aza 3
ṯamɽa ṯeṯir ṯi amɽi Papaŋw ṯeṯinyji mulɔ eḏaɽani ŋunduŋwu
1 izarṯi ṯamɽa ṯinḏeḏanyji Papa mindaŋ er eni nyiŋa nyor nyeḏi Allah! ner ṯa orɔ ŋwu tɔk! ŋwu ṯaŋwu, eṯinyji ṯurmun ṯime kaka eṯuŋw gwu ṯime ŋunduŋwu. 2 limɽi linyi, a kwirir nyor nyeḏi Allah kirem; ŋiti ŋilŋiiḏina kinna mac a kwinḏir eḏi roto ḏa kwaḏan gi, lakin ŋilŋiiḏir zi rac eḏaruŋw, muŋw ruweḏe lu ta, er aɽani ŋunduŋwu, kaka inḏir gwu nyiŋa eḏeze ŋunḏuŋwu kwir taŋw. 3 kwete nyiḏak kweṯalliḏa ŋunduŋwu tugwori nana ṯəkiza ṯi kizen kḏu ŋwuzuɽi rɔgwɽɔ-na ruŋwun, kaka enuŋw gwu kwuzuɽu-na ŋundu dar-dar.
ŋikya ŋiti ŋeṯinanni mac ki rugwor-na reḏi lere lir nyor nyeḏi Allah
4 kwere kweṯizerri ŋiki, kwunderṯa kweri dapi kuruu gi la keḏi Allah, kaka ur gwu ŋikya ŋeṯi kii ŋiɽaŋal-na tatap. 5 a lilŋiica rac eḏaruŋw, kwumɔ ruwene lu eḏi dimi ŋikyaŋi ŋeri kiṯay, na ŋikya ere nani duŋgwun-na mac. 6 na kwere kweṯinanni duŋgwun-na, etuŋw zi ere erri ŋiki mac. kweṯizerri ŋiki, nuŋw ere eze ŋunduŋwu mac, nuŋw ere elŋe ŋunduŋwu tɔk mac. 7 kwelle kwinyi, eṯere efrinji kwere eḏi kekeɽinji ŋaŋwuzi lu mac. kweṯizerri ŋeni ŋofḏana, kwunderṯa kwir kwofḏana kaka enuŋw gwu ŋundu tɔk kwofḏana. 8 kweṯizerri ŋiki, kwunderṯa kwir kweḏi ibliiz, kaka erri zi gwu ibliiz ŋiki kwɔnkwɔn mindaŋ kirem kwumorɔ. na ŋiɽaŋal ŋi ŋu ta, na Tor teḏi Allah ruwene lu eḏi kii ŋɔḏɽor ŋeḏi ibliiz. 9 kwere kwilŋiiḏir ŋelŋe ŋi ŋeḏi Allah kwiti kweṯizerri ŋere ŋiki mac, kaka urŋw gwu lola leḏi Allah, mindaŋ etuŋw ere eḏi ŋuma eḏi zi erriri ŋiki mac, kaka ilŋiiḏir gwu ŋelŋe ŋi ŋeḏi Allah. 10 er ŋi ta ilŋeḏine lir kwelle kweḏi Allah, er ŋi ta ilŋeḏine tɔk lir kwelle kweḏi ibliiz; kwiti kweṯizerri ŋeni ŋofḏana mac, etuŋw ere orɔ kweḏi Allah mac, na ŋgwa ta kwiti kwetamɽi eŋgen tɔk mac.
11 ŋiɽaŋal ŋu ŋinderta ŋiniŋnaŋazi kwɔnkwɔn: ŋofḏana eḏamɽaḏizina wuɽe-wuɽeny. 12 er ere orɔ kaka kayiinŋw mac kwir kweḏi ibliiz, mindaŋ iɽinyiiḏuŋw gwu eŋgen. kwiɽinyaḏuŋw kaḏa? kaka erruŋw zi gwu ŋundu ŋiki, na eŋgen erruŋw zi gwu ŋofḏana.
