aza 3
ŋiɽaŋal ŋinḏi eḏila ŋir ŋiki
1 lakin ilŋiicazi ŋu eḏaruŋw, ki ŋwamin ŋweḏi kwaḏanŋw, ŋwila ŋwomur ŋwufirli ŋiɽaŋali. 2 kaka inḏi gwu lor eḏamɽi rɔgwɽɔ reŋen wuɽe-wuɽeny, ṯimiidaḏa ṯi, er piŋi rɔgwɽɔ ṯellina ṯi; er ulluluḏi; er ruzici rernyinŋwuzi lenyinŋali ludurlaḏu; er ere naŋni eḏari zukran mac; er ere ketize ŋiɽaŋali ŋeḏi Allah yey tɔk mac; 3 er zi ere amɽi liḏaḏu mac; er derne eḏi kiɽmiḏi ŋiɽaŋali-na ŋere; er zi andazi ŋir ṯuŋwun; er ere miḏa rugwori reŋen mac; er ere eḏi ŋimɽya-na mac; er zi uwezi ŋa ŋeni ŋizaw; 4 er zi bɔŋwuḏaḏizina; er orɔ limiɽṯiru; er riimi ki ṯellina ṯi; er amɽi kwɔmne kweṯəmi ŋunduŋwuzi-na ki lobi leḏi li amɽi Allah. 5 er ari, nyiŋa liri leḏi ḏiin ṯeḏi Allah, lakin ta a ŋuma ŋeḏi Allah ere nani ŋunduŋwuzi-na mac. na ŋa ta, eṯi ruci lizi-na klu tuk. 6 kaka eṯir gwu nani deŋgen-na kla leṯellelu ki yiŋna-na eḏi multaḏa layu ki ŋiɽaŋal-na ŋeŋen, liti leḏi yey-na mac, lakin leṯi ruzi ŋikya ŋeŋen eḏorɔ ṯofi ṯeŋen, na leṯi kwaḏiḏa ŋiɽaŋali ŋir-na ter ter. 7 law klu leṯi zi niŋnaci kwete nyiḏak, lakin ner ere kaṯazi ŋiɽaŋali ŋir rerem mac. 8 kaka ireca gwu lor leni yanniiz-ŋa yambariiz gi muuzaŋw kereny, na lizi klu tɔk, eṯir ireci ŋiɽaŋali kereny ŋeni ŋirlalu, kaka enir gwu lor limɔ kiyaḏi ŋwoɽa-na cil, ner eḏi ṯəmna ṯurena ŋidiny-na dedep. 9 lakin er ere ṯamḏu ŋiɽaŋal ŋi ŋeŋen mac, kaka inḏi gwu lizi tatap eḏi zi izaci ŋiḏyaŋi ŋeŋen ki, kaka ŋa ŋeḏi kla lir nden leḏi kerrenyŋw.
kwɔmne kwinḏi eḏi firlazi timuṯaawuzŋw la
10 lakin ŋa ta, a kwumenyi izaci ṯilŋiiḏina tinyi, na ŋa ŋetinyjerri tɔk, na ṯindinyana tinyi nana, na ṯamɽa tinyi tukwurmɔṯana ṯi, 11 owɽar nyi gwu yey ṯirara ṯi, kezir weni anṯaakya, na iguunya, na liztra tɔk, na ŋwunda ŋwu tatap, eṯinyji ta indinyani nana, nenyi ŋi ṯa Kweleny kileḏi ṯirṯir. 12 nyi kwecaŋa ma ŋwa, er zi owɽi yey kla tatap leṯorɔ zurum eḏi miiḏi eḏi Kwruztu-na kweni Yecu. 13 lakin lizi liki rugwori, na luzur tɔk, er kikindeni ŋikyaŋi-na, er eni ŋunduŋa leṯi zi ṯuzi liḏaḏu, ner eni ŋunduŋa tɔk liṯuḏi. 14 lakin na ŋa ta, eṯenji ŋwara lu teter ki ŋiɽaŋal-na ŋimerŋazi ilŋiiḏini, ŋimezi miḏa ṯəmna ṯi tɔk, kiḏayineŋa zi gwu kla limɔŋazi ilŋiiḏini, 15 kaka ilŋiidi ŋa gwu ŋiɽaŋali ŋirlinelu ter ŋuluḏina, ŋɔgɔŋ ŋi yey yelu, ŋeṯeḏi ŋuma eḏilŋiiḏini ŋaŋwu eḏi kaṯazi ŋigileḏa ṯəmna ti, allaḏiŋa gwu Kwruztuŋw kweni Yecu ṯugwori nana. 16 ŋa ŋuluḏina tatap Ṯigɽim ṯi ṯeḏi Allah ŋeni ŋofḏana eḏi zi ŋi ilŋiiṯini, eḏi zi ŋi ermici, eḏi zi ŋi dandimaḏa, eḏorɔ əpa weḏi ṯofḏana. 17 mindaŋ ma kwizi kweḏi Allah zeyini minmin, kwukita rɔgwɽɔ lu ruŋwun cugwɔ-cugwɔp eḏaki ŋɔḏɽor ŋete nyiḏak ŋizaw.
Ṯuulicǝ ṯǝthi ṯa@liim ṯir ŋǝluŋ.
