Cekuṛei Mo'di ro
1 OPI atate Musa ri ekye: 2 “Nyede Cekuṛei mo'di udiudiro si ritu, lowa uzizana sina ago gawa eŋgyeza. 3 Ago ondro avo ànya riti te, anjioko lowa cini ri kala kotone mire ecivo Mutuguṛi a'do lototi maro roya. 4 Oko ondro ka'do avote toto alona ayani, 'dooko dri'bai käläsikalai Yisaraele ro ro ri kalakotone mire. 5 Ago ondro avote toto fereŋwa, te 'bakalai se koto gawa be ogone 'buzelesi 'do ri gawa eŋgyene. 6 Ondro ka'do avote toto fereŋwa pere ṛirina si, te 'bakalai se ŋgäṛiŋwadrisi ri te eto oyine. Beṛo ovone toto fereŋwa inye ànyari gawa eŋgyeza. 7 Oko ondro ka'dote kalaombine voaloya, cekuṛe ovone madaro ko ovone toto fereŋwa. 8 Ago ŋgwàagoro Arona ro, se kohanii ro 'do ri ni cekuṛei ovone.
“Cekuṛei ovo ri a'done ota ro ämiri 'duro le kovole'bai amiro ri. 9 Ago ondro nyàte oyi kyila ya 'bädri modo amiro roya kyila oyene, kyila'baazii se kogota ami be 'do be, oko ämiri cekuṛei kwoi ovone 'dooko ma OPI Lu amiro mayina ta amiro ndi, ago mapana ami 'da ni kyila'baazii amiro rigyesi. 10 Tuse ami be yai'dwesi si, ago tu karama se aka'dabe iyi rosi, ago tu karamai Imba To'di rosi, ämiri cekuṛei ovone ŋgapäṛi ozaro amiro dri ago ŋgapäṛi oloro ta ŋgapäṛi rumora rota ro ro dri; ago ànya o'bana ami ndi ta Lu amiro ro oyine: ma ni OPI Lu amiro owo.”
Oyi Yisaraele'bai ro ni Sinai yasi
11 U'du 'buteritu si imba ṛiri ndroa rosi oko, 'dikolo narute ni Mutuguṛi a'do lototi OPI ro ro drisi, 12 ago lidri Yisaraele ro eto oyite ni Vocowa Sinai ro yasi; ago 'dikolo kyi edrete le Vocowa Parana roya. 13 Ono ni tu käti se ànya keŋgyeyi gawa be sina oso tase OPI katabe Musa ri ronye owo. 14 A'do ŋgalonyi ro voro lidri gawa Yuda ro ro gboko ànyaro be etoyi oyite käti bere anyaro be; Nasona ŋgwa Aminadaba ro ni dri'ba lowa ànyaro ro. 15 Netaniela ŋgwa Zuara ro ni dri'ba lowa lidri Yisakara ro ro. 16 Eliaba ŋgwa Elona ro ni dri'ba lowa lidri Zebuluna ro ro.
17 Ondro eŋgye Mutuguṛi te oko, ŋgwàagoro Geresona ro ndi ŋgwàagoro Merari ro be se kayibe ni Mutuguṛi uŋgyi iyi soyite. 18 A'do ŋgalonyiro voro lidri gawa Rubena ro ro gboko ànyaro be soyite bere anyaro be; Elizura ŋgwa Sedeura ro ni dri'ba yi lowa ànyaro dri. 19 Selumiela ŋgwa Zurisadai ro ni dri'ba lowa lidri Simeona ro ro. 20 Ago Elisapa ŋgwa Duela ro ni dri'ba lowa lidri Gada ro ro.
21 'Dooko Koata'bai se kayibe ni ŋga alokado uŋgyi iyi soyite, ago äkyi oto Mutuguṛi te kuru gawa kinja ya teinye ànyari esaako. 22 A'do ŋgalonyiro voro lidri Eperaima ro ro gboko ànyaro be soyite bere ànyaro be, ago Elisama ŋgwa Amiuda ro ni dri'ba yi lowa ànyaro dri. 23 Gamaliele ŋgwa Pedazura ro ni dri'ba lowa lidri Manase ro ro. 24 Ago Abidana ŋgwa Gideoni ro ni dri'ba lowa lidri Benjamina ro ro.
25 'Dooko a'do ŋgalonyiro voro lidri Dana ro, soyite äduro gawa cini iyi vo bere ànyaro be, gbokoi ànyaro voro, Aizera ŋgwa Amisadai ro ni dri'ba yi lowa ànyaro dri. 26 Pagiela ŋgwa Okarana ro ni dri'ba lowa lidri Asera ro ro. 27 Ago Aira ŋgwa Enana ro ni dri'ba lowa lidri Nafatali ro ro. 28 Ono ni ora aba ro lidri Yisaraele ro ro lowa ànyaro voro, ondro ànya keŋgyeyi gawa te owo.
29 Musa atate Obaba ŋgwa Ruela Midiana'ba ambago Musa ro ro ri ekye: “Màte ugu oyi vose OPI kata tana be ämäri se ekye: ‘Mozona ndi ämiri ana ya’; nyikyi ama yibe, ago màyena mi ndi kado; tana OPI 'batate takado oyene Yisaraele ri.” 30 Oko nda zatadrite ekye: “Hwa, mänina ko oyine, male maro oyine 'bädri modo maro ya zelevoi maro re ayani.” 31 Oko Musa atate ekye: “Molo'baru miri nye'be ama ko, tana mini vose ämäri gawa otone kigye vocowa ya ni, ago miri a'done mi ro ämäri. 32 Ago ondro ka'do nyoyi bete ama yibe, 'dooko ŋgase kado OPI kabe oyena ämäri, mayena kpa ayani miri.”
Oyi Lidri ro
33 Lidri eto oyite ni 'bereŋwa alokado OPI ro Sinai pa si abayite u'du nätu, ago Sänduku Tao'baro OPI ro 'dete mileya ànyari aba u'du nätu ro 'do ya, ugu vo uṛi be vo loliro usuza ànyari. 34 'Dikolo OPI ro a'dote kuru ànya dri kitu si, ondro ànya kefoyite ni gawa yasi owo.
35 Ago ondro eto oyite Sänduku Tao'baro be oko, Musa atate ekye: “OPI, miŋga, ago mi'ba kyila'baazii miro kepereru; ago mi'ba ànya se yana osoro milomvo iyi kumu ni mimilesi.” 36 Ago ondro ate loli oko, nda atate ekye: “OPI, nyego lidri kutu otiako Yisaraele ro re.”