aza 12
buuluz muŋw eze kwɔmne kweḏi kilerena ŋiŋliṯa, na ṯajila ṯeṯejilini ŋunduŋwu ki rɔgwɽɔ
1 nyi kwellini nyi tɔk kwɔmne gi kwete; ŋiti ŋeḏi ṯəgna ṯere mac, lakin ŋinaŋnanyji eḏi zi andazi ŋeḏi kwɔmne kwizanyi ŋiŋliṯa, na ŋeḏi ṯiruwenizelu ṯinḏeḏa nyi Kweleny. 2 nyi kwilŋiiḏi kworu kwete eḏi Kwruztu-na ki yiḏla yir wri-kwaɽŋan yimɔ ṯamḏu, kwumer dimi la teṯ, ner gi ele kilerena lac lir nimra ṯɔɽɔl—kwunani kwir aŋna ya kwiti kwir aŋna mac, ŋiti ŋilŋiicanyji mac, Allah wiri wilŋiiḏizi. 3 nenyjelŋe ŋu ŋenuŋw kwor ŋgwu kwumer dimi la, ner gi ele kezir-na wizaw—kwunani kwir aŋna ya kwiti kwir aŋna mac, ŋiti ŋilŋiicanyji mac, Allah wiri wilŋiiḏizi— 4 nuŋw neŋne ŋiɽaŋali ŋiti ŋeŋgir zi andazi mac, ŋiti ŋeŋgi zi kwizi bonye eḏi ŋi ofi kworɔ tɔk mac. 5 ŋiɽaŋal ŋi ŋeḏi kwor ŋgwu enyi ŋi ellini, lakin ŋiɽaŋal ŋi ŋeḏi rɔgwɽɔ rinyi, enyi ŋi ere ellini mac, illi ŋeḏi ṯajila tinyi. 6 menyi kinna naŋni eḏellini, enyi ere orɔ kwete kwuḏiki mac, kaka inḏinyji gwu eḏi zi andazi ŋir rerem, lakin nyi ŋgwu kwudirna, mindaŋ muŋw ere kwere mac kwenyi alla eḏi ŋi ṯemizi nyuŋwu la beten kaka ŋizaŋw zi ki ŋeḏre-na ŋinyi, na ŋiniŋnaŋw zi nani nyi gwu. 7 na eḏi ṯinyini nyuŋwu eḏi piŋi rɔgwɽɔ beten ŋiɽaŋal ŋi ŋir ŋwunda ŋwunda ŋeḏi ṯurwenizelu, ner nyi inḏeḏa ṯugwiya kaŋna-na winyi, tir kafur keḏi zeyṯaan eḏundeŋni nyuŋwu, eḏi ṯinyini nyuŋwu eḏi piŋi rɔgwɽɔ beten. 8 nyamin-na tɔɽɔl nenyi dadici Kwelenyi lu ŋiɽaŋal ŋi ŋu, eŋgi ṯugwi duŋgweci nyuŋwu; 9 lakin nuŋw eca nyuŋwu ŋwu: ṯimeca tinyi ṯeḏi ŋimɽi ṯimɔŋa ṯa biɽḏi ŋwu, kaka eṯi gwu ŋuma ŋinyi orɔ minmin ki ṯajila-na. ŋwu ṯaŋwu, nyi kwamina beṯen eḏellini ŋiɽaŋal ŋi ŋeḏi ṯajila tinyi, eḏi ma ŋuma ŋeḏi Kwruztu nani duŋgwinyi-na. 10 ṯaŋwu, ki ŋiɽaŋal ŋeḏi Kwruztu ŋundu, nyi kwamina ṯajila ṯi, na ṯiruzine ṯi luŋw tɔk, na ŋiɽaŋal ŋi ŋifirli, na ṯowɽina ṯi yey mindaŋ, na ṯerrina ṯi dar tɔk; kaka menyi gwu eni kwajila ta, enyeni kwufirli.
buuluz muŋw dugwuɽezi ŋiɽaŋal-na ŋeḏi ṯellina ṯuŋwun
11 nyi kwumeni kwuḏiki! emba, ŋaŋa liri limenyi iili eḏi zi andazi, ŋaŋa liri emba keni rerec leŋgi nyi iɽi-na. kaka iti eni nyi gwu kwɔkwɽeny mac eḏi yafur la kyu yiṯemḏelu, menyi kinna ere eni kwɔmne kwere mac. 12 ŋilim ŋeḏi kafur kir rerem ŋimerrini daŋgal-na ṯindinyana ṯi nana tatap ŋilim ŋi eḏi ŋi liŋɽazi lizi, na ŋɔḏɽor ŋi ŋiṯemḏelu. 13 ŋinani ŋere ŋiti ŋimɔ ŋazi errici mac kaka yaniiza yiḏaḏu a? illi ma ŋazi ere ufini ṯofi ṯere mac. iɽinyacar nyji lu ŋu!
