Malaki 3 - The Holy Bible in Moru (BAIBOLO ALOKADO) (MB)

1 OPI Mbaraekye ka tadrioza ekye: “Mazona lazo'ba maro 'da mileya liti edene märi. 'Dooko Opi se nyàbe voondre tana ro 'do ikyina dori Yekalu ndaro ya. Lazo'ba tao'baro se nyàbe uṛina 'do ikyina 'da.”

2 Oko a'di unina ni yaiŋgyine tuse nda kabe ikyi sina ana siya? Ondro nda kefote oko a'di unina ni a'done lidriidriro ya? Nda a'dona 'da oso sä'buni ronye, ago oso asi se kabe logo wäṛi ronye. 3 Lazo'ba OPI ro ikyina opena vure 'da oso 'dise kabe mo'di utri wäṛiro ronye. Nda wäṛina kohanii 'da oso toka'ba kabe mo'di ndi logo läguläguro be wäṛina ronye, tana ànya keziyi ŋgapäṛi se kadoro robe ayani OPI ri. 4 'Dooko ŋgapäṛi se cini lidri Yuda ro ndi Yerusalema robe kayibe ezina OPI ri 'do tana ka'do robe nda usiusiro, oso se ka'dobe tu kyeno kai si ana ronye.

5 OPI Mbaraekye ekye: “Mefona 'da vure opene ami lako, ago dori medrena tazevo 'da tetedri'bai lomvo, taoye'bai ago kode toko drisi lomvo, ànya se kayibe ruäṛu kowesi lomvo, ànya se kayibe päläti losioye'bai ro ozona ŋgaoco si iyi lomvo, ago ànya se kayibe ni kandrakado ävuzii, kyemvoi ndi atrai robe uruna, ndi 'dise cini koro ma ko iyi be lomvo.

Ozo Ŋgapäṛi Telesi Alo 'Bute ro

6 “Ma OPI owo, ago mäläpiru ko ko. Ka'do inye ami, zelevoi Yakoba ro ono, mìkye driko kpeye. 7 Ami orivoya oso zutui amiro ronye, mìnaru teni otà maro yasi ago nyäti ànya kote. Nyègo mare, ago megona kpa ndi amire. Oko nyà taeji mìkye: ‘Mègona mire eŋwanyeya?’ 8 Meji ami, inye'do 'diaza ocona Lu gi'da ya? Caoko nyà ma oco. Nyà ma eji mìkye: ‘Mà mi oco eŋwanyeya?’ Nyà ma oco ŋgapäṛi telesi alo 'bute ro ndi ŋgapäṛi azaka be ozovoya. 9 Latri orivoya vo ami cini ro dri tana tu'de ono vona kpeye ka ma oco. 10 Nyèzi ŋgapäṛi amiro telesi alo 'bute ro kpeye voŋgaodroro Yekalu ya ya, tana ŋgaonya ka'do robe amba Yekalu ya. Nyòjo ta maro 'dooko mìndre kode mäpina vouŋbo cini vo'buyakuru ro ko ago medana beti ŋga kado cini ro ko amba ämiri ya? 11 Ma'bana cici cini ko ŋgaluru amiro enjine, ago ice konoro amiro unina ko orine doŋgo owaako amba. 12 'Dooko lidri tu'dei cini ro uzinayi ami 'da kado, tana wari amiro a'dona 'da vo kado ro.”

Tao'baro Lu ro ta Yauni rota

13 OPI ekye: “Nyàta ta koziro amba te malomvo. Oko nyà taeji mìkye: ‘Màta ta e'di ro koziro milomvo ya?’ 14 Nyàtate mìkye: ‘Ruindu Lu ri orivoya taawi yi. Takado se mùsuna ota ndaro orosi kode taoro ka'dasi tusu si OPI Mbaraekye ri ni e'diya? 15 Oso màndrebe ronye, lidri se driuŋgyi be a'do gwo ni yai'dwesi. Ko gialo ekye lidri taundi oye'bai kayi a'do ŋgaamba be, oko ànya kojoyi ta Lu ro ca ànya payivote.’ ”

16 'Dooko lidri se kuturiyi OPI be kai atayi ta OPI rote azi ri. OPI eri ago zatadri tase ànya katayibe ana rote. Egyi ta ànya se kuturiyi OPI be ago koroyi nda be ana rote buku se taoyiro nda kandra ana ya. 17 OPI Mbaraekye ekye: “Ànya a'donayi 'da lidri lämu'duro maro tuse mate taoye maro oyena si. Ma'dona ndi yaunibe ànyari, oso täpi kabe a'do yauni be ŋgwa se kabe ruindu ndäri 'do ri ronye. 18 Lidri maro ogo ondrenayi a'do toto lakole taŋgye'bai ndi takozi'bai be roya, ago 'dise kabe ruindu märi ndi 'dise kinduru ko märi be iyi roya 'da kpa to'dina.”