aza 14
haḏiya eḏizandaci ŋinḏeḏa zi Allah Ṯigɽim ṯi, na wir ter eḏortaḏa kandiza gi kiṯimṯina keḏi Ṯigɽim
1 kwakiḏaḏiri ṯamɽa lu, na eṯorɔ zurum eḏafi haḏiya weḏi Ṯigɽim, mindaŋ ta ma eḏi ŋuma eḏizandaci ŋinḏeḏa ŋazi Allah Ṯigɽim ṯi. 2 kaka muŋw gwu ortaḏa kwere kandiza gi kiṯimḏina keḏi Ṯigɽim, eṯuŋw ere andaci lizi mac, eṯuŋw andaci Allah; kaka iṯuŋw gwu kwere mac kwilŋiica ŋunduŋwu ŋiɽaŋali, na eṯuŋw zi andazi ŋir ŋejmeṯ eḏi Ṯigɽim-na. 3 lakin mezi kwizi andaci ŋa ŋinḏeḏa zi Allah Ṯigɽim ṯi, eṯi ŋiɽaŋal ŋuŋun eḏi ŋuma eḏi duŋgwuŋgwazi lizi ṯəmna ṯi, eḏi zi firlazi la, ya eḏi zi kandizelu. 4 kwizi ŋgwa kweṯortaḏa kandiza gi kiṯimḏina keḏi Ṯigɽim eṯuŋw gi duŋgwuŋgwaci rɔgwɽɔ ruŋwun ṯəmna, lakin ŋgwa kweṯizandaci ŋinḏeḏa zi Allah Ṯigɽim ṯi, eṯuŋw ŋi duŋgwuŋgwazi kaniiza. 5 na ŋazi ma naŋni tatap eḏortaḏa kandiza gi ŋgu keḏi Ṯigɽim, lakin na ŋazi keni naŋni beṯen eḏizandaci ŋinḏeḏa zi Allah Ṯigɽim ṯi. ŋgwa kweṯizandaci ŋinḏeḏa zi Allah Ṯigɽim ṯi, kwuṯemḏila ŋgwa kweṯorṯaḏa kandiza gi kiṯimḏina keḏi Ṯigɽim, illi ma gwu kwizi kwere orɔ muṯarjam, mindaŋ ma kaniiza duŋgwuŋgwaḏa.
6 lieŋgeri, menyila nani ŋa gwu, mindaŋ menyi ortaḏa kandiza gi kiṯimḏina keḏi Ṯigɽim, nyi kwɔŋazi meci aŋgwuru? illi ma ŋazi baŋaci ŋir ṯiruwenizelu ṯere, ya ma ŋazi ilŋiiḏini ŋere, ya ma ŋazi andaci ŋere ŋinḏeḏa zi Allah Ṯigɽim ṯi, ya ŋir ŋeḏi ṯaliim. 7 kwɔmne ŋgwa kwiti kweḏi ŋimiiḏa-na mac, ŋgwa kweḏi ŋwal ŋwir kaka lufɽiṯir, ya kwumbəra, muŋw ere eḏi ŋwal-na ter ter mac ta, er ma elŋe ŋwuɽju aŋgwuru ŋweḏi ṯilŋa? 8 ma bruz ere ṯiŋaḏa ŋwal lu ŋama-ŋamaŋ mac, a na orṯa elŋe aŋgwuru eḏaɽazi kwɔmne duŋw eḏi gi ele ki ṯuwən-na? 9 ŋiri ṯaŋwu tɔk daŋgal-na; ma andazi kandiza gi kiṯimḏina, na eya kwiri kwinḏi eḏi zi elŋe? kaka inḏi ŋa gwu eḏandaci ezir domony. 10 kandiza kinani ter ter ki ṯurmun-na kitezir, nuŋw ere kere kiira maana-na mac. 11 lakin menyere elŋe maana kweḏi kandiza mac, nyi orɔ kwizi kwiṯimḏina nanuŋw gwu kweṯandazi, na ŋundu ta, ŋworɔ kwiṯimḏina nani nyi gwu. 12 ner ṯa orɔ ŋwu tɔk daŋgal-na; kaka ur ŋa gwu zurum kweḏi haḏiya weḏi Ṯigɽim, eṯi naŋni eḏi yi duŋgwuŋgwazi kaniiza.
