Ǝgicǝr Kweelenyi ǝzir mindaŋ mɔŋw aaɽa.
1 Laakin liyǝŋgǝri, ŋende ŋir ŋiɽaŋal ŋeere mac ethi lɔcca ŋaaŋwɔsi ŋiɽaŋali ŋǝthi nyaamin-ŋa ŋwɔɔmɔr-ŋi, ethisi elŋe ŋinḏi ethi ǝrrini ṯaccaŋ. 2 Kaka nilŋithi-ŋǝsi rogɽo-ri raalɔ ethaarɔŋw, Kweeleny kwinḏi ethi iila kaka kwɔɔɽam kilkǝlɔ. 3 Mǝ lizi aarɔŋw, “Ŋiɽaŋal tatap ŋǝni ŋisaaw ŋaami naanɔŋw.” E-ta ǝṯisi ṯigiirathalɔ ǝnḏithǝnǝ pugwuṯ; kaka ŋijma ŋǝthi tɔr ŋǝṯi accasi kwayɔ, mindaŋ ŋweere kweere mac kwǝsi arṯitha. 4 Laakin ŋaaŋa liyǝŋgǝri-tǝ, a liti linaanɔ kirim-nǝ mac, mindaŋ ethi-mǝ Laamin kila ṯǝrmǝzi ŋaaŋwɔsi-lɔ kaka kwɔɔɽam. 5 Kaka nɔrŋa-gwɔ tatap nyɔr nyǝthi fɔɔri, nǝ nyǝthi kaaŋwɔn-naŋw tok. A kwiti kwirir lǝthi kulu mac ya kirim mac. 6 Ŋwɔṯaŋw ǝṯir nḏirɔ mac kaka lithaathɔ, laakin ǝri kǝniny naani yǝy-yǝlɔ, laŋrinna naana. 7 Nǝ kila lǝṯi nḏiri ǝṯir nḏiri kilkǝlɔ; kila lǝṯi urlǝli ǝṯir urlǝli kilkǝlɔ. 8 Laakin kaka nɔrɔr-gwɔ nyii-ŋǝ lǝthi kaaŋwɔn-nɔŋw tǝ, ǝri aŋranni naana, mindaŋ ǝri kenne yethre-ŋi yǝthi ṯǝmminǝ, nǝ yǝthi ṯamɽa tok, nǝ ṯǝkkizǝ kizǝn ṯǝri ṯǝthi ŋiglǝthǝ ṯir kaka lirr kinda. 9 Kaka niti nǝlli-nyji-gwɔ Allah mac ethi rǝrinni ŋirŋasa-ŋi ŋuuŋun, laakin ethaavi ŋiglǝthǝ Kweeleny-ŋgi kwǝri kwǝni Yǝcu Kwɔrɔstɔ, 10 kwǝyicǝ-nyji, mindaŋ mǝr nanni ŋundu-gi, a-naanir-gwɔ limiithɔ alla laayɔ mɔŋw aaɽa. 11 Ŋwɔṯaŋw a firllanni-na wɔɽe-wɔɽeny, ethi mǝccǝthisi-nǝ tok kaka-ṯǝ ŋa ŋǝrrǝ-ŋǝsi.
Ṯa@liim ṯirmithithɔ na ṯaaginna.
12 Laakin liyǝŋgǝri lǝri, nyiiŋǝ kɔlɔ lituurǝccǝ-ŋǝsi-lɔ tur, ethisi iiɽinǝ kila lǝṯi akkɔ ŋothɽor daŋgal-na, kila lǝṯi-ŋǝsi mɔlotto ethi Kweeleny-na, nǝ lǝṯi-ŋǝsi ilŋiithini ethaami eleŋw ki-ŋɔgrɔstiyan-na. 13 Ǝṯisi iiɽinǝ ṯiiɽǝthi-nǝ ṯɔppa ṯimini, nǝ ṯamɽa-thi tok, ŋiɽaŋal-ŋi ŋǝthi ŋothɽor ŋeeŋen ŋǝṯirsi akkɔ. Ǝṯi ammithina wɔɽe-wɔɽeny. 14 Liyǝŋgǝri, nyiiŋǝ lɔɔraca-ŋǝsi, ethi ulici limoozoŋi, nǝ ethisi firllasi-la tok kila lǝṯisi ṯɔrony yee-na, nǝ ǝsi mǝcci kila lajlinna, ǝṯisi mithici rɔgwori tatap. 15 Iizar mindaŋ a kweere daŋgal-na ere ǝɽinni nda mac, laakin ǝṯisi naŋnalɔ ŋisaaw ethisi ǝrrǝthisi-nǝ, nǝ lizi tatap tok. 16 Ǝṯi nyeŋlena nyaamin tatap. 17 Ǝṯi aari kiyiiriny dok-dok. 18 Ǝṯi aari shukran ŋiɽaŋal-ŋi tatap. Kaka nɔrɔ-gwɔ ṯǝ ŋiɽaŋal ŋɔ ŋǝthi ṯɔgwor ṯǝthi Allah, ethi nanni ethi Kwɔrostɔ-na kwǝni Yǝcu. 19 Ǝṯi iɽinyathɔ Ṯigɽimǝ Ṯirllinalɔ ter mac. 20 Ǝṯeere ruusi ŋiɽaŋali-lɔŋw mac ŋǝthi ŋiɽiiya. 21 Laakin ǝṯi ṯǝcci kwomne tatap, e-ta ǝṯi mithǝ ŋgwa kwɔvthanna. 22 Ǝṯisi ruccinǝ ŋeere tuk ŋa ŋaaɽinna ŋikiyaŋi.
23 Ethi Allah wǝthi ŋiiɽǝnnǝ rogɽo-ri ruuŋwun rilli ŋaaŋwɔsi-lɔ ter; ethiŋw karni rigɽimǝ raalɔ, nǝ rogɽo raalɔ yaŋna-yina yaalɔ tatap, ethi nanni liti lǝthi lɔɔma-na leere mac, ki-lɔɔmɔr-la linḏi-li Kweeleny kwǝri kwǝni Yǝcu Kwɔrɔstɔ ethaaɽa. 24 Ŋgwa kwɔrnɔṯɔ-ŋǝsi tǝ, kaka nirlliŋgwɔ-lɔ, ŋwɔsi ǝrri.
25 Liyǝŋgǝri, ǝricǝr-nyji kiyiiriny.
26 Aginnicar-nyji liyǝŋgǝri-ŋwɔsi tatap ṯaaginna-thi ṯirllinǝlɔ ter.
27 Nyii-ŋgwɔ kwɔɔŋacca-ŋǝsi ethi Kweeleny-na, mindaŋ ethi juwaab ŋgwɔ urtuni ki-lizi-nǝ tatap lǝthi ṯǝmminǝ.
28 Ethi ne@ma kwǝthi Kweeleny kwǝri kwǝni Yǝcu Kwɔrɔstɔ nanni ŋaaŋali.