aza 12
Yecu kwiri kweḏi ṯəmna ṯiṯemḏizi la tatap
1 ŋwu ṯaŋwu, kaka rikaḏinyji gwu lebleṯ lu lupa leḏi kla leṯinyji unḏizi ki, ner ofḏani eḏurṯinelu ṯofi ṯi tatap tir kwɔmne kweṯinyji riti kereny, na ŋikya tɔk ŋeṯinyji firtaŋ, mindaŋ er ma kalmiṯaḏi ṯukwurmɔṯana ṯi, ki ṯiɽinya la kḏa ṯikiticar nyji lu, 2 liza Yecuŋw, kwir kwuruwa ṯəmna ṯeri, ṯimɔŋw ṯimaza kworɔ dap tɔk; kwunderṯa kwiɽinyana ŋwuɽi nana ŋwuɽmɔḏalu, kwiti kwukitiza feḏiya yey mac eḏay kaka kwizi kwiki, kaka izazaŋw gwu ṯinyiŋlana kereny, na kwunanalu kwurzi la kweḏi Allah, ki ṯii ṯeḏi mini.
3 kiḏayinar ŋgwa kwindinyana ṯuwənu nana ṯeḏi lizi liki, mindaŋ ma ere muli mac eḏajili.
ŋijraŋal ŋeṯi ṯirətina
4 ki ṯibubla-na ṯalu ŋikya ŋali, nezi ere kinna tinyi mindaŋ eḏi irezi ŋina lu ŋalu mac. 5 ŋaŋa limɔṯuḏina ŋiɽaŋal ŋi ŋa ŋuluḏina ŋeṯiŋazi ŋi ireci kaka nyor, ŋwu:
tor tinyi, etere ruzi ṯirətina luŋw mac ṯeḏi Kweleny;
etere orlaci ŋunduŋwu ŋwudɔŋw mac muŋw inḏeḏa ŋaŋwu jiiza.
6 kaka eṯizi Kweleny rati kla letuŋw zi amɽi,
na eṯuŋw ipii nyoru ndendeṯ nyeṯuŋw zi ruzi nyuŋwun.
7 ŋofḏana eḏi zi indinyani nana ki tirətina-na; Allah ta wuruzaŋazi nyor nyuŋwun. tor tende tere titi teṯi ṯernyin rati mac? 8 ma ere eḏi ṯirətina mac, kaka ṯeṯi nyor nyiḏaḏu afi, ŋaŋa liti kineni liri nyiɽŋeyin mac, lakin a liri luruḏun. 9 na kwokwony, ner eḏi papaŋwuzi leri lir lizigwunaŋ leṯinyji rati, leṯir zi iɽi-na rac. ṯaŋwu ŋiti nofḏana manya eḏemni ṯirətina ṯeḏi Papa kweḏi rigɽim reri, mindaŋ eḏeḏi ŋimiiḏa? 10 kaka ratinyji gwu papaŋa leri nyamin nyɔkwɔ caw kaka naŋnar gwu, lakin ŋundu ta, eṯuŋw rati nyuŋwuzi eḏi meci nyuŋwuzi eḏi zey, mindaŋ mer irlinelu ter ki ṯofḏana-na kaka ŋunduŋwu. 11 ki lomur leḏi ṯirətina eṯuŋw ere ami ŋiɽaŋali mac, na eṯuŋw afa ṯirara, lakin kwaḏan eṯuŋw riɽici lizi nyoru nyir nyeḏi ṯofḏana ṯeŋen kla limɔdaɽmani ṯirətina ṯi.
12 kaka ṯaŋwu, dimer rii lu reṯinaŋni eḏajili, na ŋwurgwu tɔk. 13 rillicer ŋwara ŋwalu ray lu mindaŋ ma kla liti leṯami eleŋw titir mac ere iida ṯay tete mac, lakin er ferle nana kwokwony.