14 nyi ŋgwu kwumɔ ṯimayini eḏila nani ŋa gwu kirem, mindaŋ ma nyamin orɔ-na ṯɔɽɔl. ta enyi ere ufini ṯofi ṯere mac, kaka iti naŋnaḏi ŋazi gwu kwɔmne kwalu mac, lakin ŋaŋa liri; kaka iti ofḏanir gwu mac eḏi nyor immeci rernyinŋwuzi kwɔmne, lakin eḏi rernyinŋa immeci nyoru. 15 nyi kwamina beṯe-beṯen eḏi ṯuzi kweḏi rɔgwɽɔ rinyi ndendeṯ ŋiɽaŋal ŋi ŋeḏi rɔgwɽɔ ralu. ma ŋazi amɽi ṯamɽa ṯi ṯuru ta, er nyi amɽi ṯamɽa ṯi ṯɔkwɽeny, a? 16 ŋilŋiiḏina kinna derder eḏaruŋw, ki rɔgwɽɔ rinyi nyi kwende kwumɔŋazi ufini ṯofi ṯere daŋgal-na, ŋaŋa laruŋw, kweḏizi nyuŋwuzi ŋejmeṯi-na, nuŋw illazi nyuŋwuzi ki array yi. 17 nyi kwumɔ ŋazi ani yaḏa kwɔmne kwere lizi limɔ ŋazi uzica? 18 nyi kworaca tiiṯazŋw eḏele nenyi uzi eŋgeriŋw ŋundu gi. tiiṯaz kwumɔ ŋazi yaḏa kwɔmne kwere? ŋiti ŋerrenyji Ṯigɽim ṯi ṯutuput manya? nyiŋa liti liri kwurɔ kwutuput manya?
19 a limari kezni, nyiŋa limɔ roce rɔgwɽɔ reri ki yey-na yalu? ŋandizanyji ŋu eḏi Kwruztu-na ki yey-na yeḏi Allah, ner orɔ dak, limɽi linyi, eḏi duŋgwuŋgwazi ŋaŋwuzi. 20 kaka ṯinya nyi gwu, menyila a ŋazi ere kaṯazi kezir were kaka ŋinaŋnazi ṯugwor tinyi mac, mindaŋ mer nyi ere eḏinḏa tɔk mac kaka ŋinaŋnazi rugwor ralu; kaka ṯinya nyi gwu enyinḏa kezni ŋurreḏa, ke ŋiɽany, ŋerya tɔk, ṯamɽa ṯeḏi rɔgwɽɔ, ṯuŋwun, ṯermiḏeḏa nana, ṯipiŋa rɔgwɽɔ, na ŋitembilna tɔk. 21 nyi ŋgwu kwuṯinya mindaŋ menyila kwokwony, Allah winyi wenyi iini ṯurony ki yey-na yalu, enyi ŋi ronyina ŋeḏi kla luru limezerri ŋiki kerreny, na liti limurla rugwori lu mac ṯuronyina ṯi, eḏi zi efrici ŋir ṯortunana ṯiki, ŋijin tɔk, na yey yurlu tɔk, ŋimerzerri.
Rɔ-ɔya rǝthi Bɔɔlɔs, nǝ ṯǝjlinnǝ ṯuuŋwun.
