1 Ondro Raele kondrete anya ti ŋgwa kote Yakoba ri nonye oko, anya 'ba mawi te endreŋwa be, ago anya atate Yakoba ri ekye: “Nyozo ŋgwà märi, ondro ka'do kote inye ndi märi odrane.”
2 Yakoba ŋgate kyilaro Raele be, ago nda atate ekye: “Ma ko orivoya Lu yi. Nda ni se kalaga mi be utiako ono owo.”
3 Ago Raele atate ekye: “Ruindu'ba maro Bila begi ono, nyu'du sina, tana kuti ŋgwa robe märi, tana ma'do robe endre ro anya si.” 4 Ta'dota anya ozo ruindu'ba anyaro Bila te toko ro ago anyaro ri, ago Yakoba u'dute sina. 5 Bila kwo ŋgwa te, ago tite agoro. 6 'Dooko Raele atate ekye: “Lu pe vure maro te ma taenji ako, ago eri mätu maro kpate, ago ozo ŋgwa agoro te märi.” Ndi anya zi ävuru ndaro te Dana. 7 Bila go kwo ŋgwa kpate, ago ti ŋgwa agoro ṛirina kpate Yakoba ri. 8 Ago Raele atate ekye: “Mäfurute ruufu amba si endreŋwa maro be, ago mape anya te ṛe.” Ago anya zi ävuru ndaro te Nafatali.
9 Ondro Lea kondrete anya ti kote nonye oko, anya ru Zilepa ruindu'ba anyaro te, ago ozote Yakoba ri toko ro. 10 'Dooko Zilepa ti ŋgwa te Yakoba ri agoro. 11 Lea atate ekye: “Ono orivoya kandrakado yi.” Ago anya zi ävuru ndaro te Gada. 12 Ago Zilepa ruindu'ba Lea ro go ti ŋgwa ṛirina kpate agoro Yakoba ri. 13 Ago Lea atate ekye: “Ma te yai'dwesi: tana 'ditoko uzina mate yai'dwe'ba.” Ago anya zi ävuru ndaro te Asera.
14 Ago Rubena fote tu kyifo oloro si, ago usu kyere luweri te ämvu ya, ago ezite endre ndaro Lea ri. 'Dooko Raele atate Lea ri ekye: “Molo'baru miri nyozo kyere luweri ŋgwa miro ro 'do azana märi.”
15 Oko Lea atate anyari ekye: “Tase miru ago maro beni maresi 'do mimabe ndi ta giṛiŋwa yi ya? Ago inye'do mile kpate kyere luweri ŋgwa maro ro ono urune ya?”
Raele ekye: “Ondro ka'do nyozo kyere luweri ŋgwa miro ro 'do te märi, ago miro u'duna ndi mibe ŋgäkyi ondro ono si.”
16 Ondro Yakoba kesate ni ämvu yasi tandrolero oko, Lea fote dri ndaro utune, ago atate ekye: “Be miri ikyine u'dune mare ŋgäkyi ono si, tana märu mi te tiko ro kyere luweri ŋgwa maro rosi.” Ndi nda u'dute anya be ŋgäkyi ana si.
17 Ago Lu eri mätu Lea rote, ago anya kwo ŋgwa te, ago ti ŋgwa linji te Yakoba ri agoro. 18 Ago Lea atate ekye: “Lu ozo päläti maro te märi, tana mozo ruindu'ba maro te ago maro ri.” Ndi anya zi ävuru ndaro te Yisakara. 19 Ago Lea go kwo ŋgwa kpate to'di, ago ti ŋgwa njidrialo na kpate Yakoba ri agoro. 20 Ndi Lea ekye: “Lu ozo ŋgapäṛi te amba märi, yauono ago maro luna ma ndi, tana mäti ŋgwàagoro te ndäri njidrialo.” Ta'dota anya zi ävuru ndaro te Zebuluna. 21 Voigyesi anya ti ŋgutiŋwa aza te ago zi ävuruna te Dina.
22 'Dooko Lu yi ta Raele rote ago zatadri mätu anyaro rote, ago pi utivo anyaro te. 23 Anya kwo ŋgwa te ago tite agoro, ago anya ekye: “OPI na tusu maro te.” 24 Anya ekye: “Lu kogo kozo ŋgwa agoro aza kpa märi.” Ndi anya zi ävuru ndaro te Yosepa.
