aza 5
1 kaka ilŋiicanyji gwu rac eḏaruŋw, yaŋna yeri yir kaka yəfaŋ, mindaŋ mer ke eṯinyeḏi nani gwu Allah yiŋna yete yiti yowcina rii ri mac, yinḏi eḏi nanniḏa dɔk kilerena. 2 eṯi nyi keni əgiḏa kunuŋ, linaŋna beṯe-beṯen eḏi kenne ṯukwuɽbenalu ṯeri kilerena, 3 ṯa ŋwu mer kenne ta, er nyji ere inḏa lufduṯu. 4 ner ṯa orɔ ŋwu, ŋinani nyi ŋi kinna ki yəfaŋ-na kyu eṯinyi gwu əgiḏeḏa ṯundeŋna ṯi; eṯi nyi ere amɽi eḏalla ṯukwuɽbenalu mac, lakin eḏi ma kenne ṯiṯemḏelu mindaŋ eḏi yaŋna yinḏi eḏi miiḏi dɔk dɔk morḏaḏi eḏi yaŋna la yeri yinḏi eḏay. 5 ŋgwa kwumenyji daɽmaci eḏorɔ ŋwu, Allah wiri, wumenyji inḏeḏa Ṯigɽima tirlinelu ter tɔk ṯir arbun. 6 ṯaŋwu, eṯi nyi eḏi ŋuguli ŋizaw ŋwamin tatap; eṯinyjelŋe eḏaruŋw, nani nyi gwu ki yaŋna-na kyu ta, eṯi nyi ere eni lupaḏi nani gwu Kweleny kinna mac, 7 kaka eṯi nyi gwu dirnaṯi ṯəmna ṯi, ner ere orɔ ŋizarzi mac. 8 nenyere ṯenye mac, ŋamɽanyji eḏi ru-na lir yaŋna eḏi nani Kweleny ŋali duŋw. 9 ṯaŋwu, menyi nani nanuŋw gwu ya menyi nani lir yaŋna ta, eṯi nyi kitazazi rugwori nana eḏəmi ŋunduŋwu-na. 10 lazim er ma rilli tatap ki zeriya-na kweḏi Kwruztu mindaŋ mer afi tatap lere lere kwizaw ya kwiki, kwir kaka kwumɔŋwerri aŋna yi wuŋwun.
ṯamɽa ṯeḏi ṯi amɽi Kwruztuŋw
11 ŋwu ṯaŋwu, ilŋiiḏinyji gwu ŋeḏi ŋiḏeny eḏi ṯenye Kwelenyi, eṯinyji ṯa andindazi lizi; eṯinyji Allah elŋe lɔrtɔ ḏa, nenyaruŋw ner nyjelŋe ŋaŋa tɔk ki rugwor-na ralu. 12 nyiŋa liti liɽa rɔgwɽɔ-na reri kwokwony mac nani ŋa gwu, nenyi keni naŋni eḏinḏeḏa ŋaŋwuzi ŋiɽaŋali eḏi ŋi piŋi rɔgwɽɔ ralu ŋeni nyiŋa; ṯaŋwu a ma eḏi ŋuma eḏi zi eŋnici kla leṯellini ki rɔgwɽɔ ŋiɽaŋal ŋi ŋeḏi kwizi par ŋgi la, ŋiti ŋiri ŋeḏi ṯugwor ṯuŋwun mac. 13 menyeni kwumorle ṯugwori, na ṯa ŋiɽaŋal orɔ ŋeḏi Allah titir; menyi nani kwizaw nda-na, ner ṯa orɔ ŋalu. 14 kaka ur gwu ṯamɽa ṯeḏi Kwruztu ṯeṯinyji iili ki ṯay ṯutuput, kaka ilŋiiḏinyji gwu rac eḏaruŋw, kwumay kwete ki ŋwobi ŋweḏi lizi tatap; ŋwu ṯa ner ma ay tatap. 15 nuŋw zi eyzi tatap, mindaŋ kla limiiḏu lir yaŋna er ere miiḏici rɔgwɽɔ reŋen kwokwony mac, lakin er miiḏici ŋunduŋwu ŋgwa kwumay ŋiɽaŋal ŋi ŋeŋen, na kwumer diɽi tɔk.
