtɔpɔt; kaka-ṯǝ a-naani ŋa-gwɔ duŋgwiny-nǝ, nǝ nǝnyii naani dɔŋgwɔŋa-na tok, mindaŋ mǝr naani deŋger-nǝ tok, e-ta ǝmǝ ṯurmun ǝmmini ethaarɔŋw ŋǝ kwir kwɔɔsa-nyii. 22 Limǝ-nyji inḏǝthǝ ŋinithi ŋir ṯǝ kaka ŋa ŋinḏǝthǝ-nyji mindaŋ mǝrorona lɔtɔpɔt, kaka nyuŋwsi ŋa-gi lirna lɔtɔpɔt, 23 nyii ŋgwɔ kwɔnaanɔ deŋgen-na, nǝ ŋa nǝ naani duŋgwiny-nǝ, mindaŋ mǝroro lɔtɔpɔt min-min, mindaŋ mǝ ṯurmun elŋe ethaarɔŋw ŋa kwir kwɔɔsa-nyii, na nǝsi amɽi kaka-ṯǝ namɽa-nyii-gwɔ. 24 Papa, linaŋna-nyji kɔlɔ linḏǝthǝ-nyji, ethi naani nyii-gi kǝzir winḏi-nyii-gwɔ ethi nanni, mindaŋ mǝreese ŋinithi ŋiinyi ŋinḏǝthǝ-nyji; kaka namɽa-nyii-gwɔ kinaŋw-lɔ tuk niti nigittina-gwɔ ṯurmun kinnǝni mac. 25 Papa Kwirllinǝlɔ, ṯurmun ṯiti ṯilŋithiŋǝ mac, laakin ninyoro nyii kwilŋithiŋǝ; nǝ kɔlɔ tok nǝr elŋe ethaarɔŋw ŋa kwir kwɔɔsa-nyii. 26 Limǝ-nyji duŋgwǝci ethelŋe ŋaaŋwɔ, nǝ ŋwɔṯaŋw nyaari isṯimir ethisi ilŋithini, mindaŋ mǝ ṯamɽa kitha ṯamɽanyii-ṯhi nanni deŋgen-na, nǝ nyii tok nyii nanni deŋgen-na.”