Buṯrusŋa Karniiliyuus gwai
1 A kwiji gweta je gi Ges̱ariiya gwan Karniiliyuus, gwina gwiro zabith gwa orṯa ina yan orṯa ya Iṯaaliiya, 2 gwiro kwiji gwiŋir, athil dhenya Kaloŋa liji lai la dunu gwuŋun peth, athuŋw dhedha lijo ŋida ŋoinyadho tur, athuŋw abiŋaijo Kaloŋa ŋwamun peth. 3 A ŋwaŋa galo momaŋ dhuŋuna dhina dhiro ŋinena dhiŋidi gi saaⓐa jaro ŋinena thiril kera galo malaak gwa Kalo duni dugun ŋwaicinu, Karniiliyuus gwai. 4 A dina tejuŋw je a ŋidheny uni dugun; ŋwarnu, Kweleny gwai, aŋ gwiro? Ŋwubaicinu, Abiŋaije Kaloŋa gwuŋa a dhuŋun dhina dhuthaŋa dhadhi dhedha lijo ŋida tur dhimalidha gi je ganu ja Kalo a dhaŋidhanuŋw. 5 A ŋinena ukejo lijo gi Yaafa durnia gweta gwina gwan Simⓐaan gwina gwuthi jiriny jiter jan Buṯrus; 6 gwo gwijil galo Simⓐaan gwai gwina gwathapai ŋiro ŋadhideye jurna, gwina gwuthi duna kimumu nono ga baẖr, a ŋeda gwaji gwaŋaŋajo aŋ gwina gwiŋir daŋa apai. 7 A dina ma malaak ela gwina gwabiŋaijo Karniiliyuusuŋw, a Karniiliyuus urnie jadham juŋun ram ja dunu, a ejigur yeta ina iŋir ya ejigur ina yathupijo ŋiro gigina; 8 ŋwulabiŋaijo dhuŋuna ibidha peth, ŋwulukeje gi Yaafa.
9 A bigunu, dina idhilo gi dhai dina maljaijo mediina githo, a Buṯrus alo gi dhoda alaŋ dha dunu duŋwabiŋaijo Kaloŋa, saaⓐa jiro ŋinena die‐a‐ram kaŋin ganu. 10 A jamu eny ganu gwuleny ŋwari gweny; abi dina malgitijo ŋida momaŋ ŋa dheny, ŋwuthi gimirala gi je ganu juŋun, 11 ŋwaŋa Sama diŋeadhini ganu, a kwoŋ gweta ula dugun, gwiro ŋinena malaaya gwina gwipa, gwigukinu gi ŋwubil kworoŋo, ŋwuludha kwiyaŋ. 12 An dhola je ganu peth dha gidhila, a owaŋ, a ŋidi ŋina ŋathelila galo nyari nyai kwiyaŋ, a nyira nya Sama. 13 A ŋwal ula dugun alaicinu, Buṯrus gwai, diro; dhugo, a ŋeny. 14 Abi Buṯrus arnu, Oo, Kweleny gwai, nyi gwati gweny kwoiny gwetipo gwina gwati gwiŋir deny i gwina gwiro ŋirle gatur no. 15 A ŋwal ula dugun manaŋ ŋwamun ganu ram ŋwarnu, Ŋidi ŋina ŋijuriyilo Kalo, athaŋa arnu ŋiro ŋirle no. 16 An dhuŋun ibidha je ŋwamun ganu thiril dhiro minoŋ, a kwoŋ ibigwa alo gi Sama manaŋ.