1 Laazim nyii ǝlllini, niti-vǝ ninḏi ṯǝllnǝ ethi ǝginǝ kwomne kweere tok mac. Lakin kirem tǝ, nyji andasi ŋǝni rɔ-ɔya nǝ i@laan winḏǝthǝ-nyii Kweeleny. 2 Nyii kwilŋithi kwɔɔrɔ kwette ethi Kwɔrɔstɔ-na, kwɔmǝr kwɔdoŋwlɔ kwɔdok, ki-yithlǝlǝ yir wrii kwaɽiŋan yimǝ ṯamthɔ, nǝr-gi dallɔ ki-leere-na lir nimrǝ ṯoɽol, ninyjeere elŋe ŋɔ mac, nǝni-ŋgwɔ kwudiminǝ kwir aŋna alla kwiti kwir aŋna mac, Allah wɔrɔ wilŋithi ŋiɽaŋali ŋɔ. 3 Nyii kwilŋithi ethaarɔŋw, kwɔr-ŋgwa kwɔmǝr kwɔdoŋwlɔ kwɔdok, nǝr ǝnyji ki-fǝrḏɔɔs-na, kimanni-pa kwɔrɔ aŋna alla kwiti kwɔrɔ aŋna mac kimanni, Allah wɔrɔ wilŋithisi, 4 mindaŋ nɔŋw neŋne ŋiɽaŋali ŋiti ŋǝthi ŋɔma ethisi andasi mac, nǝ ŋiti ŋǝŋgisi kwizigwunǝŋ kweere ere ǝthici ŋɔma-na ethisi andasi tok mac. 5 Nǝrṯoroŋw mindaŋ nyii ǝllini ki-lɔɔbi lǝthi kwɔr-ŋgwɔ, laakin nyii-tǝ, nyeere ǝllinici rɔgɽo riinyi mac, illi ŋiɽaŋal-ŋi ŋa ŋǝṯi-nyii ǝjli nyuŋwɔ. 6 Na mǝnyii naŋni ethi ǝllini ki-rogɽo tǝ, nyeere oro kaka nyii kwir kǝɽiyǝŋ mac, kaka ninḏiny-gwɔ ethisi andasi ŋir rerrem. Laakin ninyeere ǝmmini mac ethi ǝllini, mindaŋ mɔŋweere kweere mac kwinḏi-nyii ethi allasila kider fikir-gi kwuuŋwun kwǝthi ŋiɽaŋal ŋa ŋiisa-ŋwsi ŋǝrrǝ-nyji, alla ŋa ŋiniŋna-ŋwsi naaniny-gwɔ.
7 Nǝ kaka niti ninaŋnar nyii-gwɔ ethi piŋi rogɽo mac kwomne-gi ŋgwa kwir ŋwundǝ-ŋwundǝ kwiisa-nyii, ŋwɔṯaŋw nǝrnyii ǝnyjici ṯugwiyǝ kaŋna-na wiinyi ṯir kaavɔr kǝthi Shiiṯaan ethi ippi nyuŋwɔ mindaŋ etheere piŋi rogɽo mac. 8 Nǝnyii aari Kweelenyi kiyiiriny nyaamin-na ṯɔɽɔl ŋiɽaŋal-ŋi ŋɔ, kwuṯucǝny-lɔ ethi allatha nyuŋwɔ kithaay; 9 laakin nɔŋwɔccǝ nyuŋwɔ-ŋw, “Ne@ma kwiinyi kwuuruṯǝŋw naaniŋa-gwɔ, kaka nǝṯi-gwɔ ŋɔma ŋiinyi oro min-min dɔŋgwɔŋa-na mǝ ajli.” Ŋwɔṯaŋw nǝnyii aamina ethi ǝllini ajli-ŋgi kwiinyii mindaŋ mǝnyii ŋɔma ŋǝthi Kwɔrɔstɔ kwuɽubǝthǝlɔ. 10 Nǝ ŋiɽaŋal-ŋi ŋǝthi Kwɔrɔstɔ, nǝnyii aamina ṯajla-thi ṯiinyi ethi indinyanni ṯajla naana, nǝ ṯǝrrǝlɔŋw tok, ṯurvǝ tok, ṯǝwɽǝ yǝylɔ, nǝ ŋa ŋifirlli beṯṯen tok. Ŋwɔṯaŋw mǝnyii ajli cige-cigep tǝ, ǝṯinyǝni kǝniny kwufirlli beṯṯen.
Bɔɔlɔs nipinnicǝ-ŋgwɔ lɔgrɔstiyana ṯɔgwor-na lǝthi Kɔɔrɔnthɔɔs-ŋwɔ.
11 Nyii kwǝni-pǝ nyii kwɔmoro keeɽer! Imba ŋaaŋa lir lɔkwɔrmɔṯasa-nyii mindaŋ ethisi ǝrri ŋɔ. Ŋaaŋa lirpa kǝniny rerrec lǝŋgi-nyii iiɽinǝ. Mǝnyii kinnǝni ere oro ŋiɽaŋal ŋeere mac tǝ, nǝnyii-tǝ ere oro kwokwɔɽony mac ki-yaavɔr-la kiya yaalɔ yɔppa. 12 Ethi-ŋǝsi ŋilim ŋittǝzir ŋir ŋwundǝ-ŋwundǝ ŋǝrrinǝ daŋgal-na ṯindinyanna-thi naana, ethi ilŋithini ŋaaŋwɔsi ethaarɔŋw nyii kwir kaavɔr. 13 Ŋinaana ŋeere ŋǝrricǝ-nyji yǝniisǝ yir ter, mindaŋ nǝŋǝsi ere ǝrrici ŋaaŋwɔsi tok mac-a, illi nǝṯǝ ṯɔɔvi oro ṯǝni ṯimǝccǝ ṯiti ṯuuvunǝ-ŋǝsi mac? Iɽinyacar-nyjalɔ ŋɔ!
