aza 16
1 ŋimɔŋazi andaci ŋu, mindaŋ er ŋazi ere ṯugwudazi ŋere mac. 2 le ŋazi allalu ki majma-na. emba, lomur klu linḏi le ŋazi li kwere eɽenye, ŋwaru ŋwa, nyi kwami əkizi Allah ŋɔḏɽorŋw. 3 er ŋazi errizi ŋu, ṯimiḏir gwu Papaŋw, na nyuŋwu tɔk. 4 lakin ŋimɔŋazi andaci ŋu, mindaŋ ma lomur enḏa ta, ezi ṯiŋayini, kaka andicaŋazi gwu ŋwu. ŋiti ŋandicaŋazi kinaŋw kwɔnkwɔn mac, kaka nani nyi gwu ta kinna ŋaŋa li. 5 na kire-kirem, nyi ŋgwu kwele nanuŋw gwu kwuzanyi, na kwende kwere daŋgal-na kwecanyi ŋwu: a kwinḏi eḏele ṯaka? 6 na kaka ma ŋazi gwu andaci ŋu, ŋazi mba rugwor ye-na. 7 lakin, nyi kwandicaŋazi rerem, ŋɔ ŋazi ṯa zayḏa, menyi ele; menyi ere ele mac, a Kwumeca ere ila nani ŋa gwu mac, lakin menyi ele ta, ŋazi ṯa ṯiŋaca-na. 8 muŋw ṯa ila, ŋwu zi ṯa ilŋiiḏini leḏi ṯurmun ŋeḏi ŋikya, na ŋeḏi ŋizana, na ŋeḏi hukm ṯɔk. 9 ŋeḏi ŋikya, kaka iti allaḏir nyi gwu rugwori nana mac; 10 ŋeḏi ŋizana, kaka inḏi nyi gwu nani gwu Papa, er nyi ere eze kwokwony mac; 11 ŋeḏi hukm, kaka mer gwu eca kwelenyi kweḏi ṯurmun kḏu hakwuma. 12 nyi kweḏi kinna ŋiɽaŋali ŋitezir eḏi zi andaci ŋaŋwuzi. lakin ŋiti ŋazi eḏici ŋuma mac eḏi zi miḏa kire-kirem. 13 mindaŋ muŋw ila kwir Ṯigɽim ṯeḏi ŋirlalu, kwɔ ŋazi mulɔtɔ ki ŋiɽaŋal-na tatap ŋir rerem; kaka iti inḏuŋw gwu eḏandazi zulṯa gi kwuŋwun mac. lakin ŋere ŋiniŋnaŋw zi, ŋwu zi andazi; kwɔ ŋazi baŋaci tɔk ŋa ŋinḏi eḏila. 14 kwenyi nii-na, kaka inḏuŋw zi gwu eḏafa ŋeni ŋinyi, eḏi zi andaci ŋaŋwuzi. 15 kwɔmne tatap kweḏi Papa, kweni kwinyi, ŋwu ṯaŋwu, nyi kwecaŋazi ŋwa: eṯuŋw zi ta afi ŋeni ŋinyi, kwɔŋazi andaci.
ŋiɽaŋal ŋedi Kweleny muŋw zi naŋni eḏi zi ṯazalu
16 kwɔkwɔk, er nyi ulezi; mindaŋ kwokwony kwɔkwɔk ta, er nyi ta eze. 17 na limeḏgen andiza la lɔkwɔ deŋgen-na wuɽe-wuɽeny, ner aru ŋwu: ŋeni aḏa ŋandicaŋw zi nyuŋwuzi, aruŋw gwu ŋwu, kwɔkwɔk, er nyi ulezi, na kwokwony kwɔkwɔk, er nyi eze? na ŋu: kaka inḏinyi gwu nani gwu Papa? 18 ner ṯa ari, aḏa kwiri kwaruŋw gi ŋwu, kwɔkwɔk? ŋiri ṯaŋ, ŋaru ŋi ŋwu? ŋimer zi ṯime ḏuṯ. 19 nezi Yecu elŋece linaŋna eḏuṯizelu, nuŋw zi eca ŋwu: a kla manja luṯalu daŋgal-na ŋiɽaŋal ŋi ŋinyi, ŋari nyi ŋi ŋwu, kwɔkwɔk er nyi ulezi, na kwokwony kwɔkwɔk ta, er nyi ta eze a? 20 nyi kwecaŋazi ma ŋwa rerem, a lari, oɽa ŋwal ki, a ronyine tɔk; lakin kla leḏi ṯurmun ta, er amina keni ŋunduŋa. na ŋaŋa tɔk a lironyina, lakin ŋazi ṯironyina ruḏinizi ṯinyiŋlana. 