ṯamɽaḏizina ṯeḏi ŋiaŋga
13 eṯi liŋɽu mac, lieŋgeri linyi, ma ŋazi ṯurmun uwezi. 14 a kwumer ruḏa ŋiɽany-na eḏenḏi ŋimiiḏa-na. ŋilŋiiḏir zi ŋu kaka amɽar gwu ŋiaŋga; ŋgwa kwiti kweḏi tamɽa-na mac kweṯi nani kinna ŋiɽany-na. 15 kwere kweṯuwezi eŋgen, nuŋw orɔ kweḏi ŋina ki rii, na ŋilŋiiḏi ŋazi eḏaruŋw, kwere kweḏi ŋina ki rii kwiti kweḏi ŋimiiḏa-na ŋiaŋ duŋgwun-na mac. 16 kaka ṯiŋaca gwu Kwruztu rɔgwɽɔ lu ruŋwun eḏeyzi nyuŋwuzi ta, eṯir ŋi ta elŋe ṯamɽa. kaka taŋwu, ŋeni ŋofḏana deŋgeri-na eḏi tiŋaci lieŋgeri-ŋwuzi rɔgwɽɔ lu tɔk. 17 lakin kwere muŋw eḏi kwɔmne kweḏi ṯurmun, mindaŋ muŋw eze eŋgen kwir kwuway cakicagi ma tugwor ere yaḏa duŋgwun mac ta, a gwu ṯamɽa ṯeḏi Allah nani-na aŋgwuru? 18 kwelle kwinyi, er ere amɽaḏizina ŋiɽaŋal ŋi ŋeḏi riŋla domony mac, lakin ŋetir zi ŋi erri ŋir ŋirlalu.
19 ŋwu taŋwu, er zi ta elŋe eḏaruŋw, a kwirir leḏi ŋirlalu, mindaŋ a rugwor reri ami nanuŋw, nanuŋw gwu, 20 menyji keni rugwor reri naŋni eḏi ruzi kaṯi; kaka eṯi gwu Allah eni wutemḏi rugwori reri, na eṯuŋw elŋe kwɔmne tatap. 21 limɽi linyi, menyji rugwor reri ere ruzi kaṯi mac, eṯir ami duŋgwaḏaŋw Allah nana; 22 na eṯir ma afi tɔk nanuŋw gwu kwere kwuṯizer gi lu, kaka miḏir gwu amra wuŋwun na eṯir zi erri ŋetəmi ŋunduŋwu-na. 23 na amr wuŋwun eni wu, er eḏici yiriny yeḏi Tor tuŋwun teni Yecu Kwruztu ṯəmna, er amɽaḏizina wuɽe-wuɽeny, kaka inḏeḏaŋw gwu ṯa nyuŋwuzi amra. 24 kla tatap leṯi miḏa amra wuŋwun, eṯir nanni duŋgwun-na, na eṯuŋw nanni deŋgen-na. na eṯir zi ṯa elŋece eḏaruŋw, kweṯinyji gwu nanni-na, Ṯigɽim ṯi ṯinḏeḏaŋw nyuŋwuzi.
Nyɔr nyǝthi Allah.
1 Iisar-ṯi ṯamɽa ṯamɽa-nyji-thi Papa, mindaŋ nǝmyji ǝnyjici yiriny yǝni nyɔr nyǝthi Allah; imba a kwǝnir-ṯǝŋw. Nǝ sǝbǝb kwiti kwilŋithi-nyji-gi ṯurmun mac, nɔŋworo kaka niti nilŋithir ŋunduŋw mac. 2 Limɽi liinyi lamɽa-nyji, a kwɔmǝr oro nyɔr nyǝthi Allah kirem; ŋiti ŋilŋithina kinnǝni mac a kwinḏir ethi rotto tha. Laakin nǝrsi elŋe rac ethaarɔŋw, mɔŋw ruwǝnnǝlɔ ǝri aaɽanni ŋunduŋw, kaka ninḏir-gwɔ etheese ŋunduŋw-ṯǝ ŋgwa kwette-kwette. 3 Kweere nyithak kwǝṯi kittatha naanɔ-ŋgwɔ ǝṯɔŋw suuɽi rogɽo ruuŋwun kaka nǝni-gwɔ Kwɔrɔstɔ zaaṯɔk kwɔsɔɔɽɔ.
