Kama Käläsikala Lewe'bai Koata ro ro
1 OPI atate Musa ndi Arona be ri ekye; 2 mìti Lewe'bai käläsikala Koata ro, katidrii ànyaro voro, ago käläsikalai ànyaro voro, 3 etoni se ndroa na be 'butenätu ya le se ndroa na be 'butenji ya, se ko'debe ree losi oyene Mutuguṛi a'do lototi OPI ro roya 'do. 4 Losi Koata'bai ro ni a'done dri'bai ŋgase cini alokado ndra ro.
5 Ondro ka'dote gawa eŋgyene, Arona ndi ŋgwàagoro ndaro be ri ocine Mutuguṛi ya, ago boŋgo toyitoyiro otrine vuru, ago drî Sänduku Tao'baro ro takone sina. 6 'Dooko ànyari kyini indri ro takone kundu na ya, ago drina o'bene ändru boŋgo lu'buliro si, ago ànyari ice caricari uŋgyina ro unjune kigye.
7 Ago ànyari drî tara'biza se abe ambata se ozobe OPI ri o'bana drigye 'do ro takone boŋgo lu'buliro si, ago saani nai o'bane driigye, deŋbele nai ndi ŋgaŋgutruro ozaro be, kata'ba nai ndi 'boṛo nai ŋgapäṛi vino ro robe ndi ambata na be o'bane orine 'duro driigye; 8 'dooko ànyari drî ŋga cini kwoi ro takone boŋgo walawalaro si, ago drina takone kyini indri rosi, 'dooko ànyari ice caricari uŋgyina ro unjune kigye.
9 Ànyari boŋgo lu'buliro urune drî ŋga lamba edrero ro, lamba nai, ŋga izwena ro siniyaŋwà na iyi be ndi lakazà na cini ido ice ido ro ro ezina robe takone sina. 10 Ànyari lomvona ndi lakazà na cini be biṛine kyini indri rosi, ago o'bane ŋga uŋgyina ro dri.
11 'Dooko ànyari boŋgo lu'buliro takone vo tori oloro läguläguro dri, drina takone kyini indri rosi, ago ànyari ice caricari uŋgyina ro unjune kigye. 12 Ànyari lakazà se cini abe losi oye sina vo Alokado ya iyi urune, ànya opane boŋgo lu'buliro ya, drina takone kyini indri rosi ago ànya o'bane ŋga uŋgyina ro dri.
13 Ànyari torofo omvone ni vo tori oloro drisi, ago drina takone boŋgo lärimiro si. 14 'Dooko ànyari lakazà se cini abe losi oye sina lau iyi o'bane vo tori oloro dri, ŋga asi epero, moŋgo nai, kye'boŋwà na, deŋbeleŋwà na ndi lakazà cini se abe losi oye sina vo tori oloro ya be, ànyari drina takone kyini indri rosi, ago ànyari ice caricari uŋgyina ro unjune kigye. 15 Ago ondro Arona ndi ŋgwàagoro ndaro be kondeyi drî Vo Alokado ro takona te ndi lakazà cini Vo alokado robe ago eŋgye Mutuguṛi te oko, 'dooko ŋgwàagoro Koata ro ri ikyine ŋgase kwoi uŋgyine, oko beṛo ko ànyari ŋgase alokado odone, ukyi ànya odrayi 'da.
Kwoi ni losi se oyene käläsikala Koata ro ri ondro ate Mutuguṛi uswe owo.
16 Eleazara ŋgwa kohani Arona ro ri ni a'done dri'ba Mutuguṛi ro ndi ido asi eyiro ro, ŋgaŋgutruro tägyi ndeṛindeṛiro, ŋgapäṛi ozaro 'duro inya ro, ido 'diäṛu ro ndi ŋgase cini losi oyero Mutuguṛi ya iyi robe.
17 OPI atate Musa ndi Arona be ri ekye: 18 “Mì'ba äfu käläsikala Koata ro ko ni Lewe'bai lakosi. 19 Ŋgase oyene ämiri Koata'bai ri ni no ukyi ànya odra 'da ondro ka'do ànya kikyi te lototi ŋgase alokado ndra iyi lomvo owo: Arona ndi ŋgwàagoro ndaro be ri ocine zo ya, ago losi se oyero ozone 'dialo alo ri ago ŋga se uŋgyiro tana itine ndäri. 20 Oko ko Koata'bai ri ocine ŋgase alokado Mutuguṛi ya ondrene ca vo ondre ndriŋwa si, ukyi ànya odrayi 'da.”
