Ŋiɽaŋal ŋiŋna.
1 Sǝyyiḏ Thaawfiilɔs: Kaka mǝgwɔ lizi luuru ṯǝccici beṯṯen ethi lo ŋiɽaŋali ŋǝthi kwomne ŋgwa kwǝrrinǝ dǝŋgǝr-nǝ. 2 Nǝrsi lo ŋa ŋandica-nyji kila liisasi yǝy-yi naana yeeŋen, ŋa ŋiisarsi kwon-kwon-lɔ tuk, lindǝr-ṯǝ lir yaavɔr yǝthi ŋiɽaŋal ŋisaaw. 3 Nǝ ŋwɔṯaŋw yaɔ Sǝyyiḏ Thaawfiilɔs, kaka nɔrɔɔminy-gwɔ ŋiɽaŋali-lɔ ŋɔ tatap mammak ŋǝmǝ-ŋǝmmǝŋ kinaŋw-lɔ tuk kwon-kwon, ninyaarɔŋw ŋisaawi ethi lɔcca ŋaaŋwɔ ŋiɽaŋali ŋɔ ŋǝmmǝŋ. 4 Ŋǝrrǝ-nyji ŋɔ mindaŋ mǝsi elŋe ŋir rerrem ŋǝthi kwomne tatap ŋimǝr-ŋǝsi ilŋithini.
I@laan wǝthi ŋelŋe ŋǝthi Yuhanna kwǝni Ma@maḏaan.
5 Ki-ŋwaamin-la ŋwa ŋwɔr-ŋi Hiiruuḏus mǝlik kwǝthi Yahuuḏiiyyǝ-ŋw, na kaahin naani kette kinaŋw kǝni Zakkariiyyǝ, kuruuthu ethi Abiiyyǝ-ŋǝ. Nǝ yiriny yǝthi kwaaw kwuuŋwun ǝni Aliisaabaaṯ; kwuruuthu ki-ŋwɔɔla-na ŋwɔthi Haaruun. 6 Nǝr aami naanaŋw ndǝndǝk kiyǝnǝ yǝthi Allah, nǝr iinyici awaamira naana na gwaaniin tatap min-min kǝthi Kweeleny. 7 Laakin nǝreere ǝthi tɔɔrɔ-na teere mac, kaka nɔrɔ-gwɔ Aliisaabaaṯ kwɔɔrɔm, nǝ nǝroro yimǝyǝŋ-nǝ keene-keene.
8 Laamin lette nǝ Zakkariiyyǝ akkɔ ŋothɽor ki Heikal-na kiyǝnǝ yǝthi Allah, kaka nɔrɔ-ŋgwɔ kaahin, nǝ ḏɔɔr rɔɔthanni ṯuuŋwun tok, 9 nǝ kaka nɔrɔ-gwɔ ǝthi wǝṯi kahana rɔɔmi, nǝ gwɔra@ iidi duŋgwun-lǝ ethi anḏi ki Heikal-na wǝthi Kweeleny ethi ruuɽǝsi kwɔthɽɔla ki-ŋwɔthgwun-lǝ. 10 E-ta na lizi naani dɔŋw par laarɔ kiyiiriny ki-lɔɔmɔr-la luruɽǝnnǝli kwɔthɽɔl. 11 Nǝ meleka kwǝthi Kweeleny ruwǝnicǝlɔ, kwirlǝccǝ ŋwɔthgwunǝ-lɔ ki-thii ṯǝthi mɔni, kinaŋw nuruuɽǝsǝ-ŋgwɔ kwɔthɽɔla. 12 Mǝ Zakkariiyyǝ ese tǝ, nɔŋw burcǝŋnǝ-lɔ burccǝk, nɔŋw ṯeenye. 13 Laakin nǝ meleka ǝccǝŋw, “Ǝṯi ṯiinya mac yaa Zakkariiyyǝ! Kaka mǝ-gwɔ Allah neŋne ṯaara ṯɔɔŋwɔ kiyiiriny, nǝ kwaaw kwǝǝŋa kwǝni Aliisaabaaṯ kwɔŋǝ ilŋanyji tɔɔrɔ, mindaŋ ǝnyjici yiriny ǝccǝ Yuhanna. 14 Mindaŋ aamina nǝ a nyeŋlena, nǝ lithaathɔ littǝzir ǝri aamina ŋelŋe-ŋi ŋuuŋun tok! 15 Kaka ninḏi-ŋgwɔ ethoro kwɔr kwɔppa ŋɔɔrɔ, kiyǝnǝ yǝthi Kweeleny. Nǝ laazim ŋweere ii kiɽicaŋi keere mac, wala ethi ii kiɽii ḏuṯ, ŋwuurǝnni Ṯigɽimǝ-nǝ Ṯirllinǝlɔ ter, kaari-na tuk kǝthi lǝnyin. 16 Nǝ ŋwɔɽǝ nyɔɔrɔ nyuuru nyǝthi Israa-iil naana-gwɔ Kweeleny kwir Allah weeŋen. 17 Ŋwɔ iŋnaci Kweelenyi keereny ṯigɽim-thi kwɔfirlli ŋɔma-ŋi ŋir kaka ŋǝthi kwiɽii kwǝni Iliiyyǝ. Ŋwaaɽasi papa-ŋwɔsi nyelle-nyi dɔŋw kwokwony; ŋwɔsi urlelɔ kila luuɽu yǝninǝ ethi aaɽtha ki-thaay-la ṯǝthi lizi lɔvthanna; ŋwɔ kettice Kweelenyi lizi-lɔ luuŋwun cɔgwo-cɔgwop.”
