aza 1
ṯagna na ṯireca ṯeḏi ŋiɽaŋal ŋeṯir zi ilŋiiḏini ŋir ŋəluŋ
1 nyi kweni buuluz, kwir kafur keḏi Kwruztu kweni Yecu amr yi weḏi Allah wir Kwigileḏa kweri, na weḏi Kwruztu kweni Yecu, kwir ṯəkiza kizen ṯeri, 2 nyi kwagne ŋaŋwu, ŋa kweni timuṯaawuz, kwumorɔ rerem tor tinyi ki ṯəmna-na.
eḏi ṯimeca ṯeḏi ŋimɽi nani ŋa gwu, na ŋimɽi tɔk ŋiɽena ŋi ŋinḏi nani gwu Allah wir Papa, na Kwruztu kweni Yecu, kwir Kweleny kweri.
3 kaka oraca ŋa gwu, inḏi nyi gwu kezir weni makḏunya ta, nani kezir weni afazuz eḏizi inḏeḏa lɔkwɔ amra, er zi ere ilŋiiḏini ṯaliima ṯir ter mac, 4 na er zi duŋgweci ŋir ŋiŋerɔŋw lu, na ŋeḏi kla linani kerreny tuk, na ŋeḏi ŋelŋe ŋeŋen mindaŋ, eḏi zi məmilḏi, ŋeṯir zi miɽina ŋitezir, ŋiti ŋeṯi firli lizi mac ki təmna-na ṯeḏi Allah. 5 na ŋiɽaŋal ŋupa ŋeḏi amr wu ŋir ṯamɽa teṯi ruḏa ki ṯugwor-na ṯizuɽu-na ṯəmna ṯi, ṯiira ŋidiny-na. 6 na lɔkwɔ ner aki ṯay kḏu pir, ner ṯuḏi kenjer gi domony, 7 naŋnar gwu eḏorɔ limuallim leḏi kuruu, lakin ner zi ere elŋece rerec mac ŋandizarzi, ya kwɔmne tɔk mac kweṯir gi aruŋw, kwilŋiiṯi nyi-na.
8 a kwilŋiiḏiri eḏari, kuruu kiri kizawi ma gi kwere elŋe ŋɔḏɽor ŋuŋun, 9 lakin, ŋilŋiicarzi rac eḏaruŋw, kuruu kiti kikitizarzi lofḏana mac, lakin ner zi ketice liti lofḏana mac, lir ludurlaḏu, liti liṯinya Allah mac, leni liki rugwori, leṯi zi erre luŋw, leṯendinye rerinyin ŋwuzi lenyin ŋali, leṯi kekite ḏimya, 10 leṯuri yey lu, leṯi inḏireḏizina lir lor, leṯi nyimi lizi eḏi li əgini kwuruuza, lir ləluŋ, leṯorɔ lizuhuuḏ lir ŋidiny, na kwɔmne tatap kwuḏaḏu kweṯi kii ŋiɽaŋali-na ŋeḏi ṯaliim. 11 ṯaliim kḏu ṯiri ŋiɽaŋal ŋandizazi ŋeḏi ŋiniṯ ŋeḏi Allah, weṯortani, ŋimɔŋw zi kete ki rii-na rinyi.
buuluz kweṯeca Allah zukran kweḏi ŋimɽi ŋuŋun
12 nyi kweca Kwruztuŋw kweni Yecu zukran, kwir Kweleny kweri kwumenyi inḏeḏa ŋuma eḏi ŋi aki ŋɔḏɽor ŋu, emnaŋw gwu nyuŋwu eḏorɔ kafur kuŋwun, 13 ur nyi gwu keni kwete kweṯerri ŋunduŋwu luŋw, kweṯowɽi ŋunduŋwu yey, lakin nuŋw ruweci nyuŋwu ŋimɽya lu ŋuŋun, kaka ṯimḏinyi gwu, iti ilŋiicanyji gwu ŋere kinna mac ŋeḏi ṯəmna. 14 na ṯimeca ṯeḏi ŋimɽi ŋeḏi Kweleny kweri ṯamḏalu purpur ŋeni nyi, ṯəmna ṯi-na, ṯamɽa ṯi ṯeṯinani eḏi Kwruztu-na kweni Yecu. 15 ŋiɽaŋal ŋu ŋiri rerem na er zi miḏa ṯəmna ṯi ṯir minmin, ŋaruŋw, Kwruztu kweni Yecu kwoɽu ki ṯurmun-na eḏi zi kileḏi leni liki rugwori, nenyi pa, nenyorɔ kwiki beṯen eḏi liḏaḏu la; 16 lakin, ur nyi gwu kwiki beṯen eḏi liḏaḏu la leni liki ta, nenyi afi ŋimɽya nani gwu Allah, mindaŋ na Yecu Kwruztu eḏi ŋuma eḏi zi ŋi ruweci lu ṯindinyana nana ṯuŋwun ṯir minmin duŋgwinyi-na, eḏi zi ṯi baŋaci kla leṯalliḏa ŋunduŋwu rugwori nana, eḏafi ŋimiiḏa ŋiaŋ, ŋinḏi eḏi nanniḏa dɔk. 17 eḏi ṯiniiya-na ŋiniṯ ŋi orɔ ŋeḏi Melik kweṯinanniḏa kwumiiḏu dɔk dɔk, kwiti kweṯijini mac, kwir Allah wutuput, dɔk dɔk dɔk. emba.
