ŋeni ŋirlalu na ṯamɽa
1 nyi, kwir kwijowiṯ, kwagne ŋaŋwu kwir kwaw kwica Allah-na, kwelle gi-na kwɔŋwa, kwamɽanyi rerem. nenyi ere orɔ nyi kwutuput kwamɽaŋazi mac, lakin kla tatap lilŋiiḏi ŋirlalu, 2 ŋiɽaŋal ŋi ŋeḏi ŋirlalu ŋeṯinyji gwu nanni-na, ŋenyji gwu nanni-na dɔk dɔk.
3 ṯimeca ṯeḏi ŋimɽi, na ŋimɽi ŋundu ŋiɽena ŋi, er nanni deŋgeri-na ŋinḏi nani gwu Allah wir Papa, na nani gwu Yecu Kwruztu, kwir Tor teḏi Papa, ŋirlalu ŋi na ṯamɽa ṯi.
4 nenyi nyeŋlena beṯe-beṯen, inḏanyji gwu nyɔkwɔ nyir nyor riyɔŋwa nyeṯi dirnaṯi ki ŋiɽaŋal-na ŋirlalu, kaka inḏeḏanyji gwu Papa amra. 5 na kire-kirem, nyi kwuṯazaŋa lu kwɔmne gi kwere. eṯaruŋw mac, amr wiaŋ wiri winḏeḏa ŋa. beri; wunderṯa wumer miḏa ṯayṯi; er amɽaḏizina wuɽe-wuɽeny. 6 na ṯamɽa eni kḏu, eḏinyici amra nana weḏi Allah. wunderṯa wir amr kaka niŋnaŋazi gwu kerreny, eḏi dirnaṯi ki ṯamɽa-na.
7 ner nani ki ṯurmun luru leṯi zi kekeɽinjelu, liti lemnize Yecuŋw Kwruztu mac eḏaruŋw, kwumila kwir aŋna. na ŋgwa kwir ṯuwən ṯeḏi Kwruztu kwir ṯa ŋwu, kweṯorɔ kwəluŋ. 8 aŋricar rɔgwɽɔ ralu, er ere ṯuzi kwɔmne ŋgwu mac kwəkizanyi ŋɔḏɽor, lakin er inḏa ujra wir minmin. 9 kwere kweṯi dapi ṯaliim ṯi la ṯeḏi Kwruztu, eṯuŋw ere eḏi Allah-na mac, na ŋgwa kweṯi dirnaṯi ki ṯaliim-na ṯeḏi Kwruztu, eṯuŋw eḏi Papaŋw-na, na Toru tɔk. 10 muŋw ila kwere daŋgal-na muŋw ere afa ṯaliima kḏu mac ta, ere enji ŋunduŋwu ki duənu mac, ya ere agni tɔk mac. 11 kaka kwere kwagni ŋunduŋwu, kwunde kwirir gi ŋumaṯi ki ŋɔḏɽor-na ŋuŋun ŋiki.
12 nyi kweḏi ŋiɽaŋali ŋuru eḏi zi luca ŋaŋwu, lakin ta, enyjere lɔ warga yi na hibr yi mac, lakin enyi aki kizen eḏila nani ŋa gwu eḏi mumri ŋiɽaŋali la ki yey-na, mindaŋ eḏi ṯinyiŋlana ṯeri orɔ minmin.
13 kwelle kweḏi aŋgalu kwir kwaw kwica Allah-na, kwagnaŋazi.
1 Nyii kwɔrɔ kwir Shekh, nyii ŋgwa kwɔlɔcca-ŋa ŋaaŋwɔ ŋgwa kwir kwaaw kwiccar-na, nǝ nyelle nyɔɔŋwa tok, kila lamɽa-nyji rerrem, nǝ ninyeere oro nyii kwɔtɔpɔt mac, laakin kila tok tatap lǝṯi-si elŋe ŋir rerrem, 2 kaka nɔrɔr-gwɔ ŋa ŋir rerrem dǝŋgǝr-nǝ mindaŋ ǝri nannatha dok-dok.