21 kwaw kwaciza ŋelŋe, eṯuŋw ronyine kaka ma gwu lomur ṯimanni, mindaŋ ma tor oɽaḏa lu, eṯuŋw ere ṯiŋayini ŋijima kwokwony mac; eṯuŋw amina, kaka ma gwu kwizigwunaŋ elŋine ki turmun-na. 22 ŋaŋa tɔk, rugwor ralu riiḏi ŋazi-na kirem, lakin nyi kwɔ ŋazi eze kwokwony, mindaŋ a nyeŋle rugwor-na; ŋazi kwizi kwere ere dimeḏa ṯinyiŋlana mac. 23 ki lamin ṯa kla, er nyi ŋi ere uṯizelu ŋere mac. nyi kwecaŋazi ma ŋwa rerem, ma uṯizi Papaŋw lu kwɔmne gi kwere nyiḏak, yiriny yi yinyi, kwɔŋazi ta inḏeḏa. 24 a lende limuṯalu kinna kwɔmne gi kwere yiriny yi yinyi, uṯir ga lu ta, a ṯa afi, mindaŋ a ṯinyiŋlana ṯalu orɔ minmin. 25 ŋimɔŋazi andaci ŋu ŋiŋerɔŋwa. lomur klu linḏi, ŋazi li ere andaci ŋiŋerɔŋwa kwokwony mac; ŋɔ ŋazi keni andaci pɔrpɔr ŋeḏi Papa. 26 ki lamin ṯa kla, a luṯalu yiriny yi yinyi, na ŋazi ere eca ŋwu, nyi kwaraḏi Papaŋw ŋwal ŋwere ŋweni ŋaŋa mac, 27 kaka eṯi ŋazi gwu ta Papa ŋundu amɽi; kaka ma gwu amɽi, na kaka ma gwu emni tɔk eḏari, kwuruḏi ki Allah-na. 28 nyi kwuruḏi nani gwu Papa, nenyila ki ṯurmun-na; kwokwony, enyefrici ṯurmuna, enyaɽiḏa nani gwu Papa.
29 na limeḏgen eca ŋwu: icaṯi, a kwiri pa ŋgwu kwandize pɔrpɔr kire-kirem ŋgwu, na ere andazi ŋiŋerɔŋwa mac. 30 ŋu ṯa ŋimenyjelŋece kirem, nenyari, kwilŋiica kwɔmne tatap, eṯuŋw ere naŋni kwere mac eḏuṯizelu ŋiɽaŋal ŋi ŋere. ṯaŋwu ŋimenyji ta emni, nenyari, kwuruḏi nani gwu Allah. 31 nezi Yecu eŋnici, nuŋw zi eca ŋwu: a klu limemni kirem a? 32 izarṯi, lomur klu linḏi, epa, limenḏina le li faḏi ki riny ki riny eḏele daŋgal ŋwuzi; er nyi ṯaza lu kwutuput; lakin, nenyere nani kwutuput mac, kaka eṯi nyi gwu Papa nannazi. 33 ŋimɔŋazi andaci ŋu ŋaŋa tatap, mindaŋ a ŋi ma eḏi ŋiɽena duŋgwinyi-na. a leḏi ṯurfa ki ṯurmun-na rac; lakin, ruḏir lugwul keni kaka menyi gwu illazi ṯurmuna ki.
1 “Ŋandica-ŋǝsi ŋɔ mndaŋ mǝ ṯǝmminǝ ṯaalɔ ere ajli mac. 2 Liŋǝsi ruttutǝlɔ ki-limajma@-na. Lɔɔmɔr kila linḏi ethiila, mindaŋ mǝŋǝsi kwette nyithak eɽinye tǝ, ŋwɔ kittatha ethaarɔŋw ŋǝni ŋǝrricǝ-nyji Allah. 3 Ŋinḏirsi ethisi ǝrri ŋɔ kaka niti nilŋithir-gwɔ Papa-ŋw mac, wala ethi elŋe nyuŋwɔ. 4 Laakin ŋandica-ŋǝsi ŋɔ mindaŋ mǝ lɔɔmɔr leeŋen iila linḏirsi-li ethisi ǝrri ŋɔ, e-ta esi-mǝ kithaayini ŋa ŋandica-ŋǝsi.
Ŋothɽor ŋǝthi Ṯigɽim Ṯirllinǝlɔ ter.