ŋimiiḏa ŋiaŋ eḏi Kwruztu-na
16 ŋwu ṯaŋwu, na kirem eṯi nyi ere ecice kwizi kwere mac ŋizigwunaŋ ŋi domony; menyi ecice Kwruztuŋw kerreny kaka kwizigwunaŋ, eṯi nyi ere ecice ŋunduŋwu kwir ṯa ŋwu kwokwony mac. 17 ŋwu ṯaŋwu, kwere muŋw nani eḏi Kwruztu-na eṯuŋw ketene kwokwony kwiaŋ; rɔgwɽɔ ruɽun rimere kitay, izarṯi, kwizi kwumorɔ kwiaŋ. 18 ŋu tatap ner ila nani gwu Allah, wumuza Kwruztuŋw eḏəmiḏi nyuŋwuzi-na ŋundu gi, mindaŋ nuŋw inḏeḏa nyuŋwuzi ŋɔḏɽor ŋeḏi tamiḏana kḏu; 19 ŋeni ŋu, Allah wumɔnani eḏi Kwruztu-na eḏi zi əmiḏina leḏi ṯurmun ŋundu gi, mindaŋ nuŋw zi ere eḏi zi ortutucina kwokwony mac ŋeṯir ŋi aki tay pir, nuŋw alliḏa nyuŋwuzi ṯugwori nana eḏi zi andazi ŋeḏi ṯamiḏana kḏu. 20 ṯaŋwu nyiŋa liri yafur yeḏi Kwruztu ki lobi luŋwun; Allah wiri wuturecazi lu ŋiɽaŋal ŋi ŋeri. nyiŋa liturecaŋazi lu tur, ki lobi leḏi Kwruztu, eḏamiḏina Allah yi. 21 Kwruztu kwiti kwilŋiica ŋikya ŋere mac, lakin keni na Allah ruzi ŋunduŋwu ŋikya ki ŋwobi ŋweri, mindaŋ ŋundu ŋgi er orə nyiŋa ṯofḏana ṯeḏi Allah.
1 Ŋwɔṯaŋw nǝr elŋece nyiirŋǝ ethaarɔŋw, mǝ yǝvǝŋ yǝri kiyɔ yir wurǝyu ernene tǝ, nǝrǝthi dɔɔnɔŋw naanɔ-gwɔ Allah, kwir dɔɔnɔ kwiti kwɔdaɽiminna rii-ri mac, kwinḏi ethi nannitha dok-dok ki-leere-na. 2 Nǝ kire-kirem-ŋgwɔ tǝ, ǝṯir ǝgǝthǝ beṯ-beṯṯen, lakkɔ kizǝn ethi kenne dɔɔnɔŋw kwǝri kwǝthi ki-leere-naŋw; 3 nǝ ŋwɔṯaŋw mǝr kenne tok tǝ, ǝreere naani ŋwɔvdɔṯṯɔ kwokwony mac. 4 Nǝ a-naanir tǝ kinnǝni ki-yǝvǝŋ-nǝ kiyɔ yir wurǝyu, ǝṯir tǝ ǝgǝthǝ ṯurvǝ-thi, nǝ nǝreere ǝniŋw mac, a kwɔnaŋnari ethi allatha yǝvǝŋi-lɔ kiyɔ yir wurǝyu mac, laakin nǝrsi naŋni ethisi kenne kiya yǝthi ki-leere-naŋw, mindaŋ mǝ ŋiimiitha ŋǝṯi nanntha dok-dok irṯasi yaŋna-lɔ yǝri kiyɔ yir wurǝyu. 5 Nǝṯǝ Allah oro wɔgittica-nyji kwomne-lɔ ŋgwa cɔgwo-cogwop, winḏǝthǝ-nyji Ṯigɽimǝ ṯuuŋwun ṯir ǝrbuun.
6 Ŋwɔṯaŋw nǝr urǝnni ŋuugul-nǝ deddep nyaamin tatap. Na nǝr elŋe rac ethaarɔŋw, a-naanir ta kinnǝni ki-yǝvǝŋ-nǝ kiyɔ yir yaŋna, nǝrǝni luruccǝ dɔɔnɔŋw-na kwǝthi Kweeleny. 7 Kaka nǝṯir-gwɔ nanni ṯǝmminǝ-thi, nǝ ǝṯir-ŋeere nanni-nǝ ŋa ŋǝṯirsi ese mac. 8 A kwǝnir luurǝnnǝ ŋuugul-nǝ mindaŋ nǝr naŋni ethi rucci yaŋnana yǝri, mindaŋ ethi ɔɽɔmaṯṯi ki-dɔɔnɔ Kweeleny-gi. 9 Ŋwɔṯaŋw mǝrtǝ naani kinnǝni kɔnɔŋw, wala kinanaŋw, nǝrsǝthi ŋɔtɔpɔt ethi ǝmi ɔunduɔw-nǝ. 10 Nǝ laazim ǝri ruwǝnnǝlɔ kiyǝnǝ yǝthi kwɔrsi kwǝthi hɔkwɔm wǝthi Kwɔrɔstɔ, mindaŋ mǝ leere-leere aavi ŋgwa kwǝthi ŋothɽor ŋuuŋun, ɔrɔr-gwɔ ŋisaaw alla ŋigii, ŋa ŋǝrrǝ-ŋwsi a-naanɔ-ŋw tǝ kinnǝni aŋna-yi kwamiithɔ.
