Nebi aza ka Yosapata Luku
1 Yosapata 'Bädri'ba Yuda ro egote londroro zo'desi miri ro ndaro Yerusalema ya ana ya. 2 Oko nebi aza ävuruna Jehu ŋgwa Anani ro, oyite 'bädri'ba re ago atate ndäri ekye: Inye'do mima miro be ndi kado ànya se koziro opane ago o'dene 'dise yana osoro OPI lomvo vosi ya? Tase miyebe ono 'ba OPI te a'done kyilaro mibe. 3 Caoko, takado aza orivoya mibe. Tana nyana beti lu tokoro Asera se lidri kabe mätuna ono rote, ago nyojote osone ole Lu ro voro.
Ŋgao'ba Yosapata ro To'diro
4 Yosapata rite Yerusalema ya, caoko nda abate lidri lakosi turoturo, etoni ŋgäṛiŋwadrisi Beraseba ya le mä'dudri 'bädri lutu ro Eperaima roya, lidri läzine egone kovole OPI, Lu zutui ànyaro ro re. 5 Nda ka'da vureope'bai te 'bakicii cini obeobero tiṛi si Yuda ro yasi, ba alo alo 'bakici alo yasi, 6 ago emba ànya te ekye: Nyà'do taotibe vureopevoya; tana nyà losi oye ko drikaca lidri rosi oko drikaca OPI rosi; nda orivoya ami be vureopevoya. 7 Nyuturi OPI ago miye losi taoti si, tana OPI Lu amaro le ta'diriako kode ta 'dilewero ndi ta miogye robe ko.
8 Yerusalema ya Yosapata ka'da ruka Lewe'bai, kohanii ndi ruka dri'bai robe te vureope'bai ro, vure ota OPI ro pere ro kode kalaope ro lidri 'bakici ro lako opene. 9 Nda ozo ta ŋgaembaro kwoi te ànyari ekye: Beṛo ämiri kama amiro oyene OPI turi si, nda orone 'diriro, ŋgase cini nyàbe oyena si. 10 Azi amiro ni 'bakici aza yasi keziyi vure aza te ami kandra, ta 'diufuro kode tase arabe ndi ta ota pere robe rota oko, beṛo ämiri ta vure oyero embane ànyari kadoro, ukyi ànya a'doyi 'da taenji be OPI kandra. Ondro miye kote inye, ami ndi azi amiro yibe nyätämbina mbara kyila OPI ro ro ndi. Oko ondro ka'do miye kama amiro te, minina ko a'done taenji be. 11 Kohani Fopara Amaraya ri ni a'done drikaca ädu vure ta mätu ro robe; ago Zebadia ŋgwa Isamaele ro, wari'ba Yuda ro ri ni a'done drikaca ädu vure ete azaka robe. Lewe'bai ri ni tase abe oyena vo vure roya ondrene. Nyà'do agoagoro ago miye ta ŋgaemba ono ro, ka'do inye OPI ka'do taŋgye resi.