“Nyii kwiti kwɔmǝ-ŋǝsi rarmatha mac kinaŋw-lɔ tuk kwon-kwon ethi andaci ŋaaŋwɔsi kwomne-ŋgwɔ, kaka a-naaninyii-gwɔ ŋaaŋa-li. 5 Laakin kirem tǝ, nyaaɽitha naanɔ-gwɔ kwɔɔsa-nyii, laakin ŋweere kweere mac kwaalɔ kwinḏi-nyii ethi uṯicǝlɔ ethaarɔŋw, ‘A kwinḏi etheele ṯaka?’ 6 Laakin kaka mǝŋǝsi-gwɔ andaci ŋiɽaŋali mindaŋ, ṯɔrɔɔnyɔna ṯimǝ urǝnni rɔgwori raalɔ deddep. 7 Laakin ŋɔ ŋandisa-nyji ŋir rerrem: ŋinḏi ethoro faayitha kwaalɔ mǝnyii ele kithaay, nǝ mǝnyii ere ele kithaay mac tǝ, a kwumǝccǝ ere iila naamiŋa-gwɔ tok mac; laakin minyeele tǝ ŋǝsi usicǝ. 8 Mɔŋwiila tǝ ŋwɔ baaŋaci ṯurmunǝ ŋikiyaŋi ŋeeŋen, ŋirllalɔ nǝ hɔkwɔma tok: 9 ŋǝthi ŋikiya tǝ, nǝroro ŋiti ŋǝmminicǝr-nyiiŋi mac, 10 ŋǝthi ŋirllalɔ tǝ, kaka ninḏiny-gwɔ ethaaɽitha naanɔ-gwɔ Papa, mindaŋ ǝrnyeere ese kwokwony mac; 11 nǝ ŋǝthi hɔkwɔm tǝ, nǝroro ŋǝthi kweeleny kwǝthi ṯurmun kɔthɔ kwɔmǝ haakimni.
12 “Nyii ŋgwɔ-tǝ kwǝthi ŋiɽaŋali ŋittǝzir ŋǝthisi andaci ŋaaŋwɔsi, laakin ŋiti ŋǝsi ǝthici ŋɔma-na kinnǝni kire-kirem-ŋgwɔ mac. 13 Mǝ Ṯigɽim ṯǝthi ŋirllalɔ iila tǝ, kwɔŋǝsi iili ki-ŋiɽaŋal-na ŋa tatap ŋir rerrem kaka niti ninḏi-ŋgwɔ ethisi andasi sɔlṯa-gi kwuuŋwun mac, laakin ŋette nyithak ŋinḏi-ŋwsi ethisi neŋne, nǝroro ŋɔŋwsi andasi mindaŋ mɔŋwsi andaci ŋaaŋwɔsi ŋa ŋinḏi ethiila. 14 Ṯinḏi-nyii ethi niinǝ, kaka ninḏi-ŋgwa ethisi aavi ŋa ŋǝni ŋiinyi ŋwɔsi andaci ŋaaŋwɔsi. 15 Kwomne ŋgwa tatap kwǝthi Papa naŋworo kwiinyi; nǝrṯoro ŋɔ ŋǝccǝ-ŋǝsi-ŋiŋw, ṯinḏi ethisi aavi ŋǝni ŋiinyi ŋwɔsi andaci ŋaaŋwɔsi.
Ṯɔrɔɔnyɔna-ŋǝ ṯaamathina.
16 “Kwaathan kwokwo-tǝ, ǝrnyeere ese kwokwony mac; nǝ kwaathan kwokwo kwokwony tǝ ǝmyeese.” 17 Nǝ ṯalaamiiz ṯokwo ṯuuŋwun andasi-na naraarɔŋw, “Ŋǝni ǝyǝ ŋɔ ŋandica-ŋwsi nyuŋwsi ŋaari-ŋiŋw, ‘Kwaathan kwokwo, ǝrnyeere ese mac, nǝ kwokwony kwaathan kwokwo ǝrnyeese’; nǝ, ‘Kaka ninḏiny-gwɔ etheele naanɔ-gwɔ Papa’?” 18 Nǝr aarɔŋw, “Ŋǝni ǝyǝ ŋǝniŋw, ‘Kwaathan kwokwo’? Ŋenḏe ŋilŋthi-nyji ŋǝni ǝyǝ ŋandisa-ŋwsi.” 19 Nǝsi Yǝcu elŋe naana linḏi ethi uṯicǝlɔ, mindaŋ nɔŋwsǝccǝŋw, “Ŋindǝr ŋɔ ŋuṯucǝŋǝ-ŋi rogɽo-lɔ raalɔ, ŋiɽaŋal-ŋi ŋandisa-nyji ŋǝniŋw, ‘Kwaathan kwokwo ǝrnyeere ese mac, nǝ kwokwony kwaathan kwokwo ǝrnyeese’? 