aza 7
Yecu kwiri Kiziiz kir kweleny kaka malkizaaḏikŋw
1 na malkizaaḏik ŋgwu, kwir kweleny kweḏi zaliimŋw, kwir kiziiz keḏi Allah wuṯemḏelu purpur, ner kadriḏi ibrahiim gi, muŋw aɽa muŋw gwu iɽinyiiḏa lelenyi, nuŋw ortaḏa ŋunduŋwu; 2 na ibrahiim inḏeḏa kwete kweḏi wri kweḏi kwɔmne tatap eḏorɔ kwuŋwun. na yiriny yuŋwun ṯay ṯi kwupizena eḏeni kweleny kweḏi ṯofḏana, nuŋw eni tɔk kweleny kweḏi zaliimŋw, ŋenuŋw, kweleny kweḏi ŋiɽena. 3 nuŋw ere eḏi ṯernyin ŋwuzi lenyin gi mac, ya likwurna tɔk mac, nuŋw ere eḏi ŋwamin ŋwiŋna mac, nuŋw ere eḏi ŋwamin ŋweḏi kwaḏanŋw tɔk mac; aɽanaŋw gwu Tor teḏi Allah, eṯuŋw nanniḏa kwir kiziiz dɔk dɔk.
4 na izarṯi, kweni kwete kwuṯemḏizelu! na ibrahiim, kwir kwukwurna, inḏeḏa ŋunduŋwu kwete kweḏi wri kweḏi kwɔmne tatap kwumɔŋw afa ki ṯuwən-na. 5 na kla lir ŋelŋe ŋeḏi laawi leṯafi ŋɔḏɽor ŋeḏi yiziiz, eṯir eḏi amra kuruu-na eḏafi kwete kweḏi wri nani gwu lizi, lir lieŋgen leŋen, ner orɔ ŋunduŋa kinna tɔk ŋelŋe ŋeḏi ibrahiim. 6 lakin na malkizaaḏik, kwiti kweḏi likwurna leŋen mac, nuŋw afi kwete kweḏi wri nani gwu ibrahiim, nuŋw ortaḏa ŋunduŋwu kwumafa ṯikitaḏa tatap teḏi Allah. 7 nuŋw ere kwere mac kweŋgi derne eḏaruŋw, ŋgwa kwir kwɔkwɽeny kweṯafi ṯortaḏa nani gwu ŋgwa kwuṯemḏelu. 8 na kwokwony, eti lizi linḏi eḏay afi kwɔmne kwete kweḏi wri, lakin ki ŋiɽaŋal-na ŋa, eṯuŋw afi ŋgwa ŋimerzi lɔ, ŋenuŋw, kweri miiḏi. 9 a kweḏir ŋuma keni eḏaruŋw: na laawi ŋundu, kwunderṯa kweṯafi kwete kweḏi wri, nuŋw inḏeḏa kwete kweḏi wri ibrahiim ŋgi, 10 kaka urŋw gwu lola kinneni kari-na keḏi kwukwurna kwuŋwun ki lomur ta kla, mer kadriḏi malkizaaḏik gi.
11 eŋgi lizi eḏi ŋuma eḏi ṯimayini dap ŋiziiz ŋi ŋeḏi laawi (ŋinderta ŋimɔ ŋi lizi afi kuruu), eŋgir ere naŋni kiziiza kir ter mac eḏi ruwene lu, keḏi nizama kwir kaka kweḏi malkizaaḏik, ki lobi leḏi kiziiz kete keḏi nizama kwir kaka kweḏi haruun. 12 ma timorḏaza nani teḏi ŋiziiz ta, lazim er morḏazi kuruu tɔk. 13 na ŋgwa kwandizar gi ŋiɽaŋali ŋu, nuŋw orɔ kweḏi gabiila kir ter, kiti kinna kimeḏi kiziiza kere mac eḏaki ŋɔḏɽor ŋeḏi ŋweḏgwun. 14 ŋilŋiiḏir zi ŋu ŋeḏi Kweleny kweri eḏaruŋw, kwiri kwete kweḏi ŋelŋe ŋeḏi yahuuḏa, na muuza kwende kwaruŋw ḏuṯ, yiziiz yinḏi eḏila nani gwu gabiila ŋgu.
15 ŋilŋiiḏir zi ŋu derder ma Kiziiz kiaŋ ruwene lu kir kete kaka malkizaaḏik, 16 kimorɔ Kiziiz, ŋiti ŋiri ŋeḏi kuruu keḏi ŋelŋe mac, lakin ŋuma ŋi ŋeḏi ŋimiiḏa ŋiti ŋeḏir zi ŋuma mac eḏi zi kiraza lu. 17 kaka unḏizer ŋi ki ŋeni ŋundu,
a kwiri Kiziiz ketinanniḏa dɔk,
keḏi nizama kwir kaka kweḏi malkizaaḏik.
