Lewe'bai 8 - The Holy Bible in Moru (BAIBOLO ALOKADO) (MB)

Odi To Arona ndi Ŋgwàagoro Ndaro be ro

1 OPI atate Musa ri ekye: 2 “Miru Arona ndi tro ŋgwàagoro ndaro yibe, ndi boŋgo runduṛuro kohanii robe, ago ido 'diäṛu ro, 'daŋgo alodi olone ŋgapäṛi ro ta takozi rota, timelegogoi ritu, ndi koṛiga alodi ambata loŋgaako robe. 3 'Dooko mimbikala lowa cini ro käläsi Mutuguṛi a'do lototi OPI ro kala.”

4 Ago Musa yete oso se OPI kota nda be 'do ronye; ago lowa mbikalate käläsi mutuguṛi ro kala. 5 Nda atate ekye: “Ono ni tase OPI kozo ota na be oyene owo.”

6 Musa lofo Arona ndi ŋgwàagoro ndaro be te mileya, ago ja ànyate gyisi. 7 Ago nda so boŋgo kätäti rote Arona lomvo ago embe bindi te ibaembevo anyaro yasi, ago so boŋgo ruinduṛuro te anya lomvo. Nda so boŋgo ga juṛuŋwa rote anya lomvo ago embete kyini na kundu ro se a'dibe kadoro ana si ibaembevo na ya. 8 Nda so boŋgoŋwa kätätidri rote anya lomvo ago 'ba Urima ndi Tumima be te kigye. 9 Nda vu boŋgo uvuuvuro te Arona dri ago 'ba logo läguläguro te tagyia alokado mile boŋgo uvuuvuro ya, oso OPI kozo ota na be ndäri ronye.

10 'Dooko Musa ru ido 'diäṛu rote, ago logyite Mutuguṛi OPI ro dri ndi ŋgase cini kigye be, ago di ànya te to OPI ri. 11 Musa logyi azana te vo tori oloro dri perena njidrieri, logyite vo tori oloro dri ndi lakazà na cini ndi saani na cini ndi jope na be drisi, ànya odizana to OPI ri. 12 Ago nda da ido 'diäṛu ro aza te Arona dri ago äṛu nda te nda odiza to. 13 'Do vosi Musa ezi ŋgwàagoro Arona rote mileya, ago so boŋgo kätäti rote ànya lomvosi, ago embe bindi te ibaembevo ànyaro yasi, ago embe tagyia pärägäŋwà rote ànya drisi, oso OPI kozo ota na be ndäri ronye.

14 'Dooko Musa ezi 'daŋgo ŋgapäṛi ta takozi rota te; ago Arona ndi ŋgwàagoro ndaro be 'bayi drìi ànyaro te drî na ya. 15 'Dooko Musa fute ago ru kari na aza te, ago 'bete driŋgwa ndaro si koyi cukudri vo tori oloro ya kai lomvosi, wäṛizana. 'Dooko nda da anjoko kari rote vo tori oloro zele. Nda dite to ago wäṛite. 16 Musa ewe vose cini ombiombiro lakazà yasi lomvosi, telesi togo ro se kadopara 'do, koṛomoci ritu ndi vo ombiombi na be te, ago za ànyate vo tori oloro dri. 17 Nda ru anjoko iza 'daŋgo ro, kyini na, iza ro'bo na, ndi ici na be te, ago zate asi si tesi gawa kundusi, oso OPI kozo ota na be ndäri ronye.

18 'Dooko Musa ezi timelegogo te ŋgapäṛi ozaro ro; ago Arona ndi ŋgwàagoro ndaro be 'bayi drìi ànyaro te drî na ya. 19 Ndi Musa fute ago luvu kari na te gbikyi vo tori oloro lomvosi. 20 Ondro otolo timelegogo te jinyijinyi oko Musa za drî nate ndi izana otolobe jinyijinyi 'do be ndi voombiombi nabe. 21 Ago ondro aja lakazà yasi ndi ŋbiṛi nai be te oko, Musa za timelegogo te cu vo tori oloro dri, ŋgapäṛi ozaro tägyi kadoro ro ŋgapäṛi ŋgaonyaro ro OPI ri, oso Opi kozo ota na be ndäri ronye.

