Dhuŋun dhina dhabiŋu Istifaanuus
1 A kweleny gwa gusus arnu, Dhuŋun ibidha dhiro minoŋ a? 2 Ŋwarnu, Liji lai lina liro limega, a baboŋa, diŋinul. Kalo gina guthi majdh gaŋinijo babuŋw gwega gwina gwan Ibraahiim dina juŋw Ma ben al Baẖren, kwereny nanaŋ gwati gwijo gi H̱aaraan no, 3 ŋwaicinu, Tui gi len luŋa, a gi liji luŋa, ŋela gi len lina laŋa aŋajo. 4 Ŋwubitu gi len la Kaldaaniyiin, ŋwuje mine gi H̱aaraan. A dina ma babo gwuŋun ai, ŋwela gi len lina lathanyan je ŋinena. 5 Athuŋwbidhedhi kaloŋa mine gadhuŋwunje, i gitiny gina gadhuŋwun geta lora luŋun no; ŋwubabiŋaijo darnu guŋwdhedha ŋwulaŋu ŋwuŋun ŋwina ŋwaji ŋwila gidon, ŋinena athuŋw uthi nanaŋ ŋare no. 6 A Kalo gabiŋu minoŋ, ŋwulaŋ ŋwuŋun ŋwaji ŋwaje gi len lina lati liro len legen no; a ŋwaro jine ja liji la len ibile, a ŋwali umeye ŋiya jidhileo arabaⓐ miiya. 7 A liumam lina lirujilo jine laji linyil akimiye nyi, Kalo garna, a gidon gi dhuŋun ibidhe latuiya a linyi orthadha kalo ibiga. 8 A ŋwudhedha dhuŋuna dhina dhidiminu dhadhi uredhini; a minoŋ ŋwuliŋa Isẖaaguŋw, a ŋwura gi lamun lina liro nimra dubaŋ; a Isẖaag liŋa Yaⓐguubuŋw, a Yaⓐguub liŋa lelenya la baboŋa lina liro die‐a‐ram. 9 A leleny la baboŋa ubijo ŋida ganu ŋina ŋuthilo Yuusuf, alelaŋ gi Mas̱r. Athilbije Kalo gai, 10 ŋwubigilaŋiye ŋidi ganu ŋuŋun peth ŋina ŋadhumeye ŋiya, a ŋwudhedha niⓐma a bebra gi je ganu ja Firⓐuun gwina gwiro malik gwa Mas̱r; ŋwuruje kweleny gi Mas̱r alaŋ a gidunu alaŋ gwuŋun peth. 11 Abi gidhuŋur ila gi ŋwen peth ŋwa Mas̱r a Kanⓐaan, a dhuŋun je dhina dhibur gwuleny; athi baboŋa lega bujo ŋida ŋa dheny no. 12 A dina ma Yaⓐguub diŋini darnu ŋwon ŋwo gi Mas̱r, ŋwukeje baboŋaije lega gi lamun lina liro kwerkwereny. 13 A gi lamun lina liro nimra ram a Yuusuf aŋajo limegen darnu ŋeda gwiro; a Yuusuf aŋajo Firⓐuunuŋw limegen. 14 A Yuusuf ukejiye di babo gwuŋun gwina gwan Yaⓐguub, a liji peth luŋun, lina liro dure‐thiril a die‐a‐thudhina. 15 A Yaⓐguub ule gi Mas̱r, ŋwubai, ŋeda, a baboŋa lega. 16 Alapai algwela gi Shakiim, algeta gi dhel ganu dhina dhili Ibraahiim luro la gwarush gwina gwiro faḏḏa gi keleŋa ga H̱amuur gwa Shakiim.
