aza 2
ŋedi liɽi lir ləluŋ, na ŋeḏi ŋeḏre ŋiki
1 lakin na liɽi lir ləluŋ diɽi tɔk ki lizi-na kerreny tuk; na lizi leni limuallim lir ləluŋ, er ila daŋgal-na tɔk, er enjici ŋaŋwuzi ŋejmeṯi ŋəluŋi, ŋiɽaŋal ŋi ŋeḏi rugwor reŋen domony eḏi kiici ŋaŋwuzi ŋiɽaŋal-na, er nyindini keni Kwelenyi kwumezi liṯa tɔk. ŋwu ṯaŋwu, er efica rɔgwɽɔ reŋen ṯikiraḏa lu fitak. 2 er zi kwaḏiḏa luru ki ray-na reŋen riki, na deŋgen ŋgi, er erri ṯay luŋw ṯir rerem. 3 na kaka miidaḏir gwu kwuruuza ta, er ŋazi kekɽinjelu ŋəluŋ ŋi; nezi hukm weḏi kerrenyŋw ere nanji zagi mac; eṯi zi ṯikiraḏa lu ṯeŋen nanjelu yey yelu.
4 na ŋimɽi ere yaḏa Allah ki limaleyka mac, akir gwu ŋiɽaŋali pir, lakin nuŋw zi kaṯa ki jahannam-na kiriim-na ndɔm ndɔm, eḏi gwu nanni mindaŋ ma lamin ila leḏi zeyria. 5 na ŋimɽi ere yaḏa ŋunduŋwu ŋeḏi ṯurmun ṯeḏi kerrenyŋw tɔk mac, lakin nuŋw kileḏi nuuhŋw, kweṯi zi ireci ŋeḏi ṯofḏana, na lizi liḏaḏu dufɔkwɽeny, afaŋw gwu kiiruwa ki ṯurmun nana ṯeḏi kla liti leṯi nii Allah-na mac. 6 nuŋw dunnazi limeḏiina leni zaḏuum-ŋa amuura gi, nuŋw zi ruzi yaru; nuŋw zi kiraza lu hukm yi eḏi zi ŋi ilŋiiḏini kla liki rugwori linḏi kwaḏan. 7 lakin nuŋw kileḏi luutŋw, kweni kwofḏana, kwumɔ ŋiɽaŋal ŋiki urreḏa beṯen ŋeḏi kla liki rugwori. 8 kaka eṯi gwu tugwor ṯofḏana ṯeḏi kwor ŋgwa kweni kwofḏana ye-na ŋwamin tatap, nanuŋw gwu deŋgen-na ŋiɽaŋal ŋi ŋeḏi ŋikya ŋeŋen, ŋeṯir zi andazi, ŋeṯir zi erri tɔk. 9 ŋwu ṯa, eṯi Kweleny eḏi ŋuma rac eḏi kileḏi lizi leṯiketize ŋiɽaŋali ŋuŋun yey, ki ṯurfa-na, na eḏi zi kəki jiiza gi kla leni liki rugwori mindaŋ ma lamin ila leḏi zeyria. 10 ŋeni ŋupa ŋiɽaŋali, linderṯa kla leṯorɔ lijin eḏi zi ŋi ruŋwici rugwori; leṯiderne eḏinyizi zulṯa nana kweḏi kla lupa; eṯir piŋi rɔgwɽɔ reŋen; eṯir bonye eḏi zi erri luŋw kla lir leḏi ŋiniṯ. 11 lakin na limaleyka, liṯemḏizi la ŋuma ŋi, eṯir ere ila nani gwu Kweleny ŋiɽaŋal ŋi ŋere ŋir luŋw mac, mindaŋ eḏi zi ŋi ruzi kaṯi.