18 nyi kwumɔ ŋa inḏeḏa ŋɔḏɽor ŋu, tor tinyi teni timuṯaawuz, kaka ilŋiiḏinyji gwu ŋeḏi ṯugwor ṯɔŋwa ŋiɽya ŋi. ŋwu ṯa, a eḏi ŋuma eḏi ŋi ṯugwuḏi ṯiṯugwuḏa tizaw, 19 kaka eḏi ŋa gwu ṯəmna na ṯugwori tizaw, ner nani lɔkwɔ leṯi derne ṯireca ṯeḏi rugwor, mindaŋ ma ṯəmna ṯeŋen ke tɔk, 20 na deŋgen-na liri lor nden, kwete kweni himinaayiz na kwuḏaḏu kweni izkanḏar, limenyji ṯiŋaci zeyṯaanŋw lu mindaŋ eḏi zi ilŋiiḏini eḏere ellineḏa Allah nana mac.
Ṯaaginna-ŋǝ ṯɔrtatha-thi.
1 Nyii kwɔrɔ kwǝni Bɔɔlɔs, kwir kaavɔr kǝthi Kwɔrɔstɔ kwǝni Yǝcu, waamir-yi wǝthi Allah wir Kwiglǝthǝ kwǝri, nǝ wǝthi Kwɔrɔstɔ kwǝni Yǝcu kwir ṯǝkkizǝ kizǝn ṯǝri.
2 Nyii kwɔlɔcca-ŋa ŋaaŋwɔ kwǝni Ṯiimɔɔthaaws, kwir tɔr tiinyi rerrem ki-ṯǝmminǝ-nǝ:
Ǝthi-ŋǝ Allah wir Papa nǝ Kwɔrɔstɔ kwǝni Yǝcu kwir Kweeleny kwǝri inḏǝthǝ ŋaaŋwɔ ne@ma-ŋwɔsi ŋimɽi-ŋi nǝ ŋiiɽǝnnǝ tok.
3 Nyii kwɔɔracca-ŋa kinaŋw ninḏinyii etheele Makḏuuniiyyǝ, ethi naani ŋa Afasuus, mindaŋ ethi ṯiinyini lizi kila lǝṯaari @allima ṯa@liima ṯir ŋǝluŋw. 4 Andicasi ethisi duŋgwǝci ŋa ŋir ŋiŋeeroŋw-lɔ domony, nǝ ŋǝṯirsi mimiɽi-na ŋǝthi lugwurnǝ lǝthi kerreny-ŋwɔ tuk, ŋǝṯi aava ɔppathi-ŋwlɔ domony, nǝ aṯireere ǝrrici Allah karatha keere kuuŋun mac ŋa ŋilŋithina ṯǝmminǝ-thi. 5 Nǝ karath kǝthi waamir wɔ oro ṯamɽa kitha ṯǝṯi ruuthǝ ki-rɔgwor-na rɔsɔɔɽɔ cɔr-cɔɽic, nǝ rɔgwor-ri risaaw, nǝ ṯǝmminǝ ṯir rerrem. 6 Lizi lokwo lǝni limǝ ɔrlacci ŋiɽaŋali ŋɔ ŋwɔdoŋw, mindaŋ nǝr ṯuusi ṯaay ṯeeŋen ŋiɽaŋal-ŋi ŋɔ ŋǝthi ɔppathalɔ kwir ŋǝɽiyǝŋ domony. 7 Nǝr naŋni ethoro mɔ@allimiin kwǝthi Sherii@a kwǝthi Allah, laakin ǝṯirseere elŋe ŋaṯa-ŋa ŋette-ŋette ŋǝṯirsi andasi mac, wala ethelŋe kwomne ŋgwa kwǝṯir-gi aarɔŋw kwilŋiṯṯiny-nǝ.