17 Abi dina ma lamun je githo la dhuŋun dhina dhabiŋaijidhai Kalo dhina dhalifijodhai Kalo Ibraahiimuŋw, a liji oinyadhani gwuleny gi Mas̱r, 18 di a malik gwiter dire, gwina gwati gwiliŋidhi Yuusufuŋw no. 19 A ŋeda ibigwa uthi dhuŋuna dhina dhuthi ŋwujimiya ganu gi liji alaŋ lega, athuŋwupijo baboŋaije lega dhuŋuna dhina dhathil umeye ŋiya, dathi ŋwugur ŋwegen guthini por dathil midho no. 20 A Muusa gwiliŋinu kaija ibige, a ŋwubujini gwiŋir gwuleny, ŋwudimini gi dunu gwa babo gwuŋun luweo thiril; 21 a dina muŋw guthini por, a ŋera ŋa Firⓐuun apai, ŋwireje ŋwuro ŋari ŋuŋun. 22 A Muusa alimini bebruŋw peth gwa liji la Mas̱r, ŋwubur nono gi dhuŋun a gi ŋiro. 23 A dina muŋw ro jidhileo dure‐ram, ŋwuthi dhuŋuna gi dhugor ganu dhuŋun duŋwela daŋadha limegen lina liro keleŋa ga Israayiil. 24 A dina muŋw aŋa gweta gwina gwibujo dhuŋuna dhina dhike tur, ŋwudujo gwina gwibujo dhuŋuna dhina dhike, ŋwura galo, ŋwurinya Gwimas̱r. 25 Ŋwari gi dhugor ganu dhuŋun nu udubidi limegen laliŋa darnu laji lal Kalo gilaŋiye dhoi dhai dhuŋun; athibi ŋediŋa liŋidhi no. 26 A gi lamun lina ligwujo lamun ibile ŋwulbuje ram dilkadhe, ŋwari ŋwulabiŋaijo diliŋiriye, ŋwulaicinu, Liji lai, nyaŋa liro ŋimega; kworaŋ nyabapai dhuŋuna dhina dhike gweta gweta dagalo ganu? 27 Abi gwina gwurijo kwijo gwiter dhuŋuna dhina dhike dhiŋa Muusuŋw, ŋwaicinu, Ei gwirujaŋa kweleny a gadhi guri? 28 Ŋa gwibupo dinyi rinya, gwiro ŋinena rinyiaŋana Gwimas̱r dilaŋina a? 29 A Muusa abire dina muŋwdiŋini dhuŋuna ibidha, ŋwuro gwirin gi len la Madiiyaan, kalo gina giliŋidhuŋwna keleŋa ram gina giro loma. 30 A dina ma jidhila erna jina jiro dure‐ram, a malaak gwa Kweleny uŋinijo gi leba gi len lina lan Siinaa gi dhiŋila dha iga gi kwari. 31 A dina ma Muusa aŋa dhuŋuna ibidha, ŋwali galo dir gi dhuŋun dhina dhaŋudhuŋw; a dina muŋw doga githo duŋw daŋa, ŋwudiŋini ŋwal ŋwa Kweleny, 32 ŋwarnu, Nyi gwiro Kalo ga baboŋa luŋa, a Kalo ga Ibraahiim, a Kalo ga Isẖaag, a Kalo ga Yaⓐguub. A Muusa ube galo, athuŋw uthi reuŋw ganu datiŋa no. 33 Abi Kweleny aicinu, Wuludhi caudhe galo ŋwora ŋwuŋa; kalo gina go gidhunudhaŋana alaŋ giro kwiyaŋ gwina gwiŋir didirel. 34 Titiganu nyi gwimaŋa umuŋw ŋiya gwa liji liny lina lo gi Mas̱r, a nyi gwimadiŋini aruŋw gwegen gi dugor ganu degen, a nyi gwimula dinyil guda galo, abi ila ŋinena ŋukeje gi Mas̱r.
35 Muusa gwiro ibigwa gwina gwidoinyilo, alarnu, Ei gwirujaŋa kweleny a gadhi? Ŋeda gwiro gwina gwukejo Kalo duŋwuro kweleny a gwadhi guda galo dhoi dhai dha malaak gwina gwaŋinijo gi kwari. 36 Ŋeda gwiro ibigwa gwina gwimalteya por, ŋwugeta ŋiro ŋina ŋathalije lijo galo dir a ŋwapai ŋiro ŋina ŋipiŋipa gi len la Mas̱r, a gi Baẖr gwina Gwure, a gi leba jidhileo dure‐ram. 37 Muusa gwiro ibigwa gwina gwabiŋaijo keleŋa ga Israayiil, ŋwulaicinu, Kweleny gwina gwiro Kalo galo gaji gajidirijo nebuŋw gi limagalo ganu, gwiro ŋinena nyi; a gwanya deŋinaijo. 38 Ŋeda gwiro ibigwa gwina gwijo gi kaniisa gi leba malaak gwai gwina gwabiŋaijo gi len alaŋ lina lan Siinaa ŋedaŋa baboŋa lai lega; gwina gwapo dhuŋuna dhina dhuthi midhuŋw dijidhedha. 39 Gwina gwati gwibupo baboŋa lega diluthejo nyuni no, albidhiŋa, alwureje dugore degen gi Mas̱r. 40 Alaici H̱aruunuŋw nu, Gitijije kaloŋa athiji madhinijo; gi dhuŋun dhan Muusa ibigwa gwina gwiteyije gi len la Mas̱r, anaŋa lati liliŋidhi aŋ gwina gwimaje dugun no. 41 Algegito ŋimiro ŋina ŋitiny gi ŋwamun ibiŋwe, aldhugijo ŋida, aliŋir dugore gi ŋiro ŋa doi degen. 42 Albi Kalo urle galo, ŋwulabrico dilorthadha ejigur ya Sama; gwiro ŋinena ulinuŋwna kitham ga nebiŋa, Dunu gwai gwa Israayiil, nyaŋa liminyi dhugijo ŋida ŋadhi dhuge jidhileo dure‐ram gi leba a? 43 Abi nyaŋa lapo gutu ga Muuluuk, a ludum la kalo galo gina gan Ramfaan, s̱uwaar gwina gwigegitanya danyal idijo ŋwurko ŋwai; a nyi gwajapa kwereny di Baabil.