13 ṯaŋwu, ner ofḏani eḏi ŋgwa kweḏi haḏiya eḏi yi ortaḏa kandiza gi kiṯimḏina keḏi Ṯigɽim, eḏuŋw ari ki yiriny mindaŋ muŋw eḏi ŋuma tɔk eḏi ŋi upi kandiza-na. 14 menyari ki yiriny kandiza gi kiṯimḏina keḏi Ṯigɽim, eṯuŋw orɔ ṯigɽim ṯinyi ṯeṯari ki yiriny, lakin ŋaɽiny ŋinyi ta, eṯir nani domony. 15 na aḏa kwiri kwenyerri? ŋofḏana eḏari ki yiriny ṯigɽim ṯi ṯinyi na ŋaɽiny ŋi ŋinyi tɔk; enyi kete rilŋa ṯigɽim ṯi ṯinyi na ŋaɽiny ŋi ŋinyi tɔk. 16 mezi ere erri ŋu mac, na ma kinna orṯaḏa ṯigɽim ṯi dak, a kwizi kwiira haḏiya weḏi Ṯigɽim ṯirlinelu ter ŋwari emba aŋgwuru ki ṯortaḏa-na ṯɔŋwa, muŋw ere elŋe ŋiɽaŋali ŋandizaŋazi? 17 ma keni ami ortaḏa ŋwu Kwelenyi ŋama-ŋamaŋ, lakin a kwende kwumɔ duŋgwuŋgwazi kwizi kwir ter. 18 nyeca Allah zukran, kaka eṯi nyi gwu ortaḏa kandiza gi kiṯimḏina keḏi Ṯigɽim ŋwamin ŋwuru eḏi daŋgal la tatap; 19 lakin, nani nyi kaniiza-na ta, ner ofḏani duŋgwinyi eḏi zi andaci ŋir ŋɔkwroc domony, ŋaɽiny ŋi ŋinyi, eḏi zi ŋi ilŋiiḏini liḏaḏu, ki lobi leḏi ŋiɽaŋal ŋitezir kandiza gi kiṯimḏina keḏi Ṯigɽim ṯirlinelu ter.
20 lieŋgeri, eṯere orɔ kaka nyor nyɔkwɽeny mac ki fikir-na kwalu; eṯorɔ kaka nyelle nyiti nyilŋiiḏi ɔɽɔmi mac, lakin ki fikir-na kwalu, eṯaɽni lizi limɔ irmiḏiḏi ŋufuŋaŋi. 21 ŋuluḏina kuruu-na, ŋaruŋw: nyi kwandaci lizi klu ŋiɽaŋali lizi li leḏi riŋla rir ter, na runyu ri reḏi lizi liṯimḏina, lakin er nyi ere ketize yəni too. 22 ṯaŋwu, na kandiza kiṯimḏina keḏi Ṯigɽim ere orɔ ṯibaŋica ṯeḏi lizi leḏi ṯəmna mac, lakin nuŋw keni orɔ ṯeḏi lizi kla liira ṯəmna-na. na mezi kwere andaci ŋiɽaŋali ŋinḏeḏa zi Allah Ṯigɽim ṯi, eṯir ere orɔ ŋeḏi kla liira ṯəmna mac, eṯir orɔ ŋeḏi kla leḏi ṯəmna. 23 ṯaŋwu, ma kaniiza aɽaḏi duŋw tatap, mindaŋ mer ortaḏa kandiza gi kiṯimḏina keḏi Ṯigɽim, e ta, ma lizi enḏa liti leḏi haḏiya weḏi Ṯigɽim mac, na kla liti leḏi ṯəmna kinna tɔk mac, liti leŋazi kete ŋeɽer manya? 24 lakin mer zi andaci tatap lere lere ŋiɽaŋali ŋinḏeḏa zi Allah Ṯigɽim ṯi, mindaŋ muŋw enḏa kwere kwiti kweḏi ṯəmna kinna mac, ya kwiti kweḏi haḏiya weḏi Ṯigɽim mac, eṯi ṯugwor ṯuŋwun eni ṯimɔ yə-na beṯen, kaka ma gwu ŋiɽaŋal ŋalu ter ter eriṯe ṯugwori ṯuŋwun. 25 na eṯi ŋejmeṯ ŋeḏi ṯugwor ṯuŋwun ruwenelu, mindaŋ ŋwiidi kiyeyna rific eḏi kwoce Allah lu, na ŋwelŋe eḏaruŋw, Allah weṯinani daŋgal-na rerem.
