aza 6
1 nyelle, eṯi inyici rarnyalu ŋwuzi nana lanyalu ŋali eḏi Kweleny-na, kaka ofḏanar gwu ŋu. 2 kuruu karuŋw: eṯi iɽi ṯarnyalu ŋwuzi-na lanyalu gi—na amr wu orɔ wiŋna weḏi ṯikitaḏa-na tɔk— 3 ṯeni ŋwu: mindaŋ ma ami nanuŋw, na a yiḏla yɔŋwa uri tɔk ki ṯurmun-na. 4 papaŋa, eṯere lakazi nyelle nyalu mac, mindaŋ eḏi zi eprini ŋarriny, lakin eṯi zi dandimaḏa keni əpa yi ṯilŋiiḏina ṯi ṯeḏi Kweleny.
5 ŋaŋa lir yaḏaam, eṯi inyici lelenyi nana lalu leḏi ṯurmun kḏu; laŋraḏi eḏi zi əmi-na beṯen ṯugwor ṯi ṯutuput ma keni əkizi Kwruztuŋw ŋɔḏɽor. 6 eṯere aki ŋɔḏɽor eḏi ŋi əmi lizi-na mac mer ŋazi izaci, lakin kaka yaḏaam yeḏi Kwruztu leṯizerri ṯugwor ṯi ṯeḏi Allah rugwor ri ralu. 7 eṯizəkizi ŋɔḏɽor ṯinyiŋla ṯi-na, kaka kla leṯəkizi Kwelenyi ŋɔḏɽor ŋiti ŋir ŋeḏi lizigwunaŋ mac. 8 kiḏayinar eḏaruŋw, ma kwizi erri kwɔmne kwete nyiḏak kwicaw, ŋwu ṯa afi kwir ṯaŋwu nani gwu Kweleny, muŋw kinna orɔ kaḏaam kir kwuway, ya kir hurr. 9 na ŋaŋa lir leleny leḏi yaḏaam yir luway, eṯizerri ṯaŋwu tɔk; eṯi zi ere ketice ŋiḏenya mac, lilŋiiḏi rac eḏaruŋw, ŋgwa kwir Kweleny kweŋen, nuŋw orɔ Kweleny kwalu tɔk ŋgwana kwunani kilerena, nuŋw ere ruzi kwete kwecer kwupa, kwizaw eḏi kwuḏaḏu la, kwecer kwɔkwɽeny.
yeḏre yir yilim yeḏi likwruztyan
10 ṯaŋwu, firliri teter eḏi Kweleny-na, ŋuma ŋi ŋuŋun ŋupa ŋiminni. 11 kinnari yeḏreŋi yeḏi Allah yir minmin, mindaŋ ma eḏi ŋuma eḏenji ŋwara lu teter ki tumɔmma-na ṯeḏi ibliiz. 12 kaka iti ur gwu ṯububla ṯeri ṯeḏi lizigwunaŋ mac, lakin nuŋw orɔ teḏi lizulṯa liti lijina mac, na kla lupa leḏi ŋuma, na leleny leḏi kirim keḏi ṯurmun kḏu, orṯa yi witezir weḏi ŋikya kezir weḏi yilim. 13 ṯaŋwu, kinnari yeḏreŋi yeḏi Allah yir minmin, mindaŋ ma eḏi ŋuma eḏenji ŋwara lu teter ki lamin lifirli ŋiɽaŋali ŋir ŋiki, na mezi ṯimazi tatap, eḏeḏi ŋuma eḏi zi rillazi la titir. 14 ṯaŋwu, irlaḏir la titir, likəkine ŋiɽaŋal ŋi ŋir rerem ki yiriny kaka yaraṯ, likinna yeḏreŋi yir ṯofḏana, 15 linanalu cugwɔ-cugwɔp yiḏwan yi ŋwara ŋi, yir ŋiɽaŋal ŋizaw ŋeṯafa ŋiɽena. 16 ki ŋiɽaŋal la ŋu tatap, eṯapi lerwa leḏi ṯəmna, a li eḏi ŋuma eḏi li iɽinyaḏa lorje leḏi igə weḏi ŋgwa kwiki. 17 na kinnari yeḏreŋi yeḏi ŋwoɽa yir ŋigileḏa, na kalala keḏi Ṯigɽim tirlinelu ter, kir ŋiɽaŋal ŋinḏi nani gwu Allah. 18 ariri ki yiriny nyamin tatap ki Ṯigɽim-na ṯirlinelu ter, ṯara ṯi tatap ki yiriny na ṯuṯa ṯi lu tɔk. eṯinḏiri mac eḏizerici kla ki yiriny leni lirlinelu ter eḏi Kwruztu-na, ṯideŋṯina ṯi ṯeḏi ṯi ari ki yiriny duṯu-duṯuk. 19 ericeri nyuŋwu tɔk ki yiriny, mindaŋ menyi Allah inḏeḏa ŋiɽaŋali ŋofḏana kworɔ-na eḏi zi ŋi andaci pɔrpɔr, ŋugul ŋi, ŋiɽaŋali ŋir injiil, ŋulucina kerreny ki ṯugwor-na tuŋwun; 20 ŋinderṯa ŋu ŋimenyi ruzi kafur keḏi Melik kweni Allah—ŋwuɽu ŋi; mindaŋ menyi andiza lu ŋugul ŋi, kaka ofḏanar gwu eḏizandazi.