ṯoraca na ṯireca
14 ṯecer eḏami nanuŋw lizi li tatap leḏi ŋumaṯ, na eḏi dirnaṯi ki ṯofḏana-na tirlinelu ter. kwiti kwere mac kweḏi ŋuma eḏeze Allah muŋw ere dirnaṯi mac ki ṯofḏana-na tirlinelu ter. 15 aŋraḏir eḏi kwizi ere kwere ṯuzi ṯimeca ṯeḏi ŋimɽi ŋeḏi Allah mac. eḏi rufu reḏi ŋiɽaŋal ŋiɽi ere miiḏi mac eḏi zi lakizelu, mindaŋ eḏi ŋi kiici duŋw ŋiɽaŋali. 16 aŋraḏir eṯuŋw ruḏa kwere kwijin mac, ya kwere kweṯinaŋni kwɔmne kweḏi ṯurmun domony mac kaka izuu, kwumɔ upi ŋoru ŋuŋun ŋir ŋi nda kwɔmne-na kwutuput kwir eḏne. 17 a lilŋiiḏi eḏaruŋw, kwaḏan ta muŋw naŋni eḏafi ŋoru ŋir ṯortaḏa, ner dirnaḏa ŋunduŋwu lu, iti inḏaŋw gwu ṯay ṯere mac eḏi ṯi əɽa ŋiɽaŋal-na, aruŋw gwu fa kinna ŋwal ŋi ki rifiny rifiny.
ŋiɽaŋal ŋir-na ter ter ŋeḏi urzaliim kweḏi ṯurmun, na kweḏi kilerena
18 kaka ŋaŋa, a liti limɔduŋgwaḏa ezir nana mac wa weṯir mummaḏa nana, weḏi igəŋi wufudu burbur, na kirimi nana, na ezir nana wowḏu lu kwurum, na kireɽin nana tɔk, 19 na kwurna nana kweḏi bruz, na ṯɔgwɽɔ nana tete ṯandiza ŋiɽaŋali, ner zi ṯi turecelu tur eḏere neŋne kwokwony mac. 20 ner ere naŋni edi neŋne ŋiɽaŋali ŋeḏi amr mac wuniŋnar, weni ŋwu: ma kinna kwɔmne kwere kwir ŋirel-ŋa mummi ayinu, er aca yal yi. 21 na ayin ke ŋirinya beten mindaŋ na muuza aru ŋwu: nyi ŋgwu kwunḏuḏi ŋiḏeny ŋi. 22 lakin a limɔ duŋgwaḏa ayinu nana weni ziyuun, na meḏiina nana kweḏi Allah wumiiḏu kweni urzaliim kweḏi kilerena, na limaleyka nana litezir lirayḏi duŋw lu, 23 na a limɔ duŋgwaḏa ŋwuduŋw nana ŋweḏi kla limeḏi ŋelŋe ŋiaŋ, leḏi yiriny yimerzi lɔ kilerena, a limɔduŋgwaḏa Allah nana wir gaaḏi kweḏi lizi tatap, na rigɽima nana reḏi kla leni lofḏana, limerzi ṯimazi kworɔ dap, 24 na Yecuŋw nana, kwir ṯəmiḏana ṯeḏi ṯikitaḏiza ṯete ṯiaŋ, na ŋina nana ŋimer ŋi recini, ŋeṯunḏizi ŋiɽaŋali ŋizaw ki, ŋiṯemḏizi ŋa ŋeḏi habiil.
