aza 11
1 errer zi ŋaŋa kaka ŋeṯinyjerri, kaka eṯinyji gwu erri ŋir kaka ŋeṯi zi Kwruztu erri.
ŋeḏre ŋeḏi law kaniiza-na
2 lakin, nyi kwiɽeŋazi-na, lieŋgeri, kaka eṯir nyi gwu izazi ki ŋiɽaŋal-na tatap, na eṯi gwu aŋraci ṯaliima kḏa ṯinḏeḏa ŋazi. 3 na ŋazi naŋni eḏizelŋe eḏaruŋw, nda leḏi kwor kwere leni Kwruztu, na leḏi kwaw kwere leni kwor kwuŋwun, na leḏi Kwruztu nuŋw eni Allah. 4 ma kwor kwere ari ki yiriny, ya muŋw zi andaci ŋinḏeḏa zi Allah Ṯigɽim ṯi tirlinelu ter, kwukwuɽbena ndalu, eṯuŋw eni kwiti kwiɽa nda-na luŋwun mac; 5 lakin ma kwaw kwere ari ki yiriny, ya muŋw zi andaci ŋinḏeḏa zi Allah Ṯigɽim ṯi, kwiti kwukwuɽbena ndalu mac, eṯuŋw eni kwiti kwiɽa nda-na luŋwun mac, na nda luŋwun orɔ kaka eṯuŋw fiyəŋini. 6 kaka ma kwaw kwere ere naŋni eḏi kwuɽbeni ndalu mac, ṯaŋwu ner ofḏani duŋgwun eḏundeḏa owɽu wuŋwun; na mer ere zayḏa mac eḏundeḏa owɽu wuŋwun ya eḏi fiyaŋini, ner ofḏani eḏi kwuɽbeḏa ndalu. 7 kaka iti ofḏanar gwu mac eḏi kwor kwere kwuɽbeni ndalu, kaka aɽinaŋw gwu Allah ŋiniṯ ŋi, lakin kwaw ta, eṯuŋw eni ŋiniṯ ŋeḏi kwor. 8 (kaka iti daɽmaḏi gwu Allah kworu aŋna yi weḏi kwaw mac, lakin nuŋw daɽmaḏa kwayu aŋna yi weḏi kwor. 9 na Allah ere daɽmaḏa kworu mac ŋiɽaŋal ŋi ŋeḏi kwaw, lakin nuŋw daɽmaḏa kwayu ŋiɽaŋal ŋi ŋeḏi kwor.) 10 ŋinderṯa ŋu ŋeŋgi ŋi kwaw kwuɽbena ndalu, eḏi gi baŋaci zulṯa kweḏi kwor ki yey-na yeḏi limaleyka. 11 (lakin eḏi Kweleny-na, na kwaw ere orɔ minmin oɽeny mac, kwiira kworu-na, ya kwor eḏorɔ minmin kwiira kwayu-na; 12 kaka daɽmaḏi gwu Allah kwayu aŋna yi weḏi kwor, ner ṯa orɔ kirem, eṯir ilŋiiḏa kworu nani gwu kwaw, na kwɔmne tatap ruḏa nani gwu Allah.) 13 ṯeceri ŋiɽanali ki rɔgwɽɔ ralu eḏizeze. ŋofḏana eḏi kwaw kwere ari Allah ki yiriny nda li liti likwuɽbene lu mac, a? 14 ṯurmun ṯiti ṯilŋiiḏini ŋazi manya eḏaruŋw, ma kwor kwere mulḏaḏa owɽu lu wuŋwun, eṯir orɔ feḏiya nanuŋw gwu, 15 lakin ma kwaw mulḏaḏa owɽu lu wuŋwun eṯi keni ŋiniṯ orɔ ŋuŋun, kaka inḏeḏer gwu owɽu eḏorɔ ṯukwuɽbenalu ṯuŋwun. 16 lakin, muŋw naŋni kwere eḏi məmilḏi, a kwende kweḏi ri ŋiɽaŋali ŋere ŋurtuŋw deŋgeri-na, ya eḏi zi yaniiza yeḏi Allah.
