aza 3
ŋiɽaŋal ŋeḏi lilen
1 kaka ṯaŋwu, ŋaŋa lir law, eṯi ketize ŋiɽaŋali yey ŋeḏi lilelu, mindaŋ ma lɔkwɔ deŋgen-na liti linyica injiila nana kinna mac, er urla rugwori lu kezni, liira ŋiɽaŋal-na ŋere, ŋeḏre ŋi ŋeḏi law leŋen, 2 mer izaci ŋaŋwuzi ŋeḏre ŋortana, ŋuzuɽu-na cucuɽic. 3 eṯere efrinji ŋizana ŋalu eḏorɔ ŋeḏi ṯɔgɽana ṯeḏi aŋna par ŋgi la mac, eḏummi owɽu-na ŋamal ŋi, na eḏi kenne tigir kwere kwir ḏahab, na ṯikinna ṯeḏi yireṯ yir gaali. 4 lakin eḏir orɔ ŋeḏi rugwor iininy yi-na, ŋamal ŋi ŋiti ŋeṯernine mac, ŋir tigɽim ṯiɽena, ṯeṯejilini, ṯinderṯa ṯir gaali beṯen ki yey-na yeḏi Allah. 5 kaka ṯaŋwu kerreny tuk, eṯi law lirlinelu ter leṯalliḏa Allah rugwori nana ṯəkiza ṯi kizen eḏi ŋizana ŋu, na eṯir ketize ŋiɽaŋali yey ŋeḏi lilen. 6 kaka inyica gwu ṯa zaara ibrahiimŋw nana, nuŋw eca, kweleny. ŋaŋa limorɔ kirem nyor nyuŋwun, mezi erri ŋofḏana, mezi ere ṯenye ŋere mac.
7 kaka ṯaŋwu tɔk, ŋaŋa lir lor lagiḏu, eṯi nanni ŋeḏre ŋizaw law li lalu, lilŋiiḏi ŋiɽaŋali ŋeḏi ṯaga tizaw; eṯi iɽi yaŋna-na yeḏi law lalu, leni yajila daŋgal la, na kaka oɽmaṯi ŋa gwu duŋw ki ṯimeca-na ṯeḏi ŋimɽi ŋeḏi Allah, ṯeṯiŋazi inḏeḏa ŋimiiḏa. mindaŋ ma ŋazi kwɔmne kwere ere rii kereny mac eḏari ŋundu ŋali ki yiriny.
ṯiyaḏiza rugwor-na ṯeḏi likwruztyan
8 ŋu ŋimɔ irmiḏiḏi, ruḏur-na ŋaŋa tatap lutuput, liyaḏizi rugwor-na; eḏi ŋazi ŋimɽi yaḏa ki liaŋgalu, ezi amɽi; eḏir rugwori reḏi ŋimɽya-na, ṯejilina ṯi tɔk ki rɔgwɽɔ. 9 izari eḏi kwizi ere kwere mac eḏizi kwumaci-na ŋiki ŋeḏi ŋa ŋeni ŋiki. mer ŋa ɔllɔ, eṯizulluḏi mac, lakin a keni ortaḏa ŋgwa kwulluḏuŋa. kaka ma ŋazi gwu Allah ornuṯi eḏafi ṯortaḏa. 10 kaka luḏinar gwu:
ŋgwa kwunaŋna eḏamɽi ŋimiiḏa, na eḏeze ŋwamina ŋwicaw,
eḏuŋw miḏa ṯiŋla ṯuŋwun teter eḏi zi ere andazi ŋere ŋiki mac mirec;
na eḏuŋw ṯinyini ṯunyu ṯuŋwun tɔk eḏi zi ere andazi ŋir array mac.
11 eḏuŋw zi orlaca ŋiki ŋwudɔŋw mindaŋ ŋwu zi erri ŋizaw;
eḏuŋw naŋnini ŋiɽena eḏi zi romalu tɔk.
12 kaka eṯi gwu yey yeḏi Kweleny ecice lizi kla lofḏana,
na eṯi yəni yuŋwun niŋnaci ṯara ki yiriny ṯeŋen,
lakin eṯi gwu kiyəna kweḏi Kweleny ruḏici
ŋunduŋwuzi kla ṯuwən leṯizerri ŋiki.
