Yasuuⓐ a kwa gwa Saamira
1 Dina ma Kweleny liŋa darnu Farriisiyiin limadiŋini darnu Yasuuⓐ gwigeto calmiz joinyadhanu, ŋwulⓐamidhe joinyadhanu di Yuuẖanna, 2 (Yasuuⓐ gwati gwiro cucun gwina gwathiⓐamidhe no, abi calmiz juŋun ro jathiⓐamidhe,) 3 ŋwugathani Yahuudiiyuŋw, ŋwela Jaliil manaŋ. 4 A aram gwela Saamira gwai. 5 Ŋwobani gi len leta la Saamira, lina lan Suukhaar, githo kalo gina gidhedhi Yaⓐguub ŋari ŋuŋun ŋan Yuusuf. 6 Biir gwa Yaⓐguub gwijo mine, a Yasuuⓐ mule nono kwilaŋ, ŋwujalo kalbiir alaŋ kaŋin ganu.
7 A kwa gwa Saamira eladha daŋire ŋau; a Yasuuⓐ aicinu, Dhedhiny nyiye. 8 (Ŋinena ma calmiz juŋun ela gi len delia ŋida ŋa dheny.) 9 A kwa gwa Saamira aicinu, Kworaŋ ŋa, gwina gwiro Yahuudi, nyi bothaije galo iye gwai, ŋinena riny kwa gwa Saamira? Ŋinena athi Yahuud iŋiriyo Saamiriiyiin lai no. 10 A Yasuuⓐ abiŋaijo, ŋwaici, Ada ŋa gwina gwiliŋidhii dhedhaŋw tur gwa Kalo, a gwina gwothaijaŋa galo iye gwai; gwaŋai othaije galo, a gwaŋa dhedha ŋau ŋina ŋimidho. 11 A kwa aicinu, Kweleny gwai, au gwati gwuthi kwoiny gwa dhodha ŋau no, a biir gwolaŋ ganu; abi ŋaŋal apana ŋau ŋina ŋimidho a? 12 Ŋa gwinunu di babo gwuri gwan Yaⓐguub, gwina gwidhedhije biir, athuŋwuniye, a keleŋa guŋun a dhola dhuŋun a? 13 A Yasuuⓐ abiŋaijo, ŋwaici, Gwina gweye ŋau ibiŋa gwaji gwa odha eny manaŋ; 14 Abi gwina gweye ŋau ŋina ŋaji ŋinyildhedha gwati gwa odha eny gatur no; abi ŋau ŋina ŋaji ŋinyildhedha ŋaji ŋaro dugun ŋinena lijigeny lina lathirthedhe di midhe gwortal. 15 A kwa aicinu, Kweleny gwai, dhedhiny ŋau ibiŋa athiny odha ithi no, i athathiny oradhi daŋire no. 16 A Yasuuⓐ aicinu, Idhi, ŋa urnia kwoma gwuŋa, nya ila mina. 17 A kwa abiŋaijo, ŋwaici, Nyi gwati gwuthi kwoma no. A Yasuuⓐ aicinu, Ŋa gwimabiŋi momaŋ ŋa gwati gwuthi kwoma no. 18 Ŋinena uthaŋa loma thudhina; a gwina gwuthaŋa ŋinena gwuŋa gwutu no; gi dhuŋun ibidha ŋa gwabiŋu titiganu. 19 A kwa aicinu, Kweleny gwai, nyi gwimaŋa ŋa gwiro ŋinena nebi. 20 Baboŋa luri lathorthadha Kaloŋa gi len ibila; nya barnu Urushaliim gwiro kalo ga dhorthadha Kaloŋa. 21 A Yasuuⓐ aicinu, Kwa gwai, uminyu dhuŋuna dhiny, saaⓐa jaji jila jina jati jainya jai orthadha Babuŋw gi len ibila, i gi Urushaliim no. 22 Nyaŋa lathorthadha ŋida ŋina ŋati ŋiliŋidhanyalo no; athanalbi orthadha ŋina ŋiliŋidhanalo; ŋinena dhuŋun dhadhi gilaŋ dhidhi di Yahuud. 23 Abi saaⓐa jaji jila, a jo ŋinena, ma liji lina lathorthadha Kaloŋa titiganu galorthadha gi dhigirim a gi dhuŋun dhina dhiro titiganu; ŋinena bupilo Babo lina liro minoŋ dilorthadha. 24 Kalo giro Dhigirim; a lina lorthadha, aram galorthadha gi dhigirim a gi dhuŋun dhina dhiro titiganu. 25 A kwa abiŋaijo, ŋwaici, Nyi gwiliŋidhi darnu Masiiya gwaji gwila, gwina gwan al Masiiẖ; muŋwila, gwijabiŋaijo dhuŋuna peth. 26 A Yasuuⓐ abiŋaijo, ŋwaici, Nyi gwiro ibigwa gwina gwabiŋaijaŋa.