Kama käläsikala Lewe'ba Geresona ro ro
21 OPI atate Musa ri ekye, 22 Miti käläsikala Geresona ro kpa, katidrii ànyaro voro ago käläsikalai ànyaro voro, 23 etoni se ndroa na 'butenätu ya le se ndroa na 'butenji ya, vona se cini ko'debe ree losi oyene Mutuguṛi a'do lototi OPI ro roya 'do. 24 Kwoi ni losi se oyene ànyari ago ŋgase ànyari uŋgyine owo: 25 Mutuguṛi, ŋga yana takoro, lomvona takoro, kyini indri ro se drina kurusi takoro, boŋgo oyiro käläsi na kala, 26 boŋgo toyi ro goko ro, ndi boŋgo toyi ro ecivo goko se orivoya gbikyi Mutuguṛi ndi vo tori oloro be lomvosi 'do be, ndi lakazà cini ànyaro losi na robe iyi uŋgyine, ndi ŋgase cini alebe ànyari oyene iyi yibe. 27 Geresona'bai ri losi cini oyene oso Arona ndi ŋgwàagoro ndaro be kayibe ka'dana ànyari oyene ronye. Beṛo Musa ndi Arona be ri ondrene anjioko losi 'do drikaca ànyaro zele. 28 Kwoi ni losi se oyero käläsikala Geresona ro ri Mutuguṛi a'do lototi Opi ro ya, drikaca Itamara ŋgwa kohani Arona ro ro zele owo.
Kama käläsikala Lewe'ba Merari ro ro
29 OPI atate Musa ri käläsikala Merari ro otine, katidrii ànyaro voro ago käläsikalai ànyaro voro; 30 etoni se ndroa na 'butenätu le se ndroa na 'butenji ya, vona se cini ko'debe ree losi oyene Mutuguṛi a'do lototi Opi ro roya 'do. 31 Kwoi ni ŋgase ànyari uŋgyine owo: Ŋga Mutuguṛi gbetero, joce nai, ice caricarina ndi ŋga ànya lunjuna robe, 32 ndi joce ice caricari se gbikyi goko lomvosi iyi ndi ŋga ànya lunjuro be, ŋga otona ro, ibaŋwà na ndi lakazà se cini losi ro ànyaro iyi, be miri ävuru ànyaro egyine ndi ŋgase ànyari uŋgyine be. 33 Kwoi ni losi se oyero käläsikala Merari ro ri, Mutuguṛi a'do lototi Opi ro ya owo, drikaca Itamara ŋgwa kohani Arona ro ro zele owo.
Oti Lewe'bai ro
34 Musa, Arona ndi dri'bai lowa robe tiyi Koata'bai te katidrii ànyaro voro ago käläsikalai ànyaro voro, 35 etoni se ndroa na be 'butenätu ya le se ndroa na be 'butenji ya, vona se cini ko'debe ree losi oyene Mutuguṛi a'do lototi OPI ro roya 'do. 36 Oti ànyaro katidrii ànyaro voro cini orivoya kutu ritu kama njidrieri 'butenji (2,750). 37 Ono ni oti katidrii Koata'bai ro ro, vona se cini ko'debe ree ruindune Mutuguṛi a'do lototi OPI ro roya, se Musa ndi Arona be kotiyibe oso se OPI kota Musa be ronye owo.
38 Oti Geresona'bai ro, katidrii ànyaro voro ago käläsikalai ànyaro voro, 39 etoni se ndroa na be 'butenätu ya le se ndroa na be 'butenji ya, vona se cini ko'debe ree losi oyene Mutuguṛi a'do lototi OPI ro roya 'do. 40 Oti ànyaro katidrii ànyaro voro ago käläsikalai ànyaro voro cini orivoya kutu ritu kama njidrialo 'butenätu (2,630). 41 Ono ni oti katidrii zelevoi Geresona ro ro, vona se cini ko'debe ree ruindune Mutuguṛi a'do lototi OPI ro roya, se Musa ndi arona be kotiyibe oso se OPI kota be ronye owo.
42 Oti katidrii zelevoi Merari ro ro katidrii ànyaro voro ago käläsikalai ànyaro voro, 43 etoni se ndroa na be 'butenätu ya le se ndroa na be 'butenji ya, vona se cini ko'debe ree ruindune Mutuguṛi a'do lototi Opi ro roya, 44 oti ànyaro katidrii ànyaro voro cini orivoya kutu nätu kama ritu (3,200). 45 Kwoi ni ànya se atibe katidrii zelevoi Merari ro ro, se Musa ndi Arona be kotiyibe oso se OPI kota Musa be ronye owo.
46 Oti Lewe'bai cini ro, se Musa ndi Arona be ago dri'bai Yisaraele ro kotibe, käläsikala voro ago katidrii voro; 47 etoni se ndroa na be 'butenätu ya le se ndroa na be 'butenji ya, vona se cini ko'debe ree losi oyene ago unina ndi ŋgaläŋgyi uŋgyine ni Mutuguṛi a'do lototi OPI ro roya, 48 vona se atibe cini orivoya kutu njidriana kama nji 'butenjidriena (8,580). 49 Oso se OPI kota Musa be ronye a'ba ànya te, mano alo ndi losi ruindu ro ndaro se oyene kode ŋga uŋgyine 'do oyene ago Musa ti ànyate oso se Opi kota be ronye.