ṯirerina ŋiɽaŋal ŋi ŋerrina ŋizaw ṯiri kaka ṯeḏi Kwruztu
13 lizi liri lendu lɔŋazi deŋṯini ṯurfa ṯi, ma eḏi rugwori rutuput tizaw? 14 lakin ma rerini ŋiɽaŋal ŋi ŋeḏi ṯofḏana, a lortani. eti ṯinya kwizi kwere mac; eṯere pini rugwor-na tɔk mac. 15 lakin eti nii Kwruztuŋw-na ki rugwor-na ralu lac, kwir Kweleny, eti nani cugwɔ-cugwɔp ki nyamin tatap eḏi zi aalanizi kwere nyiḏak kwɔŋazi uṯicelu ṯəkiza ṯi kizen ṯeḏi ŋa, lakin eṯi zi aalanizi ŋiɽena ŋi, na ṯiniiya ṯi-na. 16 eṯaŋraci rugwori ralu ŋwamin tatap eḏi zi erri ŋizaw, mindaŋ mer ŋazi allazi nana, kla leṯɔllɔlɔ ŋeḏre ŋalu ŋizaw eḏi Kwruztu-na, leŋgir zi ruzi luŋw. 17 kaka ofḏanar gwu eḏi rerini ŋiɽaŋal ŋi ŋerrina ŋizaw mer orɔ keni ŋeḏi ṯugwor ṯeḏi Allah, ki lobi leḏi li rerini ŋiɽaŋal ŋi ŋerrina ŋiki. 18 ŋende ŋere ŋimezi Kwruztu erri ŋiki, lakin nuŋw ay ŋiɽaŋal ŋi ŋeḏi ŋikya ŋeri tamin dak, nuŋw eyzi nyuŋwuzi kla lerrizi ŋiki, eḏi mulḏa nyuŋwuzi kwokwony nani gwu Allah; ner kete ŋunduŋwu kwir aŋna ŋiɽany ŋi, lakin, kwir ṯigɽim, nuŋw aɽiḏa ki ŋimiiḏa-na. 19 na ki ṯigɽim-na kḏu ta, nuŋw ele eḏandaci rigɽima ŋiɽaŋali ŋizaw, kra reḏi lizi limay, kezir wumer gwu kəkini. 20 linderṯa kla kinaŋw liti linya nana mac, mezi gwu Allah əkici kizen ləlu tuk ṯindinyana ṯi nana, ki ŋwomur ŋweḏi nuuh ŋwudaɽmaḏuŋw ŋi faluuka; ner gwu kilaw lɔkwɔ ŋaw la, lir dufɔkwupa ṯuɽuk. 21 ṯibaptizina ṯiri ṯaŋwu tɔk, ṯeṯi ŋazi kileḏi kirem, lakin nuŋw ere eni ṯuna nana domony mac ṯeḏi yaŋna yuruŋwa, lakin na ṯibaptizina eni ŋwu, eḏi naŋni Allah eḏi zuɽici ŋaŋwuzi rugwori-na ŋiɽaŋal ŋi ŋeḏi ṯidiɽa ṯeḏi Yecu Kwruztu ki ŋiɽany-na. 22 kwunderṯa kwumallu kilerena, ŋgwana kwunanalu ki ṯii ṯeḏi mini ṯeḏi Allah, kwumɔ Allah ketice limaleyka tatap, na kla tatap leḏi zulṯa, ŋuma ŋi tatap, nuŋw zi annizalu ŋwara ŋi ŋwuŋwun.
Laaw-ŋǝ lɔr-li leeŋen.
