Barnaaba-ŋǝ Shaawul-gi mǝrsi-gwɔ allana ethisi ɔɔsi.
1 Nǝ liɽii naani lokwo kǝniisǝ-nǝ kǝthi Anṯaakiya-ŋw mɔ@allimiin-gi kwǝni: Barnaaba, Sim@aan (kwǝni Kwuŋwnǝ) nǝ Luukiyuus (kwǝthi Garwaan-ŋwɔ) nǝ Manaayiin (kwudiiɽǝthizǝr Hiiruuḏus-gi kwir haakim) nǝ Shaawul tok. 2 Nǝ kinaŋw nǝkkicǝr Kweelenyi ŋothɽor nǝ nimthir arminḏaani tok. Nǝsi Ṯigɽim Ṯirllinǝlɔ ter ǝccǝŋw, “Ǝllicǝr-nyii Barnaaba-ŋwɔsina Shaawul-gi, ethi ǝkkici nyuŋwɔ ŋothɽor ŋa ŋɔrnaca-nyji.” 3 Nǝr mithǝ arminḏaani, nǝraari kiyiiriny mindaŋ mǝrsi kette rii-la reeŋen, nǝrsi ɔɔsi nǝreele.
Barnaaba-ŋǝ Shaawul-gi mǝr-gweele Gɔbrɔs.
4 Nǝ Ṯigɽim Ṯirllinǝlɔ ter ɔɔsi Barnaaba-ŋwɔsi Shaawul-gi, mindaŋ nǝreele mɔrkǝb-gi nǝr ɔppathi Gɔbrɔs. 5 Mǝr ɔppathi Salaamiis, nǝraari bǝshirǝ ŋiɽaŋali ŋǝthi Allah ki-limajma@-na. Nǝ Yuhanna kwǝni Mɔrgus naani ŋundu-ŋǝli ethisi mǝcci ki-ŋothɽor-na.
6 Nǝr irǝri ǝzir naana tatap wǝthi jǝziirǝ mindaŋ nǝr ɔppatha Baafuus, kǝzir wɔmǝr-ŋwɔ kaṯṯasi kwuzuri kwette kwir Yahuuḏ kwǝni Bar Yashuu@, kwuruusǝ rogɽo ruuŋwun kwiɽii, 7 kwir methigen kwǝthi haakim-ŋa wǝthi jǝziirǝ-ŋw, wǝni Sarjiyuus Bɔɔlɔs, kwir kwǝr kwǝthi yǝnǝ. E-ta nǝ haakim ɔrnɔṯi Barnaaba-ŋwsi Shaawul-gi etheele naŋna-ŋgwɔ ethi neŋne ŋiɽaŋali ŋǝthi Allah. 8 Laakin nǝ kwɔr naani kwette kwǝni @aliim (yǝni kwuzur kandisa-gi kǝthi Yuunaan) kwǝṯi ṯǝcicci ethi urli haakimalɔ orllok ki-ṯǝmminǝ-nǝ nɔŋw ṯiinyini ŋunduŋwsi. 9 E-ta nǝ Shaawul kwǝni Bɔɔlɔs, urǝnni-nǝ Ṯigɽim-thi Ṯirllinǝlɔ ter, mindaŋ nɔŋw ecce kwuzuri tok-tok, 10 mindaŋ nɔŋwɔccǝŋw, “Ŋa ŋgwɔ kwir tɔr tǝthi Ibliis! Ŋa kwir ṯuwǝn ṯǝthi kwomne tatap kwirllǝlɔ. Ŋa ŋgwɔ kwuurǝnnǝ arraayana tatap wir Ibliis, a kwǝṯi tǝccici dok-dok ethi ruusi ŋiɽaŋali ŋir rerrem ŋǝluŋ ŋǝthi Kweeleny! 11 Iisa-ṯi ṯii ṯǝthi Kweeleny ṯiŋǝ ippi mindaŋ a riimi kii, ere ese fɔɔri kwǝthi aaŋwɔn mac ŋwɔɔmɔri ŋwokwo.”