17 A dina alidhi Buṯrus galo dir gi gwidom gwuŋun ŋwarnu dhuŋun dhiro dhaŋ dha dhuŋun ibidha dhina dhiro ŋinena dhiŋidi dhina dhaŋudhiny, a liji lina lukejilo Karniiliyuus othaije lijo galo dunu gwai gwa Simⓐaan, aldhuna kour, 18 alurnie, alothaije galo alarnu, Simⓐaan gwina gwan Buṯrus gwathije mina a? 19 A dina jo Buṯrus direye je galo gi dhuŋun dha dhuŋun dhina dhiro ŋinena dhiŋidi dhina dhaŋinu dugun, a Dhigirim aicinu, Aŋadhi, liji thiril lo libupaŋa. 20 Abi diro ŋule, nyalela, athaŋa dhenyo gi ŋidi ŋeda no; lukejinyilo. 21 A Buṯrus ule gi liji lina lukejilo Karniiliyuus dugun; ŋwulaici, Nyi gwiro gwina gwibupanya; dhuŋun dhiro dhaŋ dhina dhiludhanyana? 22 Alaicinu, Karniiliyuus gwina gwiro zabith, gwina gwiro kwiji gwiŋir gwina gwathidhenya Kaloŋa, gwina gwuthi shahaada gwina gwiŋir gi liji peth lina liro Yahuud, gwabiŋaijo Kalo malaak gwai gwina gwiŋir didirel daŋa odhadha dunu dugun, duŋwdiŋini dhuŋuna duguŋa. 23 Ŋwulodhadha kiru, ŋwulgeta ŋirin. A bigunu allela Buṯrus ŋalai, a liji coŋ gi limegen lina lathije gi Yaafa aligwudhie. 24 A bigunu gweda aluni gi Ges̱ariiya, albi Karniiliyuus dhunijo, ŋwurnie lijo luŋun a limedhigen a liji lina lathil lai jaijiye galo liduŋw. 25 A dina ma Buṯrus uni, albudhe Karniiliyuus gwai, a Karniiliyuus ide ŋwora ganu dugun, ŋworthadha. 26 Abi Buṯrus direjalaŋ, ŋwaici, Diro; nyi ko gwiro kwiji. 27 A dina muŋw uni alje dilgwai abiŋi, ŋwubuje lijo loinyadho lauradho liduŋw; 28 ŋwulabiŋaijo, ŋwulaici, Nyaŋa liliŋidhi darnu dhuŋun dhati dhaudhi gi dhuŋun dha naamuus di kwiji gwina gwiro Yahuudi dilaicaijiye liduŋw kwiji gwai gwa gabiila giter i duŋwela dugun no; abi nyi Kalo gaŋajiny darnu nyi gwati gwarnu kwiji gweda gwiro kwiji dogo i gwiro ŋirle no. 29 Gi dhuŋun ibidha nyi gwimila, athinyi doinyo no dina urniinyilo. A nyi gwa gwothaijaje galo nyaŋa lurnaijiny aŋa? 30 Abi Karniiliyuus aicinu, Ŋwamun ŋwiro kworoŋo dina jiny galo jamu di gi saaⓐa ibija; a gi saaⓐa jina jiro thiril nyi gwijo dabiŋaijo Kaloŋa gi dunu gwiny, a kwiji dhuna gi je ganu jiny gwina gwigeno ciraŋa jina jaro gumgum. 31 Ŋwarnu, Karniiliyuus, abiŋaije Kaloŋa gwuŋa gwimadiŋinini, a dhuŋun dhina dhuthaŋa dhadhi dhedha lijo ŋida tur dhimaŋidhanini gi je ganu ja Kalo. 32 Ukejo lijo gi Yaafa durnia Simⓐaanuŋw, gwina gwuthi jiriny jiter jan Buṯrus; gwina gwo gi dunu gwa Simⓐaan gwina gwathije kimuma nono ga baẖr; a maji ma ŋeda ila, gwaŋa abiŋaijo. 33 Nyin ukedheja lijo ganu babraŋ duguŋa; a ŋa gwimapai dhuŋuna dhina dhiŋir ŋinena maŋa ila. A ŋinena anaŋa peth lo mina gi je ganu ja Kalo, dana diŋini dhuŋuna peth dhina dhabiŋaijaŋadhai Kalo.