ŋofḏana eḏi kete nizama kwizaw kweḏi kaniiza
26 ta, a kwer ari ḏa, lieŋgeri linyi? ma aɽaḏi duŋw, eṯuŋw eḏi kwete ṯilŋa, na kwir ter ṯilŋiiḏina ṯere, na kwir ter ŋiɽaŋali ŋimɔ zi Allah ruwecelu, na kwir ter tɔk kandiza keḏi Ṯigɽim ṯirlinelu ter, ya ṯupə-na ṯeḏi kandiza ŋga. eḏi kwɔmne ŋgwu tatap orɔ kweṯi duŋgwuŋgwazi kaniiza. 27 mer ortaḏa lɔkwɔ kandiza gi kiṯimḏina keḏi Ṯigɽim, eḏir orɔ kaka nden ya ṯɔɽɔl domony, na eḏir andazi lere lere, mindaŋ mezi kwizi kwete upuci-na. 28 lakin, ma kwizi ere nani kwinḏi eḏi zi upuci-na mac, eḏir nani tugwup kaniiza-na er andaci Allah ki rugwor-na reŋen. 29 ŋofḏana eḏi zi nden ya ṯɔɽɔl andaci ŋinḏeḏa zi Allah Ṯigɽim ṯi, na kla linanalu er ṯeci ŋiraŋali ki rugwor-na reŋen ŋandizar zi. 30 lakin, mezi Allah ruweci kwizi lu ŋere ŋgwa kwunanalu, eḏi ŋgwa kwiŋna nani tugwup. 31 kaka eḏi ŋa gwu ŋuma tatap lere lere eḏi zi andaci ŋinḏeḏa ŋazi Allah, mindaŋ mer zi elŋe tatap, na er firlaḏa la tatap; 32 kla leṯandazi ŋuma ŋi ŋeḏi Ṯigɽim eṯir orɔ leleny leḏi rigɽim reŋen. 33 kaka iti ur gwu Allah, Allah weḏi ŋitəmbilna mac, lakin eṯuŋw orɔ Allah weḏi ŋiɽena, kaka eṯuŋw gwu orɔ ki yaniiza-na tatap yeḏi kla lirlineluter eḏi Kwruztu-na.
34 eḏi law nani tugwup ki yaniiza-na. iti ofḏanar gwu mac eḏi zi andaci, lakin er orɔ keni liniŋneḏu, kaka ari gwu kuruu ŋwu. 35 ma kwɔmne nani kwere kwunaŋnar eḏelŋe, eḏir uṯizi lilenŋwuzi lu duənu-na kweŋen. kaka ur gwu feḏiya eḏi kwaw andazi kaniiza-na. 36 anna! ŋiɽaŋal ŋeḏi Allah ŋuruḏi nani ŋa gwu a? ya ŋupaḏi nani ŋa gwu ṯuɽuk a?
37 ma kwizi kwere aruŋw, nyi kweḏi ŋiɽaŋali ŋinḏeḏinyji Allah Ṯigɽim ṯi, ya, nyi kweḏi haḏiya weḏi Ṯigɽim, eḏuŋw zi elŋe ŋu ŋulucaŋazi eḏaruŋw, amr weḏi Kweleny wiri. 38 mezi kwizi kwere ere ketice ŋu yey mac, er ere ketice ŋunduŋwu yey tɔk mac. 39 ṯa ŋwu, lieŋgeri linyi, eṯorɔ zurum eḏizandaci ŋinḏeḏa ŋazi Allah Ṯigɽim ṯi, na eṯi zi ere ṯinyini mac eḏortaḏa kandiza gi kiṯimḏina keḏi Ṯigɽim; 40 lakin eḏi kwɔmne tatap ami errini ŋwu nizam gi.
Haḏaaya wǝthi Ṯigɽim Ṯirllinǝlɔ ter.