18 Nǝ Zakkariiyyǝ ǝccǝ meleka-ŋw, “Ŋǝnyji elŋe ŋɔ aŋgwɔrɔ? Nyimoro kwɔr kwɔmoro kimǝyǝŋ, nǝ kwaaw kwiinyi oro kimǝyǝŋ tok.” 19 Nǝ meleka ǝŋnici nɔŋwɔccǝŋw, “Nyii kwir kwǝni Jibraa-iil kwǝṯi rilli kiyǝnǝ yǝthi Allah, wɔsa-nyii ethi andaci ŋaaŋwɔ ŋiɽaŋali ŋisaaw. 20 Laakin neere mithǝ ŋiɽaŋali ŋiinyi mac, ŋinḏi ethoro rerrem mǝ lɔɔmɔr iila kila dap-dap. Nǝ kaka mɔgweere ǝmmini mac tǝ, ere ǝthi ŋɔma ethi andasi mac; a-naani tugwup mindaŋ a laamin iila kila landicaŋa-li linḏi-li ethi ŋiɽaŋal-ŋɔ rattathi rerrem.” 21 Nǝ ki-lɔɔmɔr-la ṯǝ kila nǝ lizi ǝkkici Zakkariiyyǝ-ŋw kizǝn mindaŋ nǝr urǝŋni, nǝraarɔŋw kwotho kwɔmǝ ɽindaŋnalɔ lǝlu-ttuk ki Heikal-na. 22 Ṯaŋw mɔŋw ruuthǝ par tǝ, nɔŋweere ǝthi ŋɔma mac ethisi andaci, mindaŋ nǝr elŋece ethaarvŋw kwɔmǝ iisa rɔ-ɔya ki Heikal-na. Nɔŋw naani ndip kwiti kwǝthi ŋɔma ethi andasi mac, mindaŋ nɔŋwsi andaci rii-ri. 23 Mǝ ḏɔɔr ṯǝthi ŋothɽor ŋuuŋun ernene ki Heikal-na tǝ, nɔŋw aaɽitha dɔɔnɔ kwuuŋwun. 24 Mǝ ŋwaamin ŋwokwo ere, nǝ kwaaw kwuuŋwun kwǝni Aliisaabaaṯ eethe, mindaŋ nɔŋw naani yǝwǝ ṯɔthni kiininy kwiti kwurwǝthǝlɔ mac, 25 nɔŋwaarɔŋw, “Ŋindǝr-ṯǝ ŋɔ mindaŋ Kweeleny kwɔmǝ-nyii iisasalɔ kirem ethi dimmǝthǝ nyuŋwɔ ṯɔŋwnɔtha kithaay ki-lizi-nǝ.”
Kimǝcci kwǝthi ŋelŋe ŋǝthi Yǝcu.
