'Bädri'ba ka Moredekai oro
1 Ŋgäkyi gi ana si 'bädri'ba ni kote u'dune, ago nda ozo tate buku tase cini egyibe ta losi 'bädri'ba rota ro ezine, ago ezite 'bädri'ba kandra. 2 Ago usu ta tase Moredekai kitibe ta Bigetana ndi Teresa be rota, se ni rotii 'bädri'ba ro se ni gaga'bai zoi 'bädri'ba ro ro, se käyiyi ta be 'Bädri'ba Asuerosa ufune ana ro egyite kigye. 3 Ago 'bädri'ba ejitate ekye: “Taoro kode 'desi se ozobe Moredekai ri ta gi ono ta e'diya?”
Ruindu'bai 'bädri'ba ro zayitadrite ekye: “Aye ŋga aza kote ndäri.”
4 Ago 'bädri'ba ejitate ekye: “Dri'bai losi ro maro aza gibe goko ya noŋwa ya?” Tana 'dooko Amana eci dri ndri goko ya; nda ikyite 'bädri'ba ejine Moredekai oyine ice kacaro se anya kedebe nda oyiza ana dri. 5 Ndi ruindu'bai 'bädri'ba ro zayitadrite ekye: “Amana orivoya lau edrevoya goko ya.”
Ago 'bädri'ba atate ekye: “Mi'ba nda keci.”
6 Ta'dota Amana ecite, ago 'bädri'ba atate ndäri ekye: “Ayena e'di mano se aza ma 'bädri'ba malebe ya cini si orine ono riya?”
Amana usu tate ekye: “'Bädri'ba orona a'di ayani ya cini si ndrani mädrisi ya?” 7 'Dooko Amana zatadri 'bädri'ba rote ekye: “Ta mano se mi 'bädri'ba milebe ya cini si orine rota, 8 mi'ba ezi boŋgo ruindururo se mi 'bädri'ba misote 'do ndi farasi se nyabate sina 'do be ago aso tagyia mi 'bädri'ba ro drigye. 9 Mi'ba ozo boŋgo ruindururo ndi farasi be alo aza dri'bai foparandra miro rigye nda koso robe mano se mi 'bädri'ba milebe orine ya cini si 'do lomvo, kulutu nda farasi dri ugu lämune goro 'bakici ro yasi. Mi'ba dri'ba se foparandra ana ri ugu taayone ekye: ‘Mindre 'bädri'ba ka mano se nda kolebe orone ono orona!’ ”
10 'Dooko 'bädri'ba atate Amana ri ekye: “Nyezi boŋgo runduṛuro ndi farasi be ndrindri oso se nyata be ronye, ago miye oso inye Moredekai se Yuda ro se kabe ori dereŋwa 'bädri'ba ro kala 'do ri. Nye'be ŋgaaza alodina se nyata tana be 'do ko oyeakona.”
11 'Dooko Amana ru boŋgo runduṛuro te ndi farasi be, ago so te Moredekai lomvo, ago 'ba Moredekai te ugu lämune goro 'bakici ro yasi, oko Amana ugu tana ayote lidri ri ekye: “Mindre 'bädri'ba ka mano se nda kolebe orone ono orona!”
12 'Dooko Moredekai gote dereŋwa 'bädri'ba ro kala. Oko Amana mute ndrindri 'bäru tusu ro ago drî ovoovoro boŋgo si. 13 Ago Amana iti tase cini ka'dobe ndäri ana tana te toko ndaro Zeresa ndi bereazii cini ndaro yibe ri. 'Dooko lidri tavouni'bai ndaro ndi toko ndaro be atayite ndäri ekye: “Ondro ka'do Moredekai se keto mi opebe ṛe ono ka'dote Yuda yi, minina kote ndana opene. Endaro nda opena mi ndi ṛe.”
Äfu Amana te
14 Oko ondro ànya kayi dri ugu ata oko, rotii 'bädri'ba ro esayite ndriŋwa Amana ugune ŋgaonya se Esetera kala'dibe ana onyane.
© The Holy Bible in Moru © The Bible Society in the Sudan, 2000