Dhuŋun dhina dhabiŋu Buṯrus
34 A Buṯrus igiye ŋwinyu ŋwuŋun ŋwarnu, Titiganu nyi gwiliŋidhi darnu Kalo gati gathuminyuni kwijo gweta gi kwiji gwiter no, 35 Abi gi liji peth gweta gwina gwathidhenya ŋeduŋw, athuŋw apai dhuŋuna dhina dhiŋir, gwuminyinu dugun. 36 Dhuŋun dhina dhukejo Kalo gi keleŋa ga Israayiil, dhina dhabiŋuŋw audhaijiye gwai galo Yasuuⓐ al Masiiẖ gwai (ŋeda gwiro Kweleny gwa ŋidi peth), 37 nyaŋa liliŋidhi dhuŋuna ibidha dhina dhabiŋinu gi Yahuudiiya peth dhina dhijo kwerkwereny gi Jaliil gidon gi dhuŋun dha maⓐmuudiiya dhina dhabiŋudhai Yuuẖanna; 38 darnu akwai Kalo gibulujo Yasuuⓐuŋw gwa Naas̱ira Dhigirima nono dhina Dhiŋir a ŋoma, gwina gwathelila galo ŋwapai ŋiro ŋina ŋiŋir, a ŋwiŋiriye lijo nono peth lina luthina Ibliis ŋelenya alaŋ, ŋinena jilo Kalo gai. 39 A anaŋa liro shuhuud gi dhuŋun peth dhina dhapuŋw gi ŋwen ŋwa Yahuudiiya a gi Urushaliim; gwina gwirinyiilo ko alalije gi lure alaŋ lina limaliganu; 40 ŋeda gwima Kalo direye gi lamun lina liro nimra thiril, ŋwabrico duŋw aŋini momaŋ. 41 Abi gwati gwaŋinu gi liji peth no, ŋwubaŋinijo lijo lina liro shuhuud lina luthinilo Kalo ganu kwereny daguri, anaŋa lina gwithanalai a analiye dina maji muŋw dire dai gi liji ganu lina laio. 42 A jabiŋaijo danabiŋaijo lijo, anaro shuhuud darnu ŋeda gwiro gwina gwigitinu di Kalo duŋwuro gadhi dakimiye lijo lina limidho a lina laio. 43 A nebiŋa peth liro shuhuud gwuŋun, darnu liji peth gweta gweta gwina gwuminyu ŋeduŋw gwapai dhudhanuŋw ganu gwa ŋidi ŋina ŋike jiriny jai juŋun.
Liumam lapo Dhigirima dhina Dhiŋir alⓐamidhini
44 A dina jo Buṯrus dabiŋi dhuŋuna ibidha, a Dhigirim dhina Dhiŋir ula gi liji alaŋ peth lina lidiŋinu dhuŋuna. 45 A ŋediŋa alo galo dir lina luminyu lina liro la liji lina lurtedhinu a peth lina lidhi Buṯrus ŋalai, ŋinena ma dhedha tur gwa Dhigirim dhina Dhiŋir buludhe gi Liumam alaŋ ko. 46 Ŋinena diŋinilo dilabiŋi diŋila dai, alorthadha Kaloŋa. A gi dhuŋun ibidha al Buṯrus aicinu, 47 kwiji gweda gwuthi ŋoma gwadoinya ŋau ŋai dathi liji ibila apo maⓐmuudiiya, lina limapai Dhigirima dhina Dhiŋir gwiro ŋinena apanana ko a? 48 Ŋwuldhedha amr dilⓐamidhini gi jiriny ja Kweleny. Alothaije galo dilli jalo ŋwamun coŋ.
Bɔṯrɔs-ŋǝ Karniiliiyuus-gi.