ṯikiyazi lu ṯeḏi kuruu keḏi ṯarbeza
17 lakin, ma ŋazi ilŋiiḏini ŋu ta, ner nani ŋete ŋiti ŋimɔ ŋi iɽi-na mac, rayḏi ŋa gwu duŋw ŋiti ŋeṯi ŋi ofḏazi mac. 18 kaka niŋnanyi gwu, kerre-kerreny, a leṯirayḏa duŋw kaniiza-na lundenena; ŋenyjemni ŋu ŋɔkwɔ tɔk, 19 kaka ofḏanar gwu eḏi ṯundenena nani daŋgal-na eḏi zi ṯi ruwecelu kla leṯinanni eḏi Kwruztu-na rerem. 20 kinaŋw ma oɽmaṯi duŋw ta, eḏne wa weri ye witi wiri weḏi kuruu keḏi ṯarbeza ṯeḏi Kweleny mac. 21 kaka iiḏina ŋa gwu ta, a leṯi illalu ŋɔdor ŋɔdor eḏne yi na ṯigir ṯi ṯalu, mindaŋ eṯir nani lɔkwɔ yaŋwu yi, na liḏaḏu eṯir urleli. 22 anna! a liti leḏi yiŋna eḏi gwu eḏne-na manya? na eḏi gwu ii tɔk manya? ya ŋaŋa, a leṯi ruzi kaniiza kedi Allah luŋw mindaŋ eḏi zi inḏeḏa feḏiya kla liti leḏi eḏneya-na mac. nyi kwɔŋazeca ḏa? nyi kwami ŋazi li-na? beri, nyi kwende kwamina.
23 kaka afanyji gwu nani gwu Kweleny ŋundu, ŋa ŋimɔ ŋazi andaci, ŋeni ŋu: ki lomur limerli bɔŋwuḏi Kwelenyi kweni Yecu, ma kirakalu orɔ ta, nuŋw dimi eḏneya wir kafa, 24 mindaŋ muŋw eca zukran, nuŋw undena, nuŋw zi eca ŋwu: aŋna winyi wiri wu, wumerŋazi kiici, eṯizerri ṯaŋwu eḏi ŋi ṯiŋayini nyuŋwu. 25 ŋwu ṯa, mer eḏne, nuŋw dimi tiṯraŋi tɔk, nuŋw zi eca ŋwu: tiṯra kru teni ṯikitaḏiza ṯiaŋ ŋin ŋi ŋinyi; eṯizerri ṯaŋwu ki ŋwomur ŋwere ŋwere ŋweṯi ŋa ŋi ii, eḏi ŋi ṯiŋayini nyuŋwu. 26 ner ṯa orɔ ŋwu, ki ŋwomur ŋwe ŋi ye eḏneya wu, na eḏi zi ii ŋeḏi tiṯra tɔk, ŋeṯi ŋazi baŋaci ŋeḏi ŋiɽany ŋeḏi Kweleny mindaŋ muŋw aɽa.
27 ŋwu ṯaŋwu, muŋw ye kwere eḏneya wu, muŋw zi ii ŋeḏi tiṯra kru teḏi Kweleny tɔk, kwiru rugwor-na riɽen riɽen, eṯuŋw eni kwuməkici Kwelenyi lomori puɽcur aŋna yi na ŋin ŋi ŋuŋun tɔk. 28 ṯaŋwu, eḏi kwizi izanni ki rɔgwɽɔ-na ruŋwun kerreny, mindaŋ ŋwu ma ye eḏneya, ŋwu zi ma ii ŋeḏi tiṯra tɔk. 29 kaka eṯi gwu kwizi ŋgwa kweṯeḏne, na kweṯi ii tɔk kwiti kwilŋiica mac eḏaruŋw, aŋna wuŋwun wiri wu eḏi nii-na, eṯuŋw efica rɔgwɽɔ ruŋwun hukma. 30 ṯaŋwu eṯir nani luru daŋgal-na lajila nana, na luma tɔk, na lɔkwɔ luru linḏiri ŋwaru ŋweni ŋiɽany. 31 lakin mer icinina ki rɔgwɽɔ-na rerem, eṯi Kweleny ere ruzi nyuŋwuzi kaṯi mac. 32 na muŋw hakwumi nyuŋwuzi ta, eṯir eni lirətina əpa yi weḏi Kweleny mindaŋ mer nyji ere kiraza lu ṯurmun ṯi-na mac. 33 ŋwu ṯaŋwu, lieŋgeri linyi, ma rayḏa duŋw eḏeḏne, eṯi nanji liaŋgalu lu liḏaḏu— 34 muŋw nani kwere yaŋwu yi, ŋofḏana duŋgwun eḏiiḏina duənu, —mindaŋ ma rayḏa duŋw ta, er ŋazi ere ruzi kaṯi mac. na ŋeḏi kwɔmne kwir ter ta, eḏir nani mindaŋ menyila ta, ŋazi ma ṯimaci.