1 Kithaayinasi ŋa ŋǝniŋw, ŋwɔɔmɔr ŋwa ŋwinḏi ŋwɔfirlli ŋiɽaŋali ki-ŋwaamin-la ŋwa ŋwinḏi ethiila. 2 A lizi amindindi rogɽo reeŋen, ǝri meede gwuruushǝ, ǝri piŋi rogɽo reeŋen, lǝṯi ɔllɔllɔthi, liti lǝṯi iinyici rǝrnyin-ŋwɔsi lǝnyin-ŋǝli naana mac, ǝṯirsi firasi ŋisaaw, luruuŋwɔnǝ, 3 liira ŋimɽiyǝnǝ, liti lǝṯisi rɔgwor yee-na mac, lǝṯi ɔŋwnɔthi, liti lǝṯi mithǝ rɔgwori mac, lir dɔrr, lir limirṯiɽu, lǝṯisi uwǝzi ŋisaaw; 4 lir khaayiniin, lǝṯi fiɽigathi, lǝṯi piŋi rogɽo reeŋen, ǝṯirsi ṯibatha ŋa ŋǝṯisi ǝminǝ, nǝ Allah tǝ bǝri; 5 ǝrsǝthi ŋǝthi ḏiin parŋgala dak, laakin ǝri dirnnatha ŋɔma-lɔ ŋuuŋun ŋir rerrem. Lizi lir kaka-ṯǝŋw ǝsi ruccinǝ tuk. 6 Nǝ ki-lɔdɔŋw leeŋen, nǝr naani lǝṯi mɔmri yiŋna-la ethi iidǝsi layɔ kila lajla lǝṯi uvuni ṯɔɔvi ṯǝthi ŋikiya ŋeeŋen, nǝ lǝṯi mɔmlottone sɔɔrɔm-gi kwirna ter-ter, 7 lir laaw kila lǝṯi ṯǝccici ethaari @allima ethisi elŋe, laakin ǝṯireere ǝthi ŋɔma mac ethisi elŋe ŋa ŋir rerrem. 8 Kaka nirrǝcǝ-gwɔ Yanniis-ŋǝ Yambriis-gi Muusǝ-ŋw keereny, ŋwɔṯaŋw tok nǝ lizi kɔlɔ irrǝci ŋiɽaŋali keereny ŋir rerrem, lir lizi kila liti lirilɔ ŋaɽiny-lɔ ŋeeŋen mac, liti lɔvthanna ki-ṯǝmminǝ tok mac. 9 Laakin liti lǝthi ŋɔma ethi dɔŋgwatha-lɔ tuk mac, kaka ninḏi-gwɔ ŋǝɽiyǝŋ ŋeeŋen ethi iijinǝlɔ por-por. Ŋindǝr-ṯǝ ŋa dap-dap ŋǝrrinicǝ Yanniis-ŋwɔsi Yambriis-gi.
Ṯa@liim ṯirimthithɔ.
10 Nǝ ŋa ta, nǝ kwakithatha ṯa@liima-lɔ ṯiinyi, ŋethre niinyi, karatha kǝthi ŋimiitha ŋiinyi, ṯǝmminǝ ṯiinyi, ṯindinyanna naana ṯiinyi, ṯamɽa ṯiinyi, mithǝ ṯɔgwori kwiinyi, 11 ki-ṯǝwɽinnǝ yǝy-lɔ ṯiinyi, nǝ ki-ṯiraara-na ṯiinyi. Ŋilŋithi-ŋǝsi ŋɔ tatap ŋǝrrinicǝ-nyii a-naani-nyii Anṯaakiya, Iguuniiyyǝ nǝ Lasṯra tok, nǝ ṯǝwɽǝ yǝy kitha ṯir ŋudur-ŋudur ṯimthicǝ-nyii ṯɔgwori! Laakin nǝnyii-gwɔ tǝ Kweeleny kilǝthinǝ tatap. 12 Aw rerrem, mǝ kweere nyithak naŋni ethi nannatha ki-ŋimiitha-na ŋǝthi Allah Kwɔrɔstɔ-ŋgi kwǝni Yǝcu tǝ, ǝri ǝwɽi yǝy-lɔ. 13 Nǝ kila ligii, nǝ lir lǝluyw ǝri kǝniny kikiyatha keereny-gi, ethisi kǝgiɽinyjǝlɔ lithaathɔ, na nǝrǝni likǝɽinyjinǝlɔ ki-rogɽo reeŋen. 14 Laakin ŋa tǝ, iilathi keereny-gi ki-ŋiɽaŋal-na ŋa ŋir rerrem ŋǝccǝr-ŋǝsi @allima, mindaŋ nǝsi ǝmmini tig-tig. A kwilŋithi-pǝ mɔ@alllmiina kwɔɔŋa rac, 15 nǝ kinaŋw tuk ŋogoŋ-ŋi ŋɔɔŋa yǝyǝlɔ, nǝ elŋe Yiṯaabi Yirllinǝlɔ ter, yǝthi ŋɔma ethi ǝccǝ ŋaaŋwɔ @allima ethi kaṯṯasi ŋiglǝthǝ ṯǝmminǝ-thi ethi Kwɔrɔstɔ-na kwǝni Yǝcu. 16 Kiṯaab tatap kirllinǝlɔ ter kinḏi Allah-ŋgi nɔŋw ɔvthanni ethi-gi aari @allima ŋa ŋir rerrem, ethi-gi kikirinyatha, ethi-gi dandimatha ŋa ŋiti ŋisaaw mac, nǝ ethi-gi aari @allima ṯaay ṯǝthi ŋirllalɔ, 17 mindaŋ mǝ ŋgwa kwǝṯi ǝkkici Allah ŋothɽor oro min-min ethi naanalɔ cɔgwo-cɔgwop ethi akkɔ ŋothɽor ŋette nyithak ŋisaaw.