aza 5
1 kaka eṯir gwu alla yiziiza yir leleny yere yere ki lizi-na, na eṯir zi eca-na eḏi rilli ŋiɽaŋal ŋi ŋeŋen ki yey-na yeḏi Allah, eḏefica haḏiya na karama eḏi gi zuɽi ŋikyaŋi. 2 eṯi ŋgwa kwir kiziiz kir kweleny ki lizi-na eḏi ŋuma eḏi zi ṯici nana jiɽem kla limaki ŋiɽaŋali pir, na kla leṯele rugwor ri reŋen, kaka eni gwu ŋundu tɔk kweṯajili. 3 kaka enuŋw gwu ŋu, ner ofḏani eḏi kete ŋundu karama keḏi ŋikya ŋuŋun, na keḏi ŋikya ŋeḏi lizi tɔk. 4 na eṯuŋw ere nii rɔgwɽɔ-na ruŋwun mac eḏorɔ kiziiz kir kweleny. eṯi Allah orɔ weṯornuṯi ŋunduŋwu, kaka ornuṯuŋw gwu haruunŋw tɔk.
5 ŋwu ṯaŋwu tɔk, Kwruztu kwiti kwuniiya rɔgwɽɔ-na ruŋwun mac eḏorɔ Kiziiz kir kweleny, lakin na ŋgwa kwica ŋunduŋwu-na, eca ŋwu:
a kwiri Tor tinyi,
nyi kwumorɔ aŋwunu Papa kwɔŋwa.
6 kaka aruŋw gwu ŋwu tɔk kezir wir ter:
a kwiri Kiziiz keṯinanniḏa dɔk
keḏi nizama kwir kaka kweḏi malkizaaḏik.
7 ki ŋwomur ŋwunani ŋi Yecu kwir aŋna, nuŋw ari ki yiriny tuṯalu ṯi, nuŋw ariḏa ŋgwa kwola ŋuma ŋi, ŋwal ŋi ki, kweḏi ŋuma eḏi kileḏi ŋunduŋwu ŋiɽany-na, nuŋw niŋnaci ŋunduŋwu ŋiɽaŋal ŋi ŋeḏi ṯinyica ṯuŋwun Allah nana. 8 urŋw gwu kinna Tor, eṯuŋw elŋece ṯinyica nana kwɔmne gi kweṯuŋw gi rerini; 9 na muŋw ṯimayini dap ta, nuŋw orɔ ṯuwa ṯeḏi ŋigileḏa ŋeṯinanniḏa dɔk, ŋeḏi kla tatap leṯinyici ŋunduŋwu nana, 10 kwuruza Allah Kiziiz kir kweleny, keḏi nizama kwir kaka kweḏi malkizaaḏik.
ṯoraca eḏi ililaḏa kereny ki ŋikwruztyan-na
11 ŋeni malkizaaḏik ŋeḏir zi ŋitezir eḏi zi andazi, ner nyji firlaṯa eḏizilŋiiḏini, kaka ma gwu riimeḏi yəni-na eḏi zi neŋne. 12 na ki lomur la ṯa klu kinna, ner ofḏani daŋgal-na eḏorɔ kla leṯizilŋiiḏini ŋiɽaŋali, na naŋni kwizi kwete eḏizilŋiiḏini ŋaŋwuzi kwokwony ŋa ŋir ŋiŋna ŋeḏi ŋiɽaŋal ŋeḏi Allah. a linaŋna ta kinna ŋan, na ere naŋni eḏneya wufirli-na kinna mac; 13 kaka kwete nyiḏak kweṯiruzi ŋan eḏne wuŋwun, eṯuŋw zi ere elŋe mac ŋir ŋiɽaŋal ŋeḏi ṯofḏana, kaka urŋw gwu tor tɔkwɽeny. 14 lakin eḏne wurfirli-na wiri weḏi kla limɔpeŋe, weḏi kla limelŋe ŋiɽaŋali ŋimerzi ireni gi eḏi zi elŋece ŋeni ŋizaw, na ŋeni ŋiki tɔk.