27 A ŋinena ma calmiz juŋun ila, alali galo dir ŋinena odaijilo kwa gwai; athibi kwiji gweta arnu, Au gwibupaŋa no? i kworaŋ nya babiŋi kwa gwai no? 28 A kwa gathani gidhe ga ŋau, ŋwela gi len, ŋwabiŋaijo lijo, ŋwulaici, 29 Ilal, nyaŋa kwijo gwina gwabiŋaijiny dhuŋuna peth dhina dhathiny apai. Gwati gwiro al Masiiẖ na? 30 Algathana lena, alila dugun. 31 Kaija ibige a calmiz juŋun abiŋaijo, alaici, Muⓐallim gwai, ithi. 32 Ŋwulbaicinu, Nyi gwuthi ŋida ŋa dheny ŋina ŋati ŋiliŋidhanyalo no. 33 A calmiz othaijiye galo, alarnu, Gwiman kwiji gweta upijo ŋida ŋa dheny a? 34 Al Yasuuⓐ aicinu, Ŋidi ŋiny ŋa dheny ŋiro ŋa dhapai dhuŋuna dhuŋun gwina gwukejiny, a dimeaje ŋiro ŋuŋun. 35 Nyaŋa lati latharnu, Luwa loma kworoŋo la dhuna na? Aŋadhul, nyi gwa gwabiŋaijaje, ŋajaici, Daŋadhul galo, nya datiŋa galo gi dhiruiny ganu; ŋwima udhe ŋwa dhuni. 36 A gwina gwathapai ŋiro ŋa dhuni gwapai ujra yuŋun, alwureje ŋwona liduŋw di midhe gwortal; a gwina gwathikwoi a gwina gwathuni liŋir dugore. 37 A dhuŋun dhina dhatharnu, Gweta gwathikwoi, a gweta gwathuni, dhiro titiganu. 38 Nyi gwukejaje duni ŋwona ŋwina ŋwati ŋwapanyana ŋiro ganu no; liji liter lapo ŋiro, nyabi madhadhe ŋiro ŋegen.
39 A Saamiriiyiin loinyadho la len ibile uminyi Yasuuⓐuŋw, ŋinena maldiŋini dhuŋuna dha kwa dhina dhabiŋaijuŋwulo, ŋwulaici, Gwabiŋaijiny dhuŋuna peth dhina dhathiny apai. 40 Ma Saamiriiyiin ela dugun, alothaije galo, alaici, Ada ŋa gwimuminyi, ŋajalo mina. Ŋwujalo mine ŋwamun ram. 41 A gi dhuŋun dhuŋun a liji loinyadho gwuleny uminyi. 42 Alaici kwaio nu, Ŋinena manuminyi, gwati gwuminyudhana gi dhuŋun dhuŋa dogo no; anabi diŋini, analiŋa darnu ŋeda gwiro al Masiiẖ titiganu, gwina gwiro Mukhallis̱ gwa gidhila.