22 'Dooko Musa ezi timelegogo ṛiri te, timelegogo 'di o'baro kohanii ro; ago Arona ndi ŋgwàagoro ndaro be 'bayi drìi ànyaro te drî na ya. 23 Ndi Musa fute, ago ru kari na aza te ago 'bete bizevo drigwo yasi Arona roya, driago Arona ro drigwo yasi ya, ago paago drigwo yasi ndaro ya. 24 Ago olofo ŋgwàagoro Arona rote mileya ago Musa 'be kari na aza te bizevo cini ànyaro drigwo ro yasi, driàgo ànyaro drigwo ro yasi, ago paàgo ànyaro drigwo ro yasi. 'Dooko Musa luvu anjoko kari rote vo tori oloro ro lomvosi gbikyi. 25 Nda ru vo ombiombiro, vo ombiombiro tavi ro, vo ombiombiro cini lakazà yasi ro, telesi togo ro se kadopara 'do, koṛomoci ritu ndi vo ombiombi na be, ndi ŋbiṛi drigwo yasi be te. 26 'Dooko nda ru ambata loŋgaako alodi se adibe OPI ri 'do te ni koṛiga yasi, ambata ido si alodi, ago kulugbu alodi, 'ba ànya te vo ombiombiro ndi ŋbiṛi drigwo yasi be dri. 27 Nda ozo ŋgaonya se cini kwoi te drì Arona ndi ŋgwàagoro ndaro be roya, ago ànya ozoyite ŋgapäṛi lämu'du ro OPI ri. 28 'Dooko Musa ru ŋgaonya se kwoi te ni ànya rigyesi, ago zate vo tori oloro dri ŋgapäṛi ozaro be ŋgapäṛi 'dio'baro ro. Ono orivoya ŋgapäṛi ŋgaonya tägyi kadoro yi Opi ri. 29 'Dooko Musa ru kätäti na te ago ozote ŋgapäṛi lämu'du ro OPI ri. Telesi iza timelegogo 'dio'baro 'do ni ŋgase a'done Musa ri owo. Oso se OPI kozo ota na be ndäri ronye.

30 'Dooko Musa ru ido 'diäṛu rote ndi kari se vo tori oloro dri 'do azana be ago logyite Arona ndi boŋgo anyaro be drisi, ago kpa ŋgwàagoro Arona ndi boŋgo ànyaro be drisi. Nda di ànya te to ndi boŋgoi ànyaro be OPI ri.

31 Musa atate Arona ndi ŋgwàagoro ndaro be ri ekye: “Nyàla'di iza na 'do käläsi Mutuguṛi a'do lototi OPI ro kala, ago mìnya lau ndi ambata se orivoya koṛiga ŋgapäṛi 'dio'baro ro ya ana be, oso se OPI kozo ota na be ronye. 32 Anjoko iza ro kode ambata ro se kabe e'be 'do miza asi si. 33 Ago beṛo ko ämiri ofone tesi käläsi Mutuguṛi ro yasi u'duna njidrieri, madale u'du ami o'ba ro okyena lutu. Tana uruna u'du njidrieri ami o'baza. 34 OPI ozo ota ni tase màyebe ondro ono oyene inye, takozi amiro onaza. 35 Beṛo ämiri orine käläsi Mutuguṛi ro kala kitu si ago ŋgäkyi si u'duna njidrieri, ota se OPI kozobe ono oyene. Ondro ka'do mìye kote mìdrana ndi. 'Do ni ota se OPI kozobe märi owo.” 36 Ta'dota Arona ndi ŋgwàagoro ndaro be yeyi tase cini OPI kozo ota na be ànyari Musa si oyene kai te.