Lazo Epeso ri
1 “Nyegyi malaika känisa ro Epeso ya ri mikye:
“Ono ni lazo yi ni nda se kabe 'bi'bi njidrieri äti drígwo ndaro si ago se kabe aba ŋga lamba edrero se orivoya läguläguro njidrieri ana lakosi resi. 2 Mäni, tase miyebe te; mäni ndi miye losi te mbarasi ago nya'dote yaiŋgyi be, mäni ndi miletadri kote lidri kozi be, ago nyojo ànya se kayibe ata ekye iyi orivoya lazo'bai oko ko inye te, ago nyusu ànya te kowe'bai ro. 3 Mi orivoya yaiŋgyi be, nyezarute ta maro ta, ago nyozovo kote. 4 Oko ono ni tase mabe sina milomvo owo; yauono nyulu ma kote oso miyebe käti ronye. 5 Nyusutavo nye'debe mu'du eŋwanye! Nyetadri ni takozii miro yasi ago miye tase miyebe käti ayani. Ondro nyetadri kote ni takozi miro yasi, mikyina 'da mire ago manana ŋga lamba edrero amiro 'da ni vo anyaro yasi. 6 Oko ono ni tase miro nya'do be sina owo: ya miro osoro tase Nikolai'bai kabe oyena lomvo, ya maro kpa osoro lomvoigye.
7 “Ka'do inye, nya'dote bi be nyeri tase Tori kabe atana Känisai ri ekye:
“Ànya se kabe ŋgaopeṛe mayena taŋgye rigye onyana doŋgo ce adri ro ro se kabe omba Ämvu Lu roya 'da.
Lazo Semurena ri
8 “Nyegyi malaika Känisa ro Semurena ya ri mikye:
“Ono ni lazo yi ni nda se orivoya käti ago kpa äduro yi, se drate ago adrite kpa to'di ono resi. 9 Mäni rriti miro te, mäni ndi mi orivoya ati'ba yi oko endaro ami orivoya ŋga amba be! Mäni ta undiro se atate milomvo ànya se kayibe ata ekye iyi Yuda yi oko ko orivoya inye; ànya orivoya gboko se ka'dobe Satani ro owo! 10 Nyuturi ko ni ŋgase aza nya oyebe ruezane ni rigye ri. Nyeri! Kicu'ba o'bana mi 'da ojone rukä amiro ovo si kamba ya, ago rriti amiro u'duna a'dona 'da 'butealo. Nyà'do 'diri märi, ondro ka'do gica odra yi owo, ago mozona adri 'da ämiri ŋgapäṛi ŋgaopeṛe amiro ro.
11 “Ka'do inye, ondro nyà'dote bi be, nyeri tase Tori kabe atana känisai ri se ekye:
“Ànya se kabe ŋgaopeṛe, odra ṛiri ri oyene koziro i'do.
Lazo Peregamuma ri
12 “Nyegyi malaika känisa ro Peregamuma ya ri mikye:
“Ono ni lazo yi ni nda se bando sikyaka'da ritu be resi. 13 Mäni vose nyàbe ori kigye te, gya vose Satani ko'ba giti ndaro be kigye ya. Ami orivoya ŋgye märi, ago nyè'be taoma amiro ma ya kote, gica tuse Anitipasi, ruindu'ba 'diri maro se äfube gya vose Satani kabe ori kigye ya. 14 Oko ma orivoya ta fere be ami lomvo; azaka orivoya ami lako se ka oso ŋgaemba Balama ro vo, se kemba Balaka te lidri Yisaraele ro locine takozi ya ànya leye si ŋgaonya se ozote lui edeedero ri onyane ago ronyi loyene. 15 Kpa oso inye, ami lidri be ami lako se ka oso ŋgaemba Nikolai'bai ro vo. 16 Ka'do inye nyètadri ni takozii amiro yasi! Ondro mìye kote, mikyina 'da amire ndriro ago mayena kyila 'da lidri se kai yibe bando se kabe efo ni kala maro ya si.
17 “Ka'do inye, ondro nyà'dote bi be, nyeri tase Tori kabe atana känisai ri se ekye:
“Ànya se kabe ŋgaopeṛe mozona rukä mana da'doda'doro ro 'da ànyari ago mozona kuni onjero 'da ànya alo alo ri se egyi ävuru to'di te driigye se 'diaza ni ko e'be gialo nda se kabe anya uru 'do ayani.
Lazo Tautira ri
18 “Nyegyi malaika känisa Tautira ya ri mikye:
“Lazo ono orivoya ni Ŋgwa Lu ro, se mi na keleko oso asi ronye, se pa na kabe lägu oso logo se ätrite ronye resi. 19 Mäni tase nyabe oyena ndi, mäni ŋgalu miro, a'do'diri miro, ruindu miro ndi yaiŋgyi miro be ndi, mäni ndi anjioko yauono nyà ugu losi oye ndrani se miyebe käti drisi. 20 Oko ono ni tase mabe sina milomvo owo: miletadrite toko se Jezebela, se kabe andivo anyaro uzina lazo'ba Lu ro ono be. Ŋgaemba anyaro si anya loci ruindu'bai maro te ronyi loyene ago ugu ŋgaonya se ozote lui edeedero ri onyane. 21 Mozo tu te anya ri drietane ni takozi anyaro yasi oko anya gazo drietane ni ronyi anyaro yasi. 22 Ka'do inye mavona anya 'da kitapara se anya ndi ànya se koyeyitabe toko drisi anya be ro dri ànya ezaruna 'da koziro, mayena ta ono 'da yau e'be gialo ànya etanayi drî lutu ni ŋgakozi se ànya koyeyibe anya be yasi. 23 Mäfuna oso'bai anya vo kpa, ago 'dooko känisa cini uninayi 'da anjioko ma ni nda se kuni tavousu cini ya robe ndi tase abe olena be, mozona ŋga 'da 'di alo alo ri oso tase nda koyebe ronye.
24 “Oko rukä amiro Tautira ya so kote ŋgaemba undiro ono vo; mini tase azaka kuziyibe ‘ŋgaemba gyuru ndrwi Satani ro ono kote.’ Mata ämiri anjioko ma'bana ŋgaläŋgyi aza ko ämidri. 25 Oko beṛo ämiri ŋgase mirube ami yibe ono ätine anda, madale mesa lutu. 26 Nda se kabe ŋgaopeṛe, se kabe tase malebe oyena 'duro le ädu ya 'do, mozona drikaca se musube ni Täpi maro rigye ono kpa rigye: Mozona drikaca 'da ànyari tu'dei dri, 27 ànya miriza dofo logoro si ago ànya tufuza jinyijinyi oso lakaza ludri ro ronye. 28 Mozona 'bi'bi kyenoŋbo ro kpa 'da ànyari.
29 “Ka'do inye, ondro nyà'dote bi be, nyeri tase Tori kabe atana känisai ri ono!
© The Holy Bible in Moru © The Bible Society in the Sudan, 2000