1 Nǝ kwɔr naani kwette Gaysariiyya kwǝni Karniiliiyuus, kwir ḏɔɔbiṯ ṯǝthi jesh kwǝṯir-ŋi aarɔŋw kwǝthi Iyṯaaliya-ŋw kwiri. 2 Nɔŋworo kwette kwǝṯi iiɽi Allah-na; ǝṯir kwocce Allah-lɔ dɔɔnɔ-gina kwuuŋwun tatap. Ǝṯɔŋwsi ǝrri ŋittǝzir ethi mǝcci lizi lir Yahuuḏ lir lɔwaay, nǝ ǝṯɔŋweere uɽǝthi ethaari kiyiiriny mac. 3 Mǝ saa@ oro ṯoɽol kwǝthi kirakalɔ-ŋw, nɔŋweese rɔ-ɔya, nǝ ki-rɔ-ɔya-na kɔrɔ, nɔŋweese meleka kwǝthi Allah por-por kwǝnḏǝthǝ kiininy nɔŋwɔccǝŋw, “Karniiliiyuus!”
4 Nɔŋw ɔnḏasi meleka yǝy naana kwɔrop kwithiinyanna tok, mindaŋ nɔŋwɔccǝŋw, “A kwaari-tha yaa Sǝyyiḏ?”
Nǝ meleka ǝŋnici nɔŋwɔccǝŋw “Allah waamina ṯaara-thi ṯɔɔŋwɔ kiyiiriny nǝ ŋothɽor-ŋi ŋǝṯisi ǝrri ŋisaaw-ŋisaaw, mindaŋ nɔŋw kittatha ethi ǝŋnici ŋaaŋwɔ. 5 Nǝ kire-kirem-ŋgwɔ tǝ, ɔɔsa lizi lokwo etheele Yaafa naanɔ-gwɔ kwɔr kwette kwǝni Sim@aan Bɔṯrɔs. 6 Ŋgwana kwɔdappathalɔ ŋiirinǝ ki-dɔɔnɔ kwǝthi Sim@aan kwǝṯi ǝnyji yirna, kwɔnannɔ bahara kǝni.” 7 E-ta mǝ meleka urli ŋwɔdɔŋw mɔŋweele-tǝ, nǝ Karniiliiyuus ɔrnɔṯi yaḏaama yiɽǝn yǝthi dɔɔnɔ kwuuŋwun, nǝ jesh kwette kwǝṯi mithǝ ŋiɽaŋali ŋǝthi Allah, ŋgwa kwuruusǝŋw kwǝthi rogɽo ruuŋwun. 8 Nɔŋwsi andaci ŋa ŋǝrrina mindaŋ nɔŋwsi ɔɔsi nǝreele Yaafa. 9 Nǝ ki-laamin lir ter a-naanir ki-thaay-la, mǝr iilici Yaafa-ŋwɔ keṯṯɔk, nǝ Bɔṯrɔs dallɔ kindala lǝthi dɔɔnɔ ethi-gwɔ aari kiyiiriny kaaŋwɔn wumǝ naani kelgeny-na tittir. 10 Nǝ yaaŋwɔ yee mindaŋ nɔŋw naŋni kwomne kweere kwǝthi yee, nǝ ki-lɔɔmɔr-la-ṯǝ kila limaanir-li ethneya, nɔŋweese rɔ-ɔya. 11 Nɔŋweese leereya lidiŋǝlnǝ kwɔrɔ, mindaŋ nǝ kwomne kwette ɔɽa kwurǝyu-lu kwir kaka milaaya kwɔppa kwukǝkkinnǝ ruunyu ruuŋwun rir kwaɽiŋan. 12 Nǝgwɔ kwomne naanina tatap kwɔmiithɔ kwirna ŋwɔɔla-ŋwɔɔla kwǝṯeele ŋwaaraŋalɔ, nǝ yaariyalɔ, nǝ ndǝw lǝthi leere tok. 13 Nǝ ṯogɽo ǝccǝŋw, “Diiɽu yaa Bɔṯrɔs; a ɽeenye mindaŋ mǝ yee!”
14 Laakin nǝ Bɔṯrɔs ǝccǝŋw, “Bǝri-mǝ, Kweeleny nyii kwende kwɔmǝ yee kwomne kweere kwigii kuruu-gi nǝ kwir ŋiɽigin tok mac.” 15 Nǝ ṯogɽo andica kwokwony nɔŋwɔccǝŋw, “Ǝṯeere ruusi kwomne kweere kwuruuŋwɔ mac kwǝṯi-gi Allah aarɔŋw kwɔsɔɔɽi.” 16 Nǝ ŋiɽaŋal ŋɔ ǝrrini nyaamin-na ṯoɽol, e-ta nǝ kwomne dimmǝnni ki-leere.