Yasuuⓐ gwiŋiriyo ŋare nono ŋa kweleny gweta gwa Jaliil
43 A ma ŋwamun ram erna ŋwugathani kaloŋa ibige, ŋwela Jaliil. 44 Ŋinena abiŋina Yasuuⓐ, ŋwarnu, Nebi gwati gwuthi nuŋw gi len luŋun no. 45 Dina muŋwobani Jaliil, a Jaliiliyiin uminyi, dina aŋudhilo dhuŋuna peth dhina dhapuŋw gi Urushaliim gi ŋidwa; ŋinena ko iledhilo ŋidwa. 46 A Yasuuⓐ aura manaŋ Gaana ga Jaliil, kalo gina gimidineyuŋwuna ŋau ŋa dugur. A kweleny gweta je, gwina gwuthi ŋare ŋuma Kafranaaẖuum. 47 Dina muŋwdiŋini darnu Yasuuⓐ gwimagathana Yahuudiiyuŋw ŋwila Jaliil, ŋwela dugun, ŋwothaije galo gwuleny ŋwari gwaiula ŋwudirijo ŋare galo ŋuŋun; ŋijo githo dai. 48 A Yasuuⓐ aicinu, Mathaŋa aŋadhi ŋiro ŋina ŋipiŋipa a dhuŋun dha dhalije galo dir no, au gwati gwuminyu gatur no. 49 A kweleny aicinu, Kweleny gwai, ula kwereny nanaŋ ŋari ŋiny ŋina ŋitiny ŋati ŋaio no. 50 A Yasuuⓐ aicinu, Idhi gwiŋir dhugore; ŋari ŋuŋa ŋamidhe. A kwiji uminyi dhuŋuna dhina dhabiŋaijo Yasuuⓐ, ŋwela. 51 A dina juŋw dule, albudhe jadham jai juŋun, alaicinu, Ŋari ŋuŋa ŋimidho. 52 A dina muŋwulothaije galo, ŋwulaici, Ŋari ŋiŋirii nono kaija girau? Alaicinu, Ŋiŋirii nono saaⓐa jetipo dilaŋina. 53 A babo liŋa darnu saaⓐa jiro jeta jeta jina jar jai Yasuuⓐ ŋari ŋimiŋir nono; ŋwuminyi, a liji peth la dunu gwuŋun. 54 Ŋiro ibiŋa ŋina ŋipiŋipa ŋina ŋigodhaijo ŋiro ram ŋina ŋapilo Yasuuⓐ, dina gathanuŋw Yahuudiiyuŋw ŋwela Jaliil.
Yǝcu-ŋǝ kwaaw-gi kwir Kwɔsaamira.