3 Ethi ne@ma-ŋa ŋimɽi-ŋi nǝ ŋiiɽǝnnǝ tok nanni nyii-ŋǝli, ŋinḏi naanɔ-gwɔ Allah wir Papa, nǝ naanɔ-gwɔ Yǝcu Kwɔrɔstɔ kwir Tɔr tǝthi Papa, ŋiɽaŋal-ŋi ŋir rerrem nǝ ṯamɽa.
Ŋiɽaŋal ŋir rerrem nǝ ṯamɽa.
4 Nyii kwinyiŋlana beṯṯen ethi ese nyɔɔrɔ nyokwo nyɔɔŋwa nyɔrɔɔmɔ ŋiɽŋali-lɔ ŋir rerrem, kaka-tǝ ninḏǝthǝ-nyji gwɔ Papa waamira. 5 Nǝ kirem tǝ ŋǝ tuurǝccǝlɔ tur kwaaw kwaalɔ, ŋiti ŋǝniŋw nyii kwɔlɔcca-ŋa waamira wiyaŋ mac, laakin waṯa wa wǝthir kinaŋw-lɔ tuk kwon-kwon, ethi amɽathisi-na wɔɽe-wɔɽeny. 6 Na nǝṯǝ ṯamɽa oro kɔthɔ, etheele ki-waamir-la wuuŋwun; nɔŋworo ṯǝ wa winiŋnaca-ŋa kinaŋw-lɔ tuk kwon-kwon, mindaŋ nǝmǝ kwakithatha ṯamɽalɔ. 7 Kaka mǝgwɔ Iigǝɽinyjǝlu littǝzir faathitha ṯurmunǝ naana, lir lizi liti lǝmminǝ mac ethaarɔŋw Yǝcu Kwɔrɔstɔ kwinḏi aŋna-yi; nǝ ŋgwa kwir kaka ṯǝŋw, nɔŋworo kwir kwɔgǝɽinyjǝlu nǝ ṯuwǝn tok ṯǝthi Kwɔrɔstɔ. 8 Aŋricar rogɽo laakin a kǝniny ǝgini ɔjra wir min-min. 9 Kweere kwǝṯi dappi ṯa@liim-thila ṯǝthi Kwɔrɔstɔ, ǝṯɔŋgweere nanni-na mac, ǝṯɔŋweere ǝthi Allah-na mac; nǝ ŋgwa kwǝṯi nanni ki-ṯa@liim-na, ǝṯɔŋw ǝthi Papa-ŋwɔsi Tɔr-ri. 10 Mɔŋw iila kweere naani-ŋa-gwɔ, mindaŋ mɔŋweere aava ṯa@liima kɔthɔ mac tǝ, ǝṯeere ǝnyji ki-dɔɔnɔ-na mac, wala ethi aaganni ŋunduŋw. 11 Nǝ mɔŋw aaganni kweere ŋunduŋw ŋwɔni kwǝr-gi ɔɽɔmaṯṯi ki-ŋothɽor-na ŋuuŋun ŋigii.
Ŋiɽaŋal ŋirimthithɔ.
12 Ŋɔ ŋǝthi-nyji ŋittǝzir ŋǝthisi lɔcca ŋaaŋwɔsi, e-ta ninyeere naŋni ethisi lɔɔtha wǝrigǝ-yi nǝ hibir-yi tok mac, laakin nǝnyii kittatha ethiila etheese ŋaaŋwɔ mindaŋ ethi andasi liisithɔ kiyǝnǝ tittir, mindaŋ mǝ ṯinyiŋlana ṯǝri oro min-min.
13 Kwelle kwǝthi aŋgalɔ kwir kwaaw ŋgwa kwiccar-na kwaaginna-ŋa.