aza 4
eḏala ŋikyaŋi rii
1 ŋwu ṯaŋwu, kaka rerinicenyji gwu Kwruztu aŋna yi, ner ofḏani eḏi kete rɔgwɽɔ lu ralu cugwɔ-cugwɔp eḏi rari, kaka kwere kwumɔ ṯa rerini aŋna yi, nuŋw orɔ kwumezi ala rii ŋeni ŋiki, 2 mindaŋ ŋwamin tatap ŋweḏi yiḏla yuŋwun yinḏuŋw yi eḏi nanni aŋna yi, ŋwu nanniḏa ṯugwor ṯi ṯeḏi Allah, iti nanuŋw gwu zurum gi kweḏi ŋizigwunaŋ kwokwony mac. 3 eḏi ŋwomur ŋwumɔṯamḏu uri ṯaŋwu, ŋwumezi ŋi erri kaka ŋeṯizi lizi lirlu domony amina eḏi zi erri. kinaŋw, a leṯi dirnaṯi ki ŋiɽaŋal-na ŋiki, kaduwa gi keḏi aŋna, na ṯurlela, na ṯaḏifiny-na tɔk, na ki ṯoɽmata-na kuɽuguna tɔk, ki zibr-na kwiki mindaŋ, ki ṯikwocalu-na ṯeḏi libayil. 4 kla liliŋɽu kaka ma gwu derne kirem eḏi li oɽmaṯi ki lufa-na leŋen, na ŋinderṯa ŋu ŋeṯir ŋazi ŋi ermiḏeḏa nana. 5 lakin lirli eḏi zi ireci ŋeŋen rac ki yey-na yeḏi ŋgwa kwunanalu cugwɔ-cugwɔp eḏi zi ketize limiiḏu zeyria, layyu tɔk. 6 ŋiɽaŋal ŋizaw ŋir injiil ŋɔḏɔ ŋandicarzi kla layyu? ŋinderta ŋu, mindaŋ mer zi ṯa kinna hakwumi lir yaŋna kaka eṯir gwu hakwumi lizigwunaŋ tatap, eŋgir miiḏi lir rigɽim ŋimiiḏa ŋi ŋeḏi Allah.
7 kwɔmne tatap kwumadiḏi eḏi irmiḏiḏi, ŋwu taŋwu, eṯaŋranni ŋama-ŋamaŋ; eti nani cugwɔ-cugwɔp eḏari ki yiriny. 8 na ŋiṯemḏizi la tatap, ner orɔ eḏamɽaḏizina beṯe-beten ki rugwor-na, kaka eti gwu ṯamɽa kwuɽbeḏa ŋikyaŋi lu ŋiṯezir. 9 etornutaḏizi-na wuɽe-wuɽeny ki duənu-na kwalu eḏi kitaḏizi ŋirina, liti leḏi tiŋaŋleḏa tere mac. 10 kaka afar gwu tatap haḏiya lere lere eti yi meciḏizi-na, kaka liwakiil lizaw leḏi ṯimeca ṯeḏi ŋimɽi ŋeḏi Allah, ṯir-na ter ter. 11 ma orɔ kwete kweṯandaci liḏaḏu ŋiɽaŋali, eṯizandaci ŋinḏeḏa zi Allah eḏizandaci; ma orɔ kwete kweṯi zi meci liḏaḏu, eṯi zi meci ŋuma ŋi ŋeṯi zi Allah inḏeḏa, mindaŋ a kwɔmne-na ndendeṯ, eṯi zi ṯa erri eḏi ŋi nii Allah-na, Yecu ŋgi kweni Kwruztu, eṯi ṯortaḏa-ŋa ŋuma ŋi ŋeḏi ŋeleny orɔ ŋuŋun dɔk dɔk. emba.
eḏi nyeŋlena ṯirerina ṯi ŋiɽaŋal ŋi ŋedi Kwruztu
12 limɽi linyi, eṯere liŋɽi mac ṯirerina ṯi tir kaka igə ṯeṯi ŋazi ilica eḏi ṯeci ŋaŋwuzi, mindaŋ eḏalla lu keḏber. 13 lakin eṯi nyeŋlena eḏi fa ta oɽmaṯi Kwruztu ŋali ṯirerina ṯi ṯuŋwun, mindaŋ ma ŋiniṯ ŋuŋun ruwene lu, a ureni-na dedep ṯinyiŋla ṯi-na. 14 ma ŋazi lizi ermiḏeḏa nana ŋiɽaŋal ŋi ŋiki ŋiki kaka eḏi ŋa gwu yiriny yeḏi Kwruztu, a leni lortani, kaka ma ŋazi gwu Ṯigɽim ṯeḏi ŋiniṯ, tir Ṯigɽim ṯeḏi Allah, omi daŋgal-na. 15 lakin, eḏuŋw ere rerini kwere mac daŋgal-na ŋiɽaŋal ŋi ŋeḏi ḏimi, ya ŋoɽam, ya ŋere ŋir ḏor, ya ŋireḏiza; 16 lakin muŋw rerini kwere ŋiɽaŋal ŋi ŋuruŋw ŋi kwruztyan, eti ṯurony miḏi mac, eḏuŋw nii Allah-na porpor yiriny yi kyu.
