Ethi nanni ŋethre ŋisaaw.
1 Kaka nirǝrinǝ-gwɔ Kwɔrɔstɔ aŋna-yi, laazim ŋaaŋa tok a ferlle ki-rogɽɔ-na raalɔ tok kaka-ṯǝ ṯaay kiṯhǝ ṯaarɔŋw-thi fǝkirǝ; kaka mǝ kmeere rǝrinni aŋna-yi, ǝṯɔŋweere ǝthici ŋikiyaŋi karatha keere kwokwony mac. 2 Ŋwɔṯaŋw, min kirǝ-kirǝm ŋgwɔ mindaŋ ŋa ŋinḏi ǝthiila, laazim a nanni ŋimiitha-ŋi ŋaalɔ, ŋiɽaŋal-ŋi ŋǝthi ṯɔgwor ṯǝthi Allah ǝthi-gwɔ kette rii-la ruuŋwun, laakin etheere mithinni sɔɔrɔm-gi kwǝthi ŋizigwuŋǝŋ mac. 3 Ŋwɔɔmɔr ŋwɔmǝ-ṯǝ uruŋw ŋwa ŋwɔthi kǝrrǝny-ŋwɔ ŋwɔrrǝ-ŋǝsi-ŋi ŋa ŋǝṯisi Umam ǝrri-ri, nǝ ŋimiitha ŋaalɔ nanni ki-ŋisǝrmuth-nǝ, kadɔwa-na, ki-ṯurlǝlǝ-nǝ, ki-ṯathvinyna-na, nǝ ŋǝrṯǝmbǝl, ki-lɔdɔŋw-na lǝthi kiɽica, nǝ ṯɔgwɔccalɔ ṯigii ṯǝthi libaayil. 4 Nǝ kirem tǝ, nǝ Umam liŋɽi kaka niti mǝgwɔ ɔɽɔmaṯṯi ŋundu-ŋǝli mac, ki-ŋimiitha-na ŋa ŋette-ŋette ŋigii-na ṯiga-ṯiga, nǝ nǝrṯoro ŋɔ ŋǝṯir-ŋǝsi-ŋi ollollo. 5 Laakin linḏi ethi rilli wɔɽǝ-wɔɽǝny kiyǝnǝ yǝthi Allah, wǝṯi naanalɔ cɔgwo-cɔgwoo ethisi accǝ haakima limiithɔ nǝ laayɔ tok. 6 Ŋindǝr-ṯǝ ŋɔ mindaŋ nǝrǝccǝ lizi kila laayɔ bǝshirǝ Inyjiil-yi, ki-lizi kila lǝccǝrsi haakima lir yaŋna kaka lithaathɔ tatap; lǝccǝrsi bǝshirǝ Inyjiilǝ mindaŋ mǝr nanni rigɽim-ri ethaaɽanni Allah ŋimiitha-ŋi.
Ǝthi ǝmmini ǝthi mǝccǝthisi-nǝ wɔɽe-wɔɽeny.
7 Kwomne tatap kwɔmaadithi ethi ernene. Ŋwɔṯaŋw laazim ǝṯi mithǝ rɔgwori, laŋrinna naana, ethǝthi ŋɔma ethaari kiyiiriny. 8 Nǝ ŋithǝmthisi-lǝ ŋɔ tatap, nǝroro ethi amɽathisi-na beṯ-beṯṯen, kaka nǝṯi-gwɔ ṯamɽa kwuɽubǝthǝ ŋikiyaŋ-lɔ ŋuuru. 9 Ǝṯi aalinathisi-na ki-dɔɔnɔ-na kwaalɔ, liti lidii rɔgwor-na mac. 10 Kaka nɔrŋa-gwɔ liwǝkiil lisaaw lǝthi haḏaaya wǝthi Allah wirna ter-ter, nǝ laazim ŋwɔ-yi ǝkkici lithaathɔ ŋothɽor. 11 Mǝ kweere aari bǝshirǝ-tǝ, laazim ŋwaari bǝshirǝ ŋiɽaŋal-ŋi ŋǝthi Allah. Mɔŋw akkɔ kweere ŋothɽor tǝ, ŋwɔsi akkɔ ŋɔma-ŋi ŋa tatap ŋinḏǝthǝsi Allah, mindaŋ mǝ Allah biɽǝnni yiriny ŋiɽaŋal-ŋi ŋǝthi kwomne-ŋgwa tatap, Yǝcu Kwɔrɔstɔ-ŋgi. Ethi ŋinith ŋuuŋun nǝ ŋɔma tok nannatha dok-dok. Amiin.