ŋaɽi ṯa kunuŋ
21 tihiikuz, kwir eŋgeri kwamɽanyi beṯen, kwir kwumeca kwirlalu ki ŋɔḏɽor-na ŋeḏi Kweleny, kwɔŋazi andaci ŋiɽaŋali tatap ŋeni nyi, mindaŋ ma elŋe eḏaruŋw, nyi kwir ti ḏa, na nyi ŋgwu kwerre aḏa. 22 nyi kwumɔ ŋazi uzica ŋunduŋwu ŋiɽaŋal ŋi ṯa ŋa ŋete ŋete, mindaŋ ma eḏi ŋuma eḏelŋe ŋiɽaŋali ŋeni ŋeri; na ŋwu lirli rugwori ralu nana teter.
23 eḏi ŋiɽena nani nani gwu lieŋgeri leri na ṯamɽa-ŋa ṯəmna ṯi, ṯinḏi nani gwu Allah wir Papa, na Kweleny kweni Yecu Kwruztu. 24 eḏi ṯimeca ṯeḏi ŋimɽi nani lizi li tatap leṯamɽi Kwelenyi kweri kweni Yecu Kwruztu, ṯamɽa ṯi kḏa titi ṯeṯay mac.
Nyelle-ŋǝ rǝrnyin-ŋǝli.
1 Nyelle, iinyicǝr rarnyalɔ-ŋwsi laanyalɔ-ŋǝli naana ethi Kweeleny-na, kaka nɔvthannar-ŋwɔ ethisi ǝrri ŋa. 2 “Ǝṯi iiɽi ṯarnyalɔ-ŋwɔsi-na Laanyalɔ-gi.” Waamir windǝr-ṯǝ wɔ wiŋna wa@ḏ-yi nǝ wathaathɔ waarɔŋw, 3 “Mindaŋ maami naanɔŋw tǝ, e-ta a nannitha lǝlu-ttuk kwurǝyu-lu.”
4 Papa-ŋa ǝṯeere lakkasi nyelle-lɔ nyaalɔ mac mindaŋ ethi urǝzi rɔgwori, laakin ǝṯisi kǝniny tatti ṯǝppǝ-thi, nǝ ethisi ǝccǝ @allima ethi Kweeleny-na.
Lɔwaay-ŋǝ lisǝyyiḏ-ŋǝli leeŋen.
5 Lɔwaay, ǝṯi iinyici lisǝyyiḏ-ŋwɔsi laalɔ naana ki-rɔgwor-na lac-lac lǝthi ṯurmun-nǝŋw ŋitheny-ŋi lɔnḏɔthɔ, lir kaka ǝṯisi ǝrrici Kwɔrɔstɔ-ŋw. 6 Ǝṯisi ere ǝrri mǝr naani yǝy-lɔ ḏak mac, ethi naŋni ŋunduŋwsi ethi biɽǝthǝ ŋaaŋwɔsi yiriny. Laakin ǝṯisi ǝrri rɔgwor-ri min-min ŋa ŋinaŋnathi-ŋǝsi Allah, kaka lɔwaaya lǝthi Kwɔrɔstɔ. 7 Ǝṯi akkɔ ŋothɽor laami rɔgwor-na, lǝmminǝ ki-rɔgwor-na ethisi ǝkkici Kweelenyi, ethiseere ǝkkici lizigwunǝŋi mac, 8 ǝsi elŋe ethaarɔŋw, Kweeleny kwinḏi ethi inḏǝthǝ lizi tatap ɔjra, ɔrɔ-ŋgwɔ kwɔwaay alla hɔrr, ŋiɽaŋal-ŋi ŋǝthi ŋothɽor ŋuuŋun ŋisaaw ŋakkɔŋwsi. 9 Ŋaaŋa lir lisǝyyiḏ-ŋǝ leeŋen, ǝrricǝr-siṯǝ ŋunduŋwsi tok ŋwɔ, nǝ ǝseere nǝŋnici ŋǝriya kwokwony mac. Ǝsi kithaayini ethaarɔŋw, ŋaaŋa ŋundu-ŋǝli tatap nǝthi Sǝyyiḏǝ ṯǝ ŋgwa kwette-kwette kwǝthi ki-leere-naŋw, kwiti kwǝthi ṯɔṯana mac.
Kwomne kwǝthi ŋǝriyǝ kwǝthi Allah.