26 Ki-yǝwǝ-lǝ yir nyirlil yiitha-yi Aliisaabaaṯ, nǝ Allah ɔɔsi meleka kwǝni Jibraa-iil etheele ki-mǝḏiinǝ-nǝ kwɔnaana Jǝliil kwǝni Naasira, 27 naana-gwɔ letteṯ limthi kwɔr kwette nda kwǝni Yuusuf, kwǝthi ŋwɔɔla ŋwɔthi Ḏaawḏ-ŋǝ, nǝ yiriny yǝthi letteṯ ǝni Mǝryǝm. 28 Nǝ meleka iila naana-ŋgwɔ nɔŋwɔccǝŋw, “Ŋa-ŋgwa kwisaawa! Kweeleny kwɔnaana ŋa-gi mindaŋ kwɔmǝ-ŋǝ ɔrtatha tig-tig!” 29 Nǝ Mǝryǝm ippinni ṯɔgwor-na tig-tig ŋiɽaŋal-ŋi ŋǝthi meleka, mindaŋ nɔŋw urǝŋni kwaarɔŋw ŋiɽaŋal ŋuuŋun ŋɔ ŋǝni-thi manɔ ǝyǝ. 30 Nǝ meleka ǝccǝŋw, “Ǝṯi ṯiinya mac Mǝryǝm; kaka niniyǝŋǝ-gwɔ Allah-na. 31 A kweethe mindaŋ elŋe toŋwora, mindaŋ anyjici yiriny ǝccǝ Yǝcu. 32 Mindaŋ ŋwɔ peŋe ŋɔɔrɔ yǝnǝ, mindaŋ ǝri ǝccǝ Tɔr tǝthi Allah wuthǝmthi-lǝ pur-pur. A Kweeleny kwir Allah ruusi ŋundu-ŋwɔ mǝlik, kaka kwugwurnǝyin kwǝni Ḏaawḏ, 33 mindaŋ ŋwɔnannitha dok-dok kwir mǝlik kwǝthi nyɔr nyǝthi Ya@guub, mindaŋ a ŋeeleny ŋuuŋun ere ernene mac!” 34 Nǝ Mǝryǝm ǝccǝ meleka-ŋw, “Ŋinḏi ethi ǝrrini ŋɔ aŋgwɔrɔ ɔrɔny-ma letteṯ linaana min-min?” 35 Nǝ meleka ǝŋnici nɔŋwɔccǝŋw, “Ṯigɽim Ṯirllinǝlɔ ter ṯiŋǝ-gwɔ dappitha-na, mindaŋ a-ŋǝ ŋɔma ŋǝthi Allah kwuɽubǝthǝlɔ. Nǝ sǝbǝb-gi-ṯǝ ŋgwɔ ǝri ǝnyjici lurgwuduŋi lirllinǝlɔ ter yiriny yǝni Tɔr tǝthi Allah. 36 Ṯiŋaayina Aliisaabaaṯ-ŋwɔ kwir ŋa-gi ǝgwur wɔtɔpɔt, kwɔmeethe toŋwora ŋimǝyǝŋ-ŋinǝ, nǝ yǝwǝ yimoro nyirlil yǝthi ŋgwa kwǝṯir-gi aarɔŋw kwir kwɔɔrɔm. 37 Kaka niti ninaani-gwɔ kwomne kweere mac kwǝṯi kettice Allah ŋɔɔrɔ.” 38 Nǝ Mǝryǝm ǝccǝŋw, “Nyii kwir-pa khaḏaam kǝthi Kweeleny, ethirnyii-mǝ tǝ ǝrrinici kaka ŋa ŋandica-nyji.” Ŋwɔṯaŋw nǝ meleka ɔrlacci ŋwɔdoŋw.
Mǝryǝm mɔŋŋweele ethi raaŋitha Aliisaabaaṯ-ŋwɔ.
39 Nǝ ki-ŋwaamin-la ṯǝ ŋwa, nǝ Mǝryǝm diiɽi nɔŋw fiɽigazi kilyǝ etheele ki-mǝḏiinǝ-nǝ kwɔnaana kǝzir wir ŋwundǝr ŋwɔthi Yahuuḏiiyyǝ-ŋw. 40 Nɔŋw ǝnḏi ki-dɔɔnɔ kwǝthi Zakkariiyyǝ mindaŋ nɔŋw aaganni Aliisaabaaṯ-ŋwɔ. 41 Mǝ Aliisaabaaṯ neŋne ṯaaginna ṯǝthi Mǝryǝm-ṯǝ, nǝ tɔr ogwom kaari-na kuuŋun; mindaŋ nǝ Aliisaabaaṯ urǝnni-nǝ Ṯigɽim-thi Ṯirllinalɔ ter. 42 Nɔŋw ɔvɔna ŋǝmmaŋi nɔŋwaarɔŋw, “A kwǝni kwɔrtanna beṯṯen ki-laaw-na tatap, nǝ tɔr tinḏi-ŋǝ ethelŋe ŋwɔni tɔrtanni! 43 Nǝ aatha kworo mindaŋ nǝrricǝr-nyji ŋɔ ŋɔppak, ŋinḏi-ŋi lǝnyin kwǝthi Kweeleny-ŋa kwiinyi ethi raaŋitha nyuŋwɔ? 44 Kaka mǝnyii-ŋwɔ neŋne ṯaaginna ṯɔɔŋwa ṯǝ, nǝ tɔr ogwom kaari-na kiinyi taamina. 45 A kwir-mba kwir kwaaw kwinḏi ethi ɔrtanni kaka nǝmminǝŋǝ-gwɔ ŋiɽaŋali ŋǝthi Kweeleny ŋa ŋinḏi ethi rattathi!”