1 Nǝ Lifirriisiiyyiin elŋece ethaarcŋw Yǝcu ŋgwana kwǝti ǝgini, nǝ ǝṯɔŋwɔccǝ ṯalaamiiza @ammiḏa ṯuuru ethi Yuhanna-la. 2 Nǝ Yǝcu rogɽo-ri ruuŋwun-tǝ, nɔŋweere ǝccǝ kwizi kweere @ammiḏa mac; laakin nǝ ṯalaamiiz oro ṯoɽok ṯuuŋwun. 3 Nǝ mǝsi Yǝcu neŋne ŋa ŋandinna, nɔŋw ɔrlacca Yahuuḏiiyyǝ-ŋw ŋwɔdɔŋw, nɔŋwaaɽitha Jǝliil. 4 Nǝ kinaŋw ninḏiŋw nɔŋwɔni kwindi ethi ruu Saamira-ŋgi-na. 5 Mɔŋw ɔppathi Saamira nɔŋw iila ki-mǝḏiinǝ-nǝ kwǝni Sɔɔkhaar, kwɔnanyja ṯɔrɔny keṯṯɔk ṯinḏǝthǝ Ya@guub tiɽiŋǝyin tǝni Yuusuf. 6 Nǝ ṯill ṯǝthi Ya@guub naani kinaŋw, nǝ kaka mǝgwɔ Yǝcu mɔɔli ŋiɽaŋal-ŋi ŋǝthi kilyǝ, nɔŋw naanalɔ ṯill kǝni. Nǝ ki-lɔɔmɔr-la ṯǝ kila tǝ, nǝ aaŋwɔn rilli kelgeny-na tittir. 7 E-ta nǝ kwaaw iila kwir Kwɔsaamira ethi aŋri. Nǝ Yǝcu ǝccǝŋw, “Nḏǝthǝny ŋaaw nyjii.” 8 Kaka mǝgwɔ ṯalaamiiz ṯuuŋwun ele ki-mǝḏiinǝ-nǝ ethi liṯṯa ethneya. 9 Nǝ kwaaw kwir Kwɔsaamira ǝccǝŋw, “A kwotho kwuṯucǝny-lɔ ŋaaw-ŋi ŋata kwir Yahuuḏi, nǝ nyii-tǝ ninyoro kwaaw kwǝthi Saamira-ŋw?” Kaka nǝṯi-gwɔ Yahuuḏ-ŋǝ Lisaamiriiyyiin-li durnǝthisinǝ. 10 Nǝ Yǝcu ǝŋnici nɔŋwɔccǝŋw, “Ǝŋgi elŋe haḏiiyyǝ wǝthi Allah, nǝ ǝyǝ kwir-ŋgwa kwǝccǝ-ŋǝŋw, ‘Nḏǝthǝny ŋaaw nyjii’, ǝŋgi uṯici ŋunduŋw-lɔ, mindaŋ ǝŋgwɔŋw inḏǝthǝ ŋaaŋwɔ ŋaaw ŋimiithɔ.” 11 Nǝ kwaaw ǝccǝŋw, “Yaa Sǝyyiḏ, a kwende kwǝthi kwomne kweere kwǝthi-gi alla ŋaaw, ŋaaɽi nǝ ṯill ɔlɔna too; e-ta amaava ŋaaw ŋimiithɔ ṯaka? 12 A kwɔthǝmthi ŋa ṯǝrnyǝriŋw-lǝ ṯǝri ṯǝni Ya@guub, ṯinḏǝthǝ-nyji ṯill kɔthɔ, nɔŋwsii rogɽo-ri ruuŋwun, nǝ nyiɽiŋǝyin-ŋǝ ŋirel-ŋi ŋuuŋun-ǝ?” 13 Nǝ Yǝcu ǝŋnici nɔŋwɔccǝŋw, “Kweere kwii ŋaaw; ŋɔ a ǝwthǝ yee kwokwony, 14 laakin kweere kwii ŋaaw ŋǝnyji inḏǝthǝ a ǝwthǝ ere yee kwokwony ḏuṯ. Nǝ ŋaaw ŋa ŋǝnyji inḏǝṯhǝ ǝroro ḏuŋgwun-nǝ ṯuwǝ ṯǝṯi irṯǝṯhi dok-dok, mindaŋ ŋwuurǝnni ŋimiitha-na ŋǝṯi nannitha dok-dok.” 15 Nǝ kwaaw ǝccǝŋw, “Yaa Sǝyyiḏ nḏǝthǝ-nyii ŋaaw ṯǝ ŋa! Mindaŋ ǝnyii ǝwthǝ ere yee kwokwony mac, wala ethiila kwokwony kɔnɔŋw ethi aŋɽi.”