44 Baboŋa lega luthi gutu ga shahaada gi leba, gwiro ŋinena abiŋuŋwna ŋeda gwina gwabiŋaijo Muusuŋw duŋwgeta gwiro ŋinena s̱uura gwina gwaŋudhuŋw. 45 Gina gapo baboŋa lega ko gi lamun legen Yashuuⓐ ŋalai dina malmutha lena la liumam, lina limal Kalo ruce gi je ganu ja baboŋa lega, di gi ŋwamun ŋwa Daawud; 46 gwina gwibujo niⓐma gi je ganu ja Kalo ŋwubupe duŋwbuje kaloŋa gadhije gan Kalo ga Yaⓐguub. 47 Abi Sulemaan aicijo ŋeduŋw duna. 48 Abi gwina gwinunu gwuleny gwati gwathije gi heyaakil gwina gwigitinu doi dai no; gwiro ŋinena arna nebi, 49 Sama gwiro kursi giny, a gidhila giro gidhur ga ŋwora ŋwiny. Dunu gwiro dhaŋ gwina gwadhinyil aicijo? Kweleny gwarnu, i kalo giro dhaŋ gina gadhinyin gatho uwa. 50 Dhoi dhiny dhati dhiro dhina dhigeta ŋida ibiŋa peth na? 51 Nyaŋa lina lathi biradhalaŋ gi dugor ganu dalo a lina lati liro ŋwudhriny gi dugor ganu dalo a gi nyuni ganu nyalo no, nyaŋa lathekajo Dhigirima dhina Dhiŋir, gwiro ŋinena athin baboŋa lalo ekajo nyaŋa lirna ko. 52 Nebi gwiro gwirau gwina gwati gwirinu baboŋa lalo no. Alrinya ŋediŋaije lina lidhi kwereny alabiŋi dhuŋuna dhan ila gwa ŋeda gwina gwiŋir; gwina gwimanyanugejiye a gwina gwimanyarinya. 53 Nyaŋa lina lidhedhilo malaayka naamuus, athanyabi dimii no.
Ai gwa Istifaanuus
54 Dina maldiŋini dhuŋuna ibidha al dugor pi ganu gwuleny, alŋireje jiŋai nono. 55 Abi ŋeda oinyadhe Dhigirima dhina Dhiŋir, ŋwubaŋalaŋ gi Sama, ŋwaŋa majdh gwa Kalo, a Yasuuⓐ didhuna gi dhoi dhina dhiro dhiŋir dha Kalo, 56 ŋwarnu, Aŋadhul, nyi gwa gwaŋadhi Samawaat gwiginu, a Ŋari ŋa liji didhuna gi dhoi dhina dhiro dhiŋir dha Kalo. 57 Albure gwula ŋwal ŋwai ŋwina ŋwipa, algirba nyuni galo nyegen, alrudhudhe nono dhugor dhai dhetipo, 58 alteye len por gi mediina alaice nyol nyai. A lina liro shuhuud wala ciraŋa jegen galo alligeta gi ŋwora ganu ŋwa kamal gina gan Shaawul. 59 Alaici Istifaanuusuŋw nyol nyai, a ŋeda urnie Kaloŋa, ŋwarnu, Kweleny gwai gwina gwan Yasuuⓐ, apo dhigirima dhiny. 60 Ŋwujalo ŋwurko ŋwai ŋwure gwula ŋwal ŋwai ŋwipa ŋwarnu, Kweleny gwai, athaŋa geto ŋida ibiŋa ŋina ŋike degen no. A dina muŋw are minoŋ, ŋwudhire ŋwar ŋwai ŋwa dhai.
