aza 3
lijowiṯ ledi kaniiza
1 ŋiɽaŋal ŋiri rerem, ma kwere orɔ zurum eḏi naŋni ŋɔḏɽor ŋeḏi kwijowiṯ kweḏi kaniiza, eṯuŋw naŋni ŋɔḏɽor ŋizaw. 2 eḏi kwijowiṯ eni kwofḏana, kweḏi kwayu kwutuput, kweṯi zi icicaci ŋama-ŋamaŋ ŋeḏi kaniiza, kwiḏi ṯugwori kwɔmne-na tatap, kweṯeḏi ŋiɽaŋali ŋizaw ŋeḏi yeyna, kweṯamɽi lirina, kweḏi ŋuma eḏizilŋiiḏini lir ter; 3 kwiti kweṯamɽi kiɽcaŋi mac, kwiti kweṯipii kwere mac, kwir kwiɽena, kwiti kweṯi məmilḏi mac, na kwiti kweṯi miidaḏa kwuruuza tɔk mac. 4 lazim eḏuŋw eni kweṯi daɽmaḏa duənuŋw kwuŋwun ŋamaŋ, na kweṯi nyor nyuŋwun inyizi nana, na eḏi iɽi ŋunduŋwu-na tɔk; 5 kaka muŋw ere edi ŋuma eḏi daɽmaḏa duənuŋw kwuŋwun mac ta, ŋwu ma aŋraci kaniiza keḏi Allah aŋgwuru? 6 eḏuŋw ere orɔ kwruztyan kwiaŋ mac, mindaŋ muŋw piŋi rɔgwɽɔ, ŋwu iideḏa ki hukm-na weḏi zeyṯaan. 7 eḏuŋw orɔ tɔk kwete kwofḏana ki yey-na yeḏi kla par ŋgi la, mindaŋ mer ere uŋwuni mac eḏi iidezi ŋunduŋwu kiɽbin-na keḏi zeyṯaan.
8 kaka taŋwu, lazim eḏi lor lir lizamaamaz eni lofḏana, liti lir riŋla riɽen mac, liti leṯi naŋni kiɽcaŋi mac, na liti leṯi miidaḏa kwuruuza tɔk mac. 9 lazim er miḏa ṯəmna ṯir ŋejmeṯ ŋupa ṯugwor ṯi ṯuzuɽu-na. 10 eḏir zi ṯeci kla kerreny tɔk, mindaŋ edi ma miḏa ŋɔḏɽor ŋeḏi lizamaamaz lofḏana, liira loma-na lere mac. 11 kaka ṯaŋwu tɔk, eḏi law leŋen eni lofḏana, liti leṯi uŋwuni lizi mac, leṯeni liḏi rugwori, lirlalu kwɔmne-na tatap. 12 eḏi lizamaamaz tatap eḏi layu lere lere, leṯi daɽmaḏa nyoru nyeŋen, na duənuŋw kweŋen tatap kwizaw. 13 na mer aki ŋɔḏɽor ŋeŋen ŋizaw lir lizamaamaz, ezi liḏaḏu ruzi lofḏana, er bonye ṯəmna ṯi ṯupa eḏi Kwruztu-na kweni Yecu.
14 nyi kwaki kizen eḏila nani ŋa gwu fitak, lakin na ŋazi luca ŋu mindaŋ, 15 menyi kinna ɽindaŋnalu ləlu tuk, ezi ta elŋe rac ŋeŋgi zi erri ki duənu kweḏi Allah, kwir kaniiza keḏi Allah wumiiḏu, kir riɽḏin reṯi miḏeḏa ŋirlalu la. 16 ŋiɽaŋal ŋiri ŋejmet ŋupa ŋiminni ŋeḏi ḏiin ṯeri ṯeḏi Allah, kaka ŋuluḏina, ŋaruŋw:
na ŋundu, nuŋw ruwenizelu kwir aŋna,
ner inḏa kwofḏana eḏi Ṯigɽim-na,
kwumɔ limaleyka eze,
na ŋeni ŋuŋun ner zi andazi ki ŋeleny-na tatap,
ner zi emni ṯurmun-na nana,
kwumer allazi ki ŋiniṯ la.
Rɔ-asa kǝniisǝ-nǝ.
