Dawidi ru Raba te
(2 Samuele 12:26-31)1 Duru kogo kotite se ni tu 'bädri'bai ro oyiro kyila ya oko, Yoaba ugu kyila'bai te ago pere 'bädri Amona'bai rote, ago ikyiyite muyidri Raba rote gotayi ago ruyite. Oko Dawidi rite Yerusalema ya. 2 Dawidi ru tagyia lu ànyaro Milekoma rote ni dri ndaro yasi; nda usu läŋgyina te talentaro logo läguläguro orivoya alodi; ago kuni liŋgyiekye orivoya kigye; ago asote Dawidi dri. Ago nda ezi ŋgaamba 'bakici ro se otopabe te orivoya amba ṛo du'duro. 3 Nda ru lidri 'bakici se ana rote, 'ba ànya te losi oyene mbara, kye'bo ndi koloŋwà yibe si. Ye kpate oso inye lidri 'ba'desii cini azaka Amona'bai ro ri. 'Dooko Dawidi ndi lidri cini ndaro be egoyite Yerusalema ya.
Kyila Lidri Dämbäṛäṛä Felesete'bai robe
(2 Samuele 21:15-22)4 Ono vosi kyila go ŋgate Felesete'bai be Gezera ya; 'dooko Sibekai ni Husa yasi fu Sipai te, se ni alo aza Zelevoi lidri dämbäṛäṛä ro ro; ago ape Felesete'bai te ṛe.
5 Kyila aza a'do kpate to'di Felesete'bai be; ago Elinama ŋgwa Jaira ro fu Lami ädrupi goliyata Gata'ba ro rote, se äzuce äzu ndaro ro uwena oso juṛu kodoopi'ba ro ronye.
6 Ago kyila go a'do kpate to'di Gata ya, se mano omba 'desiro aza orivoya kigye, se orivoya driŋgwa njidrialo be dri alo dri, ago paŋgwa njidrialo be pa alo dri, otina cini orivoya 'buteritu fosu; ago nda kpani zelevo lidri dämbäṛäṛä ro ro yasi. 7 Ondro nda kotokombate Yisaraele be oko, Jonatana ŋgwa Simei, ädrupi Dawidi ro ro fu nda te. 8 Se nätu kwoi ni zelevoi lidri dämbäṛäṛä ro ro ni Gata yasi; Dawidi ndi lidri ndaro be tufuyi ànya te.