aza 4
1 ŋaŋa lir leleny leḏi yaḏaam, eṯizerrici ŋirlalu, na ŋofḏana tɔk, kiḏayinar eḏaruŋw, nyiŋa tɔk leḏi Kwelenyi kilerena.
2 eṯari ki yiriny titir; naniri yey yi lu, leca zukran rugwor ri; 3 na eṯi nyji erici ki yiriny tɔk, ta enyji ma Allah iŋḏici ogwur weḏi ŋiɽaŋal ŋuŋun, eḏi ruwezi ŋiɽaŋali lu ŋulucina, ŋeni Kwruztu, ŋinderṯa ŋinəni nyi ki zijin. 4 eṯinyji erici ki yiriny mindaŋ enyji ma ruwezelu pɔrpɔr, kaka ofḏanar gwu eḏi zi andazi. 5 eṯizerrici kla leḏi par ŋgi la ŋir ŋeḏi yeyna, laŋrica ŋwomuri ŋamaŋ. 6 eṯizandazi ŋimɽi ŋi ŋiɽaŋali ŋeḏi fayḏa-na kaka kwumḏa, ta a ma elŋe eḏami eŋniciŋw kwere nyiḏak kaka ofḏanar gwu.
7 tihiikuz kwɔŋazi andaci tatap ŋeni nyi; kwiri eŋgeri kwamɽanyi beṯen, kwir kwumeca kwirlalu na kaḏaam kofḏana keṯinyi gi oɽmaṯi ki ŋɔḏɽor-na eḏi Kweleny-na. 8 nyi kwumɔ ŋazi uzica ŋunduŋwu ŋiɽaŋal ŋi ṯa ŋa ŋete ŋete, mindaŋ ma eḏi ŋuma eḏelŋe ŋiɽaŋali ŋeni ŋeri; na ŋwu firli rugwori ralu nana teter. 9 nenyi uzica anizimuzŋw ŋundu gi, kwir eŋgeri kwirlalu kwamɽanyi beṯen, kwir kwete kwalu, lɔŋazi ilŋiiḏini ŋiɽaŋali ndendeṯ ŋimerrini kunuŋ.
10 arizṯarkuz, kwoɽmaṯi nyi gi ki zijin-na, kwagnaŋazi, na marguz tɔk kwir kigireyin kweḏi barnaaba-na, (a limezi neŋne ŋeni ŋundu ŋenuŋw, muŋw ila eḏi raŋḏa ŋaŋwuzi ta, ami enjiŋw kiloɽu-na), 11 na yazuwa kweni yuuzṯuz tɔk. linderṯa klu cukcuk lir likwruztyan leḏi yahuuḏ loɽmaṯi nyi li ki ŋɔḏɽor-na ŋeḏi ŋeleny ŋeḏi Allah, ner eni limenyi kandizelu. 12 abufraz, kwir kwete kwalu, kwir kaḏaam keḏi Kwruztu kweni Yecu, kwagnaŋazi, kweṯiŋazi ṯiŋayini ŋwamin tatap ŋama-ŋamaŋ ki ṯara-na ṯuŋwun ki yiriny mindaŋ eḏi ma ami rilluŋw, lifirli teter, lir minmin, leṯureni ṯilŋiiḏina ṯi ṯeḏi ṯugwor ṯeḏi Allah. 13 kaka unḏizenyi gwu ŋunduŋwu ki, kwumɔŋazi əkizi ŋɔḏɽor ŋifirli, na kla linani lawuḏikya, na linani hirabuliiz tɔk. 14 luuga kwagnaŋazi, kwir hakiim weṯir amɽi beṯen, na diimaz tɔk, 15 agnicernyi lieŋgeri ŋwuzi linani lawuḏikya, na nimfazŋw kwir kwaw, na kla leḏi kaniiza ki duənu kwuŋwun. 16 na mer ŋazi ortici juwaba ŋgwu daŋgal-na, ezi ortici tɔk leḏi kaniiza kinani lawuḏikya; na izari ezi ortici ŋaŋa tɔk juwaba kwinḏi lawuḏikya ŋgi. 17 na ecari arkibuzŋw ŋwu: iza, aŋraci ŋɔḏɽor ŋafa ŋazi nani gwu Kweleny, ezi ṯimazi kworɔ.
18 nyi kweni buuluz kwulucaŋazi ṯagna kḏu ṯii ṯi ṯinyi, kiḏayinari ṯikəkina ṯinyi ki zijin-na. eḏi ṯimeca ṯeḏi ŋimɽi nani daŋgal-na.
1 Ŋaaŋa lir lisǝyyiḏ-ŋǝ, ǝṯi ǝrrici Lɔwaaya laalɔ ŋiɽaŋali ŋɔvthanna, nǝ ǝṯi-li biɽithina tok, a kithaayini ethaarɔŋw ŋaaŋa lǝthi Sǝyyiḏ-ŋwɔ kwette tok ki-leere-na.
Ṯiccǝ ṯǝthi ŋejmeth.