1 Ṯǝccinǝr-nyii kaka nǝṯiny-gwɔ ṯǝccini Kwɔrɔstɔ-ŋw.
Ṯukwuɽubǝnnǝ nda-lɔ ki-ṯaarana kiyiiriny.
2 Nyii ŋgwɔ kwubɽǝthi-ŋǝsi yiriny kaka nǝṯir-nyii-gwɔ kikithaayini dok-dok, nǝ kaka nǝṯi-gwɔ rɔɔmi ṯa@liima-lɔ tok kitha ṯinḏǝthǝ-ŋǝsi. 3 Laakin nyii kwɔnaŋna-ŋǝsi ethisi elŋe ŋɔ ŋǝniŋw, nda lǝthi kwɔr lǝni Kwɔrɔstɔ, nǝ lǝthi kwaaw nǝ kwɔlen oro, nǝ lǝthi Kwɔrɔstɔ ta nǝ Allah oro. 4 Mǝ kwɔr kweere aari kiyiiriny ya mɔŋw andasi ŋiɽaŋali ŋǝthi Allah ki-lizi-nǝ kwɔgwuɽubǝnnǝ nda-lɔ, ǝṯɔŋwɔni kwiti kwiiɽǝ Kwɔrɔstɔ-ŋw-na mac. 5 Na mǝ kwaaw kweere aari kiyiiriny ya mɔŋw andasi ŋiɽaŋali ŋǝthi Allah ki-lizi-nǝ kwiti kwɔgwuɽubǝnnǝ nda-lɔ mac tǝ, nɔŋwɔni kwiti kwiiɽǝ kwɔlen-na mac. Nǝ nǝrṯoro ŋette-ŋette ŋir kaka ǝṯɔŋw fiyǝŋni. 6 Na mǝ kwaaw kweere ere naŋni ethi kwuɽubǝnni nda-lɔ mac tǝ, e-ta nǝr ɔvthanni ethi undǝthǝ ǝwɽu wuuŋwun; laakin mǝr rɔɔthatha kwayɔ fǝthiyǝ duŋgwun ethi fiyǝŋni alla ethi undǝthǝ ǝwɽu tǝ, ŋwɔ kwuɽubǝthǝ nda-lɔ. 7 Nǝ kwɔr tǝ, nǝr ɔvthanni laazim ŋweere kwuɽubǝthǝ nda-lɔ luuŋwun mac, kaka nɔrɔ-ŋgwɔ suurǝ nǝ ŋinith ŋǝthi Allah; laakin kwaaw tǝ, nɔŋworo ŋinith ŋǝthi kwɔr. 8 Kaka niti nigittina-gwɔ kwɔr kwaaw-ŋgi mac, laakin nǝ kwaaw oro kwɔgittina kwɔr-ŋgi. 9 Nǝ kwɔr ere kettinice kwayɔ mac, laakin nǝ kwaaw oro kwɔgittinicǝ kwɔɔrɔ. 10 Nǝrṯoro ŋɔ ethi kwaaw laazim kwuɽubǝthǝ nda-lɔ luuŋwun sǝbǝb-gi kwǝthi limeleka. 11 Ki-ŋimiitha-na ŋǝri ethi Kweeleny-na, ǝṯi kwaaw ere nanni kwiira kwɔɔrɔ-na mac, wala kwɔr ethi nanni kwiira kwayɔ-na. 12 Nǝ kaka nigittina-gwɔ kwaaw kwɔr-ŋgi, nǝrṯoroŋw tok, nǝ kwaaw oro kwilŋithi kwɔɔrɔ. Nǝ kwomne tatap iila naanɔ-gwɔ Allah. 