Kalawasa Yakoba ro Labana be
25 Ondro Raele kuti Yosepa te oko, Yakoba atate Labana ri ekye: “Mi'ba moyi, mago robe 'bädri maro ya. 26 Nyozo 'ditoko maro ndi ŋgàga maro be se ma'dobe ruinduvoya miri tana ro kwoi, mi'ba moyi tana mini ruindu se mindurube miri kadoro ono tana ṛote.”
27 Labana atate ndäri ekye: “Mi'ba mata ta ono te: Mänite ma'dote kandrakado be ago OPI äṛu ma te ta miro si. 28 Miti päläti miro se milebe märi ozone miri 'do ago mozona ndi.”
29 Yakoba zatadrite ekye: “Mini losi se mayebe miri ono ṛote, masi ti miro litite ndra. 30 Se mabe dri ikyi, mi toto sina fereŋwa, oko yauono litite ndra lowaro; ago OPI äṛu mite, vose cini mababe kigyesi ono yasi; ka'do inye yauono te märi tausune katidri modo maro rota ayani.”
31 Labana zatadrite ekye: “Oko mozona e'di miri ya?” Ago Yakoba zatadrite ekye: “Miri päläti ozone märi i'do, male dri ugu äṛigboko koronyai 'ba ro miro vona ondrene, ondro ka'do mile tadrina gindi owo. 32 Ka'do inye ondro ono mi'ba mugu aba dri gbikyi koronyai 'ba ro miro iyi lakosi tu mileya 'do ya, märi timele se cini beti gyogyiro ndi kpekpero be, ago timele se uniro, ago indri se beti kpekpero ndi gyogyiro be, azi lako topene to, se inye iyi ka'do robe päläti ro märi. 33 Tu mileya 'do ya minina a'do 'diri maro tana dori, ondro nyikyite päläti maro lewene owo, indri se cini ko beti gyogyiro ago kpekpero be, ago timele se cini ko uniro, ondro nyusute mabe 'do anjioko mukugu kugu.”
34 Ago Labana zatadrite ekye: “Kado yi, ka'do ndi oso ata miro 'do ronye.” 35 'Dooko tu ana si Labana lewe tegoi se indri lako beti tositosiro ago kpekpero 'do te cini, ago lewe indri toko se beti kpekpero ago gyogyiro kpate cini, vona se cini kotosibe onje be 'do, ndi timele se cini uniro be, ago 'ba ŋgwàagoro ndaro te dri'bana ro. 36 'Dooko nda oyite sina lozo ni Yakoba resi abate u'duna nätu, oko Yakoba rite timele anjoko Labana ro lekyene.
37 Yakoba ŋgo gwoṛi ice lururo nätu azaka rote dofo ro, wi koto'bo na azaka te ta'dota dofo kai lomvona azaka a'dote onjero. 38 Nda 'ba dofo se kai te koronyai 'ba ro mile ikyivo ànyaro gyi umvune karaṛi ya ya, tana ànya kayite ugu gyi umvu oko, ànya ugu ruläsite. 39 Ta'dota koronyai 'ba ro se käläsirute ogone mile dofo ro yasi 'do tiyi ro beti tositosiro, gyogyiro ago kpekpero.
40 Yakoba lewe timele te to ni indri resi, ago za mi ànyaro te ogone koronyai 'ba ro Labana ro se cini beti tositosiro, ago uniro iyi driro, ago lewe se cini andivo ndaro rote to ni Labana ro lakosi.
41 Ondro koronyai 'ba ro se oshweekyero iyi kate ruläsi oko, Yakoba lala dofo iyi te mile ànyaro ya karaṛi lomvo, tana ànya käläsiru robe lakole dofo iyi roya, 42 oko nda lala dofo kote mile koronyai 'ba ro se mbaraako iyi roya. Ta'dota se cini mbaraako iyi a'dote Labana ri, ago se cini oshweoshwero iyi a'dote Yakoba ri. 43 Liti ono yasi Yakoba a'dote ŋga be amba, a'dote koronyai 'ba robe amba, ruindu'bai àgoro ndi ndiriŋwa robe, ago gamelei ndi doŋgyii be be amba.