25 aŋraḏir, a ere derne ŋunduŋwu mac ŋgwa kweṯandazi. kla limɔderne eḏi neŋne ṯɔgwɽɔ kḏa ṯandiza ki ṯurmun-na ner ere kilaḏa mac; ŋwuṯa, a kwende kweḏir ŋuma eḏi kilaḏa mer derne eḏi niŋnaci ŋgwa kweṯandazi kilerena. 26 ki lomur ṯa kla, na ṯɔgwɽɔ ṯuŋwun lakazi ureyuŋi lu, lakin kirem ta, nuŋw kitaḏa, nuŋw aruŋw: lamin lutuput kwokwony nyi kwiti kwulakazi ureyuŋi lu ṯuɽuk mac, lakin kwɔmne tatap ŋgwa kwunani lerya nana tɔk. 27 ŋiɽaŋal ŋu ŋaruŋw: lamin lutuput kwokwony, ŋeṯinyji ilŋiiḏini eḏari, kwɔmne ŋgwa kwumer lakizalu kwudimini kiṯay, kwir ŋgwa kwudaɽmina, mindaŋ ma ŋgwa kwiti kwedi ŋuma eḏi lakiḏalu mac nanniḏa dɔk. 28 ŋeleny ŋu ŋimerzi afi ŋiti ŋeḏi ŋuma mac eḏi lakiḏalu, ṯaŋwu ner eni nofḏana deŋgeri-na eḏeca Allah zukran, na eḏi kwoce ŋunduŋwu lu ṯiniiya-na ṯi ŋiḏeny ŋi, ŋeṯəmi ŋunduŋwu-na. 29 kaka ur gwu Allah weri igə wufuḏu cicir.
Allah wir Papa kwǝri.
1 Nǝ ŋǝri tǝ, kaka nirikǝthi-nyji gwɔ dɔŋwlɔ lɔppa rikkak lǝthi shuhuuḏ, ǝɽir kǝniny ǝri urṯunǝlɔ wur kwomne-gi ŋgwa tatap kwǝṯi-nyji irrǝci keereny-gi, nǝ ŋikiya tok ŋǝṯi-nyji nyindaŋṯi naana tetter, mindaŋ ǝri avri rerrem likalmiṯathɔ ṯɔgwɔrmɔṯanna-thi ki-ṯiɽinya-la kitha ṯuɽucǝr-nyji. 2 Ǝri ecce Yǝcu-ŋw ŋoṯ-ŋoṯ, kwir ṯuwǝ ṯǝthi ṯǝmminǝ ṯǝri ṯǝṯɔŋw ruusi min-min. Nɔŋw indinyanni ŋwuuɽu naana ŋiɽaŋal-ŋi ŋǝthi ṯaamana kitha ṯǝkkicǝ ŋunduŋw kizǝn keererny-gi. Nɔŋwseere kettice ŋeere yǝy mac ŋǝthi fǝthiyǝ kwǝthi ŋiɽany ki-ŋwuuɽi-lǝ, nǝ kirem tǝ nɔŋw naanalɔ ki-ṯuɽumǝ ṯǝthi mɔni ṯǝthi kwɔrsi kwǝthi Allah.
3 Aarir-ṯi fǝkirǝ ŋgwa kwindinyanna ŋuwǝzǝ naana ŋǝthi lizi ligii! E-ta ere mɔɔli nǝ etheere ajli tok mac. 4 Kinaŋw nɔthɔgthɔ-ŋa ŋikiya-ŋǝli, niŋeere kinnǝni bɔbli mac mindaŋ nǝrŋǝsi ere ɽeenye mac. 5 Nǝ ŋaaŋa limǝ mǝnyjǝ ṯɔɔthɔna ŋiɽaŋal-ŋi ŋa ŋir ṯifirlla naana ŋandica-ŋǝsi Allah kaka nyɔɔrɔ nyuuŋwun nyir nyoŋwor-a? Naarɔ-ŋgwɔŋw:
“Tɔr tiinyi ǝṯisi kettice yǝy mǝŋǝ Kweeleny tatti,
nǝ mɔŋw inḏǝthǝ ŋaaŋwɔ jiizǝ tǝ, ǝṯeere appi kworo mac.
6 Kaka nǝṯi-gwɔ Kweeleny tatti ŋgwa kwǝṯɔŋw amɽi,
nǝ ǝṯɔŋw inḏǝthǝ kwette nyithak jiizǝ kwǝṯɔŋw ruusi tɔr
tuuŋwun.”