Ŋiɽaŋal ŋandisasi Isṯifaanuus.
1 Nǝ Rǝ-iis Rɔppa rǝthi kahana uṯici Isṯifaanuus-ŋwɔlɔ nɔŋwɔccǝŋw, “Ŋir rerrema?” 2 Nǝ Isṯifaanuus ǝŋnici nɔŋwɔccǝŋw, “Liyǝŋgǝri-ŋǝ papa-ŋǝli niŋnacar-nyii-ṯi! Kinaŋw niti mǝ papa kwǝri kwǝni Ibraahiim ele ethi nanni Haaraan kinnǝni mac, nǝ Allah wǝthi ŋinith ruwǝthithǝ naana kinaŋw naanɔ-ŋgwɔ Beinǝ Nahrein, 3 nɔŋwɔccǝŋw, ‘Durṯu a ṯayyi bǝlǝḏǝ-lɔ kwɔɔŋa, mindaŋ ele ki-bǝlǝḏ kwir ter kwɔŋǝ andaci’. 4 Ṯaŋw nɔŋw ṯayya bǝlǝḏǝ-lɔ kwuuŋwun nɔŋweele eṯhi nanni Haaraan. Mindaŋ mǝ ṯǝrnyin ṯǝṯhi Ibraǝhiim-ŋǝ ai ṯǝ, na Allah iilǝ ki-bǝlǝḏǝ-nǝ ŋgwɔ kwɔnaaniŋa-gwɔ kire-kirem-ŋgwɔ. 5 Laakin nǝ Allah ere inḏǝthǝ Ibraahiim-ŋwɔ tǝzir tokwo kinnǝni mac, wala kaaga kɔtɔpɔt kǝthi wurǝyu tok mac, laakin nǝtǝ Allah ǝccǝ wa@ḏa ethi inḏǝthǝ ŋunduŋw ṯǝ wɔ ethoro wǝthi rogɽo ruuŋwun, nǝ wǝthi ŋwɔɔla ŋwuuŋwun tok. Nǝ ki-lɔɔmɔr-la lǝccǝŋw-li wa@ḏa, nǝ Ibraahiim ere ǝthi kinnǝ nyɔɔrɔ nyeere mac. 6 Ŋindǝr-ṯǝ ŋɔ ŋandicasi Allah ŋǝccǝŋw-ŋiŋw, ‘Ŋwɔɔlaa ŋwɔɔŋa ŋwinḏi ethi nǝnni ki-bǝlǝḏ kwiti kwir kweeŋen mac, kǝzir winḏir-gwɔ ethoro lɔwaay, mindaŋ ǝrsi ǝwɽi yǝy-lɔ yithlǝyu ruɽi-ṯuɽi. 7 Laakin nyǝccǝ lizi haakimǝa kila linḏirsi ethisi ǝkkici ŋothɽor, nǝ kwaathan-tǝ, ǝri ruuthǝ kithaay ki-bǝlǝḏ-nǝ ŋgwa, mindaŋ ǝrnyii kwogwɔccelɔ kǝzir wɔ’. 8 E-ta nǝ Allah inḏǝthǝ Ibraahiim-ŋwɔ kuruu kǝthi-gi unduni ŋwɔthrɔnya kir @alaama wǝthi wa@ḏ wuuŋwun. E-ta nǝ Ibraahiim uɽu Is-haag-ŋwɔ lɔthrɔnya ki-ŋwaamin-la ŋwir dɔvokwɔppa ŋwɔthi ŋelŋe ŋuuŋun; nǝ Is-haag tok uɽu tiɽiŋǝyin tǝni Ya@guub, na nǝ Ya@guub uɽu nyiɽiŋǝyin nyir wrii-kwuɽǝn, kinya nyimoro lugwurnǝ lǝri.