18 na nizam kweḏi kerrenyŋw ner afrazi tay tete, kaka enuŋw gwu kwumajili, kwiti kwumeḏi fayḏa-na kwere mac. 19 kaka iti eḏi gwu kuruu ŋuma-na mac eḏi ŋi ṯimazi kwɔmne kwere dap. lakin kirem Allah wumenja ṯəkiza kizen ṯiṯemḏelu, ṯeṯir ṯi duŋgwaḏa ŋunduŋwu nana.
20 enjaŋw gwu ṯəkiza kizen kḏu ṯiṯemḏelu, nuŋw ṯemzi rɔgwɽɔ ruŋwun. 21 na ŋeḏi kla leḏi kerrenyŋw mer zi alla eḏorɔ yiziiz, na mer zi enji ki ŋɔḏɽor-na ŋu, ner zi ere ṯemzici rɔgwɽɔ mac; lakin na Kweleny ṯemzi rɔgwɽɔ nuŋw andaci Kiziiza ŋgu ŋwu:
Kweleny kwumɔṯemzi rɔgwɽɔ
na ŋwere eḏorli ŋiɽaŋali mac, ŋaruŋw:
a kwiri Kiziiz ketinanniḏa dɔk.
22 ŋinderta ŋu ŋimɔruzi Yecuŋw arbun weḏi ṯikitaḏiza ṯiṯemḏelu. 23 na yiziiz yeḏi kerrenyŋw uri, kaka eṯir gwu mumur ḏina mezi gwu ŋiɽany ṯinyini eḏi nanna ki ŋɔḏɽor-na dɔk dɔk; 24 lakin na Yecu ta, eṯuŋw nanna ki ŋiziiz-na ŋuŋun dɔk, kaka eṯuŋw gwu miiḏi dɔk. 25 kaka ṯaŋwu, eṯuŋw eḏi ŋuma eḏi zi kileḏi minmin kla leṯi duŋgwaḏa Allah nana ŋundu ŋgi, kaka enuŋw gwu kwumiiḏu ŋwamin tatap dɔk dɔk eḏi zi roce.
26 ṯaŋwu ner ofḏani eḏeḏi deŋgeri-na Kiziiza kir kweleny, kir kiziiz kir kaka ŋunduŋwu, kirlinelu ter, kiira loma-na lere, kizuɽu-na cucuɽic, kimɔruci lizi-na liki, kimer allazi eḏi ṯamḏu lerya la pucpuc. 27 na ŋundu ta, nuŋw ere naŋni mac eḏi kekite karama ŋwamin rac kaka yiziiz kya; keḏi ŋikya ŋere ŋuŋun kerreny, mindaŋ eḏi ma kete keḏi ŋikya ŋeḏi lizi liḏaḏu; kaka erreŋw zi gwu ŋu tamin tutuput ṯuɽuk muŋw gwu ṯiŋaḏa rɔgwɽɔ lu ruŋwun. 28 kaka eṯi gwu kuruu keḏi kerrenyŋw alla loru leni lajila, eḏorɔ yiziiz yir leleny, lakin ŋiɽaŋal ŋeḏi ṯiṯemza rɔgwɽɔ ŋa ŋukwaḏaḏi kuruu, ŋinderṯa ŋimɔ eca Toru-na, tiṯimayina tuc dap dap.
Kaahin kǝni Mǝlikii-saaḏig.
1 Mǝlikii-saaḏiŋ ŋgwɔ kwir mǝlik kwǝthi Saaliim-ŋwɔ, nǝ nɔŋworo kaahin tok kǝthi Allah Wuthǝmthi-lǝ pur-pur. Nǝ kinaŋw mǝ Ibraahiim aaɽa ŋǝryǝnǝ ŋa ŋimǝŋw-ŋi ṯiinyǝ limǝlik-gǝ lir kwaɽiŋan, nǝ Mǝlikii-saaḏig kadrithi ŋundu-gi kithaay, mindaŋ nɔŋwɔccǝ baarika. 2 E-ta nǝ Ibraahiim inḏǝthǝ @ɔshɔra weere-weere wǝthi kwomne tatap ŋgwa kwɔmǝŋw ǝɽǝ ŋǝryǝnǝ. Nǝ ma@na kwiŋna kwǝthi yiriny yuuŋwun yǝni Mǝlikii-saaḏig, kwǝniŋw, “Mǝlik kwǝthi Ŋirllalɔ”. Nǝ kaka nɔrɔ-ŋgwɔ mǝlik kwǝthi Saaliim-ŋwɔ, nǝ ma@na kwǝthi yiriny yuuŋwun ǝniŋw kwokwony, “Mǝlik kwǝthi Ŋiiɽǝnnǝ”. 3 Nǝ ŋiɽaŋal ere naani ŋeere mac ŋandinna ŋǝthi ṯǝrnyin ṯǝthi Mǝlikii-saaḏig-ŋa, wala lǝnyin, wala ŋeere ŋǝthi lugwurnǝyin; wala ethi lothone ŋeere ŋǝthi ŋelŋe ŋuuŋun, wala ŋǝthi ŋiɽany ŋuuŋun. Laakin nɔŋwaaɽanni Tɔɔrɔ ṯǝthi Allah; ŋwɔṯaŋw, ŋwɔ nannitha lur kaka kaahin.