1 Nǝrṯoroŋw tok ŋaaŋa lir laaw, ǝṯi iinyici lilǝlɔŋwsi naana, mindaŋ mɔŋw naani kweere deŋgen-na kwiti kwǝmminicǝ ŋiɽaŋali ŋǝthi Allah mac tǝ, a ŋethre ŋaalɔ ŋisaaw ǝginǝ ŋunduŋwsi ethi ǝmmini. Nǝreere oro ḏɔrɔɔri mac ethisi mɔltha kandisa-gi, 2 kaka ninḏir-gwɔ etheese ṯiiɽǝnǝ ṯaalɔ ŋethre-ŋi ŋisaaw. 3 Ŋiti ŋɔvthanna mac ethi ŋisanna ŋaalɔ oro ŋǝthi parŋgala-ŋw, ŋiɽaŋal-ŋi ŋǝthi ɔmmi yǝwɽu-nǝ yaalɔ ŋaamal-ŋi, nǝ ethi kenne tiigiri naana kwir ḏahab-ŋǝ yireth-yi yir ghaali. 4 Nǝ ki-lɔɔbi lǝthi ŋiɽaŋal ŋɔ tǝ, a ŋisanna ŋaalɔ oro ŋǝthi rɔgwor raalɔ rerrem ininyǝnǝ, ŋir ŋisanna ŋǝthi ŋiiɽǝnnǝ ŋǝthi ṯigɽim ŋiti ŋǝṯi kiirathalɔ mac, nǝroro ŋǝthi faayitha kiyǝnǝ yǝthi Allah. 5 Kerreny tuk nǝ laaw naani lirllinǝlɔ ter lallathɔ Allah rɔgwori naana ṯǝkkizǝ-thi kizǝn, nǝ ŋisanna ŋeeŋen oro ṯiinyicǝ naana ṯǝthi lilen-ŋa. 6 Nǝṯǝ Saara oroŋw tok; niinyicǝ-ŋgwɔ Ibraahiim-ŋwɔ naana mindaŋ ǝṯɔŋw ɔrnɔṯi yiriny-yi yǝni Sǝyyiḏ. Nǝ kire-kirem ŋgwɔ-tǝ, noro nyɔr nyuuŋwun, mǝsi ǝrri ŋisaaw, liti lithiinya kwokwony kwomne kweere mac.
7 Nǝr-ṯoroŋw tok, ŋaaŋa lir lɔr laagithɔ, laazim aami naanɔŋw ŋethre ŋisaaw laaw-li laalɔ, ethisi elŋe ethaarɔŋw yaŋna yeeŋen yǝni yajla. Ǝṯisi iiɽinǝ, kaka ninḏir-gwɔ tok ethaavi ŋimiitha ŋaaŋa-li ŋir haḏiiyyǝ wǝthi Allah. Ǝṯisi ǝrri ŋɔ minḏaŋ mǝŋǝsi kwomne ere kweere mac kwɔŋǝsi rillici ṯaara kiyiiriny.
Ethi inḏa ṯurvǝ sǝbǝb-gi kwǝthi ŋirllalɔ.
8 Nǝroro ŋɔ ŋirimthithɔ, laazim orona lɔtɔpɔt lǝthi rɔgwori rɔtɔpɔt; ethi amɽathisi-na ŋiyaŋga, lǝthi ŋimɽiyǝ-nǝ ṯǝjlinnǝ-thi ki-rogɽo daŋgal-na. 9 Ǝṯeere ǝɽǝthisi ŋwɔɽa mac, mǝrŋǝ ollo tǝ, ǝṯiseere ollo ŋa tok mac; laakin ǝṯisi ǝŋnici ṯɔrtatha-thi, kaka nɔrɔ-gwɔ ṯɔrtanna ṯǝccǝ-ŋǝsi-thi Allah wa@ḏa ethinḏǝthǝ ŋaaŋwɔsi kinaŋw nɔrnɔṯɔŋw ŋaaŋwɔsi. 10 Kaka naarɔ-gwɔ kiṯaab Kirllinǝlɔ ter ŋwɔ:
“Mǝ kweere nyithak naŋni ethaamina ki-ŋimiitha-na,
nǝ mɔŋw amɽi etheese ŋwɔɔmɔri ŋwisaaw tǝ,
laazim ŋwɔseere andindasi-lɔ ŋigii-ŋigii mac,
nǝ ŋweere kǝkikki ŋǝluŋi tok mac.
11 Laazim ŋwɔsi ɔrlacca kithaay ŋwɔdoŋw ŋa ŋigii ethisi ǝrri
ŋa ŋisaaw;
laazim ŋwɔ naŋninni ŋiiɽǝnnǝ-lɔ ṯɔgwor-thalɔ min-min.
12 Kaka nǝṯisi-gwɔ Kweeleny kagirni kila lirllalɔ,
nǝ ǝṯɔŋw niŋnaci ṯaara kiyiiriny ṯeeŋen tok;
laakin ǝṯir-li oro ṯuwǝn kila lǝṯisi ǝrri ŋigii.”