1 Ŋiɽaŋal ŋɔ ŋir rerrem ethaarɔŋw: mǝ kweere naŋni ethoro rǝ-iis rǝthi kǝniisǝ tǝ, nɔŋwɔni kwɔnaŋna ŋothɽor ŋisaaw. 2 Ŋwɔṯaŋw a rǝ-iis rǝthi kǝniisǝ ere ǝthi lɔɔma-na leere mac; laazim ŋwɔthi kwayɔ kwɔtɔpɔt, ŋwɔni kwaŋrinna naana, kwǝṯi mithǝ ṯɔgwori, kwǝṯi iiɽi rogɽo-na ruuŋwun, kwǝṯi aalanni Iiirinǝ, kwǝthi ŋɔma ethi aari @allima, 3 kwiti kwǝṯi urlǝli mac, kwiti kwǝṯi pithii mac, wala ethi urrurǝthi lizi-li, kwiti kwǝṯi ǝmɽi gwuruushǝ mac, 4 kwǝthi ŋɔma ethaami iili dɔɔnɔŋw kwuuŋwun ŋwɔ, kwǝthi nyɔɔrɔ nyǝṯi iinyici ŋunduŋw naana ṯiiɽǝthi-nǝ tatap. 5 Kaka mǝ kwizi ere aami iili dɔɔnɔŋw kwuuŋwun ŋǝmmǝŋ mac, e-ta ŋwɔmǝ ǝŋraci kǝniisǝ kǝthi Allah aŋgwɔrɔ? 6 Laazim ŋweere oro kwɔgrɔstiyan kwiyaŋ mac, mindaŋ etheere piŋi rogɽo mac, mindaŋ ŋweere iidǝthǝ ki-hɔkwɔm-na weere wǝthi Shiiṯaan mac. 7 Nǝ ŋɔ tok, laazim ŋwɔ kaṯṯasi ṯiiɽǝnǝ ki-lizi liti lir lǝthi kǝniisǝ mac, mindaŋ mɔŋweere ǝthi lɔɔma-na leere mac, wala ethi Shiiṯaan iidǝzi kiɽibin-gi kuuŋun.
Shamamsa.
8 Ŋwɔṯaŋw nǝr ɔvthanni, laazim ethi shamamsa oro lizi lɔvthanna, lirllalɔ liti lǝthi riŋla-na riɽǝ-riɽǝn mac, liti lǝṯi kiyaci kiɽicaŋi mac, liti lǝṯi kiiri mac ethi ǝgikini gwuruushǝ. 9 Laazim ǝri aŋraci ŋejmethi ŋǝthi ṯǝmminǝ rogɽo-ri rɔsɔɔɽɔ. 10 Nǝr ɔvthanni ethisi ṯǝcci ker-kerreny; mǝrsi kaṯṯasi lɔvthanna tǝ, ǝri-mǝ akkɔ ŋothɽor. 11 Nǝ ŋwɔṯaŋw tok, a laaw leeŋen ǝni lirllalɔ, liti lir ṯɔŋwɔn mac, lithii rɔgwori, lirllalɔ kwomne-na tatap. 12 Ethi shamamsa aagwɔ kwayɔ kwɔtɔpɔt dak, nǝ ŋwɔthi ŋɔma ethaami iili nyɔɔrɔ nyuuŋwun-ŋwɔ lizi-li-nǝ lǝthi dɔɔna tok. 13 Shamamsa ŋgwa kwǝṯaami akkɔ ŋothɽor-ŋw ŋeeŋen, ǝṯir ǝgini ṯɔvthanna naanɔ-gwɔ lithaathɔ, mindaŋ mǝrǝthi ŋɔma ethi andasi ŋuugul-ŋi ŋiɽaŋali ŋǝthi ṯǝmminǝ ṯeeŋen ethi Kwɔrɔstɔ-na kwǝni Yǝcu.
Ŋejmeth ŋɔppa.
14 Nyii ŋgwa kwɔgittathɔ ethiila naani-ŋa-gwɔ fittak. 15 Laakin nyii ŋgwɔ kwɔlɔcca-ŋa juwaaba-ŋgwɔ, mindaŋ mǝnyii ŋindaŋnalɔ kǝzir weere tǝ, ǝsi elŋe ethisi aami ǝrriŋw ki-dɔɔnɔ kwǝthi Allah, ŋgwa kwir kǝniisǝ kǝthi Allah wumiithɔ, kir ṯiɽithin ṯǝṯi mithǝthǝ ŋiɽaŋali-la ŋir rerrem. 16 Kwiti kweere mac kwǝthi ŋɔma ethi ǝvrinni ŋejmethi ŋɔppa ŋǝthi ḏiin ṯǝri:
Kaka nani-ŋgwa kwurwǝnnǝlɔ aŋna-yi wǝthi ŋizigwunǝŋ,
nǝ Ṯigɽim andasi ŋiɽaŋali ŋǝthi ŋirllalɔ ŋuuŋun, nǝ
limeleka ese.
Nǝr-gaari bǝshirǝ ki Umam-na tatap, nǝ ṯurmun tatap
ǝmminici, mindaŋ nɔŋw dimmǝnni ki-leere.