4 Kweere nyithak kwǝṯisi ǝrri ŋigii, nɔŋwɔni kwumǝ kii Sherii@a-na, kaka nɔrɔ-gwɔ ŋikiya ṯigiiyǝ ṯǝthi Sherii@a. 5 Ŋilŋithi-ŋǝsi rac ethaarɔŋw mǝ Yǝcu ruwǝthǝ-lɔ ŋwɔ dimmi ŋikiyaŋi kithaay, nǝ duŋgwun-nǝ tǝ, nǝ-gwɔ ŋikiya ere nanni-na ŋeere mac. 6 Kwiti kweere mac kwǝṯi ɔmi duŋgwun-nǝ mindaŋ ethisi-mǝ ǝrri ŋigii kwokwony, kwiti kweere mac kwǝṯisi ǝrri ŋigii mindaŋ ethǝthi ŋɔma etheese ŋunduŋw, wala ethelŋe ŋunduŋw. 7 Kwelle kwiinyi, ǝṯi duŋgwǝcǝ kweere mac ethi kǝɽinyji ŋaaŋwɔsi-lɔ. Ŋgwa kwǝṯisi ǝrri ŋirllalɔ, kwǝni kwirllalɔ, kaka nǝni-ŋgwɔ ŋundu kwirllalɔ tok. 8 Ŋgwa kwǝṯisi ǝrri ŋigii, nɔŋworo kwǝthi Ibliis; kaka nǝṯisi-gwɔ Ibliis ǝrri ŋigii kinaŋw kwon-kwon-lɔ tuk. Nǝ sǝbǝb ŋgwa kwurwǝnnǝ-gi Tɔr-lɔ tǝthi Allah, nɔŋworo ethi kiirasi ŋothɽor-lɔ ŋǝthi Ibliis. 9 Kwiti kweere mac kwilŋinna ŋelŋe ŋǝthi Allah, mindaŋ ethi-mǝ ǝrri ŋikiyaŋi kwokwony; kaka nǝṯi-gwɔ ṯobii@a ṯǝthi Allah ɔmi duŋgwun-nǝ, nǝ ǝṯɔŋweere ǝthi ŋɔma mac ethisi ǝrri ŋigii, kaka nilŋinna-ŋgwɔ ŋelŋe-ŋi ŋǝthi Allah. 10 Ŋiɽaŋal-ŋi ṯǝ ŋɔ ǝṯi nyɔr nyǝthi Allah elŋethine dedder, nǝ nyǝthi Ibliis tok. Ŋgwa kwiti kwǝṯisi ǝrri ŋirllalɔ mac, kwǝthi Allah kwiti kwɔrɔ mac, wala ŋgwa kwiti kwǝṯi amɽi eŋgen mac.
Ǝṯi amɽathisi-na wɔɽe-wɔɽeny.