9 “Nǝ lugwurnǝ kiici eŋgen kweeŋen ŋiɽany kwǝni Yuusuf, mindaŋ nǝr iila ŋunduŋw ethoro kwɔwaay Mɔsir-na. Laakin nǝtǝ Allah naanaci, 10 nǝ ki-ṯurvǝ-nǝ tuuŋwun tatap nǝtǝ Allah aŋraci ethi nannatha kwisaaw. Nǝ mǝ Yuusuf iila kiyǝnǝ yǝthi mǝlik kwǝthi Mɔsir-ŋwɔ, nǝ Allah inḏǝthǝ ne@ma nǝ ṯǝthinǝ yǝnǝ tok, mindaŋ nǝ mǝlik ruusi Yuusuf-ŋwɔ haakim wǝthi bǝlǝḏ tatap, nǝ dɔɔnɔ kwǝthi ŋeeleny tok. 11 E-ta nǝ yaaŋwɔ karbatha Mɔsir-ŋwɔ naana tatap, nǝ Kan@aan-ŋwɔ tok, mindaŋ nǝraava ṯurvǝ ṯɔppa ṯimni. Nǝ lugwurnǝ lǝri ere ǝthi ethneyǝ-na weere mac, 12 mindaŋ mǝ Ya@guub neŋne ethaarɔŋw ŋwan ŋwana Mɔsir-na tǝ, nɔŋw ɔɔsi kwelle kwuuŋwun, kwir lugwurnǝ lǝri, lǝni linḏi etheele ṯaay-thi kwon-kwon. 13 Nǝ mǝr aaɽi ki-taamin tithaathɔ, nǝsi Yuusuf ruwǝnnicǝ-lɔ, mindaŋ nǝ mǝlik kwǝthi Mɔsir-ŋwɔ elŋe lizi lǝthi dɔɔnɔ kwǝthi Yuusuf. 14 E-ta nǝ Yuusuf ṯiŋacci ṯǝrnyin ŋiɽaŋali ṯǝni Ya@guub, nɔŋwsi andaci dɔɔnɔ-ŋgana tatap kwǝthi lizi-nǝ lir ruɽi-ṯoɽol-la wrii-ṯɔthni ethi diiɽǝ ethiilǝ Mɔsir. 15 Ṯaŋw nǝ Ya@guub ele Mɔsir, kǝzir wɔmǝr-gwɔ ai ŋundu-ŋǝ nyɔr-nyi nyuuŋwun. 16 Mindaŋ nǝr ɔṯa ŋwiyaŋi ŋweeŋen nǝr-ŋi iila Shakiim, kǝzir wɔmǝrsi-gwɔ aanitha ki-thimaamɔ-na ṯiliṯṯathi Ibraahiim nyɔɔrɔ nyǝthi Haamuur gwuruushǝ.
17 “Laakin mǝ lɔɔmɔr aadithi keṯṯok kila linḏi-li Allah ethi ṯimmaci Ibraahiim-ŋwɔ wa@ḏa, nǝ lizi kikiɽǝthi tok Mɔsir-na mindaŋ nǝr uri deddep. 18 Nǝ kwaathan-tǝ nǝ mǝlik iila kwir ter kwiti kwilŋithi Yuusuf-ŋwɔ mac, mindaŋ nɔŋw mithǝ Mɔsir-ŋwɔ. 19 Nɔŋw ǝrri rǝrnyǝriŋwɔ-silɔ biḏinǝ-biḏinǝ, nɔŋwsi kǝgiṯici nyɔɔrɔ par nyǝṯirsi elŋe taay-thi ethi-gwɔ ai. 20 Nǝ ki-lɔɔmɔr-la ṯǝ kila nǝr elŋe Muusǝ-ŋwɔ mindaŋ nɔŋw saawi ŋɔɔrɔ beṯṯen kiyǝnǝ yǝthi Allah. Mindaŋ nǝr aŋraci yǝwǝ ṯoɽol ki-dɔɔnɔ kwǝthi ṯǝrnyin, 21 mindaŋ mǝr ruwazǝlɔ pǝr, nǝ tǝr tǝthi mǝlik kwǝthi Mɔsir-ŋwɔ tir tiira dimmi nɔŋw ruusi tɔr tuuŋwun. 22 Nǝrǝccǝ @allima ṯǝthinǝ yǝnǝ ṯǝthi Mɔsriyyiin, mindaŋ nɔŋw ǝthi ŋɔma kandisa-gi nǝ ŋothɽor-ŋi tok.