7 Ŋǝni-pǝ ṯirǝttinǝ ṯǝvŋicǝ-ŋǝsi ethisi indinyanni naana. Allah wuŋuusǝ-ŋǝsi kaka nyɔr nyuuŋwun. Tɔr tindǝr tǝndu teere titi tǝṯi ṯǝrnyin tatti mac? 8 Mǝrŋǝsi ere tatti kaka nyɔɔrɔ mac ṯitatta-thi kitha ṯɔɽɔmattir-gwɔ-na tatap tǝ, noro lɔrɔthɔn-pa, liti lir nyɔr nyǝthi dɔɔnɔŋw mac. 9 Kerreny nǝrǝthi papa-ŋwsi lir lizigwunǝŋ lǝṯi-nyji tatti nǝ ǝṯirsi iiɽinǝ. E-ta ǝreere kǝniny iinyici Papa-ŋw naana kwǝthi rigɽim rǝri mindaŋ ethi miithi-a? 10 Ǝṯi-nyji papa-ŋa lǝri tatti kwokwo cuk domony, kaka ŋǝṯirsi ese ŋundu-ŋǝ ŋɔvthannicasi; laakin Allah tǝ, ǝṯɔŋwsi ǝrri ŋa ŋisaaw ŋɔthannica-nyji, mindaŋ mǝr ɔɽɔmaṯṯi ki-ṯirllinǝlɔ-nǝ ter ṯuuŋwun. 11 Mǝniyji tatti ǝṯireere aamina mac, ǝṯir ronyine. Kwaathan tǝ, ǝṯi kila limǝ tǝttini jiizǝ-gi ǝṯir ǝgini ɔjra wǝthi ŋiiɽǝnnǝ ŋǝthi ŋimiitha ŋirilalɔ.
Ṯa@liim-ŋa ṯiirǝcǝ-thi.
12 Allizar rii-la raalɔ rimɔɔlɔ, nǝ a firllasi ŋwɔrgwɔ-la ŋwaalɔ ŋwajla. 13 Nḏir dɔṯṯɔk ki-raay-la rirllalɔ tittir, mindaŋ mǝ kaaga keere kir likki ere orllona mac, laakin ŋwɔ kǝniny saawi. 14 Ṯǝccǝr ethoro liiɽǝnnǝ lizi naana tatap, nǝ a ṯǝcci tok ethi nanni ŋethre ŋirillinǝlɔ ter, nǝ mireere ŋɔ mac tǝ, a kwizi ere kweere mac kwǝthi ŋɔma etheese Kweelenyi. 15 Aŋrathir mindaŋ mɔŋweeŋe kweere mac kwɔrlacci ne@ma ŋwɔdoŋw kwǝthi Allah. Ǝṯɔŋw rɔɔthɔ kweere mac kaka taaɽi tiɽii cer-cer tǝṯi peŋe mindaŋ ǝṯɔŋw ǝnyji ṯurvǝ ṯuuru ŋiya-ŋi ŋuuŋun. 16 Aŋrathir mindaŋ etheere oro liijin mac, ya etheere Allah-na mac kaka @iisu-ŋwɔ kwɔmǝ uppi ŋɔɔrɔ-na ŋuuŋun ŋɔrɔŋ-ŋi nda, ethne-yi wɔtɔpɔt dak domony. 17 Ŋilŋithi-ŋǝsi rac mɔŋgwɔ naŋni ṯǝrnyin ethi ǝccǝ baarika; laakin nǝr dirnacci kaka niti mɔŋw kaṯṯasi ṯaay mac ethi urlǝ ṯɔgwor-lɔ, a-naŋnaŋwsi-va kinnǝni tok ŋwal-ŋi yǝy-yi.