Mǝryǝm mɔŋgwɔ ɔrtatha Allah.
46 Nǝ Mǝryǝm aarɔŋw,
“Nyii kwɔrtatha Kweelenyi;
47 nyii kwɔnyiŋlana kaka nɔrɔ-ŋwɔ Allah kwiglǝthǝ kwiinyi,
48 kaka mɔŋgwɔ ṯiŋaayini nyuŋwɔ kwir khaḏaam kuuŋun
kirtalɔŋw!
Min kire-kirem-ŋgwɔ mindaŋ mǝ lɔɔmɔr iila ǝnyili lizi
tatap ǝccǝŋw,
a kwǝni kwɔrtanna
49 kaka mǝnyii-gwɔ Allah wǝthi ŋɔma
ǝrrici nyuŋw kwomne kwɔppa-kwɔppa.
Yiriny yuuŋwun yǝni yirllinǝlɔ ter;
50 ŋimɽi ŋuuŋun ŋǝṯi nannitha ki-lizi-nǝ lǝṯiiɽi ŋunduŋw-nǝ
kila linḏi ethiila ki-ŋwɔɔla-ŋwɔɔla.
51 Nɔŋw ruwǝzi ŋɔma-lǝ ŋǝthi lɔɔɽall luuŋwun,
nɔŋwsi fǝthǝlɔ kila lǝṯi piŋi rogɽo ǝfkǝr-yi wǝthi rɔgwor
reeŋen.
52 Nɔŋw dappasi muluuk-gǝlɔ kwǝthi ŋɔma,
ki-lɔrsi-la lǝthi ŋeeleny ŋeeŋen,
nǝ nɔŋwsi dimmǝthǝ-lǝ teṯ kila lirtalɔŋw.
53 Nɔŋwsi bii kila liithisi yaaŋwɔ kwomne-gi kwisaaw-kwisaaw,
nɔŋwsi ṯiŋatha kila lir lɔrṯɔ rii-ri-na domony.
54 Nɔŋw mithǝthǝ wa@ḏa wandicaŋw-yi rǝrnyǝri-ŋwsi,
mindaŋ nɔŋw iila ethi mǝcci khaḏaama kuuŋun kani
Israa-iil.
55 Nɔŋw kithaayini ethi baaŋaci Ibraahiim-ŋwɔ ŋimɽiyǝ
ŋwɔɔlaŋi-na ŋwuuŋwun tatap ethi nanniṯha dok-dok!”
56 Nǝ Mǝryǝm naani Aliisaabaaṯ-gi yǝwǝ ṯoɽol, mindaŋ nɔŋw-mǝ
aaɽitha dɔɔnɔ kwuuŋwun.
Ŋelŋe ŋǝthi Yuhanna kwǝni Ma@maḏaan.
57 Nǝ ṯaŋw nǝ lɔɔmɔr iila lǝthi ŋelŋe ŋǝthi Aliisaabaaṯ, mindaŋ nɔŋw elŋe toŋwora. 58 Nǝ jiiraan kwuuŋwun lizi-li lǝthi ǝgwur wuuŋwun neŋne ethaarɔŋw Kweeleny kwɔmǝ ruwǝcci ŋunduŋw ŋimɽiyǝ-lɔ ŋɔppa ŋimni, nǝr aamina tatap ŋundu-ŋǝli. 59 Mǝ tɔr oro nyaamin dɔvokwɔppa, nǝr-ri iila ethi uɽu lɔthrɔnya, nǝr naŋni ethi ǝnyjici yiriny yǝthi ṯǝrnyin yǝni Zakkariiyyǝ. 60 Laakin nǝsi lǝnyin ǝccǝnw. “Bǝri-mǝ! Ǝrisi ǝnyjici yǝni Yuhanna.” 61 Nǝrǝccǝŋw, “Laakin a kwende kwǝthi kwizi kweere kwǝthi ǝgwur wɔɔŋa kwǝthi yiriny kiyɔ!” 62 E-ta nǝr andaci ṯǝrnyin rii-ri ethisi ilŋithini yiriny yinaŋna-ŋwsi ethisi ǝnyjici tɔɔrɔ. 63 Nǝ Zakkariiyyǝ ɔṯalɔ lɔɔh-li, mindaŋ nɔŋw lo nɔŋwaarɔŋw, “Yiriny yuuŋwun yǝni Yuhanna.” Mindaŋ nǝr liŋri beṯṯen. 64 Nǝ kina-ṯǝ kinaŋw-lɔ tɔc, nǝ ṯuunyu ṯǝthi Zakkariiyyǝ kiṯṯini, nǝ ṯiŋla ṯuuŋwun kǝdinni, mindaŋ nɔŋwɔthi ŋɔma ethi andasi, nɔŋw aari ibṯǝḏi ethi ɔrtatha Allah. 65 Nǝ jiiraan tatap urǝnni-nǝ ŋitheny-ŋi deddep, nǝ khabar kǝthi kwomne-ŋgwɔ tatap faathitha ŋwundǝri naana tatap ŋwɔthi Yahuuḏiiyyǝ-ŋwɔ. 66 Nǝ kila tatap limǝsi neŋne nǝrsi mithǝ ki-rɔgwor-na reeŋen nǝraarɔŋw, “Tɔr kirɔ tinḏi ethi rotto tha?” Kaka a-naana-gwɔ ŋɔma ŋǝthi Kweeleny ŋundu-gi.