4 Nǝ iisar-mba, kwǝni-mi kwɔppa ŋɔɔrɔ yǝnǝ beṯṯen. Nǝ Ibraahiim kwir kwugwurnǝ kwǝri kwilŋithina por-por, nɔŋw inḏǝthǝ ŋunduŋw @ɔshɔra weere-weere wǝthi kwomne tatap ŋgwa kwumǝŋw ǝɽǝ ki-ŋǝryǝ-nǝ. 5 Nǝ ŋwɔɔla ŋwɔ ŋwɔthi Laawi ŋwir Kahana, nǝrsi ǝllici waamira wǝthi Sherii@a, ethaavi @ɔshɔra naanɔ-gwɔ lizi lǝthi Israa-iil, ŋǝniŋw naanɔ-gwɔ liyeŋgen, nɔrɔr-va kinnǝni tok ŋwɔɔla ŋwɔthi Ibraahiim. 6 Laakin Mǝlikii-saaḏig tǝ, nɔŋweere ǝthi ṯɔvɔɔ-na mac ṯuruuthu naanɔ-gwɔ Laawi, laakin nɔŋw-tǝ aavi @ɔshɔra naanɔ-gwɔ Ibraahiim, mindaŋ nɔŋwɔccǝ baarika ŋgwa kwaava wa@ḏa naanɔ-gwɔ Allah. 7 Ŋilŋithina-lɔ rac por-por ethaarɔŋw ŋgwa kwǝṯi kette barka, nɔŋwɔni kwɔppa ŋɔɔrɔ yǝnǝ ethi ŋgwala kwǝṯaavi barka. 8 Nǝ ki-ŋiɽaŋal-na ŋǝthi kahana, ǝṯi @ɔshɔr ǝvini lizigwunǝŋ-li kila lǝṯi ai; laakin ŋǝthi Mǝlikii-saaḏig tǝ, nǝ @ɔshɔr ǝvini kwizi-gi kwette kwǝṯi miithi, kaka nandisa-gwɔ Kiṯaab Kirllinǝlɔ ter. 9 Ya ǝri aarɔŋw, Laawi ŋundu wɔɽe-wɔɽeny kwǝṯi-pǝ aavi @ɔshɔra, nǝ nɔŋwɔni kwɔmǝ kette @ɔshɔra tok ṯii-thi ṯǝthi Ibraahiim. 10 Nǝ ki-lɔɔmɔr-la kila nǝtǝ Laawi naani kinnǝni kiiriny-nǝ kǝthi Ibraahiim, kinaŋw mǝr kadrithi Mǝlikii-saaḏig-gi.
11 Ǝŋgi ŋothɽor ŋǝthi kahana kir Laawi oro min-min Sherii@a-gi ŋgwa kwɔmǝr inḏǝthǝ lizi lǝthi Israa-iil, e-ta ŋiɽaŋal ŋotho ŋǝŋgi naani kwokwony ŋǝthi kaahin kir ter ethiila, niizaam-gi kwǝthi Mǝlikii-saaḏig, kwiti kwɔrɔ niizaam kwǝthi Haaruun mac? 12 Kaka ǝŋgi ŋothɽor ŋǝthi kaahin ǝthi ŋɔma ethi uppuninǝ, ǝŋgir uppi Sherii@a-na tok. 13 Nǝ Kweeleny kwǝri kwǝthi ŋiɽaŋali ŋɔ ŋandinna, nɔŋworo kwǝthi gǝbiilǝ kir ter, nǝ nɔŋweere kweere kinnǝni kwǝthi gǝbiilǝ kuuŋun mac kwɔmǝ akkɔ ŋothɽor ŋeere ŋǝthi ŋwɔthgwun. 14 Kaka nilŋithinar-gwɔlɔ dedder ŋǝthi Kweeleny kwǝri ŋuruuthuŋw-ŋi gǝbiilǝ-nǝ kǝthi Yahuuthǝ, kiti kandisa-gi Muusǝ mac ŋiɽaŋali ŋeere ŋǝthi ŋothɽor ŋǝthi kahana.
