1 Nyii kwɔrɔ kwǝni Bɔɔlɔs, kwir kaavɔr kǝthi Kwɔrɔstɔ kwǝni Yǝcu, ŋiɽaŋal-ŋi ŋǝthi ṯɔgwor ṯǝthi Allah, kwɔlɔcca-ŋǝsi kila lirllinǝlɔ ter, nǝ kila lir laalɔ ethi Kwɔrɔstɔ-na kwǝni Yǝcu:
2 Ethi ne@ma-ŋa ŋiiɽǝnnǝ-ŋi nanni daŋgal-na ŋinḏi naanɔ-gwɔ Allah wir Papa kwǝri, nǝ Kweeleny kwǝni Ysǝcu Kwɔrɔstɔ.
Barka kwǝthi Ṯigɽim ethi Kwɔrɔstɔ-na.
3 Ǝri ǝccǝ Allah shukran, wir Papa kwǝthi Kweeleny kwǝri kwǝni Yǝcu Kwɔrɔstɔ! Kaka nɔɽɔmaṯṯir nyiiŋǝ Kwɔrɔstɔ-ŋǝli, nɔŋw-mǝ ǝccǝ nyuŋwsi baarika, ninḏǝthǝ-ŋgwɔ nyuŋwsi barka tatap kwǝthi Ṯigɽim kwǝthi ki-leere-naŋw. 4 Niti nigittina ṯurmun kinnǝni mac, nǝnyji Allah allana kerreny tuk ethoro luuŋwun, ṯɔɽɔmaṯṯa-thi ṯǝri ṯǝthir Yǝcu-ŋǝli, mindaŋ mǝr rillinǝlɔ ter, liira lɔɔma-na leere kiyǝnǝ yuuŋwun. 5 Nɔŋw kittatha ki-ṯɔgwor-na ṯuuŋwun ṯamɽa-thi ethi ruusi nyuŋwsi nyɔr nyuuŋwun Yǝcu Kwɔrɔstɔ-ŋgi, ŋiɽaŋal-ŋi ŋǝthi ṯɔgwor ṯuuŋwun. 6 Ǝri biɽǝthǝ Allah yiriny ŋinith-ŋi ŋǝthi ne@ma kwuuŋwun, haḏiiyyǝ-yi wɔmǝŋw inḏǝthǝ nyuŋwsi ethi Tɔr-na tuuŋwun tir ghaali. 7 Ŋiɽaŋal-ŋi ŋǝthi ŋin ŋǝthi Kwɔrɔstɔ, nǝrnyji ruusi hɔrr, nǝ ŋikiya ŋǝri fivrinni kithaay, ŋiɽaŋal-ŋi ŋǝthi ne@ma kwɔppa kwǝthi Allah, 8 kwɔbalsaŋw nyuŋwsi naana. 9 Kaka mǝnyji-gwɔ Allah ilŋithini ŋa tatap ŋuluccunǝ ŋǝthi ṯɔgwor ṯuuŋwun ṯǝthinǝ-thi yǝnǝ, ŋa ŋigittathɔ-ŋgwɔ kerreny tuk ethisi ṯimmasi kworo Kwɔrɔstɔ-ŋgi. 10 Ŋindǝr-ṯǝ-ŋɔ ŋinaŋnasi Allah ethisi ṯimmasi kworo mǝ lɔɔmɔr iila lɔvthanna, ŋwaaɽasi ṯurmunǝ tatap dɔŋw, nǝ kwomne tatap kwǝthi ki-leere-naŋw nǝ kwurǝyu-lu tok, ŋwaava Kwɔrɔstɔ-ŋgi kwir nda leeŋen.