17 Nǝ kinaŋw naari-ṯa Bɔṯrɔs kinnǝni fǝkirǝ ŋiɽaŋal-ŋi ŋǝthi rɔ-ɔya rǝni-thi ǝyǝ, nǝ lɔr kila lɔɔsasi Karniiliiyuus ɔppatha, nǝr ɔṯalɔ dɔɔnɔ-ŋgi kwɔnaanɔ-gwɔ Sim@aan-na, mindaŋ nǝr iila nǝr rilli kǝgwɔr. 18 Nǝr ɔṯalɔ nǝraarɔŋw, “Kwiirin ŋgwɔ kweere kɔnɔŋw kwǝni Sim@aan Bɔṯrɔs-a?” 19 Bɔṯrɔs tǝ nɔŋw tǝ ṯaccici kinnǝni ethelŋe ŋiɽaŋal ŋǝthi rɔ-ɔya rǝni-thi ǝyǝ, mindaŋ nǝ Ṯigɽim Ṯirllinǝlɔ ter ǝccǝŋw, “Niŋna-ṯi! Lizi kila ṯoɽol linaŋna-ŋa. 20 Ŋwɔṯaŋw diiɽu aami naanɔŋw mindaŋ a dappi, ǝṯi ṯiinya mac ethileele, kaka nɔrɔny-gwɔ kwɔɔsasi.” 21 Ṯaŋw na Bɔṯrɔs dappi nɔŋwsǝccǝŋw, “Nyii kwirṯa-pa ŋgwa kwir kwɔr kwɔnaŋna-ŋa. Aatha kwɔrɔ kwiilathi-ŋa-gwɔ?”
22 Nǝr ǝŋnici nǝrǝccǝŋw, “Ḏoobiṯ ṯǝni Karniiliiyuus ṯindǝr ṯɔɔsa-nyji, ṯir kwɔr kwirllalɔ, kwǝṯi kwogwɔcce Allah-lɔ, ǝṯi lizi tatap lǝthi Yahuuḏ iiɽi ŋunduŋw-nǝ beṯṯen. Nǝ meleka kwǝthi Allah andaci ethi ɔrnɔṯa ŋaaŋwa ki-dɔɔnɔ kwuuŋwun, mindaŋ mɔŋwsi neŋne ŋa ŋinḏi-ŋǝsi ethisi andasi.” 23 Nǝ Bɔṯrɔs ǝnyji lɔɔrɔ kiininy mindaŋ nǝr nḏirni kinaŋw.
Mǝ ŋɔrpɔ-ŋgwa oro tǝ, mǝ Bɔṯrɔs aami nanɔ-ŋw tǝ nǝrleele, mindaŋ nǝ lizi lokwo lǝthi ṯǝmminǝ lǝthi Yaafa-ŋwɔ ele tok ŋundu-ŋǝli.
