aza 8
1 nyiŋa linaŋnaŋazi eḏi zi elŋe, lieŋgeri, ŋeḏi ṯimeca ṯeḏi ŋimɽi ŋeḏi Allah ŋimɔ ruwene lu ki yaniiza-na yeḏi makḏunyaŋw, 2 kaka ureni gwu dedep ṯinyiŋlana ṯeŋen ki ṯiṯeca-na ṯifirli beṯen ṯeḏi ṯurfa, na ŋuway ŋeŋen ŋu tɔtɔr tɔk, ner zi ŋi inḏeḏa lu weṯ ṯimeca ṯi ṯeŋen. 3 kaka mer zi gwu inḏeḏa kaka kweḏiri, nenyji ŋi undizi ki rac, na eṯi zi ṯemḏicelu tɔk ŋeḏi rugwor reŋen wuɽe-wuɽeny, 4 ner nyji turecelu tur eḏi li oɽmaṯi eḏi zi meci kla lirlinelu ter eḏi Kwruztu-na— 5 na ŋu, ŋiti ŋikitaḏinyi ŋi ŋunduŋwuzi mac eḏi zi erri, lakin kerreny ner inḏeḏa Kwelenyi rɔgwɽɔ reŋen, na nyuŋwuzi tɔk, ṯugwor ṯi ṯeḏi Allah. 6 ṯaŋwu nenyi uṯizi tiiṯazŋw lu eḏi ratazi ŋɔḏɽor ŋu daŋgal-na ŋeḏi ṯimeca ṯalu ṯamɽa ṯi, kaka muŋw zi gwu erri ṯayṯi. 7 ṯaŋwu, kaka ma gwu ṯamḏalu purpur kwɔmne-na tatap, ki ṯəmna-na, kandiza gi, ki ṯilŋiiḏina-na, ki ṯaŋrina nana tatap, na ki ṯamɽa-na ṯalu ṯeṯir nyji ṯi amɽi, izar a ṯamḏalu purpur ki ŋɔḏɽor-na ŋu ŋeḏi ṯimeca ṯamɽa ṯi tɔk.
eḏi izazi ki ŋiɽaŋal-na ŋeḏi Yecu eḏi kwakiḏalu
8 ŋiti ŋandicaŋazi ŋu amr yi mac, lakin menyi ruwene lu ŋiɽaŋal ŋi ŋeḏi ṯaŋrina nana ṯeḏi lizi liḏaḏu, eṯi ṯa ṯamɽa ṯalu ruwene lu tir rerem tɔk. 9 kaka ilŋiiḏiŋa gwu ṯimeca ṯeḏi ŋimɽi ŋeḏi Kweleny kweri kweni Yecu Kwruztu eḏaruŋw, urŋw gwu kwurṯu nuŋw orɔ keni kwuway ŋiɽaŋal ŋi ŋeni ŋalu, mindaŋ ŋuway ŋi ŋuŋun a ma orɔ lurṯu. 10 na ki ŋiɽaŋal-na ŋu nyi ŋgwu kwinḏeḏaŋazi ŋu ŋeḏi ṯugwor tinyi: kiḏla kimɔṯamḏu, a leni liŋna limɔkitaḏa eḏi zi errici ŋizaw nezi errici tɔk; ŋwu ṯa, ŋofḏanicaŋazi eḏi zi ṯimazi kirem, 11 mindaŋ ma ṯikitaḏa ṯalu na ŋa ŋimerrini biɽḏina, mezi ṯimaci tuc kwɔmne gi kweḏi ŋa. 12 ma ṯugwor ṯeḏi kwizi amɽi eḏinḏeḏa kwɔmne kweḏuŋw, eṯi Allah emnici, nuŋw ere əkici kwɔmne kizen mac kwiti kweḏi kwizi ŋuma mac eḏinḏeḏa. 13 ŋiti ŋari nyi ŋi ŋwu mac eḏir eḏi liḏaḏu ṯimeca na ŋaŋa ta eḏi ma nani domony, 14 lakin ŋiɽaŋal ŋi ŋeḏi ṯibiɽḏana, ŋgwa kweḏi ŋa kwuru kire-kirem kweŋgi zi ṯimaci kworɔ kla liiracazi, mindaŋ ma kwɔmne kweŋen kweḏi ri uri, er ŋazi ṯimaci kworɔ ŋgwa kwiiracaŋazi, mindaŋ a ma ŋiɽaŋal biɽḏina. 15 kaka luḏinar gwu, ŋaruŋw: ŋgwa kwumɔ lufezi kwuru nuŋw ere eḏi kwere kwumɔ əɽinelu mac, na ŋgwa kwumɔ lufezi kwɔkwɔ ta, nuŋw ere amɽani mac.