1 Ǝṯi kwakithatha ṯamɽa-lɔ, mindaŋ mǝŋǝsi sɔɔrɔm yee-na beṯ-beṯṯen kwǝthi haḏaaya wǝthi Ṯigɽim, ethi-yi aari bǝshirǝ ŋiɽaŋali ŋǝthi Allah. 2 Ŋgwa kwǝṯi andasi kandisa kithimthina, ǝṯɔŋweere andaci lizi mac, laakin ǝṯɔŋw andaci Allah dak; kaka niti ninaanɔ ŋgwɔ kweere mac kinaŋw kwilŋithi ŋiɽaŋali ŋuuŋun. Laakin nɔŋwɔni kwǝṯisi andasi ŋa ŋuluccunǝ ŋir rerrem ŋɔma-ŋi ŋǝthi Ṯigɽim. 3 Laakin ŋgwa kwǝṯisi andasi ŋǝthi Allah, ǝṯɔŋwɔni kwandica lizi, ethisi mǝcci, ethisi firlli naana, nǝ ethisi kandisalɔ tok. 4 Ŋgwa kwǝṯisi andasi ŋithimthina, ǝṯɔŋwɔni kwɔmǝccǝ rogɽo ruuŋwun dak, laakin ŋgwa kwǝṯisi andasi ŋǝthi Allah tǝ, ǝṯɔŋwɔni kwumǝccǝ kǝniisǝ tatap. 5 Ŋwɔṯaŋw nǝŋǝsi naŋni tatap ethi andasi kandisa kithimthina rac, laakin nǝŋǝsi naŋni beṯṯen ethisi andasi ŋǝthi Allah. Ŋgwa kwǝṯisi andasi ŋǝthi Allah, ǝṯɔŋw ṯamthɔ-la ŋgwa kwǝṯisi andasi ŋithimthina. Illi mǝ kwizi kweere naani kinaŋw kwǝthi ŋɔma ethisi uppunǝ, mindaŋ ethi mǝcci kǝniisǝ tatap. 6 Ṯaŋw liyǝŋgǝri liinyi, mǝnyii iila naaniŋa-gwɔ kwandisa kandisa kithimthina, e-ta faayitha kwiinyii kwirṯaŋ naaniŋa-gwɔ Illi mǝŋǝsi ǝvicǝ ŋiɽaŋali ŋeere ŋǝthi Allah, ya ṯilŋithinǝ ṯeere, ya ŋiɽiiyaŋi ŋeere ŋǝthi Allah, ya ṯa@liima. 7 Mǝ kwomne ŋgwa kwǝṯir ǝrii kwir kaka lɔvɽɔṯɔr-ŋi kwumbǝrǝ-gi ere ǝthi ŋwal ŋwirna ter-ter mac tǝ, e-ta ǝmǝ ṯilŋa elŋethine aŋgwɔrɔ? 8 Mǝ kibooɽony ere ǝrinni ŋwal ŋwilŋithina ŋwɔthi ŋǝryǝ mac tǝ, e-ta ǝyǝ kwɔrɔ kwinḏi ethi nǝnyji ŋǝriyǝ-lɔ cɔgwo-cɔgwop? 9 Nǝrṯoroŋw tok daŋgal-na, ŋinḏisi kwizi ethisi elŋe aŋgwɔrɔ mǝsi andasi kandisa-gi kithimthina, ŋiti ŋilŋithina-lɔ por-por mac? Kandisa kaala kinḏi kɔrɔn ethi dimmǝ domony ethigeele. 10 Kandisa kinaanɔ ki-ṯurmun-nǝ kittǝzir kirna ter-ter, laakin nɔŋweere keere kiira ma@na-na mac. 11 Laakin minyeere elŋe ma@na kwǝthi kandisa kǝthi ŋgwa kwandisa mac tǝ, nyoro kwette kwithimthina kiyǝnǝ yǝthi ŋgwa kwandisa, nǝ ŋgwa kwandisa ŋwɔ ṯimethine kiyǝnǝ yiinyi. 12 Nǝrṯoroŋw tok daŋgal-na; kaka nǝthiŋǝ-gwɔ sɔɔrɔma kwǝthi haḏaaya wǝthi Ṯigɽim, ṯaŋw kittar-yi ŋɔma tig-tig ethi-yi dɔŋgwɔ-ŋgwazi kǝniisǝ.