17 lomur limila leḏi li hukm eḏenḏa, nuŋw zi naŋni eḏi zi hakwumi kla leḏi duənu kweḏi Allah kerreny, na muŋw ṯa nani kerreny deŋgeri-na, aḏa kwinḏi eḏerrinici lizi kwaḏan gi, kla liti linyica ŋiɽaŋali ŋizaw nana mac ŋir injiil weḏi Allah? 18 na luḏinar gwu ŋwu:
ma ŋgwa kweni kwofḏana kileḏini kazip gi-na,
na aḏa kwinḏi eḏorɔ kweḏi ŋgwa kweṯiderne eḏinyizi Allah nana,
na ŋgwa kweṯizerri ŋiki?
19 ŋwu ṯaŋwu, kla leṯi rerini ŋiɽaŋal ŋi ŋeṯirzerri ṯugwor ṯi ṯeḏi Allah, eḏir zi errizeza ŋizaw, na eḏir alliḏa Allah rɔgwɽɔ nana reŋen, enuŋw gwu wirlalu, wukita kwɔmne ndendeṯ.
Ethi nanni ŋethre ŋisaaw.
1 Kaka nirǝrinǝ-gwɔ Kwɔrɔstɔ aŋna-yi, laazim ŋaaŋa tok a ferlle ki-rogɽɔ-na raalɔ tok kaka-ṯǝ ṯaay kiṯhǝ ṯaarɔŋw-thi fǝkirǝ; kaka mǝ kmeere rǝrinni aŋna-yi, ǝṯɔŋweere ǝthici ŋikiyaŋi karatha keere kwokwony mac. 2 Ŋwɔṯaŋw, min kirǝ-kirǝm ŋgwɔ mindaŋ ŋa ŋinḏi ǝthiila, laazim a nanni ŋimiitha-ŋi ŋaalɔ, ŋiɽaŋal-ŋi ŋǝthi ṯɔgwor ṯǝthi Allah ǝthi-gwɔ kette rii-la ruuŋwun, laakin etheere mithinni sɔɔrɔm-gi kwǝthi ŋizigwuŋǝŋ mac. 3 Ŋwɔɔmɔr ŋwɔmǝ-ṯǝ uruŋw ŋwa ŋwɔthi kǝrrǝny-ŋwɔ ŋwɔrrǝ-ŋǝsi-ŋi ŋa ŋǝṯisi Umam ǝrri-ri, nǝ ŋimiitha ŋaalɔ nanni ki-ŋisǝrmuth-nǝ, kadɔwa-na, ki-ṯurlǝlǝ-nǝ, ki-ṯathvinyna-na, nǝ ŋǝrṯǝmbǝl, ki-lɔdɔŋw-na lǝthi kiɽica, nǝ ṯɔgwɔccalɔ ṯigii ṯǝthi libaayil. 4 Nǝ kirem tǝ, nǝ Umam liŋɽi kaka niti mǝgwɔ ɔɽɔmaṯṯi ŋundu-ŋǝli mac, ki-ŋimiitha-na ŋa ŋette-ŋette ŋigii-na ṯiga-ṯiga, nǝ nǝrṯoro ŋɔ ŋǝṯir-ŋǝsi-ŋi ollollo. 5 Laakin linḏi ethi rilli wɔɽǝ-wɔɽǝny kiyǝnǝ yǝthi Allah, wǝṯi naanalɔ cɔgwo-cɔgwoo ethisi accǝ haakima limiithɔ nǝ laayɔ tok. 6 Ŋindǝr-ṯǝ ŋɔ mindaŋ nǝrǝccǝ lizi kila laayɔ bǝshirǝ Inyjiil-yi, ki-lizi kila lǝccǝrsi haakima lir yaŋna kaka lithaathɔ tatap; lǝccǝrsi bǝshirǝ Inyjiilǝ mindaŋ mǝr nanni rigɽim-ri ethaaɽanni Allah ŋimiitha-ŋi.
Ǝthi ǝmmini ǝthi mǝccǝthisi-nǝ wɔɽe-wɔɽeny.
