Bɔɔlɔs mɔŋgwɔ ulici lizi lǝthi Kɔɔrɔnthɔɔs-ŋwɔ, nǝ ṯaaginna ṯuuŋwun ṯirimthithɔ.
1 Nyii ŋgwa kwinḏi-ŋǝsi ethi raaŋitha kwokwony ki-taamin-la tir nimrǝ toɽol. Nǝ gǝḏiiyyǝ keere nyithak kinḏi ethi kettine, laazim ŋwɔthi shuhuuḏǝ-nǝ kwuɽǝn ya toɽol. 2 Nyii ŋgwɔ kwɔnaŋna ethisi andaci kila lǝrrǝ ŋikiyaŋi kinaŋw kerreny, nǝ kila tatap lithaathɔ tok; ŋimǝ-ŋǝsi-pǝ andica rac kerreny kinaŋw ki-taamin-la tir nimrǝ kwuɽǝn, kinaŋw a-raaŋathi-ŋǝsi, laakin ŋǝŋǝsitǝ andaci kwokwony a-naaniny tǝ kinnǝni tuk. Na mǝnyii aaɽa kwokwony tǝ, nyjeere aalatha rii ḏuṯ. 3 Ŋaaŋa lǝṯi naŋni ŋiɽaŋali-lɔ ethisi elŋe ŋǝniŋw, Kwɔrɔstɔ kwǝṯi andasi nyii-ŋgi alla bǝri. Mɔŋwsi kinnǝ ǝrri daŋgal-na nɔŋweere ǝni kwajlinna mac, laakin ǝṯɔŋw ruwǝzi ŋɔma-lɔ daŋgal-na. 4 Kaka niɽinyithir-gwɔ ki-ŋwuuɽi-lǝ ŋwɔɽɔmɔthalɔ ṯǝjlinnǝ-thi, laakin nɔŋw-tǝ miithi ŋɔma-ŋi ŋǝthi Allah, nǝ ŋwɔṯaŋw duŋgwunnǝ-ŋgi tǝ, ǝrǝni lajlinna, laakin ki-ṯɔɽɔmaṯṯa-na ṯǝri dɔŋw ŋaaŋa-li tǝ, ǝri miithi ŋundu-ŋgi ŋɔma-ŋi rǝthi Allah.
5 Ṯǝccǝr rogɽo raalɔ na ǝsi raaŋana ŋǝmmǝŋ, etheese ŋaaŋa kila laami eleŋw ŋǝmmǝŋ ki-ṯǝmminǝ-nǝ alla bǝri. Ŋaaŋa liti lilŋica rerrem mac ethaarɔŋw Yǝcu Kwɔrɔstɔ kwǝṯi naani daŋgal-na mac-a? Illi mǝteere ǝthi ŋɔma dɔṯṯɔk mac ethi ɔvthasi ki-thiṯǝccǝ-nǝ. 6 Nyii kwɔgittathɔ daŋgalɔ mindaŋ mǝ elŋe ethaarɔŋw, nyiiŋǝ liti libǝriyinǝ mac. 7 Laakin nyiiŋǝ lǝṯi aari Allah kiyiiriny mindaŋ mǝseere ǝrri ŋeere ŋigii mac, ŋiti ŋǝniŋw nyiiŋǝ limǝ ɔvthasi kinnǝni mac, laakin ethisi ǝrri kǝniny ŋa ŋirllalɔ, niijinǝr-vǝ kinnǝni lir kaka libǝriyinnǝ tok. 8 Kaka niti nǝthiny-gwɔ ŋɔma mac, ethisi ǝrrizǝsǝ ŋeere ŋir ṯuwǝn ŋiɽaŋali naana ŋir rerrem mac, laakin nǝroro ethisi ǝrri ŋa ŋir rerrem ṯoɽɔk. 9 Nyiiŋǝ lǝṯi aamina mǝnyii ajli nyiiŋǝ, nǝ ŋaaŋa tǝ, ethi firllathala. Ŋwɔṯaŋw, ǝṯi-nyii aari kiyiiriny mindaŋ moro min-min.
10 Ŋindǝr-ta ŋɔ mindaŋ nǝŋǝsi-mǝ lɔcca a-naaniny-tǝ kinnǝni tuk; mindaŋ mǝnyii ɔppatha kǝzir weere kinaŋw tǝ, ŋǝseere inḏǝthǝ ṯurvǝ mac sɔlṯa-gi kwinḏǝthǝ-nyii Kweeleny, kwir sɔlṯa kwǝthi-gi dɔŋgwɔ-ŋgwazi ŋaaŋwɔsi, nɔŋweere oro kwǝthi-gi kiyasi ŋaaŋwɔsi-lɔ mac.
11 Nǝ ŋɔ ŋir kwaathan-kwaathan tǝ liyǝŋgǝri liinyi, ŋǝsi ǝccǝŋw, cǝ, naanir laami naana. Ǝṯi ɔnvici rirllalɔ kiyǝnǝ kwɔro-kwɔrop ethoro min-min, ǝṯisi kettice ŋa yǝni ŋǝṯiŋǝsi-ŋi ɔracci; ǝṯisi ruusi ṯuunyu ṯɔtɔpɔt daŋgal-na; ǝṯi naani ŋethre ŋisaaw. Ethi Allah wǝthi ṯamɽa-ŋa ŋiiɽǝnnǝ-ŋi nanni ŋaaŋa-li. 12 Aginnathisar-na ṯaaginna-thi ṯirllinǝlɔ ter. 13 Lizi tatap lǝthi Allah lirllinǝlɔ ter laaginna-ŋǝsi.
14 Ethi ne@ma kwǝthi Kweeleny kwǝni Yǝcu Kwɔrɔstɔ, nǝ ṯamɽa ṯǝthi Allah tok, nǝ ŋɔmath ŋǝthi Ṯigɽim Ṯirllinǝlɔ ter, nanni ŋaaŋa-li tatap.