13 Ŋwɔṯaŋw ethi ŋgwa kwǝṯi andindasi kandisa kithimthina, laazim ethɔŋwaari kiyiiriny mindaŋ ethǝyhi ŋɔma ethi-ŋi uppi ŋiɽaŋali-na ŋa ŋandisa-ŋwsi. 14 Kaka mǝnyii aari kiyiiriny kandisa-gi kithimthina, ǝṯi ṯigɽim ṯiinyi ǝni ṯaarɔ kiyiiriny, laakin ǝṯi ŋaɽiny ŋiinyi ere naani kinaŋw mac. 15 E-ta aatha kwǝnyii ǝrri? Ethi-nyii aari kiyiiriny ṯigɽim-thi ṯiinyi, laakin nyaari kiyiiriny tok ŋaɽiny-ŋi ŋiinyi; nǝ nyii kette rilŋa ṯigɽim-thi ṯiinyi, laakin nyiitǝ kette rilŋa tok ŋaɽiny-ŋi ŋiinyi. 16 Na mǝ ǝccǝ Allah shukran ṯigɽim-thi ṯɔɽɔk tǝ, na kwizi-ŋgwa kwir kinnǝni kwiyaŋ domony, e-ta ŋwɔmǝ ǝthi ŋɔma ethaari “Amiin” aŋgwɔrɔ ki-ṯaarana ṯɔɔŋwa kiyiiriny ṯǝccǝ-ŋǝthi Allah shukran? Ŋende ŋilŋithi-ŋwsi ŋa ŋandisa-ŋasi. 17 Mǝ kinnǝni aami ǝccǝ Allah-ŋw shukran ki-ṯaarana kiyiiriny ṯɔɔŋwa. Laakin kwizi kwir ter tǝ, ŋweere kaṯṯasi ṯimǝccǝ ṯeere mac. 18 Nyii kwǝccǝ Allah shukran kaka nǝṯiny-gwɔ andasi beṯṯen kandisa kǝthi riŋla kithimthina daŋgal-la tatap. 19 Laakin ki-ṯɔgwɔcca-lɔ kǝniisǝ-nǝ tǝ, nǝr ɔvthanni duŋgwu-nyii ethi andasi ŋwɔɽɔjɔ ṯɔthni ŋwilŋithina, ethisi ǝccǝ lithaathɔ @allima, ki-lɔɔbi lǝthi-li andasi ŋwɔɽɔjɔ alf ŋwɔthimthina.
20 Liyǝŋgǝri liinyi, ǝṯeere aaɽanni nyɔɔrɔ nyokwɔɽony mac ki-fikir-nǝ kwaalɔ, ǝṯi aaɽanni nyɔɔrɔ nyokwɔɽony nyiti nyilŋithi mac aatha kwɔrɔ kwǝni ŋikiya, laakin ǝṯi peŋe ki-fikir-nǝ kwaalɔ. 21 Ŋɔlɔɔthɔna ki Yiṯaab-na ŋaarɔŋw, “Kweeleny kwaarɔŋwa, nyii kwandaci lizi liinyi, ŋiɽaŋal-ŋi ŋǝthi kandisa kithimthina kǝthi lizi. Nyii andasi ruunyu-ri rǝthi lizi lithimthina, laakin ŋɔ tatap ǝnyii lizi liinyi ere kettice yǝy tok mac.”
22 Ŋwɔṯaŋw, nǝ kandisa kǝthi riŋla kithimthina kir haḏiiyyǝ wǝthi Ṯigɽim ere oro ŋilim ki-lizi lǝthi ṯǝmminǝ mac, laakin nɔŋw kǝniny oro ŋilim ki-lizi liira ṯǝmminǝ, nǝ ŋa ŋir haḏiiyyǝ wǝthi kandisa kǝthi Allah nǝroro ŋilim ki-lizi lǝthi ṯǝmminǝ, laakin nǝreere oroŋw ki-lizi-nǝ kila liira ṯǝmminǝ mac. 23 Ŋwɔṯaŋw mǝ kǝniisǝ aaɽathi dɔŋw tatap, mindaŋ mǝr aari ibṯǝḏi tatap ethandasi kandisa kǝṯhi riŋla kiṯhimṯhina, na mǝ lizi lokwo liyaŋ, ya kila liira ṯǝmminǝ ǝnḏǝ, liti liŋǝsi ruusi yeeɽer mac-a? 24 Laakin mǝrsi andasi tatap leere-leere ŋa ŋinḏǝthǝsi Allah, mindaŋ mɔŋw ǝnḏǝ kweere kwiti kwǝthi ṯǝmminǝ mac, ya kweere kwir kwiyaŋ, mɔŋwsi neŋne tǝ, ŋwɔ elŋe ŋikiyaŋi ŋuuŋun. Nǝ a ŋiɽaŋal ŋɔ tatap ŋiniŋna-ŋwsi ruusi ŋunduŋw kaṯṯi, 25 mindaŋ a ŋejmeth ŋǝthi ṯɔgwor ṯuuŋwun ruwǝnnǝlɔ, mindaŋ ŋwiidi ŋwɔrgwɔ-ŋalɔ ethi kwocce Allah-lɔ kwaarɔŋw, ‘Iyyǝ Allah wɔmi rerrem daŋgal-na!”