10 Nǝ ŋɔ ŋirimthithɔ tǝ ŋǝsi ǝccǝŋw, firllir tetter ethi Kweeleny-na, nǝ ki-ṯifirlla-na ṯǝthi ŋɔma ŋuuŋun tok. 11 Ǝṯi kenne yethre-ŋi tatap yǝthi Allah, mindaŋ mǝthi ŋɔma ethi ǝnyji ŋwaara-lɔ tetter liniithi arraaya wǝthi Ibliis. 12 Kaka niti nǝṯir-gwɔ ṯɔgthi lizigwunǝŋ-li mac, laakin liniithithɔ naana ŋɔma-ŋi ŋǝthi rigɽim rigii rinaanɔ ki-yǝzir yǝthi ki-leere-naŋw. Nǝ kila lir hɔkkaam-ŋǝ lisɔlṯaan-li, nǝ ŋɔma ŋɔppa ŋǝthi lɔɔmɔr kala lir kirim. 13 Ŋwɔṯaŋw, kinnar yethre-ŋi yǝthi Allah kire-kirem-ŋgwɔ, minḏaŋ mǝthi ŋɔma ethi ǝnyji ŋwaara-lɔ tetter ki-laamin-la kila ligii, mindaŋ mǝsi ṯimmasi tatap tǝ, ǝnḏǝlɔ tetter.
14 Ŋwɔṯaŋw a rillala tittir linaanalɔ cɔgwo-cɔgwop, ligǝkkinǝ-nǝ ŋiɽaŋal-ŋi ŋir rerrem, ŋir kaka yarraath kiyiiriny, nǝ liginna yethre-ŋi yǝthi ŋirllalɔ, 15 liginna yithwǝnu ŋwaara ethi-yi naanalɔ cɔgwo-cɔgwop ethi aari bǝshirǝ Inyjiill wǝthi ŋiiɽǝnnǝ. 16 Nǝ ŋɔ tatap a dimmǝ ŋwɔrwǝ-ŋi ŋwɔthi ṯǝmminǝ, ethi-ŋi iɽinyatha iigǝŋi wǝthi nyiiri tatap nyifɔɔdɔ nyigǝgṯisi Ibliis. 17 Mindaŋ a dimmǝ liiri lǝthi ŋiglǝthǝ, nǝ kaalala kir ŋiɽaŋal ŋǝthi Allah, ŋga kinḏǝthǝ-ŋǝsi Ṯigɽim. 18 Ǝṯaari kiyiiriny Ṯigɽim-thi nyaamin tatap, lǝṯi uṯici Allah-lɔ kwomne-gi tatap, laŋrinna naana ṯɔgwɔrmɔṯanna-thi kiyiiriny tatap, laari isṯimir ethi uṯici Allah-lɔ ŋiɽaŋal-ŋi ŋǝthi kila lirllinǝlɔ ter. 19 Ǝricǝr-nyii kiiriny tok, mindaŋ mǝnyii Allah inḏǝthǝ ŋiɽaŋali ŋisaaw ŋǝthi Inyjiil minyeele ethi andasi, mindaŋ nyii andasi ŋuugul-ŋi ethi ruwǝzi ŋejmethi-lɔ ŋǝthi Inyjiil. 20 Nɔrɔny-va kinnǝni mahbuus tok ŋiɽaŋal-ŋi ŋǝthi Inyjiil wɔ, nǝnyii-mǝ kǝniny oro sǝfiir rerrec kwǝthi Inyjiil. Aarir kiyiiriny mindaŋ minyoro kwuugwul ethisi aami andasiŋw ŋǝthi Inyjiil.
Ṯaaginna ṯirimthithɔ.
21 Nǝ ŋa ŋǝni nyii, ŋǝniŋw nyii-ŋgwɔ kwɔnanni aŋgwɔrɔ, nǝ ŋirṯaŋ ŋǝṯi-nyji ǝrri, ŋa ŋǝŋǝsi ǝŋgǝri kwǝri kwamɽa-nyii beṯṯen kwǝni Ṯikhiikus kwir khaḏaam kirllalɔ ethi Kweeleny-na; ŋɔŋwsi ilŋithini ŋaaŋwɔsi tatap ŋǝni nyii. 22 Ŋinḏǝr-ṯǝ ŋɔ mindaŋ nǝŋǝsi-mǝ ṯiŋacca ŋunduŋw, ethisi elŋe ŋǝni ŋǝri, ŋǝniŋw nyiiŋǝ kɔlɔ linannɔ aŋgwɔrɔ mindaŋ mǝ firllanni-la, ki-rɔgwor-na raalɔ.
23 Ethi Allah wir Papa, nǝ Kweeleny kwǝni Yǝcu Kwɔrɔstɔ inḏǝthǝ liyǝŋgǝri-ŋwɔsi tatap lir lɔgrɔstiyan ŋiiɽǝnnǝ-ŋwɔsi ṯamɽa-thi nǝ ṯǝmminǝ tok. 24 Ethi ne@ma kwǝthi Allah nanni lizi-li kila tatap lǝṯi amɽi Kweelenyi kwǝri kwǝni Yǝcu Kwɔrɔstɔ ṯamɽa-thi ṯiti ṯǝṯi ai mac.