ṯuza ṯeḏi tiiṯaz na liḏaḏu tɔk
16 nyi kweca Allah zukran wumɔ kete ṯaŋrica kḏu ki ṯugwor-na ṯeḏi tiiṯaz eḏaŋraci ŋanwuzi. 17 kaka iti emnaŋw gwu ṯuziḏa ṯi ṯeri ṯuɽuk mac, lakin urŋw gwu zurum ta, ŋgwu kwinḏi nani ŋa gwu ŋiɽaŋal ŋi ŋeḏi ṯugwor ṯuŋwun. 18 ŋgwa kwuzanyi ŋundu gi kwiri eŋgeri kweṯir iɽi-na beṯen ki yaniiza-na tatap, ŋiɽaŋal ŋi ŋeṯuŋw zi andaci ŋir injiil; 19 ner ere orɔ ŋu dak mac, lakin kwica lizi-na leḏi yaniiza eḏi ireri nyiŋa li ki ŋɔḏɽor-na ŋu ŋeḏi ṯimeca ṯamɽa ṯi, ŋeṯinyji erri eḏi nii Kweleny-na, na eḏi zi ruweci ṯamiḏana ṯeri ṯizaw. 20 nyiŋa likitaḏi eḏi kwizi ere kwere mac kwenyji aw lom li ŋeḏi haḏiya wupa, wu winḏi nyi gwu eḏi zi inḏeṯa, 21 kaka naŋnar nyji gwu eḏi zi erri ŋirlalu titir, ŋiti ŋiri ki yey-na yeḏi Kweleny ṯuɽuk mac, lakin ki yey-na yeḏi lizi tatap tɔk. 22 na lizi li klu lir nden nyiŋa linḏi eḏuza eŋgeriŋw kwete kwir ter, kwumenyi ṯecici nyamin-na nyuru, na kwumenyi kaṯazi kwaŋrina nana ki ŋiɽaŋal-na ŋuru, na kirem ŋgwu kwaŋrina nana teter kaka kitaŋw gwu ŋaŋwuzi ki ṯugwor-na beṯen. 23 tiiṯaz ta, kwiri kwumaṯ kwinyi kweṯi nyi gi oɽmaṯi ki ŋɔḏɽor-na ŋalu; ta na lieŋgeri liri yafur yeḏi yaniiza, na eṯir nii Kwruztu-na. 24 ṯaŋwu, ruwezer ki yey-na yeḏi yaniiza yeŋen ṯamɽa lu ṯalu, na ezi baŋaci ŋeḏi ṯellina ṯeri ṯeni ŋaŋa, eḏaruŋw, ŋiri rerem.
Cuugwǝzi kwǝthi lɔgrɔstiyan.