13 Nǝ ǝyǝ kwɔrɔ kweere kwɔŋǝsi rǝri naana mǝ ǝmmini ethisi ǝrri ŋɔvthanna? 14 Laakin mǝ kinnǝni inḏa ṯurvǝ ṯǝthi ŋa ŋǝrrǝ-ŋǝsi ŋirllalɔ, e-ta ǝni lɔrtanni. Ǝṯisi ṯiinya mac, wala ethi pinni rɔgwor-na. 15 Laakin ǝṯi iiɽi Kwɔrɔstɔ-ŋw-na ki-rɔgwor-na raalɔ lac-lac. Nǝ ǝṯi iiɽi ŋunduŋw-nǝ kaka Kweeleny. Ǝṯi naanalɔ cɔgwo-cɔgwop ŋwɔɔmɔri tatap ethi ǝŋnici kweere nyithak kwɔŋǝsi uṯicǝlɔ ethisi ilŋithini ŋunduŋw ŋǝthi ṯǝkkizǝ kizǝn ṯǝthiŋǝ, laakin ǝsi kǝniny ǝrri ŋɔ ṯǝjlinnǝ-thi nǝ ṯiiɽǝ-thii-nǝ tok; 16 aŋricar rɔgwori raalɔ ethi sɔɔɽɔna cɔr-cɔɽic, mindaŋ mǝr-ŋǝsi ollo kǝzir weere, nǝ kila lǝṯisi andindasi ŋigii-ŋigii ŋethre naana ŋaalɔ, kaka nɔrŋa-gwɔ lǝthi Kwɔrɔstɔ, ǝsi ṯɔrony mithǝ ṯǝthi ŋiɽaŋal ŋa ŋandisarsi. 17 Kaka nɔvthannar-gwɔ ethi rǝrinni ŋiɽaŋal-ŋi ŋǝrrǝ-ŋǝsi ŋisaaw, mǝroro ŋǝthi ṯɔgwor ṯǝthi Allah, ki-lɔɔbi lǝthisi-li ǝrri ŋigii. 18 Kaka nayɔ-gwɔ Kwɔrɔstɔ taamin tɔtɔpɔt dak, ŋiɽaŋal-ŋi ŋǝthi ŋikiya, ŋgwa kwirllalɔ ki-lɔɔbi lǝthi kila ligii, mindaŋ ethiili ŋaaŋwɔsi naanɔ-gwɔ Allah, nǝr ɽeenye aŋna wuuŋwun, laakin nɔŋw miitha ṯigɽim-thi, 19 nǝ ṯigɽim-thi ṯǝ kitha ṯinaanɔ ŋgwɔ-na nɔŋweele nɔŋwɔccǝ rigɽimǝ bǝshirǝ Inyjiilǝ kira rinaanɔ ki-sijin-nǝ. 20 Rindǝr-ṯǝ rir rigɽim kira rǝthi kila liti liinyicǝ Allah naana mac, kinaŋw nǝkkicǝ-ŋwsi kizǝn ṯimthǝ-thi ṯɔgwori, ki-ŋwaamin-la ŋwa ŋwɔdaɽimathi-ŋi Nɔɔh mɔrkǝbǝ kwuuŋwun. Nǝ kila-ṯǝ kila lokwɔɽɔc linaanɔ ki-mɔrkǝb-nǝ lir dɔvokwɔppa dak, nǝroro limǝ kilaaw ŋaaw-ŋi, 21 ŋir @alaama waaɽinna ma@muuḏiiyya, kwǝni kwɔmǝ-ŋǝsi kilǝthi kirem. Nǝreere ǝniŋw ethi iyi ŋerletha ŋǝthi yaŋna mac, laakin nǝ wa@ḏ oro wǝthuɽuci Allah ṯɔgwor-thi ṯisaaw. Ŋwɔ kilǝthi ŋaaŋwɔsi ṯidiiɽǝ-thi ṯǝthi Yǝcu Kwɔrɔstɔ. 22 Kwindǝr-ṯǝ kwɔmeele ki-leere-na, nɔŋw naani ki-thii ṯǝthi mɔni ṯǝthi Allah, nɔŋw mithǝ limeleka tatap nǝ lisɔlṯa tatap lǝthi leere, nǝ ŋɔma tatap, nǝr naani ki-rii-na ruuŋwun.