Elemeleki ndi Katidri ndaro be Oyiyi te Moaba ya
1 Tuse vureope'bai ribe vo mirine ana si mä'bu 'dete 'bädri ya, ago mano aza Beteleme ro ni Yuda yasi oyite orine 'bädri Moaba roya, nda ndi toko ndaro ndi ŋgwàagoro ritu ndaro be. 2 Mano se ana ävuruna ni Elemeleki ago toko ndaro ävuruna Naomi, ago ävuru ŋgwàagoro ritu ndaro ro ni Malona ndi Kiliyona be; ànya oyiyite 'bädri Moaba roya ago riyite lau. 3 Oko ndi Elemeleki, ago Naomi ro, drate, ago e'be Naomi te ŋgwàagoro ritu anyaro be. 4 Ŋgwàagoro kwoi gyeyi ndiriŋwa Moaba'bai rote toko ro, alodi ävuruna ni Orupa ago aza Ruta. Ondro ànya koriyite lau oso ndroa 'butealo ronye oko; 5 Malona ndi Kiliyona be riti drakpate, ago e'be Naomi te iṛe, teinye ago ànyaro ako, ago ŋgwàagoro ritu anyaro ako.
Naomi ndi Ruta be Goyite Beteleme ya
6 'Dooko Naomi ederute ndi 'ditoko anyaro be oyine ni Moaba yasi, tana anya eri ta teni 'bädri Moaba ro yasi ekye, OPI äṛu lidri ndaro te ago ozo ŋgaonya te ànyari. 7 Ago anya ŋgate ni vose anya be orivoya kigye ana yasi, ndi tro 'ditoko ritu anyaro be. Ànya efoyite liti ya ogone 'bädri Yuda roya. 8 Naomi ata te 'ditoko ritu anyaro ri ekye: “Nyòyi, mìgo kovole 'dialo kogo zo endre anyaro roya. OPI koye ami ndi kado, oso mìye ta be kado märi ndi ànya se kodra be kai ri ono ronye. 9 OPI ko'ba ami ogone agoi urune to'di ago a'done 'ba be.”
'Dooko anya njunju ànya te mede oyesi, ago ànya 'beyi liyi te. 10 Ago ànya atayite anyari ekye: “Hwa, mòyina ndi mibe lidri miro re.”
11 Oko Naomi ata te ekye: “Mìgo kovole 'ditoko maro, nyòyina gwo mabe etaya? Inye'do ŋgwàagoro to'dina aza gibe ma ya se ogo a'dona gwo àgoro ämiri ya? 12 Mìtadri kovole, 'ditoko maro, nyòyi, märi ago aza urune te i'do tana madete pari. Ondro ka'do ca makye ma mio'ba be, ago aba ma'do gica ago be ŋgäkyi ono si ago mäti ŋgwàagoro gica, 13 inye'do mìlena ndi orine ànya kwotene madale ànya ombanayi gwo ya? Inye'do ta ono o'bana ami ndi ami etane orine ogyeako ya? Hwa, 'ditoko maro, musu ta te amba ta amiro ta, tana OPI njate malomvo.”
14 Ago ànya go 'beyi liyi te to'dina. Ago Orupa njunju adraŋwa iro te mede oyesi ago gote kovole lidri iro re, oko Ruta lebete Naomi lomvo. 15 Ago Naomi atate Ruta ri ekye: “Mindre tokoazi miro gote kovole lidri anyaro re ago lui anyaro re; miso tokoazi miro vo.”
16 Oko Ruta atate ekye: “Molo'baru miri mi'ba ma ko ogone kovole ni osovoya mi vo. Tana vose nyabe oyi kigye moyina kpa kigye, ago vose nyabe ori kigye marina kpa kigye; lidri miro a'dona ndi lidri maro, ago Lu miro a'dona ndi Lu maro. 17 Vose nyabe odra kigye madrana kpa kigye ago asena ma kpa lau. Ka'do inye taezaro koziro OPI ro kikyi mädri ondro ka'do maye ta aza te, e'be gialo odra lewena ma ni mire si.”
18 Ago ondro Naomi kondrete Ruta lete 'du oyine anya be oko, anya ata ta aza kote.
19 Ndi ànya riti ugu oyite madale ànya esayite Beteleme ya. Ago ondro ànya kesayite Beteleme ya oko, lidri 'ba'desi ya te kpeye larolaro ro ta ànyaro ta; ago 'ditoko atate ekye: “Inye'do ono gi Naomi owo ya?”
20 Naomi atate ànyari ekye: “Mìzi ma ko Naomi , mìzi ma Mara , tana OPI mbarapara 'ba ma te a'done tusuro. 21 Moyite ni nosi ŋga be, oko OPI go logo ma te kovole ŋga aza ako. Tana e'di nyà ma uzi gi'de Naomi niya? OPI Mbarapara ezi rriti te mädri.”
22 Naomi egote, kovele ni Moaba yasi tro Ruta toko anyaro Moaba'ba ro be. Ago ànya esayite Beteleme ya etovo kaaza oloro si.