16 Nǝ Yǝcu ǝccǝŋw, “Nḏi ɔrnɔṯa kwɔɔrɔ kwɔɔŋa ǝgi iila kɔnɔŋw.” 17 Nǝ kwaaw ǝŋnici nɔŋwɔccǝŋw, “Nyiiti kwǝṯhi kwɔɔrɔ-na mac.” Nǝ Yǝcu ǝccǝŋw, “A kwaami andasiŋw, naariŋaŋw, ‘Nyiiṯi kwǝthi kwɔɔrɔ-na mac; 18 kaka nǝthiŋǝ-gwɔ lɔɔrɔ ṯɔthni kerreny, nǝ ŋgwana kwǝthi-ŋǝ kire-kirem-ŋgwɔ kwiti kwir kwɔr kwɔɔŋa mac, ŋandisa-ŋasi ŋir rerrern.” 19 Nǝ kwaaw ǝccǝŋw, “Yaa Sǝyyiḏ, nyii-ŋgwɔ kwɔmǝ-ŋǝ elŋece a kwɔrɔ kwiɽii. 20 Ǝṯi rǝrnyǝri-ŋǝ rǝri kwogwɔccelɔ kaayin-la wɔ, laakin ŋaaŋa lir Yahuuḏ tǝ, ǝṯaarɔŋw, Urshaliim kwir ǝzir wɔvthanna wǝthi-gwɔ kwocce Allah-lɔ.” 21 Nǝ Yǝcu ǝccǝŋw, “Kwaaw kwaalɔ, ǝmminicǝ-nyii, saa@ ŋgwa kwinḏi ethiila kwiti kwinḏi-gi lizi ethi kwocce Papa-ŋwɔ-lɔ kwiinyi wala kaayin-la wɔ wala Urshaliim. 22 Ŋaaŋa lir Lisaamiriiyyiin ŋaaŋa liti lilŋithi ŋgwa rerrec mac kwǝṯi kwogwɔccelɔ; laakin nyiiŋǝ lir Yahuuḏ tǝ, nǝnyii elŋe ŋgwa kwǝṯi-nyii kwogwɔccelɔ, kaka ninḏi-gwɔ ŋiglǝthǝ ethiila Yahuuḏ-yi. 23 Nǝ saa@ ŋgwa kwinḏi, nɔŋw-ṯǝ kǝniny ɔro-ŋgwɔ kwinḏi-gi lizi eṯhi kwogwɔcce Papa-ŋwɔ-lɔ kwiinyi ŋɔma-ŋi ŋǝthi Ṯigɽim ṯǝthi Allah, ṯɔgwɔccathalɔ ṯir rerrem, ṯir kaka ṯinaŋnaŋw ŋundu. 24 Allah wir Ṯigɽim, nǝ kila lǝṯi kwogwɔcce ŋunduŋw-lɔ, laazim ǝri kwogwɔccelɔ ṯigɽim nǝ rerrem tok.” 25 Nǝ kwaaw ǝccǝŋw, “Nyii kwilŋithi rac ethaarɔŋw. Masiiyya ŋgwa kwinḏi ethiila, mindaŋ mɔŋw iila tǝ, kwǝnyji ilŋithini kwomne tatap.” 26 Nǝ Yǝcu ǝccǝŋw, “Nyii Kwirṯa-pa ŋgwɔ kwandisa-ŋa-gi.”
27 Nǝ kinaṯa kinaŋw-lɔ, nǝ ṯalaamiiz ṯuuŋwun ɔppatha. Nǝr liŋɽi etheese ŋunduŋw kwandisar kwaaw-gi, laakin nɔŋweere kweere mac kwǝccǝŋw, “Aatha kwir kwɔnaŋnathiŋa?” ya, “Kwotho kwandisa-ŋa-gi?” 28 E-ta nǝ kwaaw ṯayyi tii-lɔ ṯuuŋwun tǝthi ŋaaw, nɔŋw ele ki-mǝḏiinǝ-nǝ, nɔŋwɔccǝ lizi-ŋw, 29 “Ilar-ṯi ese kwɔɔrɔ kwɔmǝ-nyii andica kwomne tatap kwǝrri-rǝ-nyii. Kwɔrɔstɔ kwiti kworo-ŋgwɔ mac-a?” 30 Nǝr ruuthǝ ki-mǝḏiinǝ-nǝ nǝreele naanɔ-gwɔ Yǝcu.