23 “Mǝ Muusǝ oro yithlǝyu ruɽi-riɽǝn, nɔŋw kittatha etheele ethi raaŋitha lizi luuŋwun lir Israa-iil. 24 E-ta nɔŋweese kwette kweeŋen kwǝwɽǝ Kwɔmɔsrii yǝy-lɔ, mindaŋ nɔŋweele ethi mǝcci mindaŋ nɔŋw ɽeenye ŋgwa kwir Kwɔmɔsrii. 25 Nɔŋw kittatha ethaarɔŋw liyeŋgen luuŋwun lelŋe ethaarɔŋw kwɔɔsa Allah ethisi alla, laakin nǝrseere elŋe ŋɔ mac. 26 Mǝ ŋɔrpɔ-ŋgwa oro, nɔŋweese lizi ndǝn lir Israa-iil lurrǝthu, mindaŋ nɔŋwsi ṯǝcci ethisi ǝmmithinǝ nɔŋwsǝccǝŋw, ‘Niŋnar-ṯi lɔr laalɔ ŋaaŋa lirpa ŋiyaŋga, nǝ aatha kwurrǝthicǝ-ŋǝ?’ 27 Laakin ŋgwa kwir kaṯṯi nɔŋw ove Muusǝ-ŋwɔ wur, nɔŋwɔccǝŋw, ‘Ǝyǝ kwɔrɔ kwuruusǝ-ŋǝ rǝ-iis nǝ gaaḏi dǝŋgǝr-lǝ? 28 A kwɔnaŋna-nyii ethi ɽeenye kaka niɽinyithi-ŋǝ-gwɔ Kwɔmɔsriiya kilginǝ?’ 29 Mǝ Muusǝ neŋne ŋiɽaŋali ŋɔ, nɔŋw avri Mɔsir-nǝ nɔŋweele Miḏiyaan mindaŋ nɔŋw elŋe nyiɽiŋǝyin nyiɽǝn nyir nyoŋwor kinanaŋw.
30 “Mǝ yithlǝ ere ruɽi-riɽǝn, nǝ meleka ruwǝthǝthǝ Muusǝ-ŋw naana kwaaɽi-gi kwɔfɔɔdɔ iigǝŋi ki-sahraa-na kwɔnanyja ayinɔ-lɔ keṯṯok wǝni Siinaa. 31 Nǝ Muusǝ liŋɽi beṯṯen kwomne-gi ŋgwa kwiisa-ŋwɔ, mindaŋ nɔŋw dɔŋgwatha kwaaɽi naana keṯṯok ethaami eseŋw. Laakin nɔŋw niŋnaci ṯogɽo ṯǝthi Kweeleny ṯǝccǝŋw, 32 ‘Nyii kwir Allah wǝthi rarnyalɔ ŋǝ, Allah wǝthi Ibraahiim, nǝ Is-haag, nǝ Ya@guub’. E-ta nǝ Muusǝ ṯeenye nɔŋw ɔnḏɔthi nɔŋweere bonye etheese ǝzir wa mac. 33 Nǝ Kweeleny ǝccǝŋw, ‘Ǝlli yithwǝnu yɔɔŋwa kithaay ki-ŋwaara, kaka nirllinǝ-gwɔ ǝzirlɔ wa ter wirliŋa-gwɔla. 34 Nyii kwɔmǝ ese ṯurvǝ ṯɔppa ṯǝthi lizi liinyi Mɔsir-na. Nyii kwɔmǝ neŋne ŋwɔɽundulǝ ŋweeŋen, mindaŋ nenyii-mǝ ɔɽa ethisi alla ki-ŋɔwaay-na. Ila kire-kirem-ŋgwɔ, ŋǝ ɔɔsi Mɔsir-na’.
35 “Nǝ Muusa oro kwette kwɔmǝ lizi lǝthi Israa-iil dirnathalɔ mindaŋ nǝrǝccǝŋw, ‘Ǝyǝ kwɔrɔ kwuruusǝ-ŋǝ rǝ-iis nǝ gaaḏi ethi ǝccǝ nyuŋwsi haakima?’ Nǝ nɔŋworo kwette kwɔɔsa Allah ethoro kweeleny nǝ kwiglǝthǝ kwǝthi lizi mindaŋ ethisi alla lɔɔɽall-li nǝ ṯimǝccǝ-thi ṯǝthi meleka ŋgwa kwuruwǝthu Muusǝ-ŋw naana kwaaɽi-na ŋgwa kwɔfɔɔdɔ iigǝŋi. 36 Nɔŋw ruwǝ lizi Mɔsir-na, ǝrrǝ-ŋgwɔ ŋilima-ŋwɔsi kwomne-gi kwir ŋwundǝ-ŋwundǝ Mɔsir-na ki Bahar El-ahmar, mindaŋ nǝr nanni yithlǝyu ruɽi-riɽǝn ki-sahraa-na. 37 Nǝ Muusǝ oro kwǝccǝ lizi lǝthi Israa-iil-ŋwɔ, ‘Allah wɔŋǝsi usicǝ kwiɽiiya kwette, kaka-ṯǝ nɔɔsǝ-ŋgwɔ nyuŋwɔ, kwinḏi ethoro kwette kwaalɔ daŋgal-na’. 38 Nɔŋworo kwette kwɔnaanir lizi-li lǝthi Israa-iil dɔŋw ki-sahraa-na; nɔŋw naani kinanaŋw rǝrnyǝri-ŋǝli nǝ meleka ŋgwa tok kwɔmǝ andaci kaayin-la wǝni Siinaa, mindaŋ nɔŋw aava ŋiɽaŋali ŋimiithɔ naanɔ-gwɔ Allah ethisi tǝllicǝ nyuŋwsi.