Nǝ kinaŋw ṯalɔ ṯogdo-ṯogdo nǝ @aliim iccini kirbil-gi kimǝ aaɽathi ki-yǝy-nǝ tɔc. Nɔŋw orllololɔ kwuthǝccǝ ethi kaṯṯasi kwizi kweere ethi mɔlotto ŋunḏuŋw ṯii-thi. 12 Mǝ haakim ese ŋiɽaŋali ŋa ŋɔmǝ ǝrrini nɔŋw ǝmmini; kaka niliŋɽi-ŋgwɔ beṯṯen ṯa@lliim-thi ṯǝthi Kweeleny.
Bɔɔlɔs-ŋǝ limethgen-li mǝr-gweele Anṯaakiya kwǝthi Biisiiḏiiyyǝ-ŋw.
13 Nǝ Bɔɔlɔs-ŋǝ ele limethgen-li min Baafuus mɔrkab-gi nǝreele Bǝrjǝ, ki-mǝḏiinǝ-nǝ kwǝthi Bamfiiliiyyǝ-ŋw, kǝzir wɔmǝsi-gwo Yuhanna kwǝni Mɔrgus ɔrlacca ŋwɔdoŋw nɔŋwaaɽitha Urshaliim. 14 Nǝr ɔrlacci Bǝrjǝ-ŋwɔ ŋwɔdoŋw nǝreele dɔṯṯɔk mindaŋ nǝr ɔppathi Anṯaakiya kwǝthi Biisiiḏiiyyǝ-ŋw, na mǝ laamin iila lǝni Sǝbiṯ nǝreele nǝr ǝnḏi ki-majma@-na nǝr-gwɔ naanalɔ. 15 Mǝr ɔrti Sherii@a kwǝthi Muusǝ, nǝ ŋiɽaŋal ŋǝṯisi liɽii lo tok, nǝsi rɔ-asa rǝthi majma@ usici ŋiɽaŋali nǝrsǝccǝŋw, “Liyǝŋgǝri mǝthi ŋiɽaŋali ŋeere ŋǝthi-ŋi firllasi lizi rɔgwori-la tǝ, nǝrŋǝsi naŋni ethisi andaci.” 16 Nǝ Bɔɔlɔs diiɽǝthǝlǝ nɔŋwsi allaci ṯii-la, mindaŋ nɔŋwaari ibṯǝḏi ethisi andaci nɔŋwsǝccǝŋw,
“Lɔr lǝthi Israa-iil-ŋa lizi-li tatap lir Umam lǝṯi kwogwɔcce Allah-lɔ; kitticar-nyii-ṯi yǝni! 17 Allah wǝthi lizi lǝthi Israa-iil wǝlli lugwurnǝ-nǝ lǝri nɔŋwsi ruusi lizi lɔppa ŋiɽaŋali kinagw a-naanir-gwɔ ŋɔvanyaŋ Mɔsir-na. Mindaŋ nǝsi Allah ruwǝ Mɔsir-na ŋɔmǝ-ŋi ŋuuŋun ŋɔppa. 18 Mindaŋ nɔŋwsi indinyanni naana yithlǝyu ruɽi-riɽǝn ki-sahraa-na. 19 Nɔŋw kiirasi bǝlǝḏǝ-lɔ dɔvokwɔɽɔny kwɔnaanɔ kǝzir wǝthi Kan@aan-ŋwɔ Mindaŋ nɔŋw inḏǝthǝ lizi luuŋwun wurǝyugi wa ethoro weeŋen. 20 Nǝ ŋɔ tatap nǝr rattathi mǝ yithlǝ oro ruɽi-ruɽi la ruɽi-riɽǝn la wrii.