8 A kwilŋithir-pǝ rac ethaarɔŋw Sherii@a kwisaawi mǝgi kweere aami akki ŋothɽor-ŋw. 9 Laakin ilŋithirsi ŋɔ ethaarɔŋw, Sherii@a kwiti kwɔgitticar lizi lɔvthanna mac, laakin nǝr kettice kila ligii, lir lɔdɔrllathɔ kila liti lǝṯi ṯeenye Allah mac, ligii rɔgwori, nǝ kila liti lǝṯi iiɽi Allah-na mac, wala kwomne kweere kwirllinǝlɔ, kila lǝṯi endinye rǝrnyin-ŋwɔsi lǝnyin-ŋǝli, kila lǝṯi kegitte dimmiya, 10 nǝ nɔŋworo kwǝthi kila lir liijin, lǝṯi inḏinḏiri lɔɔrɔ, kila lǝṯi nyiimi lizi ethisi illilla, lǝluŋw, nǝ kila lǝṯi kette shahaaḏa kwir ŋǝluŋw, nǝ kweere nyithak kwir ḏiḏ ṯa@liim ṯir rerrem. 11 Nǝ ṯa@liim kitha naani ki Inyjiil-nǝ ṯǝccicǝr-nyii wǝkilǝ ethi ruwǝzǝlɔ, ṯir ŋiɽaŋal ŋisaaw ŋinḏi naani-gwɔ Allah Wɔrtanna wir Kwinith.
Bɔɔlɔs nǝccǝ-ŋgwɔ Allah shukran kwǝthi ŋimɽi ŋuugun.
12 Nyii kwǝccǝ Kwɔrɔstɔ-ŋw shukran kwǝni Yǝcu kwir Kweeleny kwǝri kwinḏǝthǝ-nyii ŋɔma ŋǝthi ŋothɽor ŋiinyi. Na nǝmminǝ-ŋgwɔ tok ethi ruusi nyuŋwɔ kwirllalɔ kwǝthi ŋothɽor ŋuuŋun, 13 nǝṯiny-vǝ kinnǝni andindasa ŋiɽaŋali naana ŋigii kerreny tok, nǝ nǝṯiny-gwɔ ǝwɽi yǝy-lɔ, nǝ nǝṯiny-gwɔ ollollo ŋunduŋw; laakin nǝnyii Allah ǝthici ŋimɽiyǝ-nǝ, kaka niti nǝthi-nyii ṯǝmminǝ kinaŋw kinnǝni mac, ŋwɔṯaŋw nǝnyji-mǝ ere elŋe ŋa mac ŋǝṯi-nyji ǝrri. 14 Ŋwɔṯaŋw nǝnyii Kweeleny kwǝri balsa ne@ma naana kwuuŋwun kwuuru, mindaŋ nɔŋw inḏǝthǝ nyuŋw ṯǝmminǝ-ŋwɔsi ṯamɽa-thi ŋiɽaŋal-ŋi ŋǝthi ṯɔɽɔmaṯṯa ethi Kwɔrɔstɔ-na kwǝni Yǝcu. 15 Ŋiɽaŋal ŋɔ ŋir rerrem ethisi ǝmmini min-min ŋǝniŋw: Kwɔrɔstɔ kwǝni Yǝcu kwɔmǝ iila ki-ṯurmun-nǝ ethisi kilǝthi ligii. Nǝ ninyoro nyii rerrec kwigiyathalɔ beṯṯen ethi deŋgen-la atap; 16 laakin nǝnyii Allah ǝthici ŋimɽiyǝ-nǝ, mindaŋ ethi Yǝcu Kwɔrɔstɔ ǝthi ŋɔma ethi baaŋaci nyuŋw ṯindinyanna naana ṯir min-min ṯuuŋwun duŋgwiny-ŋgi, kwɔthǝmthisi-lǝ tatap ŋikiya-ŋi. Mindaŋ ethoro mǝthǝl kwǝthi kila tatap linḏi ethi ǝmminici ŋunduŋw, mindaŋ ethaaavi ŋimiitha ŋiyaŋ ŋǝṯi nannatha dok-dok. 17 Ethi ṯiniyǝnǝ-ŋǝ ŋinith-ŋi oro ŋǝthi Mǝlik kwǝṯi nannatha lur, kwǝṯi miithatha dok-dok, kwiti kwǝṯiijini mac, kwir Allah wɔtɔpɔt, ethi nannatha dok-dok. Amiin.
18 Ṯlimɔɔthaaws tɔr ṯiinyi, nyii kwɔŋa ǝccici ŋothɽor ŋɔ wǝkilǝ naaniŋa-gwɔ, ŋa ŋandinna ŋǝni ŋɔɔŋa ŋiɽiiya-ŋi ker-kerreny, ŋwɔṯaŋw ǝsi aavi mindaŋ ǝŋi ṯɔgthi ṯɔthɔgtha-thi ṯisaaw, 19 a duŋgwǝci ṯǝmminǝ ṯɔɔŋwa nǝ ṯɔgwor ṯɔɔŋwa ethi naani ṯisaaw. Nǝ lizi lokwo ere kettice ŋiɽaŋali yǝni ŋǝthi rɔgwor reeŋen mac, mindaŋ nǝr kii ṯǝmminǝ ṯeeŋen. 20 Nǝ deŋgen-na nǝ Hiimiinaayus oro ŋundu-ŋǝ Iskanḏǝr-gi, kila limǝ-nyji ṯiŋacci Shiiṯaana-lɔ, mindaŋ mǝraari @allima etheere andisasa Allah ŋiɽaŋali naana ŋigii mac.