7 Kwomne tatap kwɔmaadithi ethi ernene. Ŋwɔṯaŋw laazim ǝṯi mithǝ rɔgwori, laŋrinna naana, ethǝthi ŋɔma ethaari kiyiiriny. 8 Nǝ ŋithǝmthisi-lǝ ŋɔ tatap, nǝroro ethi amɽathisi-na beṯ-beṯṯen, kaka nǝṯi-gwɔ ṯamɽa kwuɽubǝthǝ ŋikiyaŋ-lɔ ŋuuru. 9 Ǝṯi aalinathisi-na ki-dɔɔnɔ-na kwaalɔ, liti lidii rɔgwor-na mac. 10 Kaka nɔrŋa-gwɔ liwǝkiil lisaaw lǝthi haḏaaya wǝthi Allah wirna ter-ter, nǝ laazim ŋwɔ-yi ǝkkici lithaathɔ ŋothɽor. 11 Mǝ kweere aari bǝshirǝ-tǝ, laazim ŋwaari bǝshirǝ ŋiɽaŋal-ŋi ŋǝthi Allah. Mɔŋw akkɔ kweere ŋothɽor tǝ, ŋwɔsi akkɔ ŋɔma-ŋi ŋa tatap ŋinḏǝthǝsi Allah, mindaŋ mǝ Allah biɽǝnni yiriny ŋiɽaŋal-ŋi ŋǝthi kwomne-ŋgwa tatap, Yǝcu Kwɔrɔstɔ-ŋgi. Ethi ŋinith ŋuuŋun nǝ ŋɔma tok nannatha dok-dok. Amiin.
Ṯinyiŋlana ki-ṯurvǝ-nǝ.
12 Limǝthgǝri liinyi lamɽa-nyji, ǝṯeere liŋɽi mac mǝŋǝsi ṯurvǝ ṯǝcci kitha ṯiraara ṯinḏaŋa, kaka ǝṯi kwomne kweere kwithimthina ǝnḏithǝ ŋaaŋwɔsi. 13 Laakin ǝṯi kǝniny aamina kaka nɔɽɔmaṯṯi-ŋa-gwɔ Kwɔrɔstɔ-gi ki-ṯiraara-na ṯuuŋwun, mindaŋ mǝ urǝnni-nǝ deddep ṯinyiŋla-thina mǝ ŋinith ŋuuŋun ruwǝnnǝlɔ. 14 Ŋaaŋa linḏi ethi ɔrtanni mǝr-ŋǝsi ollollo kaka nɔrŋa-gwɔ lǝthi Kwɔrɔstɔ, kaka mǝŋǝsi-gwɔ Ṯigɽim ṯǝthi ŋinith ŋǝthi Allah ɔmi daŋgal-la. 15 Laakin ǝṯɔŋw rǝrinnǝ kweere kwaalɔ mac, kaka ŋgwa kwǝṯi kette ḏimmi, alla kaka kwɔɔɽam, ya kwǝrrǝzi ŋigii, ya kaka kweere kwǝṯɔɔɽi ki-ŋiɽaŋal-na mbic ŋǝthi lithaathɔ. 16 Nǝ mɔŋw rǝrinni kweere ŋiɽaŋal-ŋi ŋɔrɔŋ-ŋi kwɔgrɔstiyan tǝ, a ṯɔrony ere mithǝ mac, laakin ŋwɔccǝ kǝniny Allah shukran yiriny-yi yǝthi Kwɔrɔstɔ yǝthi-ŋwsi.
17 Lɔɔmɔr limiila lǝthi-li hɔkwɔm aari ibṯǝḏi. Na nǝṯǝ lizi lǝthi Allah oro linḏirsi ethisi kettice hɔkwɔma ker-kerreny. Nǝ mɔŋwaari ibṯǝḏi nyii-ŋǝli, e-ta ŋwɔmǝ ṯimmasi kworo aŋgwɔrɔ lizi-li kila liti lǝmminicǝ Inyjiilǝ wǝthi Allah mac? 18 Kaka naarɔ-gwɔ Kiṯaab Kirllinǝlɔ ter ŋwɔ:
“Mǝ ŋiɽaŋal ferlle beṯṯen ethi lizi lirllalɔ kilaaw;
e-ta ǝri-mǝ rotto ṯatha ŋǝthi kila liti lilŋithi Allah mac?”
19 Ŋwɔṯaŋw, ethi kila lǝṯi rǝrinni ŋiɽaŋal-ŋi ŋǝthi ṯɔgwor ṯǝthi Allah, ǝrisi ǝrri ŋisaaw, nǝ ǝri inḏǝthǝ rogɽo reeŋen Allah min-min wɔgitta ṯurmunǝ, wǝṯi mithǝ wa@ḏa wuuŋwun teṯṯer.