12 lakin eṯi lizi klu orɔ kaka kwɔmne domony kweṯi lizi miḏa eḏeɽenye, kwiti kweḏi ŋaɽiny-na mac; eṯir zi andazi ŋir luŋw ki ŋiɽaŋal-na ŋeŋen, ŋeḏi kwɔmne kwiti kwilŋiiḏir mac, mindaŋ er kiraḏa lu kaka kwɔmne kweḏi wuḏer, 13 lafi ṯirerina kaka eṯir zi gwu rəri liḏaḏu. eṯir amindi eḏurleli kaŋwuna, liri lizi luruŋwa-na mer eḏne ŋaŋa li duŋw, kaka eṯir gwu miḏa ŋidiny ŋeŋen likita ŋirina ŋaŋa li. 14 eṯir uri yey lu beṯen ŋijin ŋi, ner ere ala ŋikyaŋi rii ḏuṯ. eṯir zi kekɽinjelu lajila ki ṯəmna, kaka urir gwu lizaṯir leḏi ṯimiidaḏa ṯeḏi kwuruuz, ner efica rɔgwɽɔ reŋen hukma weḏi ṯikiraḏalu. 15 efricir gwu ṯay ṯirlalu ta, ner ṯuḏi. eṯir kwaḏiḏa ṯay ṯeḏi balaam, kwir tor teḏi bazuur, kweṯamɽi eḏəgini kwɔmne ŋikya ŋi; 16 lakin ner ermici ŋunduŋwu teɽiŋga ri titi teṯandazi mac, andiza gwu teɽiŋga ṯɔgwɽɔ ṯi ṯeḏi kwizigwunaŋ mindaŋ nuŋw ṯinyini ŋiḏyaŋi ki ŋeḏi liɽi.
17 lizi klu liri kaka le liira ŋaw-na, liri kaka yibəɽu yeṯi zi kurun urṯezi la; er inḏa kirimi kiriim-na ndɔm ndɔm kuṯelu, kimerzi ketize. 18 kaka eṯir gwu andazi ŋiɽaŋali ŋitezir cakicagi, eṯir zi kekɽinjelu kaduwa gi keḏi yaŋna kla limɔkilaḏa ṯayṯi lizi leṯidirnaṯi ki ŋikya-na. 19 eṯir zi kitaḏa hurriya yi, lakin ner orɔ ŋunduŋa luway ṯidigɽa ṯi ṯeḏi ŋikya; kaka ma kwɔmne kwere nyiḏak illazi kwizi kwere ki, eṯuŋw ṯa orɔ kwuway kweḏi kwɔmne ŋgwa. 20 kerreny, ner artiḏa kwɔmne lu kweḏi ṯurmun kweṯi zi ruŋwici rugwori nana, ṯilŋiiḏina ṯi ṯeḏi Kweleny kweri kweni Yecu Kwruztu, kwir Kwigileḏa kweri tɔk; lakin mer kəkini keni kwokwony ŋikya ŋi ŋeḏi kerrenyŋw mindaŋ mer zi illazi ki, er orɔ liki beṯen eḏi kerrenyŋw la. 21 ŋizaw deŋgen-na eŋgir ere elŋe tay ṯofḏana mac mindaŋ ilŋiidir gwu ta, eḏorlaci ṯay ŋwudɔŋw ṯeḏi amr wirlinelu ter winḏeḏerzi. 22 ner errini deŋgen-na ŋir kaka taŋwu:
tinyen timaɽiḏa kwɔmne-na kwuweḏeḏuŋw lu.
na kizaŋ kuna nana dar, kimaɽiḏa ŋacu-na kwokwony eḏi ruŋwuḏa nana.
Mɔ@allimiin kwir lǝluŋw.
1 Kerreny tuk nǝ liɽii lir lǝluŋw ruwǝnnǝlɔ ki-lizi-nǝ, nǝ ŋwɔṯaŋw tok, a mɔ@allimiin kwir lǝluŋw ruwǝnnǝlɔ daŋgal-na tok. Ǝri aava ṯa@liima ṯigii, na ǝri nyindini Sǝyyiḏǝ ŋgwa kwɔmǝsi kǝdithǝ, mindaŋ ǝsi ṯigiirathalɔ ṯǝthi rogɽo reeŋen ṯǝrmizǝlɔ. 2 Nǝrṯɔroŋw mindaŋ a lizi luuru kwakithatha raay reeŋen rigii; nǝ sǝbǝb-gi kwǝthi ŋa ŋǝrrǝrsi, a lizi lithaathɔ andisasa ṯaay naana ṯir rerrem ŋiɽaŋali ŋigii-ŋigii. 3 Mɔ@allimiin ŋgwɔ kwir lǝluŋw ṯigiiri-thi ṯeeŋen, kwinḏi ethi ǝgini ŋiɽaŋal-ŋi ŋa ŋir ŋǝluŋw ŋǝṯir-ŋǝsi andaci. Ŋwɔṯaŋw nǝsi hɔkwɔm weeŋen nanyjalɔ cɔgwo-cɔgwop kirem, nǝ ṯigiirathalɔ ṯeeŋen ǝkkici ŋunduŋwsi kizǝn yǝy-yǝlɔ!