24 Mǝ ŋɔrpɔ-ŋgwa oro nɔŋw ɔppathi Gaysariiyya, kǝzir wǝkkicǝ-yi Karniiliiyuus kizǝn, ŋundu-ŋǝ lizi-li luuŋwun nǝ limethgen luuŋwun tok lɔrnɔṯɔŋwsi. 25 Nǝ kinaŋw mǝ Bɔṯrɔs ǝnḏi, nǝ Karniiliiyuus kwɔɔmathana, nɔŋw iidǝccǝlɔ ŋwɔrŋwɔ-ŋalɔ kwɔgwɔcca-ŋwlɔ. 26 Laakin nǝ Bɔṯrɔs diiɽǝzilǝ nɔŋwɔccǝŋw, “Ḏiiɽu nǝ nyii kwir-mǝ kwizigwunǝŋ domony.” 27 Nǝ Bɔṯrɔs aari isṯimir ethi andaci Karniiliiyuus-ŋwɔ nǝndiŋw kǝzir waaɽathi-gwɔ lizi dɔŋw-lɔ littǝzir. 28 Nɔŋwsi ǝccǝŋw, “Ŋaaŋa lilŋithi-pǝ rac rogɽo-ri raalɔ erhaarɔŋw, Yahuuḏ yiti yeere mac yǝṯirsi ǝmminici ethi ɔɽɔmaṯṯi dɔŋw Umam-yi weere, wala ethi ǝndi kiininy duŋgwun. Laakin nǝnyii Allah baaŋaci ehaarɔŋw laazim ǝṯeere ruusi kwizigwunaŋi kweere kwigii mac, wala eṯhi ruusi kwiɽigin. 29 Nǝ mǝnyii uzuthicǝ nǝnyii iila kwiti kwummunǝnǝ mac. Ṯaŋw ŋǝ uṯicǝlɔ, a kwotho kwɔɔsɔthɔ naaniny-gwɔ?”
30 Nǝ Karniiliiyuus ǝccǝŋw, “Ki-ŋwaamin-la ŋwir ṯoɽol ŋwɔmǝ ṯamthɔ, ki-tɔɔmɔr-la ṯǝ tɔrɔŋw, nǝnyii aari kiyiiriny ki-dɔɔnɔ kwiinyi ki-saa@-la kwir ṯoɽol kwǝthi kirakalɔ-ŋw, nǝ kwɔr kwette ǝnḏinǝlɔ pugwuṯ, nɔŋw rilli kiyǝnǝ yiinyi, kwɔginna yireṯhi yaari kap-kap, 31 nɔŋwaarɔŋw, ‘Karniiliiyuus! Allah wɔmǝ neŋne ṯaara ṯɔɔŋwa kiyiiriny, mindaŋ nɔŋw kithaayini ŋothpor ŋɔɔŋa ŋɔvthanna. 32 Ɔɔsa kwette Yaafa naanɔ-gwɔ kwɔr kwette kwǝni Sim@aan Bɔṯrɔs, ŋgwana kwir kwiirin ki-dɔɔnɔ kwǝthi Sim@aan kwǝṯi ǝnyji yirna, kwɔnaanɔ bahara kǝni’. 33 Ŋwɔṯaŋw nǝnyii-mǝ ɔɔsɔthisa fittǝk, mindaŋ nǝ ŋiɽaŋal ŋaaŋa ǝni ŋisaaw beṯṯen mǝgwɔ iila. Nǝ kire-kirem-ŋgwɔ tǝ, nǝnyii naani tatap kiyǝnǝ yǝthi Allah, lakkɔ kizǝn ethi neŋne kwomne kweere nyithak kwandica-ŋa-gi Kweeleny.”
Ŋiɽaŋal ŋandisasi Bɔṯrɔs.