31 Nǝ ṯalaamiiz tuurǝccǝlɔ kinaṯa-kinaŋw nǝrǝccǝŋw, “Yaa Ma@allim iithi-ṯǝ kwomne kweere!” 32 Laakin nɔŋwsi ǝŋnici nɔŋwsi ǝccǝŋw, “Nyii kwǝthi ethneya witi wilŋithiŋǝ mac.” 33 Nǝ ṯalaamiiz andasi deŋgen-na nǝraarɔŋw, “Kwɔmǝ mǝnyjǝ-tǝ kwizi kweere ǝvicǝ ethneya?” 34 Nǝsi Yǝcu ǝccǝŋw, “Ethne wiinyi wir, ethisi ǝrri ṯɔgwor-thi ṯǝthi ŋgwa kwɔɔsa-nyii, mindaŋ ethi ṯimmaci ŋothɽor kworo ŋuuŋun. 35 Ŋaaŋa liṯi lǝṯi aari mac-ŋwɔ, ‘Yǝwǝ kiyita kinnǝ yǝɽinǝ kwaɽiŋan yinḏi-yi ṯɔɔna ethiila?’ Nyii kwǝccǝ-ŋǝsi-mǝ ŋwɔ, dimmǝr-ṯi yǝy ese rɔrɔny rimǝ ṯimmayini rǝthisi ɔni. 36 Ŋgwa kwǝṯi ɔni ǝṯɔŋw aavi ɔjra wuuŋwun, mindaŋ ǝṯɔŋw ruusi ŋwɔɔla dɔŋw ŋwɔṯhi ŋimiitha ŋǝṯi nanni dok-dok; mindaŋ mǝ ŋgwa kwǝthi ṯɔrɔny nǝ ŋgwa kwǝṯi ɔni tok ǝṯir aamina ndǝndǝk. 37 Kaka nǝthi-gwɔ ŋiɽaŋal yǝnǝ ŋǝṯaarɔŋw, ‘Ǝṯi kwizi kwette kwee, nǝ kwɔthaathɔ ǝṯɔŋw ɔni’. 38 Nyii kwɔmǝ-ŋǝsi ɔɔsi ethi ɔni ki-thɔrɔny-nǝ ṯiti ṯakkiŋa-gwɔ ŋothɽor mac; nǝ lithaaṯhɔ oro lakkɔ ŋothɽor kinanaŋw, ŋaaŋa-tǝ noro limǝ kaṯṯasi faayitha ki-ŋothɽor-na ŋeeŋen.”
39 Nǝ Lisaamiriyyiin littǝzir lǝthi mǝḏiinǝ ǝmminici Yǝcu-ŋw ŋiɽǝaŋal-ŋi ŋǝthi shahaada kwǝthi kwaaw kwǝccǝŋw-sigiŋw, “Kwandica-nyii kwomne-ŋgwa tatap kwǝrri-rǝ-nyii.” 40 E-ta mǝ Lisaamiriiyyiin iila naanɔ-ŋgwɔ, nǝr tuurǝccǝlɔ ethi-li naani; e-ta nɔŋw naani ŋwaamin ŋwuɽǝn kinanaŋw. 41 Nǝ luuru ǝmminici ŋunduŋw ŋiɽaŋali ŋuuŋun. 42 Nǝrǝccǝ kwǝyɔ-ŋwɔ, “Nyiiŋǝ liti lǝmminǝ sǝbǝb-gi kwǝthi ŋiɽaŋal ŋɔɔŋa mac, kaka mǝnyji-gwɔtǝ neŋne dɔṯṯɔk rogɽo-ri rǝri wɔɽe-wɔɽeny, mindaŋ ŋimǝ-nyji elŋe rerrem ethaarɔŋw, Kwiglǝthǝ kwǝthi ṯurmun kwirṯa-ŋgwɔ rerrem.”