4 Nǝ ŋimɽi ere yatha Allah ki-limelekɔ mac kila limǝ akkɔ pir, laakin nɔŋwsi kaṯṯɔ ki-jahannam-nǝ, kǝzir wɔgǝṯṯirsi-gwɔ likǝkkinǝ kirim-nǝ, lǝkkicǝ Laamin kizǝn lǝthi Hɔkwɔm. 5 Nǝ Allah ere ǝthici ṯurmunǝ ṯǝthi kerreny-ŋwɔ ŋimɽiyǝ-nǝ mac, laakin nɔŋwɔvicǝ lizi lǝthi ṯurmun kiiruwǝ kila liira Allɔh-na; nǝ kila-ṯǝ dak limǝŋwsi kilǝthi, nǝ Nɔuh oro kwaarɔ bǝshirǝ ŋirllalɔ-ŋi, nǝ lizi kila lir dɔvokwɔɽony tok. 6 Nǝ Allah ǝccǝ muḏunǝ haakima kwǝthi Saḏɔɔm-ŋǝ @amɔɔra-gi, nɔŋwsi kiirasalɔ iigǝ-yi, mindaŋ nɔŋwsi ruusi mǝthǝl kwǝthi ŋiɽaŋal ŋa ŋinḏisi ethisi ǝrrinici kila liira Allah-na. 7 Nɔŋw kilǝthi Lɔɔṯ-ŋwɔ kwir kwɔr kwirllalɔ, kwǝṯi ruunyunici ŋiɽaŋali ŋǝthi lizi kila ligii; 8 kwir kwɔr kwirllalɔ kwɔnannɔ deŋgen-na, nǝ ŋwaamin tatap ǝṯi ṯɔgwor ṯuuŋwun ṯisaaw yatha ki-ŋiɽaŋal ŋa ŋǝṯɔŋwsi ese nǝ ŋǝṯɔŋwsi neŋne tok ŋǝthi ŋothɽor ŋeeŋen ŋigii-na cil-cil. 9 Ŋwɔṯaŋw ǝṯi Kweeleny elŋe ethi kilǝthi lizi lǝthi Allah ki-ṯurvǝ-nǝ ṯeeŋen, nǝ ethisi kette tok kila ligii ki-jiizǝ-nǝ, ethi ǝkkici Laamin kizǝn lǝthi Hɔkwɔm, 10 nǝr-ṯǝ aalaci kila lǝṯi kwakithatha kadɔwa-lɔ kuruuŋǝ kǝthi yaŋna yeeŋen, mindaŋ ǝṯir ǝrri sɔlṯa-lɔŋw kwǝthi Allah.
Nǝ mɔ@allimiin ŋgwɔ kwir lǝluŋw, oro luugwul nǝ ǝṯir piŋi rogɽo tok, ǝṯleere iiɽi kwomne-na mac kwir ŋinith ŋǝthi kindala-ŋw; nɔ ǝṯir kǝniny ollollo. 11 Nifirlli-va limeleka nǝ nǝthir-vǝ ŋɔma kinnǝni tok ki-mɔ@allimiin-la kwir lǝluŋw, nǝrsi-tǝ ere andisasa ŋiɽaŋali naana mac ŋigii-ŋigii ŋǝthi hɔkwɔm kiyǝnǝ yǝthi Kweeleny. 12 Laakin lizi kɔlɔ tǝ, ǝṯirsi ǝrri ŋǝthi ṯobii@a ṯeeŋen, kaka haywaanaatha wǝthi kiyaaɽina-ŋw, wɔgittina ethi ɔmmuni ethi endinye; ǝṯirsi ǝrrǝlɔŋw ŋa ŋiti ŋilŋithirsi mac, mindaŋ ǝrsi kiirasalo kaka haywaanaatha wǝthi kiyaaɽina-ŋw, 13 ǝrsi inḏǝthǝ ɔjra wir ṯurvǝ, wǝthi ṯurvǝ ṯǝnyjǝr. Nǝ ṯinyiŋlana ṯeeŋen nɔŋwɔni-ŋwɔ, ethisi ǝrri ŋette nyithak kaaŋwɔn-na