20 Nyii kwǝccǝ-ŋǝsi-mǝ ŋwɔ rerrem, ŋaaŋa laari mindaŋ a-ronyine, laakin ṯurmun-tǝ ŋwɔ nyeŋlena; ŋaaŋa linḏi ethi jiɽiminni; laakin a ṯijiɽiminnǝ ṯaalɔ ɔrlle ŋworo ṯaamana. 21 Mǝ ŋijma accasi kwayɔ ǝṯɔŋw jiɽiminni, kaka mǝgwɔ saa@ kwuuŋwun iilicǝ; laakin mɔŋw ǝlŋe tɔɔrɔ rac tǝ, ǝṯɔŋweere kithaayini ŋijma ŋa kwokwony mac, ṯinyiŋla-thina ṯǝthi tɔr timǝ elŋenne ki-ṯurmun-nǝ. 22 Ŋwɔṯaŋw nǝthi kire-kirem-ŋgwɔ ṯɔrɔɔnyɔna, laakin nyii kwɔŋǝsi ese kwokwony rac mindaŋ mǝ rogwor raalɔ nyeŋlena, mindaŋ ǝŋǝsi kwizi kweere ere dimǝthǝ ṯinyiŋlana kɔthɔ ḏuṯ 23 Nǝ ki-laamin-la ṯǝ kila ǝrnyeere uṯicǝlɔ kwomne-gi kweere mac. Nyii kwǝccǝ-ŋǝsi-mǝ ŋwɔ rerrem, mǝ uṯici Papa-ŋwɔlɔ kwomne-gi kweere kwɔŋǝsi-tǝ inḏǝthǝ yiriny-yi yiinyi. 24 Nǝ kire-kirem-ŋgwɔ neere ɔṯalɔ kwomne-gi kweere mac yiriny-yi yiinyi; ɔṯɔr-galɔ e-ta ǝtǝ aavi, mindaŋ mǝ ṯinyiŋlana ṯaalɔ oro min-min.
Ṯithiinyǝ ṯǝthi-thi ṯiinyi ṯurmunǝ.
25 “Nyii kwǝti ŋǝsi andaci ŋiɽaŋali ŋir amthaal; laakin lɔɔmɔr kila linḏi ŋiseere andaci amthaal-yi kwokwony mac laakin ŋǝsi andicalɔ por-por ŋǝthi Papa. 26 Nǝ ki-laamin-la kila tǝ, a ɔṯalɔ yiriny-yi yiinyi; nǝ ŋǝsi ere ǝccǝŋw mac nyii kwɔŋǝsi ǝricci Papa-ŋwɔ kiyiiriny ki-lɔɔbi laalɔ; 27 kaka namɽa-ŋǝsi-gwɔ Papa rogɽo-ri ruuŋwun wɔɽe-wɔɽeny, kaka-ṯǝ namɽar-nyii-gwɔ mindaŋ nǝr-nyǝmminci ethaarɔŋw kwinḏi naanɔ-gwɔ Papa. 28 Nyii kwinḏi naanɔ-gwɔ Papa nǝnyiila ki-ṯurmun-nǝ; ŋwɔṯaŋw kwokwony, nyii ɔrlacci ṯurmunǝ ŋwɔdoŋw mindaŋ nyaaɽitha naanɔ-gwɔ Papa.” 29 E-ta nǝ ṯalaamiiz ǝccǝŋw, “A kwɔrpa-ŋgwɔ kwɔmǝ andisalɔ por-por kirem kanḏisa-gi kiti kir amthaal mac! 30 Ŋimǝ-nyji elŋe kirem ethaarɔŋw a kwilŋithi kwomne tatap, nǝ neere naŋni kwizi kweere mac ethi uṯici ŋaaŋwɔ-lɔ: nǝ ŋiɽaŋal-ŋiṯǝ ŋɔ nǝnyii ǝmmini ethaarɔŋw a kwinḏi naanɔ-gwɔ Allah.”
31 Nǝsi Yǝcu ǝŋnici nɔŋwsǝccǝŋw, “Ŋaaŋa limǝ ǝmmini kirema? 32 Lɔɔmɔr kila linḏi, nǝ limǝ kǝniny iila rerrem, minḏaŋ mǝ faathitha kiriny-kiriny daŋgal-ŋwɔsi, mindaŋ ǝrnyii ṯayyalɔ kwɔtɔpɔt; laakin ninyeere oro kǝniny kwɔtɔpɔt mac, kaka a-naanicany-gwɔ Papa. 33 Ŋimǝ-ŋǝsi andaci ŋɔ, mindaŋ mǝthi ṯibɽǝthǝlɔ pǝt duŋgwiny-nǝ. Ŋaaŋa likaṯṯasi ṯurvǝ ki-ṯurmun-nǝ; laakin rɔɔthɔr luugwul kǝniny kaka mǝny-gwɔ illazi ṯurmunǝ kii.”