18 Ŋaaŋa liti limǝ dɔŋgwatha kinnǝni ŋgwa naana mac kwǝṯir mɔmmi naana, naanɔ-gwɔ Ayin wǝni Siinaa iigǝ-yi wuuŋwun wɔfɔɔdɔ, nǝ kirim-ŋǝ ǝzir-yi wuumǝlǝ, nǝ kirǝjin, 19 nǝ ŋwal ŋwɔthi buruz, nǝ kwuurunnǝ kwǝthi ṯogɽo. Na mǝ lizi neŋne ṯogɽo, nǝr tuurǝthǝlɔ etheere neŋne ŋiɽaŋali ŋeere kwokwony mac, 20 kaka niti nǝthir-gwɔ ŋɔma mac ethi neŋne waamira waarɔŋw, “Mǝ kinnǝni haywaan oro wɔmɔmmɔ ayinɔ, laazim ǝri accathalɔ yall-yi.” 21 Aw rerrem, nǝ ǝzir ṯiŋatha ŋirinyǝlɔ ŋigii ṯiga-ṯiga, mindaŋ na Muusǝ aarɔŋw, “Nyii-ŋgwɔ kwɔnḏɔthɔ kwɔthiinya!” 22 Laakin ŋaaŋa tǝ, nǝ iila naanɔ-gwɔ Ayin wǝni Sihyɔɔn, nǝ ki-mǝḏiinǝ-nǝ kwǝthi Allah wɔmiithɔ, Urshaliim kwǝthi ki-leere-nɔgw, nǝ limeleka lir aalaaf linaanɔ ki-luuvǝ-nǝ lǝthi Siibir. 23 Ŋaaŋa limiila ki-lɔdɔŋw-na laamina lǝthi nyɔr nyir nyoŋwoŋ nyir ŋwɔɽa nyǝthi Allah, nyilɔɔthɔna yiriny yeeŋen ki-leere-na. Ŋaaŋa limiila naanɔ-gwɔ Allah wǝṯi haakimi lizigwunǝŋi. Niila naanɔ-gwɔ rigɽim rǝthi kila lirllalɔ lir min-min. 24 Ŋaaŋa limiila naanɔ-gwɔ Yǝcu-ŋgwa kwuɽuthu wa@ḏa wiyaŋ, nǝ niila naanɔ-gwɔ ŋin ŋiricinnǝlɔ ŋǝṯi andasi ŋiɽaŋali ŋǝthi wa@ḏ wǝthi kwomne kwuthǝmthi-lǝ ethi ŋin-lǝ ŋǝthi Haabiil.
25 Ǝɽir kǝniny aŋratha mindaŋ meere derne mac ethi niŋnaci ŋgwa kwandisa. Kila limǝ derne ethi niŋnaci ŋgwa kwandisa ŋiɽaŋali ŋǝthi Allah kanaŋw kwurǝyu-lu, nǝreere kilaaw mac. E-ta ǝrimǝ kilaaw nyiiŋǝ aŋgwɔrɔ mǝr dirnacci ŋgwa kwandisa ki-leere-na! 26 Ki-lɔɔmɔr-la kila nǝ ṯogɽo ṯuuŋwun riigi wurǝyuŋi laakin kirem tǝ, nɔŋwuuɽu wa@ḏa nɔŋwaarɔŋw, “Nyii Witi kwinḏi kwokwony ethi riigi wurǝyuŋi ṯɔɽɔk mac, laakin leereya tok.” 27 Ŋiɽaŋal ŋǝniŋw, “Kwokwony” nǝr andisalɔ por-por ethaarɔŋw ŋgwa kwugittina kwinḏi ethi riiginni na ǝri ǝvri kithaay, mindaŋ mǝ kwomne ŋgwa kwiti kwǝthi ŋɔma ethi riiŋinnǝlɔ mac, ŋwɔ naani ŋundu. 28 Ŋwɔṯaŋw ǝri aari shukran kaka mǝr-gwɔ aavi ŋeelenyi ŋa ŋiti ŋǝthi ŋɔma mac ethi riiginnǝlɔ. Ǝri aari shukran lɔgwɔcca Allah-la niizaam-gi kwǝthi-gi ǝmi ŋunduŋw-nǝ wuniyǝr-nǝ nǝ wiiɽǝrnǝ tok; 29 kaka nɔrɔ-gwɔ Allah wǝri iigǝ wǝṯi minǝŋ-lɔ minǝk-minǝk.