39 “Laakin nǝ rǝrnyǝri-ŋǝ derne ethi iinyici ŋunduŋw naana; nǝr ove kithaay, mindaŋ nǝrǝthi sɔɔrɔma ethaaɽitha Mɔsir-na. 40 E-ta nǝrǝccǝ Haaruun-ŋwɔ, ‘Daɽimica-nyji riiɽuwǝ ǝrnyji mɔmlotto, kaka niti nilŋithiny-gwɔ mac aatha kwɔmǝ ǝrrinici kwɔɔrɔ ŋgwɔ kwǝni Muusǝ, ŋgwa kwuruwǝ-nyji Mɔsir-na’. 41 Nǝr ṯoo tithri, mindaŋ nǝr kettice kiraama, mindaŋ nǝr aamina kwomne-gi kwuthuuthur kwǝthi ŋothɽor ŋǝthi rii reeŋen. 42 Laakin nǝsi Allah ɔrlacci ŋwɔdoŋw, ethi kwogwɔcce rɔɔrɔm-lɔ kaka nɔlɔɔthonar-gwɔ Kiṯaab-na kǝthi liɽii ŋaarɔŋw,
‘Lizi lǝthi Israa-iil!
Nyii-ti kwir mac ŋgwa kwɔgittica-ŋa kiraama kwomne-gi
ŋgwa kwǝṯi undundu kworo yithlǝyu ruɽi-riɽǝn
ki-sahraa-na.
43 Nǝ kheme oro ŋga kǝthi ṯiiɽu ṯǝni Mulɔkh kǝṯi appila, nǝ
suurǝ kwǝthi ṯiiɽu ṯǝni Ramfaan,
kwir ṯɔɔrɔm ṯir ṯiiɽu ṯaalɔ, kaka nɔrɔr-gwɔ riiɽu raalɔ,
kaka nɔrɔr-gwɔ riiɽu rǝṯirsi kwogwɔccelɔ, ŋwɔṯaŋw ŋǝsi iili
ki-ŋɔwaay-na tuk Baabil-ŋwɔ ṯɔɔɽɔthala’.
44 “Nǝ rǝrnyǝri-ŋǝ ǝthi khemeya kǝthi shahaaḏa ki-sahraa-na. Nɔŋw daɽimanni kaka-ṯǝ nandica-gwɔ Allah Muusǝ-ŋwɔ. 45 Nǝ kwaathan-tǝ nǝ lugwurnǝ lǝri dimmǝ khemeya ŋga kaavar naanɔ-gwɔ rǝrnyin-ŋǝ reeŋen, nǝrgeele kinaŋw ninḏir Yashuu@-ŋǝli, mindaŋ nǝr aavi bǝlǝḏǝ kwǝthi Umam wa wɔmǝ Allah rutti kithaay. Ŋwɔṯaŋw nɔŋw nannitha mindaŋ nǝ lɔɔmɔr iila lǝthi Ḏaawḏ. 46 Nɔŋw ǝmi Allah-na, mindaŋ nɔŋw uṯicǝlɔ ethi duŋgwǝci ŋunduŋw, ethi ǝccici dɔɔnɔŋw kwǝthi Allah wǝthi Ya@guub. 47 Laakin nǝ Sulemaan oro kwɔmǝ ǝccici dɔɔnɔŋwɔ.
48 “Laakin ǝṯi Allah Wɔppa Wuthǝmthi-lǝ Pur-pur ere nanni ki-yiŋna-na mac yaccasi lizigwunǝŋ; kaka nandisa-gwɔ kwiɽii naarɔ-ŋgwɔŋw,
49 ‘Kweeleny kwaarɔŋwa, Leere lir kwɔrsi kwiinyi kwǝthi
ŋeeleny,
nǝ wurǝyu oro ǝzir wǝṯiny-gwɔ kette ŋwaara-la.