2 Ǝṯaari kiyiiriny kodɔŋori, lǝṯi aŋranni naana, nǝṯi-gwɔ ǝccǝ Allah shukran. 3 Nǝ ǝṯir-nyji ǝrici kiyiiriny tok, mindaŋ mǝnyji Allah kiṯṯici lɔbaaba ethaari bǝshirǝ ŋiɽaŋali ŋuuŋun, ethi andasi ŋejmethi ŋǝthi Kwɔrɔstɔ, ŋindǝr-ṯǝ ŋɔ ŋinanany ki-sijin-nǝ. 4 Aarir kiyiiriny mindaŋ mǝnyji aami andasiŋw por-por.
5 Ǝthir yǝnǝ ethi-li aami eleŋw kila liti lǝthi ṯǝmminǝ mac, mǝ kaṯṯasi ṯaay tǝ, ǝṯisǝrri ŋisaaw. 6 Eṯhi kandisa kaalɔ aami nyaamin tatap ethi niŋnaci, ǝsi elŋe ŋǝni ŋɔvthanna ethi-ŋi ǝŋnici kwette nyithak.
Ṯaaginna ṯirimthithɔ.
7 Ṯiikhiikus kwir ǝŋgǝri kwǝṯi-nyii amɽi, kwɔŋǝsi ilŋithini ŋiɽaŋali ŋiinyi tatap, kwǝti-nyii mǝcci, nɔŋw rillalɔ, kwǝṯi-nyii-gi rɔmmɔthi ki-ŋothɽor-na ŋǝthi Kweeleny. 8 Kwǝni-ṯǝ kwɔɔsasa-nyii ki-ŋiɽaŋal ŋɔ, mindaŋ mǝsi elŋe ethaarɔŋw nyiiŋǝ kɔlɔ linanni aŋgwɔrɔ, nǝ ethi firllasi rɔgwor-la raalɔ tok. 9 Ŋgwa kwinḏir ethiila Unisiimus-gi kwir ǝŋgǝri kwirllalɔ kwǝṯi-nyii amɽi, nɔŋworo kwette kwǝthi dɔŋw laalɔ tok. Lǝŋǝsi andaci ŋiɽaŋali tatap ŋa ŋǝrrinǝ kɔnɔŋw.
10 Arasṯarkhus kwɔɽɔmaṯṯiny-gi ki-sijin-nǝ kwaaginna-ŋǝsi nǝ Mɔrgus tok kwir kigirǝyin kwǝthi Barnaaba-ŋa, ŋgwa kwandica-ŋǝsi-gi ethi aalanni ŋunduŋw daŋgal-na, mɔŋw iila naani-ŋa gwɔ 11 Nǝ Yǝcu kwǝni Yusṯus nɔŋw ṯiŋacca ŋaaŋwɔsi ṯaaginna tok, ŋunduŋǝ lirṯa kɔlɔ dak lir Yahuuḏ ki-limath-na liinyi lǝṯiny-li akkɔ ŋothɽor ŋǝthi Ŋeeleny ŋǝthi Allah, mindaŋ nǝroro ṯimǝccǝ ṯiinyi ṯɔppa. 12 Abafraas kwir kwette kwaalɔ, kwir khaḏaam kǝthi Kwɔrɔstɔ kwǝni Yǝcu, kwaaginna-ŋǝsi, ŋgwɔ kwǝṯi amɽi beṯṯen ethi kikithaayini ŋaaŋwɔsi nyaamin tatap ki-ṯaara-na ṯuuŋwun kiyiiriny, mindaŋ mǝnyji ŋwaara-lɔ tetter lir min-min ki-ŋiɽaŋal-na tatap ŋǝthi ṯɔgwor ṯǝthi Allah. 13 Ŋǝnyji andasi ŋǝni shahaaḏa kwuuŋwun, kaka nǝkkicǝ-ŋgwɔ ŋaaŋwɔsi ŋothɽor ŋɔmmaŋi nǝ kila linaanɔ Laawḏikiiyyǝ tok, nǝ linaanɔ Hiiraabuuliis tok. 14 Luuga kwir hakiim kwǝṯi-nyii amɽi na Ḏiimaas tok laaginna-ŋǝsi. 15 Aaginnicar-nyii liyǝŋgǝri-ŋwɔsi lǝthi Laawḏikiiyyǝ-ŋw, nǝ lǝthi Nimfaas-ŋwɔ nǝ kǝniisǝ tok kǝṯi aaɽathi dɔŋw ki-dɔɔnɔ kwuuŋwun. 16 Na mǝ juwaab ŋgwɔ urtuni daŋgal-na tǝ, e-ta ese a vrti tok kǝniisǝ-nǝ kǝthi Laawḏikiiyyǝ-ŋw. Nǝ a ɔrti ŋgwa tok kwinḏi Laawḏikiiyyǝ-ŋgi. 17 Andicar Arkhibbus-ŋwo ǝccǝŋw, “Aŋrica a ṯimmasi ŋothɽor kworo ŋa ŋinḏǝthǝr-ŋǝsi ŋǝthi Kweeleny.”
18 Nyii ŋgwɔ kwɔlɔcca-ŋǝsi ṯii-thi ṯiinyi wɔɽe-wɔɽeny ŋiɽaŋali ŋɔ. Ṯaaginna kɔthɔ ṯinḏi naaniny-gwɔ kwǝni Bɔɔlɔs. Ǝṯi ṯɔɔthɔna mac ŋwɔɽɔŋw-ŋi ŋwiinyi. Ethi ne@ma nanni ŋaaŋa-li.