Ṯilŋa ṯǝthi Zakkariiyyǝ.
67 Nǝ Zakkariiyyǝ kwir ṯǝrnyin ṯǝthi Yuhanna-ŋǝ urǝnni-nǝ deddep Ṯigɽim-thi Ṯirllinǝlɔ ter, nɔŋw andasi ŋiɽiya-ŋi, nɔŋwaarɔŋw,
68 “Ethi Kweeleny kwir Allah wǝthi Israa-iil ɔrtanni,
kwǝni-mǝ-ṯǝ kwɔmǝ iilatha ki-ṯimǝcǝ ṯǝthi lizi luuŋwun,
mindaŋ nɔŋwsi kǝdu.
69 Nɔŋw usicǝ nyuŋwsi Kwiglǝthǝ kwǝthi ŋɔma,
kwir ŋwɔɔla ŋwɔthi khaḏaam kuuŋun kǝni Ḏaawḏ.
70 Kaka nandisa-ŋgwɔ kwusǝttuk,
ruunyu-ri rǝthi liɽii luuŋwun lirllinǝlɔ ter.
71 Mindaŋ nɔŋw kilǝthi nyuŋwsi ki-ṯuwǝn-nǝ,
nǝ ŋɔma-na ŋǝthi kila lǝṯi-nyji wǝzi.
72 Nɔŋwaarɔŋw, kwinḏi ethi baaŋaci lugwurnǝ lǝri ŋimɽiyǝ,
nǝ ŋwɔ kithaayini wa@ḏa wuuŋwun wirllinǝlɔ ter.
73 Nǝ wa@ḏ wǝ nɔŋworo wǝricǝŋw-yi papa-ŋwɔ kwǝri kwǝni
Ibraahiim haalifa,
74 ethi kilǝthi nyuŋwsi ki-ṯuwǝn-nǝ ṯǝri, mindaŋ ǝri ǝkkici
ŋunduŋw ŋothɽor liira ŋithenya-na,
75 mindaŋ mǝr rillinǝlɔ ter, nǝ lirllalɔ tok kiyǝnǝ yuuŋwun
ŋwaamin tatap ŋwɔṯhi ŋimiitha ŋǝri.
76 Nǝ ŋa kwir tɔr tiinyi, ǝrŋǝ ǝnyjici yiriny yǝni Kwiɽii kwǝthi
Allah wuthǝmthi-lǝ pur-pur.
A iŋnaci Kweelenyi keereny ethi daɽimaci raay-la ruuŋwun
77 Ethi andaci lizi luuŋwun ethisi ǝccǝŋw, ŋaaŋa linḏi ethi
kilaaw ṯifivrinnǝ-thi ṯǝthi ŋikiya ŋaalɔ,
78 ŋimɽi-ŋi ŋithii jiɽeem ŋǝthi Allah wǝri, kwǝnyji irṯaṯhalɔ
fɔɔri-gi kwǝthi ŋimiitṯha,
79 nǝ ethisi irṯacalɔ fɔɔri-gi kila linaana kirim-nǝ, nǝ
ki-ṯigɽim-nǝ ṯǝthi ŋiɽany,
ethi aŋraci kilyǝ kǝri ki-thaay-la ṯǝthi ṯaama naana.”
80 Ṯaŋw nǝ tɔr peŋǝ tir aŋna, nɔŋw duŋgwɔ-ŋgwatha ṯigɽim-thi tok, nɔŋw nanni ki-sahraa-na mindaŋ nǝ laamin iila kila limǝŋw-li ruwǝnnici lizi-lɔ por-por lǝthi Israa-iil.