13 Aarir-ŋi ṯi ŋɔ haakima ki-rogɽo-na raalɔ, ŋɔvthanna ethi kwaaw aari kiyiiriny kwiti kwɔgwuɽubǝnnǝ nda-lɔ mac-a? 14 Arpa, ṯobii@a ṯiti ṯǝccǝ-ŋǝsi @allima mac-a mǝ kwɔr uli ǝwɽu ǝṯi fǝthiyǝ oro duŋgwun-nǝ? 15 Laakin mǝ kwaaw uli ǝwɽu wuuŋwun tǝ, ǝṯi ŋisanna oro duŋgwun-pǝ. Kaka ninḏǝthǝr-gwɔ ǝwɽu ethoro ṯugwuɽubǝthǝ ṯǝthi nda luuŋwun. 16 Laakin mɔŋw-tǝ naŋni kweere ethitǝ ɔppathalɔ dɔṯṯɔk, nǝ ŋɔ tatap ŋǝnyji andasi, a kwende kwǝthir ǝthiyǝ weere wir ter wala ki-ṯaarana kiyiiriny, wala ki-yǝniisǝ-nǝ yǝthi Allah.
Sherikǝ kwǝthi Kweeleny.
(Maṯṯa 26:26-29Mɔrgus 14:22-25Luuga 22:14-20)17 Laakin ŋɔ ŋinḏi tǝ, nǝŋseere naŋni ethi biɽǝthǝ yiriny mac, kaka nǝṯi-gwɔ ṯɔɽɔmaṯṯa ṯaalɔ ere ǝthi ŋiɽaŋali-na ŋisaaw mac, laakin ǝṯir-ǝni ŋigii. 18 Nyii kwiniŋnalɔ ker-kerreny ethaarɔŋw, mǝ aaɽathi dɔŋw kǝniisǝ-nǝ ǝṯi ṯundǝnnǝnǝ naani daŋgal-na, na nǝnyii ǝmmini kwokwo rac ethaarɔŋw ŋiɽaŋal ŋɔ ŋir rerrem. 19 Ŋilŋithina rac ethaarɔŋw laazim a ṯundǝnnǝnǝ naani daŋgal-na, mindaŋ mǝr elŋethine-lɔ por-por daŋgal-na, mindaŋ mǝr elŋethine dedder kila lifirlli ki-ṯǝmminǝ-nǝ. 20 Kinaŋw nǝṯi ɔɽɔmaṯṯi dɔŋw, ǝṯi sherikǝ ere oro ŋgwa mac kwǝthi Kweeleny kwiithiŋǝ. 21 Nǝrṯoroŋw meele ethi ethne tǝ, ǝṯi iilalɔ ŋodor-ŋodor ethne-yi waalɔ mindaŋ ǝṯɔŋw naani kwette yaaŋwɔ-yi, nǝ kwɔthaathɔ ǝṯɔŋw urlǝli. 22 Ǝpǝ? Ŋaaŋa liti lǝthi dɔɔnɔŋw-na mac kwǝthi-gwɔ ithna, nǝ kwǝthi-gwɔ iithǝ tok mac-a? Alla ŋaaŋa linaŋna ethi ruusi kǝniisǝ-lɔŋw kǝthi Allah, mindaŋ ǝṯisi ṯɔrony mithǝ kila liti lǝthi kwomne kweere mac? Ŋindǝr ŋǝndu ŋigittathi-ŋa-gwɔ duŋgwunyii ethisi andaci ŋaaŋwɔsi ŋǝthi ŋiɽaŋal ŋɔ? Nyii kwɔŋǝsi biɽǝthǝ yirinyǝ? Bǝri, nyiiti kwɔŋǝsi biɽǝthǝ yiriny ḏuṯ.