Ṯinyiŋlana ki-ṯurvǝ-nǝ.
12 Limǝthgǝri liinyi lamɽa-nyji, ǝṯeere liŋɽi mac mǝŋǝsi ṯurvǝ ṯǝcci kitha ṯiraara ṯinḏaŋa, kaka ǝṯi kwomne kweere kwithimthina ǝnḏithǝ ŋaaŋwɔsi. 13 Laakin ǝṯi kǝniny aamina kaka nɔɽɔmaṯṯi-ŋa-gwɔ Kwɔrɔstɔ-gi ki-ṯiraara-na ṯuuŋwun, mindaŋ mǝ urǝnni-nǝ deddep ṯinyiŋla-thina mǝ ŋinith ŋuuŋun ruwǝnnǝlɔ. 14 Ŋaaŋa linḏi ethi ɔrtanni mǝr-ŋǝsi ollollo kaka nɔrŋa-gwɔ lǝthi Kwɔrɔstɔ, kaka mǝŋǝsi-gwɔ Ṯigɽim ṯǝthi ŋinith ŋǝthi Allah ɔmi daŋgal-la. 15 Laakin ǝṯɔŋw rǝrinnǝ kweere kwaalɔ mac, kaka ŋgwa kwǝṯi kette ḏimmi, alla kaka kwɔɔɽam, ya kwǝrrǝzi ŋigii, ya kaka kweere kwǝṯɔɔɽi ki-ŋiɽaŋal-na mbic ŋǝthi lithaathɔ. 16 Nǝ mɔŋw rǝrinni kweere ŋiɽaŋal-ŋi ŋɔrɔŋ-ŋi kwɔgrɔstiyan tǝ, a ṯɔrony ere mithǝ mac, laakin ŋwɔccǝ kǝniny Allah shukran yiriny-yi yǝthi Kwɔrɔstɔ yǝthi-ŋwsi.
17 Lɔɔmɔr limiila lǝthi-li hɔkwɔm aari ibṯǝḏi. Na nǝṯǝ lizi lǝthi Allah oro linḏirsi ethisi kettice hɔkwɔma ker-kerreny. Nǝ mɔŋwaari ibṯǝḏi nyii-ŋǝli, e-ta ŋwɔmǝ ṯimmasi kworo aŋgwɔrɔ lizi-li kila liti lǝmminicǝ Inyjiilǝ wǝthi Allah mac? 18 Kaka naarɔ-gwɔ Kiṯaab Kirllinǝlɔ ter ŋwɔ:
“Mǝ ŋiɽaŋal ferlle beṯṯen ethi lizi lirllalɔ kilaaw;
e-ta ǝri-mǝ rotto ṯatha ŋǝthi kila liti lilŋithi Allah mac?”
19 Ŋwɔṯaŋw, ethi kila lǝṯi rǝrinni ŋiɽaŋal-ŋi ŋǝthi ṯɔgwor ṯǝthi Allah, ǝrisi ǝrri ŋisaaw, nǝ ǝri inḏǝthǝ rogɽo reeŋen Allah min-min wɔgitta ṯurmunǝ, wǝṯi mithǝ wa@ḏa wuuŋwun teṯṯer.