Yǝcu mɔŋgwɔ sǝwici mɔwozofa tɔɔrɔ tuuŋwun tir toŋwor.
43 Mǝ Yǝcu ṯimmasi ŋwaamin ŋwuɽǝn kinanaŋw, mindaŋ nɔŋw diiɽi nɔŋweele Jǝliil. 44 Kaka naarɔ-ŋgwɔ rogɽo-ri ruuŋwun-ŋwɔ, “Kwiɽii kwiti kwǝṯir iiɽinǝ mac ki-bǝlǝḏ-nǝ kwuuŋwun.” 45 Ṯaŋw nɔŋw iila Jǝliil. Nǝ Lijǝliil aalanni ŋunduŋw, kaka niisacarsi-gwɔ ŋa tatap ŋǝrrǝ ŋwsi Urshaliim ki-@iiḏ-nǝ, kaka ninaanir-gwɔ ŋundu-ŋǝ tok ki-@iiḏ-nǝ.
46 Ŋwɔṯaŋw nɔŋw aaɽitha kwokwony Gaana kwɔnaanɔ Jǝliil kǝzir wuruusǝ-ŋgwɔ ŋaaw kiɽica. Nǝ mɔwozof naani kwette Kafranaahuum kwǝthi tɔɔrɔ tir toŋwor tuumǝ. 47 Mɔŋw neŋne ethaarɔŋw Yǝcu ŋgwana kwɔmǝ iila min Yahuuḏiiyyǝ ethiila Jǝliil, nɔŋweele nɔŋw tuurǝccǝlɔ tur ethɔɔɽi ethi sǝwici ŋunduŋw ṯiɽiŋǝyin, kaka mɔŋgwɔ aadiṯhi ethi ai. 48 Ŋwɔṯaŋw nǝ Yǝcu ǝccǝŋw, “Meere ese ŋilima-ŋwɔsi ŋiɽaŋal-ŋi ŋa ŋir ŋwundǝ-ŋwundǝ mac tǝ, ere ǝmmini ḏuṯ.” 49 Nǝ mɔwozof accǝŋw, “Yaa Sǝyyiḏ, ndɔɔɽi fira-vra niti naayɔ tɔr ṯiinyi kinnǝni mac.” 50 Nǝ Yǝcu accǝŋw, “Nḏi nǝ tɔr tɔɔŋwa timiithi rac.” Nǝ kwɔr ǝmmini ŋiɽaŋali ŋandisasi Yǝcu, mindaŋ nɔŋw iidǝthǝ kithaay nɔŋweele. 51 Nǝ kinaŋw nɔɔɽɔŋw, nǝr biɽithi yaḏaama-yi kithaay mindaŋ nǝrǝccǝŋw, “Tɔr tɔɔŋwa kirana timiithɔ!” 52 E-ta nɔŋwsi uṯicǝlɔ lɔɔmɔr-li limɔŋw-li saawi. Nǝrǝccǝŋw, “Kilgin saa@ kwette kwǝthi kaaŋwɔn-naŋw na hɔmmǝ duŋgwǝci.” 53 Nǝ ṯǝrnyin kithaayini ethaarɔŋw saa@ kwundǝr-ṯǝ ŋgwa kwandica-gi Yǝcu ŋunduŋw nǝccǝŋw-ŋgwɔŋw, “Tor timiithi rac.” Ṯaŋw nǝr ǝmmini lizi-li tatap lǝthi dɔɔnɔŋw kwuuŋwun. 54 Nǝ ŋilim oro ŋɔ ŋir nimrǝ kwuɽǝn ŋǝrrǝsi Yǝcu Jǝliil-nǝ kinaŋw mɔŋwaaɽa min Yahuuḏiiyyǝ.