Ŋiɽany nǝ ŋimiitha Kwɔrɔstɔ-ŋgi.
1 E-ta a kwǝr aari tha? A kwǝr-tǝ nannitha ki-ŋikiya-na mindaŋ ethi-mǝ ne@mɔ kikiɽǝthi-a? 2 Bǝri-mǝ! Nyiiŋǝ kila limǝ durni ŋikiyaŋi, e-ta ǝri-gwɔ, nannatha-na kwokwony ǝŋgwɔrɔ? 3 Ŋiti ŋilŋithi-ŋǝsi mac, ethaarɔŋw, nyiiŋǝ kila tatap laari @ammiḏa ethi Kwɔrɔstɔ-na kwǝni Yǝcu, a kwaarir@ammiḏa ki-ŋiɽany-na ŋuuŋunǝ? 4 Ŋwɔṯaŋw nǝr ǝni laanmna ŋundu-gi ma@muuḏiiyya-gi nǝ lɔɽɔmaṯṯɔ ki-ŋiɽany-na ŋuuŋun, kaka mǝgwɔ Kwɔrɔstɔ diiɽǝ ki-ŋiɽany-na ŋinith-ŋi ŋǝthi Papa, nǝ nyiiŋǝ tok ǝri nanni ki-ŋimiitha-na ŋiyaŋ.
5 Ŋwɔṯaŋw mǝrorona lɔtɔpɔt ŋundu-gi ki-ŋiɽany-na ŋuuŋun tǝ, nǝrṯoroŋw rerrem tok, ǝrli ɔɽɔmaṯṯi ki-thidiiɽǝ-nǝ ṯuuŋwun. 6 A kwilŋithir rac ethaarɔŋw rogɽo rǝri rɔɔɽɔn rimǝ ai ki-ŋwuuɽi-lǝ ŋundu-gi, mindaŋ mǝ aŋna wǝthi ŋikiya wɔ kiirathalɔ, mindaŋ mǝreere oro lɔwaay lǝthi ŋikiya kwokwony mac. 7 Kaka ŋgwa kwɔmǝ ai, nɔŋwɔni kwɔmǝ kǝdinnǝ ki-ŋikiya-na. 8 Laakin mǝr ai Kwɔrɔstɔ-gi tǝ, nǝrǝthi ṯǝmminǝ ethaarɔŋw, a kwǝr miithi ŋundu-gi tok. 9 Kaka nilŋithir-gwɔ rac ethaarɔŋw, kaka nindiɽi-gwɔ Kwɔrɔstɔ ki-ŋiɽany-na, ŋweere ai kwokwony ḏuṯ; mindaŋ a ŋiɽany ere ǝthi sɔlṯa duŋgwun-lǝ kwokwony mac. 10 Nǝ ŋiɽany ŋa ŋaayɔŋwsi nɔŋwsi ai ŋǝni ŋikiya taamm tɔtɔpɔt dak, laakin ŋimiitha ŋa ŋinannɔŋw-ŋi, nɔŋwsi miithici Allah. 11 Nǝ ŋaaŋa tok, laazim a ruusi rogɽo raalɔ laayɔ ki-ŋikiya-na, mmdaŋ a miithici Allah ethi Kwɔrɔstɔ-na kwǝni Yǝcu.
12 Ŋwɔṯaŋw ere duŋgwǝci ŋikiyaŋi ethǝthi sɔlṯa mac ki-yaŋna-la yaalɔ yǝṯi ernene, mindaŋ etheere iili ŋaaŋwɔsi ethi iinyici sɔɔrɔma naana kweeŋen mac. 13 Ǝṯeere ṯiŋacci ŋikiyaŋi yaŋna-lɔ yaalɔ ethi-si ǝrri ŋir ŋudur mac. Laakin ǝṯi ṯiŋacci Allah rogɽo-lɔ raalɔ, kaka lizi kila limǝŋwsi diiɽǝ ki-ŋiɽany-na kwokwony ethi miithi, ŋwɔṯaŋw ǝṯi ṯiŋacci Allah yaŋna-lɔ yaalɔ min-min, ethi-yi ǝrri ŋǝni ŋirllalɔ. 14 Ŋwɔṯaŋw laazim a ŋikiya ere ǝthi sɔlṯa mac daŋgal-la, kaka niti nikǝkkinǝŋǝ-gwɔ Sherli@a-gi mac, laakin nǝ kǝkkini ne@ma-gi.
Lɔwaay lǝṯhi ŋirllalɔ.
15 E-ta a kwǝr aari tha? Ŋǝrsi ǝrri ŋigii kaka niti nikǝkkinǝr-gwɔ Sherii@a-gi mac, laakin nǝr kǝkkini ne@ma-gi-a? Bǝri-mǝ! 16 Ŋiti ŋilŋithi-ŋǝsi mac ethaarɔŋw, mǝ ṯiŋacci ŋgwa rogɽo-lɔ raalɔ kwǝṯi iinyici naana kaka lɔwaay, noro lɔwaay lǝthi ŋgwa kwǝṯi iinyici naana. Nɔrɔ-gwɔ ŋikiya ŋǝṯi mɔmlɔtatha lizi ki-ŋiɽany-na, nǝ mǝrǝni ṯiniŋnithɔ, ǝṯɔŋw mɔmlɔtatha lizi ŋirllalɔ naana? 17 Laakin alhamḏɔ Lillah, ŋaaŋa kila lir lɔwaay kerreny lǝthi ŋikiya, nǝ iinyici ṯa@liima naana min-min kitha ṯimǝ aavi rɔgwor-ri raalɔ. 18 Nǝ kaka mǝr-ŋǝsi-gwɔ kǝdithǝ ki-ŋikiya-na, noro lɔwaay lǝthi ŋirllalɔ. 19 Nyii ŋgwɔ kwandisa ŋizigwunǝŋi, kaka nɔrɔŋa-gwɔ lizigwunǝŋ lɔblaṯɔ. Nǝ kaka ṯǝ kinaŋw nithiŋacaŋa-gwɔ ŋiijinǝ-ŋwɔsi ŋudur-ŋi yaŋna-lɔ yaalɔ, ŋa ŋǝṯi kikindǝthi ŋuuru-ŋuuru, ŋwɔṯaŋw tok a ṯiŋacci ŋirllalɔ yaŋna-lɔ yaalɔ ethi rillinǝlɔ ter.
20 Kinaŋw nɔrŋa-gwɔ lɔwaay lǝthi ŋikiya, neere kǝkkini ŋirllalɔ-ŋi mac. 21 Laakin aatha kwɔmǝ ǝginǝ kwomne-na ŋgwa kwǝṯi-ŋǝsi-gi ṯɔrony mithǝ kire-kirem? Nǝ ṯirimthitha ṯǝthi kwomne ŋgwa ǝni ŋiɽany. 22 Laakin kire-kirem-ŋgwɔ tǝ, ŋaaŋa limǝ kǝdinnǝ ki-ŋikiya-na, mindaŋ noro lɔwaay lǝthi Allah, nǝ ṯǝgina ṯinḏi-ŋǝ ethi ǝgini, nǝ ṯirllinǝlɔ ter oro, nǝ ṯirimthitha ṯuuŋwun nɔŋworo ŋimiitha ŋǝṯi nannitha dok-dok. 23 Kaka nɔrɔ-gwɔ ɔjra wǝthi ŋikiya ŋiɽany, laakin nǝ haḏiiyyǝ wǝthi Allah tǝ, nǝ ŋimiitha oro ŋǝṯi nannitha dok-dok, ethi Kwɔrɔstɔ-na kwǝni Yǝcu kwir Kweeleny kwǝri.