ŋa ŋǝṯisi ṯimmaci sɔɔrɔma kworo kwǝthi yaŋna yeeŋen, ǝṯisi ṯɔrony mithǝ mǝli ɔɽɔmɔṯṯi dɔŋw kethne-la, ethi nyeŋlena raay-ri reeŋen rǝṯir-ri kǝkiɽinyji ŋaaŋwɔsi-lɔ! 14 Luurǝnnǝ yǝy yeeŋen ŋiijinǝnǝ deddep; liti lǝṯi bee mac ki-sɔɔrɔm-na kweeŋen kwǝthi ŋikiya. Ǝṯir iidǝsi lizi lajla ki-ṯǝmminǝ. Lǝṯi ǝccǝ rɔŋwor reeŋen @allima ethi kiiri. Lǝṯi naani ki ṯɔllɔthana ṯǝthi Allah! 15 Nǝr dɔŋgwǝci ṯaay ṯirllalɔ mindaŋ nǝr ṯuusi ṯaay ṯeeŋen ṯirllalɔ; nǝr kwakithatha ṯaay ṯɔrɔɔmɔ Bal@aam kwir tɔr tǝthi Ba@uur, ŋgwa kwamɽa ethaavi ɔjra wǝthi ŋothɽor ŋigii, 16 mindaŋ nǝr ǝrmici ŋiɽaŋal-ŋi ŋǝthi ŋikiya ŋuuŋun, kinaŋw mǝ tǝɽiŋgǝ andasi ṯogɽo-thi ṯǝthi ŋizigwunaǝŋ, mindaŋ nɔŋw rilli kwiɽiiya ŋɔthɽor naana ŋir ŋǝɽiyǝŋ.
17 Lizi kɔlɔ lir kaka ŋwɔrony ŋwiira ŋaaw-na, nǝroro kaka ŋwebleṯ ŋwɔṯisi kɔrɔn urṯǝsilǝ, nǝrsi kettice ǝzir wir kirim kiriimǝnǝ ndom-ndom kuṯṯǝlɔ lac-lac. 18 Ǝṯir piŋi rogɽo kandisa-na keeŋen kir ŋǝɽiyǝŋ domony, ǝṯir ruusi sɔɔrɔma kwǝthi yaŋna yǝthi ŋikiya ethi-gi iidǝsi kila limǝ arṯitha lizi-lɔ kila linannɔ ki-ŋikiya-na. 19 Ǝṯirsi ǝccǝ wa@ḏa hɔrriyya-yi, ŋunduŋǝ tǝ, nǝroro lɔwaay lǝthi ǝthi wigii ki-rogɽo-na reeŋen, kaka nǝṯi-gwɔ kwizi oro kwɔwaay kwǝthi kwomne kweere nyithak kwǝṯi ṯiinyi ŋunduŋw. 20 Mǝ lizi leere kilaaw ki-ṯigiirathalɔ-na ṯǝthi ṯurmun, elŋe-ŋgi kwɔmǝr-gi elŋe Kweelenyi kwǝri nǝ Kwiglǝthǝ kwǝni Yǝcu Kwɔrɔstɔ, mindaŋ ethi-mǝ aaɽi kwokwony ethi iidǝthi kwomne-na ŋgwa mindaŋ ethi ṯiinyini kwokwony. E-ta ǝṯi lizi lir kaka kɔlɔ, ǝni ligiiyathalɔ beṯṯen ethi kerreny-ŋwɔla. 21 Ŋǝŋgi ɔvthanni beṯṯen deŋgen-na ǝŋgireere elŋe ṯaay mac ṯǝthi ŋirllalɔ kerreny, mindaŋ ethi-mǝ ɔrlacci waamira ŋwɔdoŋw kirem wirllinǝlɔ ter wa winḏǝthǝrsi. 22 Ŋa ŋǝrrinicǝsi ŋunduŋwsi nǝr ǝthini mǝthǝlǝ yǝnǝ kwaarɔŋw, “Tinyǝn ṯimaaɽitha ŋuwǝŋi kinda”, nǝ “Kiizǝŋ kiyiinǝ naana kimaaɽitha korgoth-na.”