1 Nyiiŋǝ linaŋna-ŋǝsi liyǝŋgǝri ethisi elŋe ŋɔ ŋǝthi ne@ma kwǝthi Allah kwǝrrinǝ ki-yǝniisǝ-nǝ yǝthi Makḏuuniiyyǝ-ŋw. 2 Kaka mǝsi-gwɔ ṯurvǝ ṯǝcci ṯuuru ṯifirlli, laakin nǝrtǝ ǝthi ṯaamana ṯɔppa ṯir-ṯir, nɔrɔr-va kinnǝni lɔwaay ceg-cegi tok, nǝrtǝ cuugwǝzi laamina. 3 Kaka mǝr-gwɔ kette ŋgwa kwǝthicǝr ŋɔmana ethi kette, mindaŋ nǝr ṯǝmsǝlɔ pur-pur rɔgwor-ri reeŋen. 4 Nǝrnyji tuurǝccǝlɔ ethi-li ɔɽɔmaṯṯi ki-ṯimǝccǝ-nǝ, ethi mǝcci lizi lirllinǝlɔ ter linaanɔ Yahuuḏiiyyǝ. 5 Nǝr ṯǝmsǝlɔ kwuuru kwiti kwɔgittathiny-gwɔ mac! Kaka ninḏǝthǝr-gwɔ Kweelenyi rogɽo reeŋen ker-kerreny; nǝ kwaathan tǝ, nǝrnyji-mǝ inḏǝthǝ rogɽo reeŋen tok ṯɔgwor-thi ṯǝthi Allah. 6 Ŋwɔṯaŋw nǝnyii tuurǝcci Ṯiiṯus-ŋwɔlɔ, kaka nɔrɔ-ŋgwɔ kwaari ibṯǝḏi ŋothɽor ŋɔ, ethaari isṯimir ethi mǝcci ŋaaŋwɔsi, mindaŋ ethi ṯimmasi ŋothɽor ŋɔ ŋir barka. 7 Nǝ kaka nithǝmthi-ŋǝlɔ pur-pur kwomne-na tatap, ki-ṯǝmminǝ-nǝ, ki-ṯilŋiṯṯa-na, ki-ṯamɽa-na ṯaalɔ ṯǝthi ṯimǝccǝ, nǝ ki-ṯamɽa-na ṯaalɔ ṯǝni nyiiŋǝ tok. Nǝrṯoro ŋɔ ŋinaŋnar-ŋǝsi-ŋi ethi ṯamthalɔ pur-pur ki-ŋothɽor-na ŋɔ ŋir barka tok.
8 Nyii-ti kwandica-ŋǝsi ŋiɽaŋali ŋɔ waamir-yi mac, laakin ethisi ilŋithini ŋaaŋwɔsi ŋɔ ŋǝthi lithaathɔ lǝṯi amɽi ethisi mǝcci lithaathɔ. Mindaŋ ethi ṯamɽa ṯaalɔ ṯir rerrem ruwǝnnǝlɔ. 9 Ŋaaŋa lilŋithi rac ne@ma kwǝthi Kweeleny kwǝri kwǝni Yǝcu Kwɔrɔstɔ, ŋgwa kwir kwɔrṯɔ beṯṯen, laakin nɔŋworo kwɔwaay ŋiɽaŋal-ŋi ŋaalɔ, mindaŋ mǝthi ŋɔma ethoro ŋaaŋa lɔrṯɔ ŋɔwaay-ŋi ŋuuŋun. 10 Ŋikir kwiinyi kwǝni-ŋwɔ, ŋɔvthanna ethisi Ṯmmasi ŋa kworo ŋaari-ŋǝŋi ibṯǝḏi ethisi ǝrri kithlǝ-lǝ ŋgala kimǝ ṯamthɔ. Nǝreere ǝniŋw ŋaaŋa liri laari ibṯǝḏi ṯɔɽɔk mac ethisi ǝrri ŋɔ, laakin kaka namɽaŋa-gwɔ ethisi ǝrri rɔgwor-ri raalɔ! 11 Aarir kǝniny isṯimir ethisi ṯimmasi kworo kaka kinaŋw nigittathiŋa-gwɔ ethisi ǝrri, ǝɽir kǝniny ǝsi ṯimmasi kworo kwomne-gi ŋgwa kwɔnaanɔ kiriny-na kire-kirem-ŋgwɔ kwǝthiŋǝ. 12 Mǝ kwizi ǝmmini ethi kette kwomne kwǝthiŋw, ǝṯi Allah ǝmminici ŋgwa kwǝthiŋw tok, ǝṯɔŋweere ǝkkici kizǝn ŋgwa kwiti kwǝthicǝŋw ŋɔmana ethi kette mac. 13 Nyii kwiti kwuthǝccǝ ethisi dimmǝthǝ lithaathɔ ṯɔɔvi kithaay mac, mindaŋ ethi uvuni ŋaaŋwɔsi 14 laakin kaka nǝthi-ŋǝgwɔ kwittǝzir kire-kirem-ŋgwa tǝ, nǝr ɔvthanni ethisi mǝcci kila liiracasi. Mindaŋ mɔŋw iiraci ŋaaŋwɔsi kǝzir weere tok tǝ, nǝ mǝrǝthi ŋunduŋǝ tok kwittǝzir tǝ, ǝrŋǝsi mǝcci tok. Nǝ ṯǝrṯiib-thi ṯǝ kɔthɔ, ǝni limǝ biɽithina raay tok. 15 Kaka nɔlɔɔthɔnar-gwɔ ŋaarɔŋw, “Ŋgwa kwuluuvǝzǝ kwuuru, nɔŋweere ǝthi kwuthǝmthǝlɔ mac, nǝ ŋgwa kwuluuvǝzǝ kwokwɔɽoc, nɔŋweere amɽaṯatha mac.”