“Mǝr ernene ŋɔ tǝ, nɔŋwsi usicǝ yaadiya, nǝr naani mindaŋ nǝ lɔɔmɔr iila lǝthi kwiɽi kwǝni Samwiil. 21 Nǝ mǝr ɔṯalɔ ŋiɽaŋal-ŋi ŋǝni mǝlik, nǝsi Allah inḏǝthǝ Shaawul-ŋwɔ kwir tɔr tǝthi Gays kwǝthi gabiilǝ kǝthi Ban-yaamiin-ŋǝ, ethoro mǝlik kweeŋen yithlǝyu ruɽi-riɽǝn. 22 Mǝr allathalɔ kithaay nǝ Allah ruusi Ḏaawḏ-ŋwɔ mǝlik kweeŋen. Nǝ ŋɔ ŋinḏi nǝroro ŋandisasi Allah ŋǝni ŋundu ŋaarɔŋw-ŋiŋw, ‘Nyii kwɔmǝ kaṯṯasi Ḏaawḏ-ŋwɔ kwir tɔr tǝthi Yǝssǝ kwamɽa ṯɔgwor ṯiinyi’, kwinḏisi ethisi ǝrri ŋa tatap ŋinaŋna-nyji ŋunduŋw ethisi ǝrri. 23 Nǝṯǝ Yǝcu oro kwir lɔɔla lǝthi Ḏaawḏ, kwuruusǝ Allah Kwiŋlǝthǝ kwǝthi lizi lǝthi Israa-iil, kaka ŋa ŋaarɔŋw-ŋi wa@ḏa. 24 Niti mǝ Yǝcu aari kinnǝ ibṯǝḏi ŋothɽor ŋuuŋun mac, nǝ Yuhanna ǝccǝ lizi bǝshirǝ lǝthi Israa-iil, ethi ɔrlacca ŋikiyaŋi ŋeeŋen ŋwɔdɔŋw mindaŋ ethaari @ammiḏa. 25 Nǝ mǝ Yuhanna aadithi ethi ṯimmasi ŋothɽor ŋuuŋun, nɔŋwɔccǝ lizi-ŋw, ‘A laari nyii-ŋgi kwir ṯaŋ? Nyiiti kwɔrɔ ŋgwa kwǝkkicǝ-ŋǝ kizǝn mac. Laakin niŋnacar-nyii-ṯi! Ŋgwa kwette kwɔrɔɔmɔ-nyii kwaathan-gi, ninyeere ɔvthanni mac ethi allatha yithuwǝnu kithaay ki-ŋwaara ŋwuuŋwun’.
26 “Liyǝŋgari lir ŋwɔɔla ŋwɔthi dɔɔnɔ kwǝthi Ibraahiim, nǝ kila tatap lir Umam lǝṯi kwogwɔcce Allah-lɔ; ŋiɽaŋali ŋǝthi ŋiglǝthǝ ŋɔ ŋǝni ŋuusucǝr-nyji nyuŋwsi! 27 Kaka niti nilŋithi-gwɔ lizi linaanɔ Urshaliim ŋundu-ŋǝ rɔ-asa-ri reeŋen mac, ethaarɔŋw kwundǝr-ṯǝ kwir Kwiglǝthǝ, wala ethisi elŋe ŋa ŋǝthi liɽii ŋǝṯirsi ɔrti dok-dok ki-laamin lǝthi Sǝbiṯ Laakin nǝr ǝthini ŋiɽaŋali ŋǝthi liɽii yǝy-nǝ mǝr-gwɔ kette Yǝcu-ŋw kaṯṯi. 28 Nǝ niti nǝthir ŋɔma ethi kaṯṯasi sǝbǝbǝ kweere mac, kwǝthi-gi ǝccǝ ŋunduŋw haakima ŋiɽany-ŋi, nǝr-tǝ andaci Biilaaṯɔs-ŋwɔ ṯir-ṯir ethi ɽeenye. 