34 Na Bɔṯrɔs aari ibṯǝḏi ethi andasi nɔŋwaarɔŋw, “Nyii kwilŋica rac rerrem ethaarɔŋw, Allah witi wǝṯi ɔṯi lizi-nǝ mac. 35 Kweere nyithak kwǝṯiiɽi Allah-na, mindaŋ mɔŋwsi ǝrri ŋɔvthanna, ǝṯɔŋw ǝmmini ŋundu-ŋw, mɔŋw-tǝ kinnǝni oro jinisǝ kwette nyithak. 36 Ŋaaŋa lilŋica rac ethaarɔŋw kwuusucǝ lizi lǝthi Israa-iil ŋiɽaŋali ŋaarɔŋw-ŋi bǝshirǝ ŋǝthi ṯibɽǝthǝlɔ pǝt Yǝcu-ŋgi kwir Kwɔrɔstɔ kwir Kweeleny kwǝthi lizi tatap. 37 Ŋaaŋa lilŋithi ŋiɽaŋali ŋa ŋɔppa ŋǝrrinǝ ǝzir naana tatap wǝthi Israa-iil, ŋaari ibṯǝḏi Jǝliil kwaathan kinaŋw mǝ Yuhanna aari bǝshirǝ rac ṯa@liima ṯǝthi ma@muuḏiiyya. 38 Ŋaaŋa lilŋithi rac ŋiɽaŋali ŋǝthi Yǝcu kwǝthi Naasira-ŋw, kwɔmǝ Allah ɔratha Ṯigɽim-thi Ṯirllinǝlɔ ter, nǝ ŋɔma tok. Ǝṯɔŋw iirǝri ǝzir naana tatap, ǝṯɔŋwsi ǝrri-ri ŋisaaw mindaŋ ǝṯɔŋwsi sǝwi tatap kila limthisi Ibliis kaka a-naanisa-gwɔ Allah. 39 Nyii-ŋǝ lir shuhuuḏ kwǝthi kwomne-ŋgwa tatap kwǝrrǝŋwɔ ki-bǝlǝḏ kwǝthi Israa-iil nǝ Urshaliim tok. Mindaŋ mǝr ɽeenye ṯippǝccǝ-thi relme ki-ŋwuuɽi-la ŋwɔɽɔmathalɔ. 40 Laakin mǝ ŋwaamin ṯoɽol ere tǝ, nǝ Allah diiɽǝ ki-ŋiɽany-na mindaŋ nɔŋw iijini, 41 ŋiti ŋir ŋǝthi lizi tatap mac, laakin illi nǝ shuhuuḏ oro dak ŋgwa kwǝlli Allah-na, nǝ nǝnyii-ṯǝ oro nyiiŋǝ lithnar-li nǝ liithir-li tok kinaŋw mɔŋw diiɽǝ rac ki-ŋiɽany-na. 42 Nɔŋw ǝllici nyuŋwsi waamira ethi ǝccǝ lizi bǝshirǝ Inyjiilǝ, ethoro shuhuuḏ kwǝni ŋundu. Nǝ Allah allana ethi kettice lizi hɔkwɔma limiithɔ nǝ laayɔ tok. 43 Nɔŋwṯoro kwǝṯi-gi liɽii ɔnḏi kii naarir-ŋwɔ, kweere nyithak kwǝmminici ŋunduŋw a ŋikiya ŋuuŋun fivrinnici ŋɔma-ŋi ŋǝthi yiriny yuuŋwun.”
Umam mɔŋgwɔ aavi Ṯigɽimǝ Ṯirllinǝlɔ ter.
44 Nǝ kinaŋw nandisa tǝ kinnǝ Bɔṯrɔs ŋiɽaŋali, nǝ Ṯigɽim Ṯirllinǝlɔ ter dappitha ki-lizi-lǝ kila tatap ligittica ŋiɽaŋali ŋuuŋun yǝni. 45 Nǝ Yahuuḏ kiya yǝmminicǝ Kwɔrɔstɔ-ŋw yinḏir Bɔṯrɔs-ŋǝli min Yaafa liŋɽalɔ buruc kaka mǝr-gweese Allah wɔmǝ balsa haḏiiyyǝ wuuŋwun, wir Ṯigɽim Ṯirllinǝlɔ ter lizi naana tok lir Umam. 46 Kaka niŋnacarsi-gwɔ landisa kandisa kir riŋla-na ter-ter, mindaŋ nǝr nii Allah-na tok; e-ta nǝ Bɔṯrɔs aarɔŋw, 47 “Lizi kala limaavi Ṯigɽimǝ Ṯirllinǝlɔ ter, kaka-tǝ kinaŋw naava-nyii nyii-ŋǝ tok. Ǝyǝ kwɔrɔ kweere kwǝthi ŋɔma ethisi rii ma@muuḏiiyya naana kwǝthi ŋaaw?” 48 Ŋwɔṯaŋw nɔŋwsi ǝllici waamira ethi aari @ammiḏa yiriny-yi yǝthi Yǝcu Kwɔrɔstɔ. E-ta nǝr uṯicǝlɔ ethi-li naani kinnǝ ŋwaamin ŋwokwo.