Ṯɔgwɔccalɔ niizaam-gi kǝniisǝ-nǝ.
26 E-ta, a kwǝr aari tha liyǝŋgǝri liinyi? Maaɽathi dɔŋw, ǝṯɔŋwɔthi kwette ṯilŋa, nǝ kwir ter ṯa@liima, nǝ kwir ter ǝṯɔŋwɔthi ŋiɽaŋali ŋurwǝccǝsi Allah-lɔ, nǝ kwir ter ǝṯɔŋwɔthi ŋiɽaŋali ŋithimthina, nǝ kwir ter ethisi uppunǝ ŋa ŋandinna, ṯaŋw ethiroro tatap ŋǝthi ṯimǝccǝ ṯǝthi kǝniisǝ. 27 Mɔŋw naani kweere kwinḏi ethi andasi kandisa kǝthi riŋla kithimthina, ethiroro ndǝn alla ṯoɽol linḏi ethandasi ṯǝrtiib-thi, ethɔŋw naani kwette kwinḏisi ethisi uppunǝ ŋa ŋandinna. 28 Laakin mɔŋweere naani kweere kwinḏisi ethisi uppunǝ mac tǝ, ethir naani tugwup kǝniisǝ-nǝ, ǝri andasi ki-rɔgwor-nǝ reeŋen leere-leere ǝri andaci Allah. 29 Ethi liɽii andasi ndǝn ya ṯoɽol ŋiɽaŋali ŋa ŋinḏǝthǝsi Allah ethisi andasi, nǝ lithaathɔ tǝ, ǝrisi ese ŋǝni ǝyǝ ŋa ŋandinna. 30 Laakin mǝ kweere kwɔnaanalɔ ki-lɔdɔŋw-na ava ŋiɽaŋali ŋǝthi Allah tǝ, ethɔŋw rilli ŋgwa kwandisa kerreny. 31 Kaka nǝthiŋǝ-gwɔ ŋɔma ethandasi tatap ŋiɽaŋali ŋǝthi Allah ṯǝrṯiib-thi leere-leere, mindaŋ maari tatap @allima, mindaŋ ǝŋi firllathala tatap. 32 Ethi ŋgwa kwǝṯi andasi ǝthi sɔlṯa ki-ŋiɽaŋal-la ŋir haḏiiyyǝ ŋinḏǝthǝsi Allah, 33 kaka niti nɔrɔ-gwɔ Allah, Allah wǝthi ŋitǝmbilnǝ mac, laakin nɔŋworo Allah wǝthi ŋiiɽǝnnǝ.
Kaka nɔrɔr-gwɔ ṯaŋw ki-yǝniisǝ-nǝ tatap yǝthi lizi lirllinǝlɔ ter. 34 Ethi laaw naani tugwup kiyǝniisǝ-nǝ. Kaka niti ninḏǝthǝrsi izinǝ mac ethandasi. Laakin ǝri niŋnithi kǝniny kakǝ nandisa-gwɔ Sherii@a. 35 Mǝ kwomne naani kweere kwɔnaŋnar ethelŋe tǝ, ǝri uṯici lilen-ŋwɔsi-lɔ ki-dɔɔnɔ-na kweeŋen. Kaka nɔrɔr-gwɔ fǝthiyǝ ethi kwaaw andasi kǝniisǝ-nǝ. 36 Anna! Ŋiɽaŋal ŋǝthi Allah ŋuruuthu naaniŋa-gwɔ-a? Alla ŋǝni ŋɔpathɔ daŋgalɔ ṯɔɽɔk?
37 Mǝ kweere nyithak aarɔŋw nyii kwir kwiɽii, ya ethǝthi haḏiiyyǝ wǝthi Allah, laazim ŋwɔsi elŋe ŋa ŋɔlɔcca-ŋǝsi ethaarɔŋw waamir wǝthi Kweeleny wiri. 38 Nǝ mǝsi kweere ere kettice ŋɔ yǝy mac tǝ, ere kettice ŋunduŋw yǝy tok mac. 39 Ŋwɔṯaŋw liyǝŋgǝri liinyi, ethi-ŋǝsi sɔɔrɔm yee-na beṯṯen ethandasi ŋiɽiiyaŋi ŋǝthi Allah, ǝṯi ṯiinyinǝ kandisa kǝthi riŋla kithimthina mac. 40 Laakin ethi kwomne tatap ǝrrini ŋǝmmǝŋ, nǝ ṯǝrṯiib-thi tok.