29 Nǝ mǝrsi ǝrri ŋa tatap ŋɔlɔɔthɔna ŋǝni ŋundu, nǝr dappisalɔ ki-ŋwuuɽi-lǝ ŋwɔɽɔmɔthalɔ nǝr ɔɽasi ki-thimaamɔ-na. 30 Laakin nǝ Allah diiɽǝ ŋunduŋw ki-ŋiɽany-na, 31 mindaŋ nɔŋwsi ruwǝthǝ naana ŋwaamin ŋwittǝzir, kila lǝṯir-li rɔɔmɔthi min Jǝliil etheele Urshaliim. Kilala lir shuhuuḏ kwuuŋwun kirem ki-lizi-nǝ lǝthi Israa-iil. 32 Ṯaŋw, nyiiŋǝ kɔlɔ-pa limǝ-ŋǝsi ǝvicǝ ŋiɽaŋali ŋisaaw, ŋa ŋǝccǝ-ŋi Allah papa-ŋwɔsi lǝri wa@ḏa, 33 nɔŋwsi rattaci nyuŋwsi kworo lir nyɔr nyeeŋen, kaka mɔŋgwɔ diiɽǝ Yǝcu-ŋwɔ ki-ŋiɽany-na; kaka lɔɔthɔnar-gwɔ ki-mǝzmuur-nǝ kwir nimrǝ kwuɽǝn ŋaarɔŋw,
‘A kwir Tɔr tiinyi, e-ta nyimoro aŋwɔnɔ ṯarnyalɔ’.
34 Nǝr-ṯǝ oro ŋɔ ŋandisasi Allah, ŋǝthi ṯidiiɽǝ ṯuuŋwun ki-ŋiɽany-na, mindaŋ etheere nyiŋɽi kwokwony mac. Ŋɔ ŋaarɔŋw kwokwony,
‘Nyii kwɔŋa inḏǝthǝ ŋirllinǝlɔ ter nǝ barka kwir rerrem,
ŋgwa kwǝccǝny-gi Ḏaawḏ-ŋwɔ wa@ḏa’.
35 Kaka nandisa-ŋgwɔ rerrem kǝzir wir ter naarɔ-ŋgwɔŋw,
‘A kwiti kwɔduŋgwǝci Khaḏaama kɔɔŋa Kirllinǝlɔ ter
etheere nyiŋɽi mac’.
36 “Kaka nakki-gwɔ Ḏaawḏ ŋothɽor ṯɔgwor-thi ṯǝthi Allah ki-lɔɔmɔr-la luuŋwun; mindaŋ nɔŋw ai kimaara, nǝr aanitha ki-ṯuɽumǝ ṯǝthi lugwurnǝ luuŋwun, ŋwɔṯaŋw nɔŋw nyiŋɽi. 37 Laakin ŋgwa kwɔmǝ Allah diiɽǝ ki-ŋiɽany-na, nɔŋweere nyiŋɽi mac. 38 Nǝ ŋaaŋɔ tatap liyǝŋgǝri laazim ǝsi elŋe ŋɔ, ethaarɔŋw, Yǝcu-ŋgi nǝrŋǝsi ǝccǝ bǝshirǝ ŋiɽaŋali ŋǝthi ṯifivrinnǝ ṯǝthi ŋikiya; 39 laazim ǝsi elŋe ŋɔ tok ethaarɔŋw, kweere nyithak kwǝmminci ŋunduŋw, ŋwɔ kǝdinni ki-ŋikiya-na tatap ŋa ŋiti ŋǝthicǝsi Sherii@a kwǝthi Muusǝ ŋɔma-na mac ethi-gwɔ kǝdithǝ ŋunduŋw-nǝ. 40 Ŋwɔṯaŋw aŋrathir mindaŋ mǝr-ŋǝsi ere ǝrrinici ŋa mac, ŋandisasi lifii ŋaarɔŋw,
41 ‘Iisar-siṯi ŋaaŋa kila lǝṯisi ǝrrǝlɔŋw!
Ŋaaŋa liliŋɽi tok, mindaŋ ai!