23 Kaka tǝ ŋa ŋaava-nyji naanɔ-gwɔ Kweeleny nǝŋǝsi tǝllicǝ ŋǝniŋw, kulŋǝ-ṯǝ ŋga kimǝr-gi bɔɔŋwɔthi Kweelenyi kwǝni Yǝcu, nɔŋw dimmi rǝghiivǝ, 24 mindaŋ mɔŋw-ri ǝccǝ Allah shukran, nɔŋwsi undǝnǝ nɔŋwaarɔŋw, “Aŋna wiinyi wir wɔ wǝni ŋaaŋa. Ǝṯisi ǝrri ŋɔ ethi-ŋi kikithaayini nyuŋwɔ.” 25 Nǝrṯoroŋw ŋette-ŋette mǝr ethne tǝ, nɔŋw dimmi tiṯiraŋi nɔŋwaarɔŋw, “Tiṯira kɔrɔ tir wa@ḏ wiyaŋ wǝthi ŋin ŋiinyi. Ǝṯisi ǝrri ŋɔ ŋwɔɔmɔri tatap ŋwɔṯisi-ŋi ii, ethi kikithaayini nyuŋwɔ.” 26 Ŋǝni-ŋwɔ, ki-ŋwɔɔmɔr tatap ŋwɔṯi-ŋi yee rǝghiivǝ kɔrɔ, nǝ ǝṯisi ii ŋǝthi tiṯira kɔrɔ tok, ǝṯǝni lǝṯisi ruwǝzǝlɔ ŋǝthi ŋiɽany ŋǝthi Kweeleny mindaŋ mɔŋw aaɽa kimaara.
27 Ŋwɔṯaŋw mɔŋw yee kweere rǝghiivǝ alla mɔŋwsi ii ŋǝthi tiṯira tǝthi Kweeleny kwiti kwɔvthanna mac tǝ, ŋworo kaṯṯi kaka mɔŋgwɔ ǝkkici Kweelenyi puɽucur aŋna-yi nǝ ŋin-ŋi ŋuuŋun tok. 28 Ethi kwizi ecce rogɽo-na ruuŋwun kerreny, e-ta ŋwɔmǝ yee rǝghiivǝ nǝ ŋwɔsi-mǝ ii ŋǝthi tiṯira tok. 29 Nǝ kweere mɔŋw ethne, nǝ mɔŋwsi ii tok, kwiti kwilŋithi ma@na kwǝthi aŋna wǝthi Kweeleny mac tǝ, ǝṯɔŋwɔni kwithna nǝ kwiyǝnnǝ hɔkwɔma ki-rogɽo ruuŋwun tok. 30 Ŋindǝr-ṯǝ ŋɔ mindaŋ nǝrmǝ naani luuru daŋgal-na luumǝ nǝ lajla tok, mindaŋ nǝrǝni limǝ ai littǝzir. 31 Laakin mǝrecce rogɽo-na rǝri ker-kerreny tǝ, ǝreere iila ki-hɔkwɔm-na wǝthi Allah mac. 32 Laakin mǝnyji Kweeleny ǝccǝ haakima, nǝ mɔŋw tatti nyuŋwsi tok ta, e-ta ǝrinyjeere ǝccǝ haakima dɔŋw ṯurmun-thi mac. 33 Ŋwɔṯaŋw liyǝŋgǝri liinyi, maaɽathi dɔŋw ethi ethne tǝ, ǝṯi akkathisi kisǝn naana, 34 na mǝ yaaŋwɔ yee kweere tǝ, ethɔŋw ithna dɔɔnɔ, mindaŋ mǝŋǝsi Allah ere ǝccǝ haakima mac kinaŋw maaɽathi dɔŋw. Nǝ ŋa ŋithaathɔ ethir naani mindaŋ mǝnyii iila tǝ, ŋǝsi-mǝ iisacci.