1 Rɔ-asa reere-reere rɔppa rǝthi kahana rǝṯirsi alla-na ki-lizi-nǝ leeŋen ethi ǝkkici Allah ŋothɽor ki-lɔɔbi leeŋen, ethi unducci Allah kwomne kworo, nǝ ethi ǝvicǝ haḏaaya nǝ kiraama mindaŋ mǝ ŋikiya fivrinni kithaay. 2 Nǝ ŋundu ki-rogɽo ruuŋwun nɔŋwɔni kwajlinna tok, e-ta ǝṯɔŋw-mǝ ǝthi ŋɔma ethisi ṯiici naana jiɽeem kila lir yǝɽiyǝŋ lǝṯisi ǝkkiki pir-pir. 3 Nǝ kaka najla ŋgwɔ ki-rogɽo ruuŋwun, ǝṯɔŋweere undundu kwomne kworo kwir kiraama kǝthi ŋikiya ŋǝthi lizi dak mac, laakin kwǝthi ŋikiya ŋǝthi rogɽo ruuŋwun tok. 4 Kwende kweere kwǝṯi alla rogɽo ruuŋwun ṯiiɽǝthi-nǝ ethoro rǝ-iis rɔppa rǝthi kahana, laakin nǝ Allah wǝṯi ɔrnɔṯi ŋunduŋw, kaka-ṯǝ Haaruun-ŋwɔ.
5 Nǝ Kwɔrɔstɔ tok nɔŋweere piŋi rɔgɽo ruuŋwun mac ethoro Rǝ-iis Rɔppa rǝthi kahana, laakin nɔŋworo ŋgwa kwǝllinǝ kwǝccǝ ŋunduŋw-ŋwɔ:
“A kwir Tɔr tiinyi; nyii kwɔmoro Ṯarnyalɔ aŋwɔnɔ.”
6 Nɔŋwsaaɽi nɔŋwsandasi kǝzir wir ter kwokwony nɔŋwaarɔŋw:
“Ŋa kwɔrɔɔthatha kaahin lur,
nizaam-gi kwǝthi Mǝlikii-saaḏig.”
7 A-naani-tǝ Yǝcu kinnǝni kwɔmiithɔ aŋna-yi wuuŋwun ki-ṯurmun-nǝ, nɔŋwaari kiyiiriny mindaŋ nɔŋw uṯici Allah-lɔ kwɔɔvɔna ŋɔmmaŋi ŋwal-ŋi yǝy-yi, wǝthi ŋɔma ethi kilǝthi ŋunduŋw ŋiɽany naana. Nǝ kaka nǝjlinnǝ ŋgwɔ ki-rogɽo nɔrɔ-ŋgwɔ kwǝthi Allah tok, nǝ Allah niŋnaci. 8 Laakin, nɔrɔŋw-va kinnǝni Tɔr tǝthi Allah tok, nɔŋwaari @aillima ethi niŋnithi ṯirǝŋinnǝ-thi. 9 Nǝ mɔŋw ṯimmayini dap tǝ, nɔŋworo ṯuwǝ ṯǝthi ŋiglǝthǝ ŋǝṯi nannatha dok-dok ŋǝthi kila tatap lǝṯi niŋnithici ŋunduŋw, 10 e-ta nǝmǝ Allah ruusi Rǝ-iis Rɔppa rǝthi kahana, nizaam-gi kwǝthi Mǝlikii-saaḏig.
Ṯɔɔraca ethi nannatha ki-ṯǝmminǝ-nǝ.
11 Ŋinaanɔ ŋittǝzir ŋǝthisi andasi ŋǝthi ŋiɽaŋal ŋɔ, laakin nǝr ferlle beṯṯen ethisi dugwɽǝci ŋaaŋwɔsi-na, kaka nǝṯir-gweere ǝnḏi ki-ŋwɔɽa-na ŋwaalɔ mac. 12 Ŋɔvthanna-mi ŋarna ki-ŋwɔɔmɔr-la-ṯa ŋwɔ ya ǝŋgoro mɔ@allimiin kirem, laakin ŋaaŋa kila-ta kǝnnǝ linaŋna kwizi kwette ethǝccǝ ŋaaŋwɔsi @allima ḏuruusǝ ṯir ŋwɔɽa ṯǝthi ŋiɽaŋal ŋǝthi Allah. Nǝ ki-lɔɔbi lǝthi-li yee ethneya wɔfirllina, laakin nǝtǝ nanni linaŋna ethi yǝthǝ ŋan lǝlu-ttuk. 13 Kweere kwǝṯi naŋni ethi ruusi ŋan ethne wuuŋwun tǝ, nɔŋw-tǝ oro kinnǝni kwokwɔɽony, kwiti kwilŋithisi ŋǝni ŋirllalɔ nǝ ŋigii tok mac. 14 Laakin ethne wufirllina wir wǝthi kila limǝ peŋe, kila limǝ iirǝnni ŋiɽaŋali kii nǝrsi elŋe ŋisaaw nǝ ŋigii tok.