Yiŋna yɔrtɔ aŋgwɔrɔ yinḏi-nyji ethisi kettice?
Ǝzir wundǝr wǝndu wiinyi winḏiny-gwɔ ethi-gwɔ kaṯṯɔ
wǝŋ?
50 Nyiti kwɔrɔ rogɽo-ri riinyi kwɔgitta kwomne ŋgwɔ tatap
mac-a?’
51 “Ŋaaŋa lir-mba linyɔɔrɔthɔna gaa! Rɔgwor raalɔ ririmba rifirlli kaka aatha kweere, ŋaaŋa lirṯaŋ kɔlɔ limǝ riimǝcci Allah yǝni-nǝŋw ethi neŋne ŋiɽaŋali ŋuuŋun! Ŋaaŋa laaɽinna-ma-ṯǝ lugwurnǝ laalɔ; nǝ ǝṯi urrǝthǝ Ṯigɽimǝ-nǝ Ṯirllinǝlɔ ter dok-dok! 52 Kwiɽli kwunaanɔ kweere kwiti kwɔmǝ lugwurnǝ-lɔ ere ǝwɽi yǝy-lɔ mac-a? Ǝṯir endinye lizi kila lǝṯisi Allah ɔcicca, kila landindisa kerreny tuk ŋiɽaŋali ŋǝthi Kwette Kwirllalɔ kwinḏi ethiila. Nǝ kirem tǝ kwɔmǝ bɔɔŋwɔthi mindaŋ nǝ ɽeenye. 53 Ŋaaŋa lir laava Sherii@a kwǝthi Allah kwinḏǝthǝ-ŋǝsi limeleka, laakin neere iinyici naana mac!”
Isṯifaanuus mǝr-gwɔ ɽeenye yall-yi.
54 Mǝ lizi lǝthi mǝjlǝs neŋne ŋiɽaŋali ŋɔ ŋǝthi Isṯifaanuus, nǝr urǝzi rɔgwori deddep, mindaŋ nǝr yecce yiŋath-na. 55 Laakin nǝ Isṯifaanuus urǝnni-nǝ Ṯigɽim-thi Ṯirllinǝlɔ ter, mindaŋ nɔŋw baaŋatha leereya-la, nɔŋweese ŋinithi ŋǝthi Allah, nǝ Yǝcu-ŋwɔ tok kwirlɔ tok ki-ṯuɽumǝ ṯǝthi mɔni ṯǝthi Allah. 56 Nɔŋwaarɔŋw, “Iisar-ṯi nyii-ŋgwɔ kwiisa leereya lidiŋǝlnǝ kworo, ninyeese Tɔɔrɔ tǝthi Kwizigwunǝŋ tirllɔ ki-ṯuɽumǝ ṯǝthi mɔni ṯǝthi Allah!”
57 Nǝ lizi kila linaanɔ ki-mǝjlǝs-na ɔvɔna kwɔɔla-gi ŋɔmmaŋi, mindaŋ nǝr ǝnyjini nyaamin ki-yǝni-nǝ yeeŋen. Nǝr avratha naana tɔc dɔŋw-li tatap, 58 nǝr mithǝ nǝrgeele nǝr-gi ruu par kwǝthi mǝḏiinǝ mindaŋ nǝr accathalɔ yall-yi. Nǝ kila lir shuhuuḏ ṯǝyyici kaamali kette kǝni Shaawul yirethi-lɔ yeeŋen ki-ŋwaara-na ŋwuuŋwun ethisi karnicalɔ. 59 Nǝraari isṯimir ethi accatha Isṯifaanuus-ŋwɔ-lɔ, laakin ŋundu-tǝ nɔŋwɔni kwɔrnɔṯɔ Kweelenyi nɔŋwɔccǝŋw, “Kweeleny Yǝcu, mǝṯṯi ṯigɽimǝ ṯiinyi!” 60 Ŋwɔṯaŋw nɔŋw kwee ŋwɔrŋwɔ-lɔ, nɔŋw ɔvɔna ŋɔmmaŋi ṯogɽo-thi nɔŋwaarɔŋw, “Kweeleny! Ǝṯisi kitta kǝṯṯi ŋikiya-ŋi ŋɔ mac!” Mɔŋwsi andasi ŋɔ nɔŋw ayanni tɔc.