Ṯiiṯus-ŋǝ lizi-li lǝṯir-li akkɔ ŋothɽor.
16 Ǝri ǝccǝ Allah shukran winḏǝthǝ Ṯiiṯus-ŋwɔ, ṯaŋrica ki-ṯɔgwor-na ṯǝni ŋaaŋa, ethi mǝcci ŋaaŋwɔsi! 17 Nɔŋwseere ǝmmini ŋa ŋuṯicǝny-ŋǝlɔ dak mac, laakin nɔŋwɔni kwɔgittathɔ kerreny tuk ethiila ethi mǝcci ŋaaŋwɔsi wɔɽe-wɔɽeny. 18 Nǝ ŋgwa kwɔɔsa-nyii ǝŋgǝri-gi kwǝri, kwilŋithi yǝniisǝ tatap ṯǝbshiir-thi ṯuuŋwun ṯǝṯɔŋw-thi aari bǝshirǝ Inyjiilǝ. 19 Nǝreere oro ŋɔ dak mac, laakin nǝ yǝniisǝ allana ethi rɔmmɔthi nyiiŋǝ-li, ki-ŋothɽor-na ŋɔ ŋǝrinǝ baarika ṯamɽa-thi, ŋiɽaŋal-ŋi ŋǝthi ŋinith ŋǝthi Kweeleny, ethi baaŋaci ŋaaŋwɔsi ethaarɔŋw, nyiiŋǝ linaŋna ethi mǝcci ŋaaŋwɔsi. 20 Nyiiŋǝ lǝṯi aŋranni beṯṯen, mindaŋ mǝr-nyjeere kaṯṯaci lɔɔma leere mac, lǝthi ŋothɽor ŋǝthi haḏiiyyǝ wɔppa ŋiɽaŋali. 21 Kaka nɔrɔ-ŋwɔ karath kǝri ŋga ethisi ǝrri rirllalɔ, nǝreere ǝniŋw ethisǝrri kiyǝnǝ yǝthi Kweeleny dak mac, laakin kiyǝnǝ yǝthi lizi tok. 22 Nyiiŋǝ kila lithiŋaca-ŋǝsi ǝŋgǝriŋw kwǝri ŋundu-ŋǝli kila lir ndǝn; nǝ kwɔmǝ-nyii ṯǝccici nyaamin-na caw-caw, mindaŋ nǝnyii kaṯṯasi kwǝthi ṯimǝccǝ-nǝ rerrem. Nǝ ŋgwa kwǝni kwallathi-ŋǝsi ṯɔgwor naana ethi mǝcci ŋaaŋwɔsi. 23 Nǝ ŋǝthi Ṯiiṯus tǝ, nɔŋworo kwɔɽɔmaṯṯiny-gi ki-ŋothɽor-na ethi mǝcci ŋaaŋwɔsi; nǝ ŋǝthi liyǝŋgǝri lithaathɔ kila linḏir ŋundu-ŋǝli, nǝsi yǝniisǝ oro yɔɔsasi mindaŋ ethi Kwɔrɔstɔ niini-nǝ. 24 Baaŋicarsi ṯamɽa ṯaalɔ, mindaŋ mǝŋǝsi yǝniisǝ tatap elŋe rerrem ethaarɔŋw nyiiŋǝ laami ǝlliniŋw ŋiɽaŋal-ŋi ŋaalɔ.