Kaahin kir ter kir kaka Mǝlikii-saaḏig-ŋwɔ.
15 Ŋiɽaŋal ŋimǝ elŋethine-lɔ por-por; kaka mǝgwɔ Kaahin kette kiyaŋ ruwǝnnǝlɔ kaaɽinna Mǝlikii-saaḏig-ŋwɔ. 16 Nǝr ruusi Kaahin, laakin nǝreere ruusi gaanuun-gi ya ṯǝrṯiib-thi ṯǝthi lizigwunǝŋ mac, laakin ŋɔma-ŋi ŋǝthi ŋimiitha ŋiti ŋǝṯi ernene mac. 17 Kaka naarɔ-gwɔ Kiṯaab Kirllinǝlɔ ter ŋwɔ:
“Ŋa kwinḏi ethi rɔɔthatha kaahin lur,
niizaam-gi kwǝthi Mǝlikii-saaḏig.”
18 Ŋwɔṯaŋw, nǝr avrasi waamira wǝthi kerreny-ŋwɔ kǝni-gi, kaka najla-ŋgwɔ nǝ nɔŋweere ǝthi faayitha-na mac. 19 Kaka niti nǝṯi-gwɔ Sherii@a ruusi kwomne kweere min-min mac; laakin kirem tǝ, limǝ-nyji kettice ṯǝkkizǝ-lɔ kizǝn ṯithǝmthi-lǝ, ǝri-thi ǝthi ŋɔma ethi dɔŋgwatha Allah naana keṯṯok.
20 Naaɽi nǝ haliifa wǝthi Allah kiɽǝnni tok. Laakin kerreny tǝ, nǝ haliifa ere naani weere wir kaka-ṯǝŋw mac kinaŋw nuruusǝrsi kila lithaathɔ kahana. 21 Laakin Yǝcu tǝ, nɔŋworo Kaahin ŋiɽaŋal-ŋi ŋǝthi haliifa kinaŋw nǝccǝ Allah-ŋw:
“Kweeleny kɔmǝ uɽu wa@ḏa wɔraara ṯeṯṯec: nǝ kwiti
kwinḏi ethi urlǝ fikirǝ-lɔ mac.
‘Ŋa kwinḏi ethi rɔɔthatha Kaahin lur’.”
22 Nǝrṯoro ŋɔ ŋuruusǝ Yǝcu-ŋw ǝrbuun wǝthi wa@ḏ wǝthǝmthi-lǝ.
23 Kerreny ǝṯi kahana naani kittǝzir, kaka nǝṯir-gwɔ ai, mindaŋ ǝṯireere aari isṯimir ki-ŋothɽor-na ŋeeŋen mac. 24 Laakin Yǝcu tǝ, ǝṯɔŋw miithatha dooɽe, ŋwɔṯaŋw ǝṯi ŋothɽor ŋuuŋun ŋǝthi kaahin, ǝṯirseere inḏǝthǝ kweere mac kwir ter. 25 Ŋwɔṯaŋw nɔŋwɔthi ŋɔma kire-kirem-ŋgwɔ nǝ ŋwɔɔmɔri tatap tok, ethisi kilǝthi kila lǝṯiila naanɔ-gwɔ Allah ŋundu-ŋgi, kaka ǝṯɔŋgwɔ nannitha lur ethi tuurǝcci Allah-lɔ ŋiɽaŋal-ŋi ŋeeŋen.
26 Kaka nɔvthannar-gwɔ ethi Rǝ-iis Rɔppa rǝthi kahana, rillinǝlɔ ter, etheere lɔɔma-na, ethi sɔɔɽi cɔr-cɔɽic, ethisi ruccinǝ lǝni ligii tuk, rimǝ dimmǝnni ki-leere-na lac-lac kider. 27 Nɔŋweere oro kaka rɔ-asa rɔppa rǝthi kahana mac ethi undu kiraama kworo ŋwaamin tatap, ki-rogɽo rǝthi ŋikiya ŋuuŋun kerreny, nǝ kwaathan tǝ kǝthi lizi lithaathɔ. Ŋwɔṯaŋw mindaŋ nɔŋw kette kiraama kɔtɔpɔt kǝthi tatap kinaŋw mɔŋw ruusi rogɽo ruuŋwun kiraama. 28 Imba rerrem, Sherii@a kwǝthi Muusǝ kwǝṯi alla lizi-nǝ liti lir min-min mac ethoro rɔ-asa rɔppa rǝthi kahana; laakin wa@ḏ wǝthi Allah tǝ, nɔŋw uɽunni haliifa-yi wa wɔmǝ kwaathitha Sherii@a kwaathan-gi, nɔŋw alla Tɔɔrɔ-na nɔŋworo timǝr ruusi min-min ethi nannitha dok-dok.