11 Kwomne tatap kwǝrrinǝ niizaam-ŋi kwǝthi Allah, ŋiɽaŋal-ŋi ŋǝthi ṯɔgwor ṯuuŋwun; ŋwɔṯaŋw nǝnyji Allah allana ethoro lǝthi rogɽo ruuŋwun, ɔɽɔmaṯṯi-ŋgi dɔŋw ethi Kwɔrɔstɔ-na, ŋiɽaŋal-ŋi ŋǝthi ṯɔgwor ṯuuŋwun ŋigittathɔŋw-ŋi kinaŋw-lɔ tuk kwon-kwon. 12 Nǝ ǝɽir-mbǝ kǝniny nyiiŋǝ kila limǝ eŋne ethǝthi ṯǝkkizǝ kizǝn ethi Kwɔrɔstɔ-na, ǝri biɽǝthǝ ŋinithi ŋǝthi Allah yiriny. 13 Nǝ kinaŋw mǝ neŋne ŋiɽaŋali ŋir rerrem, noro lǝthi Allah, nǝ Inyjiil oro wǝviccǝ-ŋǝsi ŋigilǝthǝ ŋaalɔ. Na mǝ ǝmminici Kwɔrɔstɔ-ŋw tǝ, nǝŋǝsi Allah uɽuci nimrǝ kwuuŋwun, kaka mɔŋgwɔ inḏǝthǝ ŋaaŋwɔsi Ṯigɽimǝ Ṯirllinǝlɔ ter ṯaarɔŋw-thi wa@ḏa, 14 ṯir ǝrbuun wǝthi ŋɔr ŋa ŋinḏir-gwɔ ethi mɔrthathi-la ŋigittathica-nyji-ŋi Allah. Ŋwɔṯaŋw ǝri biɽǝthǝ ŋinithi yiriny ŋuuŋun!
Ṯaara kiyiiriny ṯǝthi Bɔɔlɔs.
15 Nǝ kaka mǝnyii-gwɔ neŋne ŋiɽaŋali ŋǝthi ṯǝmminǝ ṯaalɔ ṯǝthi-ŋǝ ethi Kweeleny-na kwǝni Yǝcu, nǝ ṯamɽa ṯǝthicǝ-ŋǝ lizi kila tatap lirllinǝlɔ ter, 16 ǝṯi-nyeere uɽǝthi mac ethi ǝccǝ Allah shukran ŋiɽaŋal-ŋi ŋǝni ŋaalɔ. Nyii kwǝṯi-ŋǝsi kikithaayini ki-ṯaara-na ṯiinyi kiyiiriny, 17 mindaŋ mǝŋǝsi Allah wǝthi Kweeleny kwǝri kwǝni Yǝcu Kwɔrɔstɔ, wir Papa kwǝthi ŋinith, ethi inḏǝthǝ ŋaaŋwɔsi Ṯigɽimǝ ṯǝthi ṯǝthinǝ yǝna, nǝ ṯɔǝthi rɔ-ɔya tok, ethelŋe ŋunduŋw, 18 mindaŋ ŋwɔ kiṯṯici ŋaaŋwɔsi yǝy yǝthi rɔgwor raalɔ etheese fɔɔri kwuuŋwun, mindaŋ mǝ elŋe ṯǝkkizǝ kizǝn kitha ṯɔrnacaŋw ŋaaŋwɔsi, nǝ barka kwuuŋwun kwɔppa kwɔgittathɔŋw-ŋgi ethinḏǝthǝ lizi luuŋwun lirllinǝlɔ ter, 19 nǝ ŋɔma ŋuuŋun ŋɔppa ŋakkɔ ŋothɽor dǝŋgǝr-nǝ, nyiiŋǝ kila lǝthi ṯǝmminǝ. Nǝrǝni ŋɔma ŋuuŋun ŋir ŋwundǝ-ŋwundǝ ŋǝṯi akkɔ ŋothɽor dǝŋgǝr-nǝ. 20 Nǝ ŋa ŋǝrrinǝ ethi Kwɔrɔstɔ-na kinaŋw mɔŋw diiɽǝ ŋunduŋw ki-ŋiɽany-na, mindaŋ nɔŋw kette ŋunduŋw ki-thii ṯǝthi mɔni ki-leere-na. 21 Nǝ Kwɔrɔstɔ aari haakima kinanaŋw ki-rɔ-asa-la tatap rǝthi kindala-ŋw, lɔsɔlṯa mindaŋ, ŋɔma mindaŋ, nǝ leeleny tok, nɔŋwɔthi yiriny yɔppa yǝthi ŋɔsɔlṯaan ki-ṯurmun-nǝ kɔthɔ, nǝ kitha ṯinḏi ethiila tok. 22 Nǝ Allah kette kwomne tatap ki-ŋwaara-na ŋwɔthi Kwɔrɔstɔ, mindaŋ nɔŋw-mǝ inḏǝthǝ ŋunduŋw kǝniisǝ ethoro Kweeleny kwɔthamthi kwomne-la ndendeṯ, 23 kir aŋna wuuŋwun wǝṯi ṯimmaci ŋunduŋw ŋiɽaŋali kworo dap-dap, mindaŋ ethoro ŋundu tatap min-min.