Kaka ŋa ŋǝrrǝ-nyji aŋwɔnɔ ŋiti ŋinḏi-ŋǝsi ethisi ǝmmini
mac,
mǝr-ŋǝsi-vǝ kinnǝni uppucinǝ tok!’ ”
42 Mǝ Bɔɔlɔs-ŋǝ Barnaaba-gi ɔrlacci majma@ ŋwɔdoŋw, nǝsi lizi uṯicǝlɔ ethaaɽa kwokwony ki Sǝbiṯ kwaaɽɔ, mindaŋ ethisi kiɽǝcci kwokwony ŋǝthi kwomne-ŋgwɔ kwandisar-ŋi. 43 Mǝ lizi faathi tǝ, nǝ luuru kwaathitha Bɔɔlɔs-ŋwɔsi Barnaaba-gi lir Yahuuḏ-ŋǝ Umam-yi wa wimthi ḏiinǝ ṯǝthi Yahuuḏ. Nǝsi yaavɔr andaci, mindaŋ nǝrsi firllasi-la ethi nannitha ki-ne@ma-na kwǝthi Allah.
44 Mǝ Sǝbiṯ aaɽa kwɔthaathɔ, nǝ lizi iila kaka lǝthi mǝḏiinǝ tatap ethi neŋne ŋiɽaŋali ŋǝthi Kweeleny. 45 Mǝ Yahuuḏ ese ŋunduŋwsi, nǝrsi kiici ŋiɽany, nǝr andisasa ŋiɽaŋali naana ŋa ŋandisasi Bɔɔlɔs, mindaŋ nǝr ollo. 46 Laakin nǝtǝ Bɔɔlɔs-ŋǝ Barnaaba-gi aami andasiŋw kǝniny rerrec ŋuugul-ŋi nǝraarɔŋw, “Ŋovthanna rac ethi andaci ŋaaŋwɔsi ŋiɽaŋali ŋǝthi Allah kerreny. Laakin kaka mǝsi-gwɔ dirnathalɔ, nǝ neere ruusi rogɽo lɔvthanna mac ki-ŋimiitha-na vǝṯi nannitha dok-dok, nyiiŋǝ lǝŋǝsi ɔrlacci ŋwɔdoŋw nyeele ki Umam-na. 47 Kaka nǝr-gwɔ waamir wɔ winḏǝthǝ-nyji Kweeleny wǝni-ŋwɔ,
‘Nyii kwǝlliŋǝ ethoro fɔɔri kwǝthi Umam, mindaŋ mǝ
ṯurmun tatap kilaaw’.”
48 Mǝ Umam neŋne ŋiɽaŋali ŋɔ, nǝr aamina, mindaŋ nǝr ɔrtatha ŋiɽaŋali ŋǝthi Allah; nǝ kila limǝ ǝllini ethǝthi ŋimiitha ŋǝṯi nannitha dok-dok nǝr ǝmminici. 49 Nǝ ŋiɽaŋal ŋǝthi Kweeleny faathitha ǝzir naana tatap. 50 Laakin nǝ Yahuuḏ ɔkkwazi lizi lir ŋwɔɽa ŋwɔthi mǝḏiinǝ, nǝ laaw lir Umam tok lǝṯi kwogwɔcce Allah-lɔ. Nǝraari ibṯǝḏi ethi ǝwɽi Bɔɔlɔs-ŋwɔsi Barnaaba-gi yǝy-lɔ, mindaŋ nǝrzi ruu kithaay kazir wǝthi muḏiiriiyyǝ kweeŋen. 51 Nǝsi yaavɔr picci kuulǝŋi ŋwaara naana ŋweeŋen, ethisi ɔɽacci lɔɔma, mindaŋ nǝr ṯamthɔ nǝreele Iyguuniiyǝ. 52 Nǝ ṯalaamiiz tinaanɔ Anṯaakiya, urǝnni-na ṯinyiŋla-thina nǝ Ṯigɽim-thinǝ Ṯirllinǝlɔ ter tok.