11 Ŋiɽaŋal ŋindǝr-ṯǝ ŋɔ ŋiniŋna-ŋǝsi kinaŋw-lɔ tuk kwon-kwon, mindaŋ mǝr amɽathisi-na wɔɽe-wɔɽeny. 12 Nǝ ǝreere aaɽanni Gaayiin-ŋwɔ mac kwir kwǝthi Ibliis mindaŋ nɔŋw-mǝ ɽeenye eŋgen ḏimmiya. Kwotho kwiɽinyithiŋw ḏimmiya? Kaka nɔrɔ-gwɔ ŋothɽor ŋuuŋun ŋigii, nǝ ŋǝthi eŋgen tǝ, nǝr irllalɔ. 13 Ǝṯi liŋɽu mac liyǝŋgǝri kaka nuwǝzǝŋǝsi-gwɔ ṯurmun. 14 Ŋilŋithirsi nyiiŋǝ rac ethaarɔŋw a kwɔmǝr ṯamthɔ ŋiɽany-lɔ nǝreele ki-ŋimiitha-na, kaka nǝṯir-gwɔ amɽi liyǝŋgǝri-ŋwɔsi. Ŋgwa kwiti kwǝthi ṯamɽa-na mac tǝ, ǝṯɔŋw ɔmi ki-ŋiɽany-na. 15 Kweere nyithak kwǝṯi wǝzi eŋgen tǝ, nɔŋwɔni kwugitta ḏimmiya, nǝ ŋilŋithi-ŋǝsi rac ethaarɔŋw ŋgwa kwǝṯi kette ḏimmiya, kwiti kwǝṯi-gwɔ ŋimiitha ɔmina mac ŋǝṯi nannitha dok-dok. 16 Nǝr-ṯǝ oro ŋɔ ŋilŋithir-ŋi ṯamɽa, ethaarɔŋw kwɔthiŋaca-nyji ŋimiitha-lɔ ŋuuŋun ethi ǝyici nyuŋwsi; nǝ nyiiŋǝ tok, laazim ǝri ṯiŋacci liyǝŋgǝri-ŋwɔsi ŋimiitha-lɔ tok. 17 Laakin mɔŋwɔthi kweere kwomne kwǝthi ṯurmun, mindaŋ mɔŋweese eŋgen kwir kwɔwaay ceg-cegi, na mǝ ṯɔgwor ere yatha duŋgwun mac tǝ, agwɔ-mǝ ṯamɽa ṯǝthi Allah ɔmina aŋgwɔrɔ? 18 Kwelle kwiinyi, ǝɽi ǝreere amɽathisi-na mac ŋiɽaŋal-ŋi ŋǝthi riŋla domony nǝ kandisa-gi tok mac, laakin ŋothɽor-ŋi nǝ ŋa ŋir rerrem.
Ŋiuugul kiyǝnǝ yǝthi Allah.
19 Ŋiɽaŋal-ŋi ṯǝ ŋɔ, nǝr elŋe ethaarɔŋw a kwirir lǝthi rerrem-ŋa. Ŋwɔṯaŋw nǝr-mǝ ǝthi ŋuuguli ki-rɔgwor-na kiyǝnǝ yuuŋwun, 20 mǝnyji rɔgwor rǝri kette kaṯṯi tǝ, Allah tǝ nɔŋw peŋe beṯṯen ethi rɔgwor-la rǝri, nǝ nɔŋwelŋǝ kwomne tatap tok. 21 Limɽii liinyi lamɽa-nyji, mǝnyji rɔgwor ere kette kaṯṯi mac tǝ, ǝroro luugwul kiyǝnǝ yǝthi Allah; 22 nǝ kweere nyithak kwǝr-gi uṯici ŋunduŋw-lɔ ǝṯir-tǝ aavi, kaka nǝṯir-gwɔ mithǝ waamira wuuŋwun, na ǝṯirsi ǝrri ŋa ŋǝṯi ǝmi ŋunduŋw-nǝ. 23 Waamir wuuŋwun wir wɔ, laazim ethi ǝmminci yiriny yǝthi Tɔr tuuŋwun tǝni Yǝcu Kwɔrɔstɔ, mindaŋ ethi amɽathisi-na, kaka-ṯǝ nǝllicǝ-ŋgwɔ nyuŋwsi waamira. 24 Kila tatap lǝṯi mithǝ waamira wuuŋwun ǝṯir ɔmi duŋgwun-nǝ, nǝ ŋundu tok deŋgen-na. Nǝ ŋiɽaŋal-ŋi ṯǝ ŋɔ ǝri elŋe ethaarɔŋw kwɔɔmɔ-nyji-gwɔ-na Ṯigɽim-thi ṯinḏǝthǝŋw nyuŋwsi.