Ṯammithana ṯǝthi-thi ammithina Allah-yi.
11 A kwilŋithir ethaarɔŋw ṯithiinya ethi ṯeenye Kweelenyi ṯǝṯi rotto ǝŋgwɔrɔ, ŋwɔṯaŋw ǝṯi-nyii ṯǝccici ethisi andindaci lithaathɔ tok. Allah wilŋithi-nyji-nǝ duɽull, nǝ nǝnyii kittatha naani-ŋa-gwɔ ethi elŋe nyuŋwsi tok ki-rɔgwor-na raalɔ. 12 Nyiiŋǝ liti liṯǝccicǝ mac ethi andaci ŋaaŋwɔsi ŋiɽaŋali ŋǝthi rogɽo rǝri; laakin nǝnyii ṯǝccici ethi inḏǝthǝ ŋaaŋwɔsi sǝbǝbǝ kwisaaw kwǝthi-gi piŋi rogɽo raalɔ ŋiɽaŋal-ŋi ŋǝni ŋǝri, mindaŋ mǝthi ŋɔma ethisi ǝŋnici kila lǝṯi ǝllini ki-rogɽo ŋiɽaŋal-ŋi ŋǝthi ŋizigwunǝŋ, ŋiti ŋir ŋǝthi ṯɔgwor ṯuuŋwun mac. 13 Nyiiŋǝ lǝni lir yeeɽer-pa? Nǝ nǝrtoro-pǝ kǝniny ŋǝthi Allah. E-ta nyiiŋǝ lɔsɔɔɽɔ ŋwɔɽana? Imba nǝrtǝ-pǝ ǝni ŋaalɔ! 14 A kwǝni kwukǝkkinǝr ṯamɽa-thi ṯǝthi Kwɔrɔstɔ, na nǝr elŋe ethaarɔŋw kwizi kwɔmǝ ai kwette ki-lɔɔbi lǝthi lizi tatap, ŋwɔṯaŋw nǝr ǝniŋw, a kwɔɽɔmaṯṯir tatap ki-ŋiɽany-na ŋuuŋun. 15 Nǝ nɔŋwsi ǝyici tatap, mindaŋ mǝ kila linḏi ethi nanni, etheere nǝnnici rogɽo reeŋen kwokwony mac, laakin ethi nǝnnici ŋgwa kwɔmǝ ai dak, kaka mɔŋgwɔ diiɽǝ kwɔmiithɔ ŋiɽaŋal-ŋi reeŋen.
16 Ŋwɔṯaŋw kirem tǝ, ǝṯinyeere ǝccǝ kwizi kweere haakima ŋizigwunǝŋ-ŋi mac. Kerreny nǝrǝccǝ Kwɔrɔstɔ-ŋw haakima ŋizigwunǝŋ-ŋi, nǝ kirem tǝ, bǝri! 17 Ŋwɔṯaŋw mɔŋw naani kweere ethi Kwɔrɔstɔ-na, ǝṯɔŋworo kwiyaŋ, ǝṯi kwomne kwir kwɔɔɽɔn irṯathalɔ; mindaŋ ǝṯɔŋw mɔrthathi kwiyaŋ. 18 Nǝ Allah oro wǝrrǝsi ŋɔ tatap, nɔŋworo wǝmmithǝ-nyji-nǝ Kwɔrɔstɔ-ŋgi, mindaŋ nɔŋw inḏǝthǝ nyuŋwsi ŋothɽor ŋǝthi ṯǝmmithǝnǝ; 19 ŋwɔṯaŋw nǝrǝniŋw, Allah wǝmmithǝ ṯurmunǝ-nǝ rogɽo-ri ruuŋwun Kwɔrɔstɔ-ŋgi, mindaŋ nǝsi Allah fivrici ŋikiyaŋi kithaay ŋeeŋen, e-ta nɔŋw mǝ inḏǝthǝ nyuŋwsi ŋothɽor ŋǝthi ṯǝmmithǝ-nǝ. 20 Nyiiŋǝ lǝṯi andasi ki-lɔɔbi lǝthi Kwɔrɔstɔ, nǝroro kaka nǝṯisi Allah tuurǝccǝlɔ nyuŋwsi-li. Ŋwɔṯaŋw ǝrŋǝsi tuurǝccǝlɔ ki-lɔɔbi lǝthi Kwɔrɔstɔ: ammithirna Allah-yi. 21 Niti-vǝ nǝrrǝ kinnǝ Kwɔrɔstɔ ŋikiyaŋi ŋeere mac, nǝtǝ Allah ruusi kwikiya ŋiɽaŋal-ŋi ŋǝni ŋǝri, nǝ duŋgwun-nǝ tǝ, ǝrǝthi ŋɔma ethi rillalɔ ṯirllathilɔ ṯǝthi Allah.