14 Taamin tindǝr-ṯǝ kɔrɔ tir nimrǝ ṯoɽol timǝ-ŋǝsi-ri ṯimmayinica ethiila ethi raaŋitha ŋaaŋwɔsi. E-ta nyiiti kwinḏi-ŋǝsi ethi naŋnatha kwomne kweere mac. Ŋaaŋa lir tittir linaŋna-nyji, kaka niti nǝṯi-gwɔ nyɔr immǝci rǝrnyin-ŋwɔsi mac, laakin ǝṯi papa-ŋa oro lǝṯi immǝci nyɔɔrɔ nyeeŋen. 15 Nyii kwaamina beṯ-beṯṯen ethi ṯuusi ŋgwa tatap kwǝthi-nyii, nǝ rogɽo riinyi tok, ethi mǝcci ŋaaŋwɔsi. Nǝ kaka namɽa-ŋǝsi ṯamɽa-thi ṯɔppa tǝ, e-ta ǝrnyii-thi amɽi ŋaaŋa ṯokwɔɽoc-a? 16 Laakin ŋinḏi-ŋǝsi ethisi ǝmmini rac ethaarɔŋw, nyii kwiti kwuuvunǝ-ŋǝsi ṯɔɔvi ṯeere mac. Ya a kwette aarɔŋw, nyii kwɔgitta araaya, mindaŋ nǝŋǝsi iidǝzi ŋǝluŋw-ŋi domony. 17 E-ta nyii kwɔmǝ-ŋǝsi aagitha kwomne kweere ki-rii-na rǝthi kila lɔɔsa-nyji-a? 18 Nyii kwutuurǝccǝ Ṯiiṯus-ŋwɔlɔ ethiila naaniŋa-gwɔ, e-ta nǝnyji ṯiŋatha ŋunduŋwsi ǝŋgǝri-ŋgi kwette kwǝri. E-ta Ṯiiṯus kwɔmǝ-ŋǝsi aagitha kwomne kweere-a? Ŋundu tok nǝ nyii tok, ŋiti ŋǝṯinǝsi ǝrri ṯigɽim-thi ṯɔtɔpɔt mac-a? Nyiiŋǝ liti lǝṯi-ṯǝ rɔɔmi ṯaay-lɔ ṯǝ kitha ṯette ṯette mac-a?
19 Kimanni-pa ŋaaŋa lǝṯi aari fǝkirǝ lǝlu-ttuk ethaarɔŋw, nyiiŋǝ lǝri ṯǝccici ethi rocce rogɽo rǝri kiyǝnǝ yaalɔ. Bǝri-mǝ! Ŋǝṯi-nyji-ṯǝ andasi kaka ŋa ŋinaŋnathi-nyji Kwɔrɔstɔ ethisi andasi kiyǝnǝ yǝthi Allah, nǝ ŋa tatap ŋǝṯinǝsi ǝrri limɽi liinyi lamɽa-nyji, ǝṯinǝsi ǝrri ethi dɔŋgwɔ-ŋgwazi ŋaaŋwɔsi. 20 Nyii-ŋgwɔ kwɔthiinya ethi ɔppatha kinaŋw, mindaŋ etheere kaṯṯasi ŋaaŋwɔsi mac lir kaka linaŋna-nyji, nǝ ŋaaŋa tok etheere kaṯṯasi nyuŋwɔ tok mac, kwir-ga kwɔnaŋna-ŋa. Nyii ŋgwɔ kwɔthiinya ethiila ethi kaṯṯasi, ŋurrǝthǝ, kee ŋiɽany, ṯuurǝzǝ ṯɔgwori, ṯamɽa rogɽo, yɔvɔɔla, ǝrmithǝthǝnǝ, ṯɔŋwɔn, ṯippiŋǝ rogɽo, nǝ tǝmbǝlni-nǝ. 21 Nyii ŋgwɔ kwɔthiinya kǝzir weere ethaaɽa mindaŋ ethi Allah wiinyi ǝjlinni nyuŋwɔ ki-rogɽo kiyǝnǝ yaalɔ, mindaŋ nyji aaratha littǝzir kila lǝrrǝ ŋikiyaŋi kerreny tuk liti limǝ urlǝ rɔgwor-lɔ kinnǝni mac, ki-fǝthiyǝ-nǝ ŋgwa, nǝ ki-ŋiijin-nǝ ŋǝrṯǝmbǝl-ŋi tok.